Thawj Pawg Thawj Tswj Hwm tsab Xov, Peb Hlis Ntuj 2013
Cia Li Tus
Muaj ib hnub ob peb xyoos tas los lawm, tom qab kuv ua kuv tej hauj lwm hauv kuv hoob kas, kuv txais kev tshoov siab muaj zog kom mus xyuas ib tug poj ntsuam laus laus uas nyob hauv ib lub tsev laus nyob rau hauv Salt Lake City. Kuv txawm tsav tsheb ncaj qha mus ntawd.
Thaum kuv txog nws chav pw, tsis muaj leej twg nyob hauv. Kuv nug ib tug kws ua hauj lwm seb nws nyob qhov twg thiab tus kws ua hauj lwm coj kuv mus rau ib qho chaw so. Nyob ntawd kuv ntsib tus poj ntsuam zoo zoo no uas nrog nws tus viv ncaus thiab ib tug phooj ywg tham. Peb tau sib tham ua ke.
Thaum peb sib tham, ib tug txiv neej tau los rau ntawm lub qhov rooj ntawm chav tsev ntawd xav yuav dej haus los ntawm ib lub tshuab muag khoom. Nws saib kuv thiab hais tias, “Nim no, koj yog Tom Monson los sav.”
Kuv teb tias, “Yog mas. Thiab koj muaj ntsis zoo li ib tug neeg xeem Hemingway puas yog.”
Nws lees hais tias nws yog Stephen Hemingway, Alfred Eugene Hemingway tus tub, uas yog kuv ib tug pab cuam thaum kuv yog ib tug npisov ntau xyoo tas los thiab kuv hu nws ua Gene. Stephen qhia kuv tias nws txiv nyob hauv tib lub tsev no hiab tsis ntev yuav tso lub ntiaj teb no tseg. Gene tau hu kuv lub npe, thiab nws tsev neeg xav tiv tauj kuv tiam sis lawv nrhiav tsis tau kuv tus naj npawb xov tooj rau kuv.
Kuv thov zam txim rau kuv thiab mus kiag nrog Stephen mus saud rau chav tsev uas kuv tus pab cuam thaum ub pw hauv, muaj lwm tus ntawm nws cov me nyuam uas koom ua ke, es nws tus poj niam twb tso lub ntiaj teb no tseg ob peb xyoos tas los. Nws tsev neeg xav tias qhov uas kuv ntsib Stephen hauv qhov chaw so yog peb Leej Txiv Saum Ntuj Ceeb Tsheej txoj kev teb lawv tej kev thov xav kom kuv yuav pom lawv txiv ua ntej nws tuag thiab teb qhov uas nws hu kuv lub npe. Kuv twb xav hais tias lawv hais yog, vim yog Stephen tsis tau nkag hauv chav uas kuv tau mus xyuas tib lub sij hawm ntawd, ces kuv yeej yuav tsis paub tias Gene nyob hauv tsev saib xyuas ntawd.
Peb tau foom koob hmoov rau nws. Muaj kev kaj siab lug nyob ntawd. Peb tau sib tham zoo zoo, ces tom qab ntawd kuv tau ncaim lawv mus.
Hnub tom qab ntawd thaum sawv ntxov lawv hu xov tooj qhia kuv tias Gene Hemingway tau tso lub ntiaj teb no tseg—20 feeb tom qab kuv thiab nws tub tub tau foom koob hmoov rau nws.
Kuv tau thov Leej Txiv Saum Ntuj Ceeb Tsheej ua Nws tsaug rau qhov Nws coj kuv kev, uas tau tshoov kuv lub siab kom kuv mus xyuas lub tsev tu neeg laus ntawd thiab tau coj kuv mus ntsib kuv tug phooj ywg zoo Alfred Eugene Hemingway.
Thaum peb hnov tau tus Ntsuj Plig, koom ua ke txo hwj chim rau Vajtswv, thiab foom lub pov thawj hwj txoj koob hmoov,—kuv xav tias Gene Hemingway tau xav txog cov lus nyob hauv zaj nkauj qhuas Vajtswv hu ua “Xib Hwb, Muaj Cua Daj Cua Dub”:
Thov txhob mus, au kuv tus Txhiv Dim!
Thov txhob tso kuv tseg ntxiv.
Thaum kuv txog ntawm ntug hiav txwv kuv yuav so
Ua rau kuv zoo siab hlo li.
Kuv tseem nyiam zaj nkauj no thiab ua tim khawv txog zaj no qhov kev nplij siab:
Txawm muaj cov cua daj cua dub los nplawm
Los dab hem los neeg thuam los raug dab tsi lawm,
Tsis muaj dab tsi ua rau lub nkoj yuav tog
Yog nyob nrog tus Tswv ntawm ntiaj teb tag nrho.
Tag nrho tej no yeej yuav mloog koj lus:
Cia li tus.1
Txawm los kua muag thiab raug txom nyem, txawm muaj kev ntshai thiab kev nyuaj siab, txawm tu siab thiab kho siab vim cov yus hlub tso lub ntiaj teb no tseg, yus yeej paub tias txoj sia yuav kav mus ib txhis. Peb tus Tswv thiab tus Cawm Seej yog tus tim khawv muaj txoj sia nyob uas qhia tias qhov no muaj tseeb.2 Nws tej lus hauv vaj lug kub yeej txaus hais tias: “Cia li tus, thiab paub tias kuv yog Vajtswv” (Phau Ntawv Nkauj 46:10). Kuv ua tim khawv txog qhov tseeb no.
© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais First Presidency Message, March 2013. Hmong. 10663 295
Qhia los ntawm tsab Xov No
Zaj no nplij tau neeg lub siab uas tau xiam ib tug uas lawv hlub los sis cov uas muaj teeb meem kov yeej ib txoj kev txom nyem. Ntxiv rau Thawj Tswj Hwm Monson zaj lus, xav seb koj puas xav qhia txog ib nqe vaj lug kub nram qab no, raws li cov uas nej qhia tej kev xav tau: Yauj 19:25–26; 1 Kauleethaus 15:19–22; Mauxiyas 24:13–15; Doctrine and Covenants 122:7–9. Yog koj txais kev tshoov siab, tej zaum koj ua tim khawv tau txog kev kaj siab lug uas tus Cawm Seej tau muab rau koj thaum koj muaj kev nyuaj siab.