Cov Mus Saib Xyuas Tom Tsev tsab Xov, Cuaj Hlis Ntuj 2014
Yexus Khetos lub Luag Hauj Lwm Los Saum Ntuj Los: Tus uas Nplij Neeg lub Siab
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau xov xwm ntxiv, cia li txuas rau reliefsociety.lds.org.
Yexus Khetos cog lus tias, “Kuv yuav tsis tso nej ua ntsuag ib zaug li; kuv yuav rov qab los cuag nej” (Yauhas 14:18). Nws yuav “muab kev zoo siab thiab kev kaj siab pauj kev lwj siab, muab zaj nkauj uas hu qhuas tus Tswv pauj kev txom nyem nyuaj siab”(Yaxayas 61:3). Vim Yexus Khetos theej peb txhua tus lub txhoj, Nws yeej yuav nco ntsoov peb. Linda S. Reeves, tus pab cuam thib ob hauv lub Koom Haum Niam Tsev tuam pawg thawj tswj hwm hais tias, “Peb tus Cawm Seej tau raug … peb tej kev mob thiab peb tej kev txom nyem thiab kev nyuaj siab kom Nws thiaj paub tias peb xav li cas thiab paub nplij peb lub siab.”
Qhov uas peb paub tias Yexus Khetos yuav nplij peb lub siab ua rau peb nyob kaj siab lug thiab tshoov peb lub siab kom peb ua raws li Nws tus yam ntxwv pab lwm tus. Thawj Tswj Hwm Thomas S. Monson hais tias: “Qhov uas peb paub txog txoj moo zoo thiab peb Leej Txiv Saum Ntuj Ceeb Tsheej thiab tus Cawm Seej txoj kev hlub yuav nplij peb lub siab thiab txhawb nqa peb thiab ua rau peb zoo siab thaum peb taug kev ncaj ncees thiab ua raws li cov lus txib. Tsis muaj dab tsi nyob hauv lub ntiaj teb uas kov yeej taus peb.”
Los ntawm cov Vaj Lug Kub
Yauhas 14:18, 23; Amas 7:11–13; Lus Qhuab Qhia thiab Kev Khi Lus 101:14–16
Los ntawm Peb zaj Keeb Kwm
Elaine L. Jack, Koom Haum Niam Tsev tus tuam thawj tswj hwm thib 12, hais tias, “Thaum peb mus saib xyuas lwm tus peb ib leeg pab ib leeg. Feem ntau peb tej tes txawj pab zoo dua li peb lub suab. Kev khawm lwm tus yeej hais ntau. Qhov uas peb luag ua ke ua rau peb koom siab. Ib lub sij hawm thaum peb sib tham ua rau peb rov qab zoo siab. Tsis yog peb yuav txawj ris lub nra ntawm ib tug uas ntxhov siab txhua lub sij hawm, tiam sis peb txawj txhawb nqa nws kom nws txawj ris nws lub nra nws tus kheej.”
Peb cov viv ncaus hauv Koom Haum Niam Tsev uas yog neeg pioneer “nrhiav kev muaj zog ntawm sab ntsuj plig los ntawm txhua tus txoj kev sib hlub thiab kev khuv leej. … Thaum lawv raug txom nyem los ntawm kev mob thiab kev tuag, lawv ib leeg muaj kev ntseeg thov Vajtswv pab ib leeg thiab ib leeg nplij ib leeg lub siab. Helen Mar Whitney sau ntawv hais tias, ‘Vajtswv txoj kev hlub nyob hauv txhua tus lub siab, ua rau tus phem thiaj tsis muaj hwj chim tav peb txoj kev mus cuag tus Tswv, thiab tus phem tej xub, tej lub sij hawm, tsis ua rau peb mob hlo li.’”
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/14. Pub txhais ua lus Hmoob: 6/14. Kev txhais lus Visiting Teaching Message, September 2014. Hmong. 10869 295
Xav Txog Qhov No
Qhov uas koj to taub tias tus Tswv nco txog koj nplij koj lub siab li cas?