Cov Mus Saib Xyuas Tom Tsev tsab Xov, Xya Hli Ntuj 2013
Kev Qhia thiab Kev Kawm txoj Moo Zoo
Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Yexus Khetos yog ib tug xib hwb zoo kawg. Nws tau ua yam ntxwv rau peb thaum Nws “qhia cov poj niam coob thiab ib tug dhau ib tug, nyob ntawm ntug kev thiab ntug hiav txwv, nyob ntawm qhov dej thiab nyob hauv tsev. Nws muaj lub siab dawb siab zoo rau lawv thiab kho lawv thiab lawv tsev neeg.”1
Nws qhia Mathas thiab Maivliag thiab “caw nkawd rais los ua Nws cov thwj tim thiab txais kev cawm seej, ‘yam uas zoo’ [Lukas 10:42] uas yeej yuav tsis raug muab tshem ntawm nkawd mus.”2
Nyob hauv cov vaj lug kub hauv peb lub caij nyoog kawg no, tus Tswv txib peb kom “ib leeg qhia ib leeg txog txoj lus qhuab qhia ntawm lub nceeg vaj” (Q&K 88:77). Hais txog kev qhia thiab kawm lus qhuab qhia, Cheryl A. Esplin, tus pab cuam thib ob hauv lub Koom Haum Me Nyuam Yaus pawg tuam thawj tswj hwm, hais tias, “Kev kawm kom to taub txhij txhua txog txoj moo zoo tej lus qhuab qhia yog ib qho uas yus yuav tsum siv tas ib sim neej thiab yuav los ‘ib kab rau ib kab, ntsiab cai rau ntsiab cai, me ntsis qhov no thiab me ntsis qhov tod’ (2 Nifais 28:30).”3
Thaum peb kawm, thiab thov Vajtswv, peb yuav qhia nrog tus Vaj Ntsuj Plig Dawb Huv lub hwj chim, uas yuav coj peb zaj lus mus “rau hauv noob neej tej siab” (2 Nifais 33:1).
Los ntawm cov Vaj Lug Kub
Amas 17:2–3; 31:5; Lus Qhuab Qhia thiab Kev Khi Lus 42:12–13; 84:85
Los ntawm Peb zaj Keeb Kwm
Peb cov yaj saub thaum yav tas los tau ua rau peb cov poj niam nco qab tias peb muaj ib lub luag hauj lwm qhia neeg nyob hauv peb tsev thiab nyob hauv lub Koom Txoos. Thaum lub Cuaj Hlis Ntuj 1979, Thawj Tswj Hwm Spencer W. Kimball (1895–1985) hais kom peb rais los ua “cov muam uas txawj kawm vaj lug kub.” Nws hais tias: “Cia li rais los mus ua ib co kws txuj paub txog cov vaj lug kub zoo—tsis yog kom hais tias yus yog neeg zoo dua lwm tus, tiam sis yog kom thiaj txhawb nqa tau lawv! Leej twg haj yam xav kom lawv tau ‘khaws’ qhov tseeb ntawm txoj moo zoo (uas ntau tus siv thaum lawv xav tau) ntau dua li cov poj niam thiab niam tsev uas saib xyuas thiab qhia ntau yam?”4
Peb sawv daws qhia thiab kawm. Thaum peb qhia los ntawm cov vaj lug kub thiab peb cov yaj saub tej lus, peb yuav pab lwm tus los cuag Khetos. Thaum peb kawm zoo thaum peb nug tej yam uas muaj nqi thiab mloog lawv hais lus teb, ces peb yuav nrhiav tau tej lus teb uas pab peb.
Kuv Yuav Pab Li Cas?
-
Kuv yuav ua dab tsi kom npaj ua ib tug qhia ntawv zoo dua?
-
Kuv puas ua tim khawv rau cov viv ncaus uas kuv saib xyuas?
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/12. Pub txhais ua lus Hmoob: 6/12. Kev txhais Visiting Teaching Message, July 2013. Hmong. 10667 295