2013
Kev txhawb kev ntseeg
March 2013

Cov Mus Saib Xyuas Tom Tsev tsab Xov, Peb Hlis Ntuj 2013

Kev txhawb kev ntseeg

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Peb tus yaj saub, Thawj Tswj Hwm Thomas S. Monson, tau hais kom peb “ncav tes los cawm cov uas xav tau peb txoj kev pab thiab txhawb nqa lawv mus rau txoj kev siab dua thiab txoj kev zoo dua. … Nov yog tus Tswv txoj hauj lwm, thiab thaum peb ua tus Tswv tej hauj lwm, … ces peb tsim nyog txais tus Tswv tej kev pab.” 1

Ntau xyoo tas los LaVene Call thiab nws tus khub mus saib xyuas tom tsev tau mus xyuas ib tug viv ncaus uas tsis tshua muaj siab ntseeg. Nkawd khob qhov rooj thiab ntsib ib tug niam tsev hluas uas hnav nws lub tsho khuam da dej. Zoo nkaus li nws muaj mob, tiam sis tsis ntev nkawd paub tias nws qhov teeb meem yog kev haus cawv. Ob tug uas saib xyuas tom tsev nrog tus niam tsev hluas no zaum thiab sib tham.

Tom qab nkawd mus lawm, nkawd hais tias, “Nws yog Vajtswv ib tug me nyuam. Peb muaj kev lav ris pab nws.” Nkawd thiaj mus xyuas nws ntau zaus. Txhua zaus, nkawd pom thiab hnov nws hloov ua zoo me ntsis. Nkawd thov tus viv ncaus no los koom lub Koom Haum Niam Tsev. Txawm nws tsis tshua xav mus, thaum kawg nws txawm mus. Tom qab nkawd yaum nws ces nws thiab nws tus txiv thiab tus ntxhais tau koom lub koom txoos. Nws tus txiv hnov tau tus Vaj Ntsuj Plig Dawb Huv. Nws hais tias, “Kuv yuav ua raws li tus npisov hais.” Nim no lawv muaj siab rau ntseeg lub Koom Txoos thiab tau ua kev cai sib khi hauv lub tuam tsev.2

Los ntawm cov Vaj Lug Kub

3 Nifais 18:32; Doctrine and Covenants 84:106; 138:56

Los ntawm Peb zaj Keeb Kwm

Kev pab cov uas tau mus ua yuam kev rov qab los rau Yexus Khetos txoj moo zoo yeej yog ib feem ntawm kev ua ib tug Neeg Ntseeg hauv Hnub Nyoog Kawg thiab ib tug mej zeej ntawm lub Koom Haum Niam Tsev. Thawj Tswj Hwm Brigham Young (1801–77) hais tias, “Cia peb ib leeg muaj siab hlub ib leeg, … thiab cia cov uas txawj pom kev coj cov neeg dig muag mus txog thaum lawv pom kev lawv tus kheej.”3

Eliza R. Snow, Koom Haum Niam Tsev tus tuam thawj tswj hwm thib ob, tau ua tsaug rau cov viv ncaus tej dej num nyob hauv Ogden, Utah, USA, kom ib leeg txhawb ib leeg lub zog. Nws hais tias, “Kuv yeej paub tias muaj ntau yam uas yus pub dawb [hais txog kev pab lwm tus] uas yeej tsis raug sau rau hauv tej phau ntawv ceev xwm txheej.” Tiam sis nws paub tias muaj ib phau uas lawv sau nyob saum ntuj ceeb tsheej txog cov viv ncaus tej dej num thaum lawv ncav tes los pab cov uas tsis tshua muaj siab ntseeg, nws hais tias: “Thawj Tswj Hwm Yauxej Xamiv hais tias tau tsa lub koom haum no kom cawm tau tib neeg. … Muaj ib phau ntxiv uas sau txog nej txoj kev ntseeg, nej txoj kev siab hlub, nej tej hauj lwm thiab tej lus zoo. … Tsis muaj dab tsi yuav ploj mus.”4

© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais Visiting Teaching Message, March 2013. Hmong. 10663 295

Lus Cim

  1. Thomas S. Monson, “The Sacred Call of Service,” Liahona, Tsib Hlis Ntuj 2005, 55, 56.

  2. Tsab ntawv rau Koom Haum Niam Tsev tuam pawg thawj tswj hwm los ntawm LaVene Call tus ntxhais.

  3. Brigham Young, hauv Daughters in My Kingdom: The History and Work of Relief Society (2011), 107.

  4. Eliza R. Snow, hauv Daughters in My Kingdom, 83.

Kuv Yuav Pab Li Cas?

  1. Kuv puas ua siab loj kom nug ib tug viv ncaus uas tsis tshua muaj siab ntseeg tuaj koom Koom Haum Niam Tsev txoj kev sib ntsib nrog kuv?

  2. Cov viv ncaus uas kuv saib xyuas puas txaus siab nug kuv tej yam txog txoj moo zoo?