Sɛkyɛ a Wɔato no Yie

Sɛkyɛ botaeɛ ne sɛ ɛbɛkora hyɛn no yie na aboa ma ɛgyina faako a ɛyɛ anaa ɛboa tenetene hyɛn no yie berɛ a ewiem nnyɛ. Nanso, sɛ saa botaeɛ yi bɛba mu a, ɛnnyɛ sɛkyɛ no nko ara na ɛbɛtumi ayɛ. Ɛwɔ sɛ sɛkyɛ no yɛ den a mfasoɔ wɔ so, na wɔde di dwuma wɔ berɛ ne bea a ɛsɛ mu.

Ankorɛankorɛ ne mmusua nso hia sɛkyɛ.

Amanehunu bɛtumi aba sɛ ahum kɛseɛ abɛbɔ yɛn afiri yɛn kwan so na ayɛ sɛ deɛ ɛde yɛn rekɔbɔ ɔbotan. Nanso ɛtɔ da a yɛwɔ asiane mu berɛ a biribiara kyerɛ sɛ yɛwɔ ahotɔ mu, na— mframa no bɔ brɛɛw a nsuo no nso ayɛ dinn. Ɛyɛ ampa sɛ, yɛbɛtumi akɔ asiane kɛseɛ mu berɛ a yɛreyera kwan na yɛrenante brɛɛw, a yɛn ani nna yɛn ho so papa.

Ɛwɔ sɛ sɛkyɛ yɛ den, nya ahoɔden, na wɔkora no yie sɛdeɛ ɛbɛyɛ krado da hia da mu. Bio, ɛsɛ sɛ wɔto wɔ fapem a ɛbɛtumi agyina atamfo tumi kɛseɛ ano.

Ɛyɛ ampa, Yesu Kristo asɛmpa no yɛ sɛkyɛ a ɛte saa. Ɔsoro ne asase Bɔfoɔ na ɔsiesiee maa botaeɛ kronkron bi na ɔyɛɛ no sɛdeɛ ɛbɛma Ne mma ahobanbɔ ne akwankyerɛ.

Wei nyina ara akyi no, sɛ yɛreka asɛmpa no a, ɛno ne Onyankopɔn nhyehyɛeɛ sɛ ɔbɛgye Ne mma na ɔde wɔn bɛsan aba Ne nkyɛn bio.

Ɛnam sɛ yɛnim sɛ biribiara bɛtumi asan n’akyi nti, ɛwɔ sɛ yɛto yɛn sɛkyɛ no yie wɔ asɛmpa nokorɛ no botan so. Ɛnsɛ sɛ yɛto no kɛkɛ wɔ anwea a ɛyɛ ahomasoɔ mu anaa deɛ ɛbɛtwe yɛn afiri yɛn nokorɛ ho.

Saa bosome yi yɛwɔ akwannya sɛ yɛtie Onyankopɔn nkoa nsɛm wɔ Asɔre no amansan nhyiamu mu. Wɔn nsɛm ne twerɛsɛm ne Honhom no nkannyan no, ma yɛn nkwa a ɛnni awieɛ nnepa ne nnyinasosɛm botan fapem a a ɛtim hɔ, a yɛbɛtumi ato yɛn sɛkyɛ wɔ so sɛdeɛ yɛbɛgyina pintinn anya ahobanbɔ wɔ abrabɔ mu apinisie ne amanehunu mu.

Tete nkɔmhyɛni Helaman kyerɛɛ sɛ, “Wɔ yɛn Gyefoɔ no botan so, a ɛyɛ Kristo, Onyankopɔn Ba no, na ɛwɔ sɛ woto wo fapem; na sɛ ɔbonsam bɔ ne mframa denden no a, aane, n’agyan nketewa a ɛwɔ kyinhyia mframa mu no, aane, sɛ n’asukɔkyea nyina ara ne n’ahum kɛseɛ no hwe mo a, ɛrennya tumi biara wɔ mo so sɛ ɛbɛtwe mo ase de mo akɔ mmɔborɔyɛ ekuu ne mmusuo a ɛnni awieɛ mu, ɛnam ɔbotan no a moasi mo dan wɔ so no nti; deɛ ɛyɛ fapem a akyinnyeɛ biara nni ho no, fapem bi a sɛ nnipa si wɔn dan wɔ so a wɔrennwiri ngu da no” (Helaman 5:12).

Ɔbra wɔ kwan a ɛfa so sɔ yɛn sɛkyɛ no hwɛ na ɛma yɛpɛ sɛ yɛsan yɛn akyi. Nanso, sɛ yɛto yɛn sɛkyɛ no yie wɔ yɛn Gyefoɔ no botan so a, ɛbɛgyina—ɛmmfa ho ne mframa no ano den, ɛpo no ahoɔden, anaa asorɔkyeɛ no tenten.

Ɛwɔ mu sɛ wɔanyɛ po-so hyɛn sɛ ɛnnyina faako na mmom sɛ ɛbɛyi sɛkyɛ na atene afa abrabɔ po so. Nanso yei yɛ abɛbuo a yɛbɛka no da foforɔ.

Seesei deɛ, ɛyɛ me dɛ sɛ menim sɛ asɛmpa no sɛkyɛ no ne Ɔgyefoɔ no botan no bɛma yɛagyina pintinn anya ahobanbɔ.

Saa sɛkyɛ no mma yɛmmmane nnkɔ asiane anaa amaneɛ mu. Ɛbɛma yɛn animuonyam akwannya a yɛde bɛsɛpɛ yɛn ho wɔ abrabɔ mu nsɛm fɛɛfɛ ne nwanwasoɔ a ɛgu so resesa no.

Abrabɔ yɛ fɛ na ɛso wɔ mfasoɔ. Mframa, Ahum, ne apinisie a ɛwɔ hɔ no bɛtumi ama yɛamane akɔ asiane a yɛhunu anaa yɛnnhunu mu, nanso asɛmpa no nkransɛm ne ne tumi kronkron no bɛma yɛagyina yɛn kwan no so na ɛde yɛn akɔ yɛn Soro Agya no asomdwoeɛ bea.

Ɛno nti, mommma yɛn nntie amansan nhyiamu no kasa no ara kwa na momma yɛmfa wɔn nsɛm no nyɛ adwuma te sɛ sɛkyɛ a wɔato no yie ama yɛn daadaa abrabɔ.

Onyankopɔn nhyira yɛn na ɔmma yɛn akwankyerɛ wɔ saa anamɔntuo a ɛsom boɔ na ɛhia yi mu!