Hyɛ no nso, kae, na fa nnaaseɛ ma

Onyankopɔn hwehwɛ sɛ yɛde asede bɛma No wɔ nhyira biara a yɛnya firi ne nkyɛn. Ɛyɛ mmerɛ sɛ yɛbɛma nnaaseɛ mpaeɛ baako pɛ aka yɛn ano, na yɛaka nsɛm korɔ no ara daa wɔ berɛ a yɛnni nsusuieɛ biara sɛ yɛde nnaaseɛ akyɛdeɛ a ɛfiri akoma mu bɛma Onyankopɔn. Ɛsɛ sɛ yɛde “nnaaseɛ ma .. wɔ Honhom mu” (D&C 46:32) ama yɛanya anisɔ atenka ama deɛ Onyankopɔn de ama yɛn no.

Kwan bɛn so na yɛbɛtumi akae deɛ Onyankopɔn ayɛ ama yɛn nyina ara no mu kakraabi? Ɔsomafoɔ Yohane twerɛɛ deɛ Agyenkwa no kyerɛɛ yɛn ɛfa nkaeɛ akyɛdeɛ a ɛnam Honhom Kronkron so ba no: “Na Okyigyinafoɔ a m’Agya bɛsoma no me din mu, ɔno na ɔbɛkyerɛkyerɛ mo nnoɔma nyinaa, na ɔbɛkae mo deɛ maka mo no nyinaa” (Yohane14:26).

Honhom Kronkron no de deɛ Onyankopɔn akyerɛ yɛn no ho nkaeɛ ba. Na ɔkwan baako a Onyankopɔn fa so kyerɛkyerɛ yɛn ne ne nhyira; nti, sɛ yɛnya gyedie a, Honhom Kronkron no bɛbɔ yɛn Onyankopɔn ayamyɛ ho nkaeɛ.

Wobɛtumi asɔ wei ahwɛ wɔ mpaebɔ mu ɛnnɛ. Wobɛtumi adi ahyɛdeɛ a ɛkyerɛ sɛ “Wobɛda Awurade wo Nyankopɔn ase wɔ ade nyina ara mu” no so (D&A 59:7).

Otitenani Ezra Taft Benson (1899–1994) susu sɛ mpaebɔ bue kwan ma yɛtumi yɛ saa. Ɔkaa sɛ:“Nkɔmhyɛni Joseph Smith kaa mmerɛ bi sɛ bɔne kɛseɛ baako a Nna a Ɛdi Akyire Ahoteɛni bi bɛyɛ ne sɛ ɔbɛdi boniayɛ ho fɔ. Ɛyɛ me sɛ yɛn mu pii nnhunu sɛ wei yɛ bɔne kɛseɛ. Wɔ yɛn mpaebɔ ne yɛn nkotosrɛ mu no ɛyɛ a na yɛtaa pɛ nhyira afoforɔ pii firi Awurade hɔ. Nanso ɛtɔ da a mehunu no sɛ ɛsɛ sɛ yɛtu yɛn mpaebɔ dodoɔ no ara gyina hɔ ma nhyira a yɛanya dada no ho anisɔ ne nnaaseɛ. Bebree na yɛnya.”

Wobɛtumi anam Honhom Kronkron akyɛdeɛ no so anya saa osuahunu yi. Wobɛtumi de kokoa mu nnaaseɛ mpaebɔ ahyɛ aseɛ. Wobɛtumi ahyɛ aseɛ akan wo nhyira na afei woahome so berɛ tiawa bi. Sɛ wokyerɛ gyedie a, Honhom Kronkron akyɛdeɛ no bɛma nhyira afoforɔ ho nkaeɛ aba w’adwene mu. Sɛ wohyɛ aseɛ kyerɛ anisɔ ma ɛmu biara a, wo mpaebɔ bɛyɛ tenten kakra akyɛn daa. Nkaeɛ bɛba, saa ara nso na nnaaseɛ bɛba.

Wobɛtumi de wei ara adi dwuma berɛ a woretwerɛ biribi agu wo journal mu. Honhom Kronkron no afa wei so aboa nnipa firi mmerɛ ahyɛaseɛ. Wokaeɛ sɛ Mose nwoma no kyerɛ sɛ, “Na wɔkoraa nkaeɛ nwoma, na ɛno mu no, wɔtwerɛɛ no wɔ Adam kasa mu, ɛfiri sɛ dodoɔ no ara a Onyankopɔn frɛɛ wɔn sɛ wɔntwerɛ no, ɔmaa wɔn nkannyan honhom” (Mose 6:5).

Otitenani Spencer W. Kimball (1895–1985) kyerɛɛ kwan a twerɛ kronkron no fa so ba: “Ɛtaa ba sɛ wɔn a wɔkora nkaeɛ nwoma no kae Awurade wɔ wɔn daadaa abrabɔ mu.” Journal nwoma no yɛ kwan baako a yɛnam so kan yɛn nhyira na ɛma yɛgya yɛn nhyira ho nkaeɛ ma yɛn asefoɔ.”

Sɛ wofiri aseɛ sɛ woretwerɛ a , wobɛtumi abisa wo ho sɛ, “Kwan bɛn so na Onyankopɔn hyiraa me ɛne wɔn a medɔ wɔn ɛnnɛ?” Sɛ wotaa yɛ saa wɔ gyedie mu a, wobɛkae (wo) nhyira no. Na ɛtɔ da a wobɛkae akyɛdeɛ a woanhyɛ no nso da bi, nanso wobɛhunu sɛ Onyakopɔn de nsa kaa wo wɔ w’abrabɔ mu.

Ɛyɛ me mpaeɛ sɛ yɛbɛkɔ so apere wɔ gyedie mu ahyɛ no nso, akae, na yɛde nnaaseɛ ama wɔ deɛ Ɔsoro Agya ne Agyenkwa no ayɛ na wɔgu so reyɛ de abue kwan ama yɛakɔ wɔn nkyɛn.