Afotusɛm a ɛkɔ ma Asɛmpatrɛni Twentwɛnsofoɔ

St. Francis a ɔfiri Assisi asɛm bi a ɔkaeɛ yɛ me dɛ paa ara—ɔse: “Ka asɛmpa no berɛ biara na sɛ ɛbɛhia a, fa kasa ka.”¹ Aba a ɛwɔ saa asɛm yi mu ne sɛ, mmerɛ pii no asɛmpaka a tumi wɔ mu paa ara no, yɛmfa ano na ɛka.

Sɛ yɛn akoma mu yɛ kann na yɛdi nnyinasosɛm a yɛwɔ no so a, nnipa hu. Sɛ yɛn abrabɔ kyerɛ ɔdɛ ne anigyeɛ a, wɔhũ paa ara.

Obiara pɛ sɛ n’ani gye. Berɛ a asɔremma reda asɛmpa hann n’adi no, nnipa tumi hu yɛn anigyeɛ ne Onyankopɔn dɔ atenka a ɛrehyɛ yɛn abrabɔ mu mã a ɛrebu fa so no. Wɔpɛ sɛ wɔhunu sɛinti. Wɔpɛ sɛ wɔte yɛn ahintasɛm no ase.

Wei ma wɔbisa nsɛm bi te sɛ “Adɛn nti na w’ani agye saa?” anaa “Adɛn nti na wowɔ saa ahotɔsoɔ suban yi?” Ɛda adi pefee sɛ saa nsɛmmisa yi nyiano twetwe yɛn kɔ Yesu Kristo asɛmpa a aba bio no ho nkɔmmɔdie.

Nyamesom ho nkɔmmɔ a yɛne yɛn nnamfo ne adɔfoɔ di no bɛtumi ayɛ sɛ abasamtuo ne ade a ɛyɛ den. Ɛnsɛ sɛ ɛyɛ saa. Daadaa nkɔmmɔ a yɛdi fa honhom mu osuahunu anaa Asɔre mu dwumadie anaa abasɛm ho no bɛtumi ayɛ mmrɛ ne anigyeɛ, sɛ yɛde akokoduro kakra ne nyansa to ho a.

Me yere, Harriet, yɛ wei ho nhwɛso pa ankasa. Berɛ a na yɛwɔ Germany no, na ɔwɔ kwan bi a ɔfa so de Asɔre no mu nsɛm ba ɔne ne nnamfo ne amanifoɔ nkɔmmɔdie mu. Sɛ ebia, ɔbi bisa no sɛdeɛ nnaawɔtwe awieɛ no kɔɔɛ a, ɔbɛka sɛ, “Saa Kwasiada yi, yɛnyaa osuahunu kɛseɛ wɔ y’asɔre mu! Abrantewa bi a wanya mfeɛ 16 kaa nsɛm dɛɛdɛ bi kyerɛɛ nnipa 200 a wɔwɔ y’asafo mu faa abrabɔ kronkron ho.” Anaa, “Mesuaa biribi faa maame bi a wanya mfeɛ 90 a ɔpamm kuntuo bɛboro 500 de kɔmaa y’Asɔre adɔyɛ kuo dwumadie no, na wɔde guu po so hyɛn mu kɔmaa nkurɔfoɔ a wɔnni bie wɔ wiase afanaa nyina ara.”

Mpɛn pii no, nkurɔfoɔ a wɔtee saa asɛm yi no pɛɛ sɛ wɔbɛtie bio. Wɔbisaa nsɛm. Na wei de akwannya baa sɛ wɔbɛdi asɛmpa no ho nkɔmmɔ wɔ kwan pa so, akokoduro so, a ɔhyɛ nnim.

Ɛnam abɛɛfo internet ne kɔmputa so nkɔmmɔdie nti, ɛnyɛ den seesei sɛ yɛbɛka saa nneɛma yi ho nsɛm wɔ nkɔmmɔdie mu sɛ kane no. Deɛ yɛhia ara ne akokoduro a yɛde bɛyɛ saa.

Awerɛhosɛm ne sɛ, ɛnyɛ den sɛ yɛbɛgye kyim. Ɛtaa ba sɛ yɛtumi gye kyim, yɛbu obi animtia, na yɛbu no fɔ. Sɛ yɛn bo fu, yɛn ani ansɔ afoforɔ anaa yɛkasa tia wɔn a, wɔmpɛ sɛ wɔbɛsua biribiara afa yɛn ho. Yɛrentumi nkan nnipa dodoɔ a wɔafiri Asɔre no mu anaa wɔammɛka yɛn ho da esiane sɛ obi kaa biribi tiaa wɔn anaa ɔhyɛɛ wɔn abufuo.

Kasafi pii wɔ wiase yi mu ɛnnɛ mmerɛ yi mu. Esiane sɛ obiara nna ne ho adi wɔ abɛɛfo internet soɔ nti, ɛnyɛ den sɛ obi bɛka nsɛm fii anaa nsɛm yaaya wɔ so. So ɛnsɛ sɛ, yɛn a yɛyɛ Kristo asuafoɔ a yɛdwoɔ na yɛwɔ anidasoɔ no, nya ɔbra a ɛkron na ɛdi mũ kyɛn saa? Twerɛsɛm no kyerɛ sɛ, “Momma mo kasa ho mmra nyam daa a nkyene wɔ mu, na moahunu sɛdeɛ ɛsɛ sɛ mobua obiara.” Kolosefoɔ 4:6.

M’ani gye nsɛm a ɛyɛ fann sɛ ewiem a ɛmu da hɔ sɛ awiaberɛ na adom ahyɛ mu mã. Wobɛtumi asusu deɛ yɛn mmusuakuo, yɛn ward, aman, na mpo wiase bɛyɛ sɛ anka yɛbɛtumi adi saa nyinasosɛm yi so a?

Ɛtɔ da a yɛkamfo yɛn ho dodo anaa sɛ yɛbɔ yɛn ho kwaadu dodo sɛ ɛba sɛ afoforɔ regye asɛmpa no atom a. Ɛho hia sɛ yɛbɛkae sɛ Awurade nhwehwɛ sɛ yɛn na yɛnsakyera afoforɔ.

Nsakyeraeɛ nnam yɛn nsɛm so na ɛba, na mmom ɛnam ɔsoro nkyerɛkyerɛ a ɛfiri Honhom Kronkron no. Ɛtɔ da a deɛ ɛhia ara ne sɛ yɛbɛka kasasin baako pɛ de adi adanseɛ anaa aka yɛn suahunu de adwodwo akoma, anaa de abue pono a ɛbɛma afoforɔ ahunu nokorɛ a ɛdi mũ nam Honhom no nkanyan so.

Otitenani Brigham Young kaa sɛ, sɛ ɔhunu onipa a n’ano nteeɛ, anaa ɔnnim badwam kasa, na deɛ ɔtumi ka ara ne sɛ, “Ɛnam Honhom Kronkron no tumi so no menim sɛ Mormon Nwoma no yɛ nokorɛ, na Joseph Smith yɛ Awurade Nkɔmhyɛni” a, ɔhunu sɛ asɛmpa no yɛ nokorɛ. Otitenani Young kaa sɛ berɛ a ɔtee saa ahobrɛaseɛ adanseɛ yi, “Honhom Kronkron a ɛfiri saa nipa no mu ba no kannyan me nteaseɛ, na hann, animuonyam, ne daa nkwa baa m’anim.”²

Me nnuanom mmarima ne mmaa, monnya gyedie. Awurade bɛtumi ayɛ nsɛm a moka no kɛseɛ na wama anya tumi. Onyankopɔn mmisa wo sɛ sakyera afoforɔ, mmom bue w’ano. Nsakyeraeɛ adwuma no nnyɛ wo dea, ɛyɛ onipa a ɔretie no ne Honhom Kronkron no dea.

Me nnamfo pa, akwan pii wɔ hɔ nnɛ a yɛbɛtumi afa so abue yɛn ano na yɛne afoforɔ akyɛ Yesu Kristo anigyeɛ asɛmpa no kyɛn kane no. Kwan wɔ hɔ ma obiara, ama asɛmpatrɛni a ɔtwentwɛn ne nan ase mpo sɛ ɔde ne ho bɛhyɛ saa adwuma kɛseɛ yi mu. Yɛn mu biara bɛtumi ahwehwɛ kwan a yɛde yɛn ara y’akyɛdeɛ ne deɛ yɛpɛ aboa saa adwuma kɛseɛ yi, a ɛde hann ne nokorɛ bɛhyɛ wiase yi ma. Berɛ a yɛreyɛ saa no, yɛbɛnya anigyeɛ a ɛba wɔn a wɔyɛ nokorɛfoɔ na wɔwɔ akokoduro sɛ “wɔbɛgyina sɛ Onyankopɔn adansefoɔ wɔ mmerɛ nyina ara mu” Mosaya 18:9.