Mesaj Premye Prezidans lan, Mas 2013
Lapè, Rete trankil
Yon jou, sa gen kèk ane, apre m te fin okipe kèk bagay nan biwo mwen, mwen te santi yon gwo pouse pou m t al vizite yon granmoun aje ki te vèv ki t ap viv nan yon mezon sante pou granmoun nan Vil Salt Lake. Mwen te kondui lamenm pou ale kote sa a.
Lè m te rive nan chanm ni, mwen te wè l vid. Mwen te mande yon anplwaye ki kote l ta ka ye e li te voye m ale nan yon sal. Lè m te rive mwen te jwenn bon tigranmoun sa a ki t ap resevwa vizit yon sè li ansanm avèk yon lòt zanmi. Nou tout ansanm te fè yon bèl konvèsasyon.
Pandan nou t ap pale a, yon mesye te vini nan pòt la pou l te vin pran yon boutèy kola nan machin pou vann bwason an. Li te gade m epi l te di: “Ay, ou se Tom Monson.”
Mwen te reponn “Wi. E ou sanble ak yon Hemingway.”
Li te di ke l sete Stephen Hemingway, pitit gason Alfred Eugene Hemingway, ki te sèvi kòm konseye m lè m te evèk sa te gen dèzane e m te konn rele l Gene. Stephen te di m ke papa l te nan menm mezon sante a e l te prèske mouri. Gene t ap mande pou mwen san rete, epi fanmi l te bezwen kontakte m men yo pa t ka jwenn nimewo telefòn mwen.
Mwen te derape imedyatman e m te monte avèk Stephen pou al nan chanm ansyen konseye m nan, kote lòt pitit li yo te reyini tou, madanm ni te mouri kèk ane anvan sa. Manm fanmi l yo te konsidere rankont mwen avèk Stephen nan nan salon an kòm repons Papa nou ki nan Syèl la te voye pou yo poutèt gwo dezi yo te genyen pou m te wè papa yo anvan l te mouri ak reponn apèl li a. Mwen te santi menm bagay la tou, paske si Stephen pa t antre nan sal la kote m t ap pale avèk moun yo egzakteman nan moman li te antre a, mwen pa t ap menm konnen ke Gene te nan mezon sa a.
Nou te ba l yon benediksyon. Yon espri lapè te egziste. Nou te pase yon bon ti moman, epi apresa mwen te ale.
Nan demen maten mwen te resevwa yon apèl telefòn ki te di m Gene Hemingway te mouri—jis 20 minit apre l te fin resevwa benediksyon an nan men pitit gason l lan avèk mwen an.
Mwen te ofri yon priyè remèsiman nan kè m bay Papa nou ki nan Syèl la pou direksyon li te ban mwen an, ki te pouse m ale nan mezon sante a e ki te dirije m al jwenn chè zanmi mwen, Alfred Eugene Hemingway a.
Mwen toujou renmen panse ke sa k te siman nan tèt Gene Hemingway jou swa sa a—kote nou t ap benyen nan limyè Lespri a, patisipe nan enb priyè a, ak pwononse yon benediksyon prètriz la—sete siman pawòl sa yo ki nan kantik “Maitre, la tempête lance” la:
Mon Rédempteur, ô demeure
Désormais près de moi,
Car je veux rentrer au port céleste
Et m’asseoir auprès de toi.
Mwen toujou renmen kantik sa a e mwen temwaye de rekonfò li pote:
Que ce soit la fureur de la mer
Oubyen des démons ou des hommes méchants,
Rien n’engouffrera la barque où se tient
Le Maître des cieux, terre, et océans.
Tout obéit à ma volonté!
Sois tranquille.1
Nan mitan dlo nan je ak eprèv, nan mitan laperèz ak lapenn, nan mitan doulè ak solitid akoz pèt yon moun nou renmen, gen yon asirans ke lavi a etènèl. Senyè ak Sovè nou an se temwayaj vivan ke bagay sa a se verite.2 Pawòl li yo nan ekriti sent yo sifizan: “Rete trankil, epi sonje ke m se Bondye” (Som 46:10). Mwen temwaye konsènan verite sa a.
© 2013 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/12. Apwobasyon Tradiksyon: 6/12. Tradiksyon First Presidency Message, March 2013. Haitian Creole. 10663 036
Ansèyman nan Mesaj Sa a
Mesaj sa a kapab rekonfòte moun ki pèdi yon moun yo ki mouri oubyen moun k ap lite anba yon eprèv. Anplis mesaj Prezidan Monson nan, panse pou w pataje youn nan ekriti sa yo, selon bezwen moun w ap anseye yo: Jòb 19:25–26; 1 Korentyen 15:19–22; Mozya 24:13–15; Doktrin ak Alyans 122:7–9. Si Lespri a pouse ou, ou gen dwa temwaye de lapè Sovè a ba nou nan eprèv nou yo.