Thawj Pawg Thawj Tswj Hwm tsab Xov, Ob Hlis Ntuj 2014
Ua Hauj Lwm Pab tus Tswv nrog Kev Hlub
Tus Tswv Yexus Khetos qhia hais tias, “Rau qhov tus uas khuv xim nws txoj sia, tus ntawd yuav tsis tau txoj sia, tiam sis tus uas tsis khuv xim nws txoj sia vim nws ntseeg kuv, tus ntawd yuav tau txoj sia” (Lukas 9:24).
Thawj Tswj Hwm Thomas S. Monson hais tias, “Kuv ntseeg tias tus Cawm Seej qhia peb tias yog peb tsis ua hauj lwm pab lwm tus kawg siab kawg ntsws, ces peb lub neej tsis muaj nqi heev. Cov uas ua neej nyob pab lawv tus kheej nkaus xwb yuav poob qab, thiab hais paj lug tias lawv xiam lawv txoj sia, tiam sis cov uas hauj lwm pab lwm tus ces yuav loj hlob thiab huaj vam—ces yuav cawm lawv txoj sia.”
Los ntawm tej yam uas Thawj Tswj Hwm Monson hais, nws ua rau Haiv Neeg Ntseeg hauv Hnub Nyoog Kawg nco qab tias lawv nyob hauv tus Tswv txhais tes thiab cov koob hmoov mus ib txhis tos ntsoov cov uas rau siab ua hauj lwm pab lwm tus.
Kev Pab hauv lub Tuam Tsev
“Peb ua hauj lwm tseem ceeb thaum peb sawv cev ua tej kab ke pab cov uas twb tso lub ntiaj teb no tseg lawm. Ntau lub sij hawm peb tsis paub cov uas peb sawv cev los pab. Peb tsis xav kom lawv ua peb tsaug, thiab peb tsis paub tseeb tias lawv yuav lees txais tej yam uas peb muab rau lawv. Tiam sis, peb ua hauj lwm pab lawv, thiab los ntawm tus txheej txheem no peb thiaj li txais tau qhov uas tsis los ntawm lwm txoj kev: peb rais los ua cov neeg cawm seej saum lub Roob Xi-oos. Ib yam li peb tus Cawm Seej muab Nws txoj sia ua kev txi rau peb, peb ua zoo ib yam li ntawd, thaum peb sawv cev ua kab ke hauv lub tuam tsev pab cov neeg uas mus tsis tau tom ntej tsuas yog peb cov uas nyob hauv lub ntiaj teb los pab lawv.”
Peb Yog tus Tswv Txhais Tes
“Kuv cov kwv tij thiab cov muam, yeej muaj cov neeg uas xav tau peb txoj kev pab nyob ntawm peb ib ncig uas xav tau peb txoj kev pab, peb txoj kev txhawb nqa, peb txoj kev nplij siab thiab peb txoj kev ua siab zoo—txawm yog lawv yog peb tsev neeg, cov phooj ywg, cov neeg uas peb paub los sis cov neeg qhua los xij. Peb yog tus Tswv txhais tes hauv ntiaj teb no, uas twb raug txib kom mus pab thiab txhawb nqa Nws cov me nyuam. Nws yeej vam peb sawv daws heev. …
“Txoj hauj lwm uas peb sawv daws raug hu los ua twb yog ua hauj lwm pab tus Tswv Yexus Khetos.”
Kev Pab Raws Li tus Cawm Seej
“Nyob hauv Sab Ntiaj Teb Tshiab no, tus Tswv uas tau sawv rov los lawm tshaj hais tias, ‘Nej yeej paub tej yam uas nej yuav tsum ua nyob hauv kuv lub koom txoos; rau tej hauj lwm uas nej tau pom kuv ua tej ntawd nej kuj yuav tsum ua thiab; rau tej uas nej tau pom kuv ua tej ntawd ntag nej yuav tsum ua.’ [3 Nifais 27:21].
Peb foom koob hmoov rau lwm tus thaum peb pab lawv ib yam li “Yexus ntawm Naxales … uas tau mus thoob plaws ua zoo.’ [Tes Hauj Lwm 10:38]. Thov kom Vajtswv foom koob hmoov pab peb nrhiav kev xyiv fab thaum peb ua hauj lwm pab peb Leej Txiv Saum Ntuj Ceeb Tsheej thaum peb pab Nws cov me nyuam hauv lub ntiaj teb.”
Yuav Tsum Pab Lwm Tus
“Peb xav kom muaj cib fim pab lwm tus. Rau cov mej zeej uas tsis tshua muaj siab ntseeg los yog cov uas tsis tshua rau siab thiab tsis xav cog lus, peb thov Vajtswv pab peb nrhiav ib txoj kev pab lawv. Kev thov lawv pab ua ib yam dab tsi tej zaum yog qhov uas yuav ua rau lawv xav rov qab muaj siab rau ntseeg. Tiam sis cov thawj coj uas pab tau ua li no mas tej lub sij hawm lawv tsis xav ua. Peb yuav tsum nco ntsoov tias tib neeg muaj peev xwm hloov siab. Lawv muab lawv tej cwj pwm tsis zoo tso tseg los tau. Lawv hloov siab lees txim rau lawv tej kev txhaum los tau. Lawv tsim nyog tuav lub pov thawj hwj los tau thiab. Thiab lawv rau siab pab ua tus Tswv txoj hauj lwm los tau thiab.”
Peb Puas Ua Txhua Yam Peb Yuav Tsum Ua?
“Lub ntiaj teb xav tau nej txoj kev pab. Peb puas ua txhua yam peb yuav tsum ua? Peb puas nco qab txog Thawj Tswj Hwm John Taylor cov lus uas hais tias: ‘Yog nej tsis rau siab ua nej tej hauj lwm, Vajtswv yuav rau txim rau nej vim muaj tej tug uas tej zaum nej pab tau yog nej tau ua nej tej hauj lwm’? [Teachings of Presidents of the Church: John Taylor (2001), 164]. Muaj tej tus uas muaj ko taw uas qaug zog, yuav tau tuav lawv tes, yuav tau txhawb pab lawv paj hlwb, tau tshoov lawv siab, thiab tau cawm lawv kom dim. Cov koob hmoov nyob mus ib txhis tos nej. Nej lub cib fim yog qhov uas nej tsis yog cov saib xwb tiam sis nej koom tes ua hauj lwm … pab lwm tus.”
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus First Presidency Message, February 2014. Hmong. 10862 295
Qhia los ntawm tsab Xov No
“Yog hais tias koj muaj kev hlub li Khetos muaj, ces koj thiaj li yuav npaj tau los mus qhia txoj moo zoo. Koj thiaj li yuav paub pab lwm tus kom lawv los paub tus Cawm Seej thiab ua raws li Nws.” Cia li xav seb puas xav thov Vajtswv kom koj txoj kev hlub cov uas koj mus xyuas loj tuaj. Thaum koj hlub lawv ib yam li tus Khetos, koj haj yam yuav muaj peev xwm ua hauj lwm pab tus Tswv thiab cov uas koj qhia.