Rongorongo man te Moan Beretitentii, Beberuare 2014
Beku Ibukin te Uea ma te Tangira
E reirei te Uea Iesu Kristo, “Bwa ane e kani kawakina maiuna ao e na boni kabua; ma ane e na kabua maiuna i bukiu ao e na boni kawakinna” (Ruka 9:24).
“I kakoaua,” e taku Beretitenti Thomas S. Monson, “e tuangira te Tia Kamaiu bwa ti ngkana ti kakeaira ni beku ibukiia tabeman, iai te kantaninga ae uarereke nakon oin maiura. Naake a maiu bon ti ibukiia a na kabuai maiuia n tokina n ai aron te aroka ae aki tetebokaki, ma akana kabuai maiuia ni mwakuri n ibuobuoki nakoia tabeman a rikirake ao ni korakora—ao mwiina a na kawakin maiuia.”
N te rongorongo aei man ana mwakuri Beretitenti Monson, e kauringia Aika Itiaki ni Boong Aika Kaitira bwa ngaia bon ana tabonibai te Uea ao kakabwaia aika akea tokia a tauraoi nakoia naake a kakaonimaki ni beku ibukia tabeman.
Mwakuri n Ibuobuoki n te Tembora
“Te mwakuri ae tamaroa e karaoaki ngkana ti karaoi otenanti ibukiia ake a tia ni mate. N angiin te tai tiaki kinaia naake ti karaoa te mwkuri n ibuobuoki ibukiia. Ti kantaninga akean te kaitau, ke n iai iroura te koaua bwa a na kariaia te bwai are ti karaoia. E ngae n anne, ti karaoa te mwakuri, ao n te kawai anne ti karekea are e reke tiaki man korakora riki tabeua: ti riki n aroia raoi taani kamaiu i aon te maunga are Tion. Ngkai e a tia te Tia Kamaiu n anga maiuna bwa te karea ibukira, ngaia ae ngaira, n anga tabeua, ti karaoa ae aekan aei ngkana ti karaoi mwakuri ibukiia tabeman inanon te tembora ibukiia naake a kekeiaki rinanon kawaia nakon te maiu are akea tokina ti ngkana iai te bwai ae karaoaki ibukiia iroura ngaira aikai n te aonaaba aei.”
Ngaira Bon Ana Tabonibai te Uea
“Tariu ao mwaneu, ti katotobiaki irouia naake a tangira ara ibuobuoki, ara kaunganano, ara boutoka, ara karaunano, ara akoi—a kona n ae kaain te utu, raao, ara reitaki, ke ianena. Ngaira ana tabonibai te Uea ikai iaon te aba, ma te kaetieti bwa a na beku ao ni karikirakeia Natina. E mwiokoira ngaira n tatabemanira nako. …
“Te mwakuri anne are ti bane ni weteaki nako iai bon a na mwakuri te Uea Iesu Kristo.”
Te Mwakuri n Ana Kawai te Tia Kamaiu
“N te Aonaaba ae Boou, te Uea e a tia ni manga katanoata, ‘Kam atai bwaai ake kam riai ni karaoi inanon au ekaretia; bwa mwakuri ake kam noorai ni karaoi ao anne ae kam riai naba ni karaoi: bwa te bwai are kam noorai ni karaoia ao anne naba are kam na karaoia’ 3 Nibwaai 27:21].
“Ti kakabwaia tabeman ngkana ti beku n ana kawai ‘Iesu are te I-Natareta … are nakonako ni karaoa ae raoiroi’ [Mwakuri 10:38]. E kakabwaiaira te Atua ni kakaean te kimwareirei ngkana ti beku ibukin Tamara are i Karawa ngkai ti beku ibukiia Natina iaon te aba.”
Kainnanoan te Beku
“Ti kainnanoia bwa ti na anganaki ara tai ni beku. Ibukiia membwa ake aikoa kakaomimaki n te Ekaretia ke naake a rawa n iri ana waaki ni kakukurei ao n teimatoa n aki ibuobuoki, ti kona n tataro mwaaka ibukin kawai aika ti na kona ni karoko irouia. Tuangakia bwa a na ibuobuoki ni waaki tabeua e kona n ae ti te kawai ae a kainnanoia bwa aonga n oki ao e bwanin aia kakaonimaki. Ma taan kairiiri ake a kona n ibuobuoki n aikai n tabetai a manga rawa ni karaoi. Ti riai ni katikua n ara iango bwa a kona aomata ni bitaki. A kona ni katikui katei aika buakaka. A kona n rairinanoia man aia bure. A kona ni karekea te nakoanibonga ma te kororaoi. Ao a kona ni beku ibukin te Uea ma nanoia ae korakora.”
Ti Karaoi Bwaai Ni Kabane Aika Ti Riai Ni Karaoi?
“Te aonaaba e rangi ni kainnanoa ara ibuobuoki. Ti riai ni karaoi bwaai ni kabane aika ti riai ni karaoi? Ti uringnga ana taeka Beretitenti John Taylor: ‘Ngkana ko aki karaoa raoi am beku, ao te Atua e na kabukintaekako ibukiia ake ko na kaman tia ni kamaiuia ngke arona bwa ko a tia ni karaoa raoi tabem’?[Teachings of Presidents of the Church: John Taylor (2001), 164]. Iai waae ni kamatoaki, baai n tauaki, iango ni kaungaki, naano ni kakukureiaki, ao tamnei ni kamaiuaki. Kakabwaia aika akea tokiia a tauraoi ibukim. Tiaki ami tai n roko ni mamataku ma kam na riki bwa taani beku … te mwakuri n ibuobuoki.”
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/13. Kariaiakaki rairana: 6/13. Rairan te First Presidency Message, February 2014. Kiribati. 10862 859
Reirei man te Rongorongo Aei
“Ngkana iai aekan ana tangira Kristo iroum, ko riai ni katamaroa raoi aron te anga reirei n te euangkerio. Ko na karekea te ungannano ni kona ni buokiia tabeman bwa a na ata te Tia Kamaiu ao n Iriria.” Iangoia n tataro ibukin karikirakean te tangira ae kororaoi ibukia naake ko kawariia. Ngkai ko karikirakea ana tangira Kristo ibukiia, ko na kona ni beku inanon kawai aika iai nanoia iroun te Uea ao naake ko reireiniia.