2014
Yexus Khetos lub Luag Hauj Lwm Los Saum Ntuj Los: Tus Tswv Yug Yaj Zoo
Ob Hlis Ntuj 2014

Cov Mus Saib Xyuas tom Tsev tsab Xov, Ob Hlis Ntuj 2014

Yexus Khetos lub Luag Hauj Lwm Los Saum Ntuj Los: Tus Tswv Yug Yaj Zoo

Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.

Yexus Khetos, tus Tswv Yug Yaj Zoo, qhia hais tias:

“Nej cov yog leej twg muaj ib puas tus yaj, yog ib tug ploj lawm, tus tswv yuav ua li cas? Nws yeej yuav tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau. …

“Kuv hais rau nej hais tias, … cov uas nyob saum ntuj yuav muaj kev xyiv fab txog ib tug neeg txhaum uas hloov siab lees txim” (Lukas 15:4, 7).

Thaum peb kawm tias Yexus Khetos yog tus Tswv Yug Yaj Zoo, peb yuav xav ua raws li Nws tus yam ntxwv thiab pab cov uas xav tau kev pab. Yexus hais tias: “Kuv yog tus tswv yug yaj uas zoo. Kuv paub kuv pab yaj thiab kuv pab yaj paub kuv. … Kuv txaus siab tuag theej kuv pab yaj” (Yauhas 10:14–15). Vim muaj Khetos txoj Kev Theej Txhoj, tsis muaj ib lub sij hawm thaum peb poob zoo es peb nrhiav tsis tau peb txoj kev mus tsev (saib Lukas 15).

Thawj Tswj Hwm Thomas S. Monson hais tias, “Peb muaj kev lav ris saib xyuas peb pab yaj. … Thov kom peb txhua tus yuav pab lwm tus.”

Los ntawm cov Vaj Lug Kub

Phau Ntawv Nkauj 23; Yaxayas 40:11; Mauxiyas 26:21

Los ntawm Peb zaj Keeb Kwm

Elizabeth Ann Whitney, uas tau mus rau thawj txoj kev sib ntsib rau Koom Haum Niam Tsev hais txog qhov uas nws hloov siab los ntseeg thaum xyoo 1830 hais tias: “Thaum kuv hnov cov Txwj Laug qhia txog txoj Moo Zoo, kuv paub tias ”yog tus Tswv Yug Yaj Zoo lub suab.” Elizabeth tau ua raws li tus Tswv Yug Yaj Zoo lub suab thiab ua kev cai raus dej thiab txais kev pom zoo.

Peb kuj hnov tau tus Tswv Yug Yaj Zoo lub suab thiab qhia tau Nws tej lus qhia rau lwm tus. Thawj Tswj Hwm Monson hais tias, “Peb yog tus Tswv txhais tes hauv ntiaj teb no, uas twb raug txib kom mus pab thiab txhawb nqa Nws cov me nyuam.”

Ib yam li ib tug tswv yug yaj nrhiav ib tug yaj uas poob zoo, cov niam tsev txiv tsev yuav nrhiav ib tug me nyuam uas tau ua loj leeb. Thawj Tswj Hwm James E. Faust (1920–2007), tus Pab Cuam thib Ob hauv Thawj Pawg Thawj Tswj Hwm, hais tias: “Rau cov niam tsev txiv tsev ncaj ncees, rau siab thiab thov Vajtswv pab qhia lawv cov me nyuam uas tsis mloog lus, peb hais rau nej hais tias, tus Tswv Yug Yaj Zoo saib xyuas lawv. Vajtswv paub thiab to taub nej tu siab npaum li cas. Yeej muaj kev cia siab.”

© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus Visiting Teaching Message, February 2014. Hmong. 10862 295

Lus Cim

  1. Thomas S. Monson, “Heavenly Homes, Forever Families,” Liahona, Rau Hli Ntuj 2006, 70.

  2. Elizabeth Ann Whitney, nyob hauv Daughters in My Kingdom: The History and Work of Relief Society (2011), 128.

  3. Thomas S. Monson, “What Have I Done for Someone Today?” Liahona, Kaum Ib Hlis Ntuj 2009, 86.

  4. James E. Faust, “Dear Are the Sheep That Have Wandered,” Liahona, Tsib Hlis Ntuj 2003, 68.

Kuv Yuav Ua Dab Tsi?

  1. Qhov uas peb paub tias tus Cawm Seej yog tus Tswv Yug Yaj Zoo ua rau peb nyob kaj siab lug hauv peb lub neej li cas?

  2. Peb yuav ua dab tsi kom pab cov uas “poob zoo” tsis tshua muaj siab rau ntseeg los yog cov uas tsis ntseeg li peb?

  3. Kuv yuav ua li cas pab txhawb nqa cov niam tsev txiv tsev uas muaj me nyuam uas tau tso txoj moo zoo tseg lawm?