Thawj Pawg Thawj Tswj Hwm tsab Xov, Xya Hli Ntuj 2013
Lub Ntiaj Teb Xav Tau cov Pioneer Niaj Hnub No
Ntau tus pioneer uas taug kev mus thaum xyoo 1847 lawv tsis tau pib ntawm Nauvoo, Kirtland, Far West, los sis New York, tiam sis lawv pib ntawm Akiv teb, Scotland, Scandanavia, los sis Yelemis teb. Cov me nyuam me tsis tau to taub lawv cov niam cov txiv txoj kev ntseeg uas ua rau lawv xav ncaim tsev neeg, phooj ywg, lawv cov khoom, thiab lawv vaj lawv tsev.
Tej zaum ib tug me nyuam tau nug, “Niam, vim li cas peb nyaib tsev? Peb mus qhov twg?”
“Cia li los, me ntxhais; peb mus rau Xi-oos, uas yog Vajtswv lub nroog.”
Cov dej nphau nphwv ntawm dej hiav txwv Atlantic nyob nruab nrab ntawm lawv vaj lawv tsev thiab Xi-oos txoj kev cog lus. Leej twg yuav paub tias tib neeg ntshai npaum li cas thaum lawv hla teb hla chaws li ntawd? Tus Ntsuj Plig ntxhi lus tshoov lawv lub siab, lawv txoj kev ntseeg tau txhawb nqa lawv, es Haiv Neeg Ntseeg uas yog neeg pioneer no tso siab rau Vajtswv thiab caij nkoj mus rau lwm qhov chaw.
Thaum lawv tuaj txog Nauvoo lawv yuav tsum rov qab sawv taug kev mus nyiaj tej kev txom nyem dua. Cov nroj tsuag thiab cov pob zeb ua cim txog lawv tej ntxa ntawm lawv txoj kev mus ntawm Nauvoo mus rau Salt Lake City. Tej tug pioneer raug txom nyem li no. Tau muab lawv lub cev nqaij daim tawv faus, tiam sis lawv tej npe tseem nyob mus ib txhis.
Cov nyuj maj mam mus kev, cov log ntawm lawv tej tsheb ua suab soob soob, cov txiv neej khwv ua hauj lwm, lawv ua tsov ua rog, thiab cov hma quaj nrov. Tiam sis cov neeg pioneer uas muaj kev ntseeg thiab raug kev txom nyem tau mus lawm tom ntej. Lawv hu nkauj:
Los, los, cov ntseeg, tsis txhob txhawj tsis txhob ntshai;
Peb sawv daws yuav zoo siab.
Txawm tias yuav nyuaj txoj kev uas peb yuav mus.
Vaj-tswv yuav nrog nraim peb. …
Peb yuav zoo! Peb yuav zoo!1
Cov neeg pioneer no nco qab tus Tswv tej lus uas hais tias: “Kuv cov neeg yuav tsum raug sim siab nyob hauv txhua yam, kom lawv yuav npaj txhij los txais lub yeeb koob uas kuv muaj rau lawv, uas twb yog lub yeeb koob ntawm Xi-oos.”2
Sij hawm ua rau peb lub cim xeeb thiab kev ris txiaj ploj zuj zus mus, kom peb tsis nco qab cov uas raug txom nyem, uas quaj nyiav taug kev thiab raug muab faus rau hauv av. Tiam sis tej kev cov nyom niaj hnub no nev? Peb tsis tas taug kev nyuaj, nce roob, hla kwj ha, taug txoj kev tshiab, los yog hla dej los? Los sis puas yog peb yuav tsum muaj siab li cov neeg pioneer kom coj peb khiav tawm ntawm tej kev nyuaj uas nyob ib puag ncig peb thiab coj peb mus rau Xi-oos uas muaj kev nyab xeeb?
Txij thaum Kev Tsov Rog Thoob Ntiaj Teb thib Ob, neeg ntiaj teb haj yam tsis coj ncaj ncees. Tib neeg ua txhaum ntau dua; lawv coj ncaj ncees tsawg dua li qub. Coob leej ua neej zoo li lawv caij ib lub roller coaster, lawv xav tau kev zoo siab tam sim no tiam sis lawv muab tej kev xyiv fab uas nyob mus ib txhis tso tseg. Peb muab kev kaj siab lug tso tseg li no.
Peb tsis nco qab txog qhov uas cov neeg Kilis thiab Loos vam meej nyob hauv ib lub ntiaj teb uas lim hiam thiab kev vam meej tu lawm—tom qab qhov uas lawv tsis khov kho thiab tsis xyuam xim ua rau lawv raug puas tsuaj. Thaum kawg, lawv xav tau ib lub neej uas muaj kev thaj yeeb nyab xeeb ntau dua li lawv xav tau kev ywj siab xaiv; thiab thaum kawg lawv xiam tag nrho—lawv txoj kev thaj yeeb nyab xeeb thiab kev ywj siab xaiv.
Tsis txhob ua raws li Dab Ntxwg Nyoog tej kev ntxias; tiam sis sawv khov kho rau qhov tseeb. Yeej yuav tsis ua rau yus txaus siab yog tias yus nrhiav kev xyiv fab los ntawm kev ua raws li yus lub cev nqaij daim tawv nyiam thiab ua txhaum. Kev txhaum yeej tsis hloov los ua kev tsim txiaj. Kev ntxub yeej tsis txhawb nqa kev hlub. Kev ntshai yeej tsis ua rau yus ua siab loj. Kev ua xyem xyav tsis txhawb nqa kev ntseeg.
Nyuaj rau tej tug tiv tau tej lus thuam thiab lus cem los ntawm cov neeg tsis txawj ntse uas thuam kev coj dawb huv, kev ua siab ncaj, thiab kev ua raws li Vajtswv tej lus txib. Tiam sis neeg ntiaj teb yeej thuam tib neeg uas ua raws li lawv tej lub ntsiab cai. Thaum Vajtswv qhia Nau-as ua ib lub nkoj, cov pej xeem tau ntsia saum ntuj tsis pom cov huab thiab thuam thiab cem—mus txog thaum ntuj los nag.
Peb puas yuav tsum rov qab kawm tej yam no ib lub sij hawm dhau ib lub sij hawm los? Sij hawm yuav dhau mus, tiam sis qhov tseeb nyob mus ib txhis. Thaum peb tsis kawm los ntawm yav dhau los, peb yuav tsum rov qab raug tej yam lawv raug thaum ub xws li kev nyuaj siab, ntxhov siab thiab kev txom nyem quaj ntsuag. Peb tsis muaj tswv yim ua raws li tus uas paub qhov pib thiab qhov kawg huv tib si—tus uas yog peb tus Tswv, tus uas tau npaj txoj kev cawm seej—tsis yog tus niag nab, uas ntxub qhov no los?
Phau ntawv qhia ntsiab lus hais tias ib tug neeg pioneer yog “ib tug uas npaj los yog qhib kev rau lwm tus raws qab.”3 Peb puas yuav muaj peev xwm ua siab loj thiab nyob khov kho ua raws li tej ntsiab lus los ntawm cov neeg pioneer ntawm tiam neeg yav tas los? Peb puas muaj peev xwm ua neeg pioneer?
Kuv paub hais tias peb ua tau li no. Auj, niaj hnub no lub ntiaj teb xav tau cov neeg pioneer ntau npaum li cas!
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/12. Pub txhais ua lus Hmoob: 6/12. Kev txhais First Presidency Message, July 2013. Hmong. 10667 295
Qhia los ntawm tsab Xov No
Cov vaj lug kub qhia tias cov neeg mus qhia tom tsev yuav tsum “ceeb toom, piav, ntuas thiab qhia, thiab caw txhua tus kom los cuag Khetos” (Q&K 20:59). Xav seb puas xav hais txog tej lus ceeb toom thiab tej lus caw nyob hauv Thawj Tswj Hwm Monson zaj xov rau cov uas koj mus xyuas. Tej zaum koj yuav xav nrog lawv tham txog tej txheej txheem kom peb pom thiab ua raws li tej tug yam ntxwv ncaj ncees, nyob nrug dev tej kev ntxias, thiab kawm los ntawm lwm tus txoj kev ua yuam kev. Cai li nug cov uas nej qhia seb lawv yuav ua li cas ua li cov neeg pioneer niaj hnub no.
Tej zaum cov me nyuam yuav nyiam kawm ntxiv txog cov neeg pioneer thaum lawv nyeem zaj On the Trail hauv phab ntawv 62 hauv phau no.