Ti A Tauraoi?

N te aono are I maeka ao ni beku iai ngkoa, te Ekaretia e katea aia tabo mooa ibukin kawakinakia, ao taan mwakuri iai te koraki ake anganano man taian uoote nako. Bon te karikirake ae rangi n nakoraoi, ike e kona n kakatauraoi tengaa bunimoa aika a boou ao tebubua te kiro taian moa aika tauraoi nakon te kukanaki nakon ana titoa ni kaikobwai te bitiobi. Ibukin tabeua baika a na riki, e ngae n anne, taani maniman aika anganano n aia itera n tai, a bon rotaki baiia ibukin karaokina ao a rootaki naba aia iango ao aia namakin.

N aron te katoto, I teimatoa n uringa te tai are ti ikotiia iai kairake n ataeinimwaane n te Nakoanibonga ae te Aaron bwa a na karaua ni kaitiaka raoi aia tabo mooa. Ungan nanora ngaira kaain ara kurubu ti ikotaki n te tabo ni karikirake anne ao ni kabaikoaira n routii, ikotii, ao ni kabuekii uteute ao maange aika matenten. Man ootan kiakian te kaura aai, ti kang tiaotiti ike ti a katekeraoira ibukin nakoraoin ara mwakuri.

Ma e ngae n anne, iai teuana te kanganga ae nakobuaka. Te kaberoro ao te ai a rang n aki karauiia 5,000 mooa aine aike a nang tauraoi ni kabung are angiina a rootaki buraeia ao a toki kani bungiia. Imwiina teutana ti a katoka ara kouteute bwa e a aonga ni manga karekei riki bunnimoa aika bati.

Membwa ni kabane n te Ekaretia are a tia ni buoka ni katauraoa kainnanoia naake a rootaki n te kainnano a aki mwaninga ke n uringaaba n te bwai are riki aei. Te karaobwai, te tatabwi, te toronibwai, ao n ibuokanibwai ma tabeman, tiaki katei aika boou nakoira.

Ti riai n uringnga bwa te kabanea n tamaroa n tititem ibukin te auti ni kaikobwai e riai ibukia kaain te utu ni kabane n te Ekaretia bwa a na karekei tataran kanaia, kunnikaia, ao, n te tabo ae riai, bwaai aika a rang ni kainnanoaki inanon te maiu. Ana auti ni kaikobwai te Uea n ikotaki ma aia tai, taarena, konabwai, nanoanga, bwaai aika katauaki n anganako, ao aia kataumwane membwa n te Ekaretia aika kakaonimaki. Bwaai n ibuobuoki aikai a tauraoi nakon te bitiobi bwa a na buokaki iai ake a rootaki n te kainnano.

Ti kaumakiia Aomata aika Itiaki bwa a na wanawana inanon aia babaire, a na aki rawa ni karaoa te bitaki n aron mauia, ao ni katoka korakoran te tarau. Angiina aomata a na kona ni kaitarai kanganga n te kataumwane ngkana iai rakan kanaia ma kunnikaia a kainaomataki man te tarau. N te bong aei ti kunea bwa angiina a ira te reirei aei ao ni kaibibitia: iai rakan aia tarau ao akea rakan kanaia.

I kaokioka te bwai are a taekinna kaain te Moan Beretitentii are a katanoata tabeua te ririki n nako:

“A kaman tia n reireinaki inanon ririki aika mwaiti Aomata aika Itiaki bwa a na katauraoi ibukin taai ni kaitara man karekean aia kataumwane ae bon tau. Ni kawakinan te mwane e a kamwaita riki te kamanoaki ao te mweeraoi. Membwa n tatabemania iai mwiokoaia ni katauraoi ibukin oin kainnanoia n te mwaiti ae bon riai.

“Ti kaungako n te tabo are ko maeka iai n te aonaaba bwa kona katauraoi ibukin taai ni kaitara man taraakin am kataumwane. Ti kaumakiko bwa ko na nanorinano n am kabanemwane, reireiniko n am kaboobwai n totokoa te tarau. Waekoa kabwara am tarau n aron ae ko kona, ao kainaomatako man te tautoronaki aei. Kawakina am mwane ae bon tau ni katoa tai nakon am kataumwane ibukin taai aika a na roko.”

Ti tauraoi ibukin bwaai aika karina inanon maiura? A nakoraoi ara konabwai? Ti bwaina te maiu n tatabwi? Iai rakan ara bwai aika ti kawakin inanon baira? Ti ongeaba nakon ana tua te Atua? Ti kaekai aia reirei burabeti? Ti tauraoi n anga mai buakon ara bwai nakoia ake a kainnano, ao ake a bon rootaki riki n te kainnano? Ti koaua nakon te Uea?

Ti maiu inanon taai aika angibuaka. N angin taai aika a na roko akea ataakina, ma ngaia are, e riai ibukira bwa ti na tauraoi ibukin baika a na riki aika akea kakoauakia iroura. Ngkana e a kaoti te tai ni babaire, e a nako te tai ni katauraoi.