Kev Cog Lus tias tej lub Siab Yuav Tig

Kuv niam, Mildred Bennion Eyring, tau loj hlob nyob hauv lub zos Granger, Utah, Teb Chaws Amelikas. Nws ib tug nus, Roy, tau ua hauj lwm li nws tsev neeg thiab tu cov yaj. Thaum nws yog ib tug tub hluas nws siv ntau lub lim tiam nyob deb ntawm tsev. Sij hawm zuj zus mus es nws tsis tshua xav koom lub Koom Txoos. Ces nws tsiv tsev mus rau lub xeev Idaho, Teb Chaws Amelikas, yuav poj niam, thiab muaj peb tug me nyuam. Nws tuag thaum nws muaj 34 xyoos thaum nws tus poj niam muaj 28 xyoo thiab nkawd cov me nyuam tseem me me.

Txawm Roy tsev neeg nyob hauv Idaho thiab kuv niam twb nyaib tsev mus deb li 2,500 mais (4,025 km) rau lub xeev New Jersey, Teb Chaws Amelikas, nws pheej sau ntawv rau lawv qhia tias nws hlub thiab txhawb nqa lawv. Kuv dab laug tsev neeg hu kuv niam ua “Aunt Mid.”

Ntau xyoo dhau los mus, ces muaj ib hnub kuv ib tug kwv tij tau hu tuaj rau kuv. Nws qhia kuv tias Roy tus poj ntsuam tau tso lub ntiaj teb no tseg. Kuv tus kwv tij hais tias, “Aunt Mid yuav xav kom koj paub.” Aunt Mid twb tau tso lub ntiaj teb no tseg, tiam sis tsev neeg no tseem paub txog nws txoj kev hlub thiab hu tuaj rau kuv.

Ua rau kuv xav txog qhov uas kuv niam tau pab nws tsev neeg zoo ib yam li cov Neeg Nifais cov yaj saub tau pab lawv tsev neeg thaum lawv muab siab npaub lawv cov kwv tij uas lawv xav coj los ntseeg Yexus Khetos txoj moo zoo. Nifais sau ib co ntawv ceev xwm txheej uas nws vam tias yuav tshoov nws cov tij laug cov xeeb ntxwv tej siab kom lawv rov qab los ntseeg li Lihais, lawv tus yawg koob. Mauxiyas cov tub tau muaj kev hlub zoo ib yam li ntawd thaum lawv qhia txoj moo zoo rau Lihais cov xeeb ntxwv.

Tus Tswv tau npaj kev rau peb muaj kev hlub nyob hauv peb tsev neeg uas nyob tau mus ib txhis li. Cov tub hluas ntxhais hluas nyob hauv lub Koom Txoos niaj hnub no tab tom muab lawv tej siab tig mus rau lawv tsev neeg. Lawv nrhiav tej lub npe ntawm tsev neeg uas tsis tau muaj cib fim txais cov kab ke cawm seej ntawm lub neej no. Lawv nqa cov npe ntawd mus rau lub tuam tsev. Thaum twg lawv ua kev cai raus dej, lawv muaj cib fim txais kev hlub ntawm tus Tswv thiab ntawm cov poj koob yawm txwv uas lawv sawv cev ua kab ke rau lawv.

Kuv tseem nco txog txoj kev hlub ntawm kuv tus kwv tij lub suab uas hu tuaj thiab hais tias, “Peb niam twb tso lub ntiaj teb no tseg, thiab Aunt Mid yuav xav kom koj paub.”

Nej cov uas ua kab ke rau cov poj koob yawm txwv muab siab npuab rau lawv, ib yam li Mauxiyas cov tub thiab tus yaj saub Nifais. Ib yam li lawv, nej yuav muaj kev xyiv fab rau cov uas txais qhov uas nej muab rau lawv. Nej yuav zoo siab ib yam li Amoos, tus uas hais txog nws txoj hauj lwm ua tub txib nyob hauv nws poj koob yawm txwv cov xeeb ntxwv:

“Yog li ntawd, peb cia li zoo siab, muaj tseeb tiag, peb yuav xyiv fab nyob hauv tus Tswv; muaj tseeb tiag, peb yuav zoo siab, vim peb txoj kev xyiv fab twb muaj puv npo lawm; muaj tseeb tiag, peb yuav qhuas peb tus Vajtswv mus ib txhis. Saib seb leej twg yuav muaj peev xwm zoo siab ntau dhau lawm nyob hauv tus Tswv? Muaj tseeb tiag, leej twg yuav muaj cuab kav hais ntau dhau lawm txog nws lub hwj chim loj, thiab txog nws txoj kev hlub tshua, thiab txog nws txoj kev ua siab ntev nyiaj rau noob neej? Saib seb, kuv hais rau nej tias, kuv twb tsis muaj peev xwm hais feem me tshaj plaws uas kuv xav tau” (Amas 26:16).

Kuv ua tim khawv tias txoj kev hlub uas nej muaj rau nej tsev neeg—txawm lawv nyob qhov twg los—yog qhov uas muaj raws li kev cog lus tias Eliyas yuav los. Nws twb los lawm. Cov me nyuam tej siab tab tom tig los rau lawv txiv, thiab cov txiv tej siab tab tom tig los rau lawv cov me nyuam (saib Malakis 4:5–6; Yauxej Xamiv—Keeb Kwm 1:38–39). Thaum nej xav nrhiav tej lub npe ntawm nej cov poj koob yawm txwv thiab nqa tej lub npe ntawd rau lub tuam tsev, ces tab tom muaj raws li qhov uas tau qhia yuav muaj los yav tom ntej.

Yog ib qho koob hmoov ua neej nyob hauv ib lub caij nyoog thaum muaj raws li kev cog lus tias tej siab yuav tig los. Mildred Bennion Eyring tau muaj tej kev xav li ntawd nyob hauv nws lub siab. Nws hlub nws tus nus tsev neeg, thiab nws ncav tes pab lawv. Lawv tej siab tig mus rau nws nrog kev hlub rau Aunt Mid vim lawv paub tias nws hlub lawv.