Kev Rau Siab Ntseeg

Kuv yeej yuav nco qab thaum kuv taug kev ntawm Winter Quarters, Nebraska, USA, uas cov neeg pioneer ua neej nyob thaum ub. Zoo nkaus li cov av dawb huv, zoo li kuv mus xyuas ib lub tuam tsev uas nyob nraum zoov.

Kuv los kua muag, ua rau kuv tsis pom kev. Kuv pom ib tug mlom tiam sis kuv tsis paub xyov yog dab tsi. Thaum kuv so kuv cov kua muag tas, kuv pom ib tug txiv neej thiab ib tug poj niam uas muaj kev nyuaj siab. Thaum kuv saib ze zuj zus, kuv pom ib tug me nyuam mos liab pw hauv ib lub ntxa nyob ntawm nkawd txhais ko taw.

Qhov no ua rau kuv xav ntau yam: tu siab, npau taws, ris txiaj, thiab xyiv fab. Kuv tau xav tshem kev nyuaj siab ntawm Haiv Neeg Ntseeg, tiam sis kuv kuj zoo siab rau tej yam uas lawv tau ua kom muaj tau txoj moo zoo.

Tej yam uas muaj los rau kuv nyob ntawm Winter Quarters pab kuv to taub tias Leej Txiv Saum Ntuj Ceeb Tsheej muab txoj moo zoo rau Nws cov me nyuam thiab pab lawv muaj kev ywj siab xaiv raws li lawv lub siab nyiam. Tus me nyuam mos liab ntawd niam txiv muaj peev xwm xaiv ib txoj kev uas yooj yim dua. Vim nkawd ua raws li tus yaj saub qhia thiab ua raws li txoj moo zoo ob tug neeg pioneer no yuav tsum rau siab mus tom ntej txawm yog nkawd tau muab nkawd tus me nyuam faus. Tiam sis nkawd tau xaiv los yuav txoj moo zoo hauv nkawd lub neej thiab lees yuav nkawd tej kev cov nyom. Kuv kawm tias Haiv Neeg Ntseeg ua raws li txoj moo zoo thiab rau siab mus tom ntej vim lawv muaj kev ntseeg thiab kev cia siab—kev cia siab tias yav tom ntej yuav zoo dua li qub thiab kev ntseeg tias tus Tswv paub lawv thiab pab tau lawv.