RONGORONGO MAN te Moan Beretitentii, Beberuare 2013
Te Reirei ibukin te Mitinare ae Mwarara
A katoatai ana Reirei Iesu Kristo n iai tabeia n uotan Ana euangkerio nakon te aonaaba (tara Mareko 16:15–16). Ma, n tai tabetai e kaangaanga kaurean wira ao n taekina ara onimaki nakoiia ake a katobibira. Ngkai iai irouia tabeman membwa n te Ekaretia te konabwai ni maroro nakoiia tabemwang taekan te aro, tabemwang a mwarara teutana ke a mwebuaka, a bwainrang, ke a onrake n te maku ni karaoana.
N taekan anne, I kan uotirakei aua bwai ake e kona temanna ni karaoi n tou mwin ana mwioko te Tia Kamaiu n taekinan te euangkerio “nakoiia aomata ni kabane” (D&C 58:64).
Riki bwa te Ota
Teuana te kario ae mamaten nanou are n angiin te tai e kikinraea St. Francis n Assisi e taku warekana, “Taekina te euangkerio n tai nako ao ngkana e riai, kabonganai taeka.”1 Ae nanonaki ikai ma e aki kaineti taekinana n te kario aei bon te ota are n angiin te tai a aki taekinaki reirei ake a rang ni mwaaka.
Ngkana iai iroura te kokoaua ao ti maiu n nakoraoi ma kainibaireara, a norira iai aomata. Ngkana ti kaota te kimwareirei ao te kukurei, a a nori aika bati riki.
Ni kabane a tangiria ni kukurei. Ngkana ngaira membwa n te Ekaretia ti kabutanako otan te euangkerio, a kona aomata n nora kukureira ao n namakina Ana tangira te Atua ni kakanoa ao ni kakataonakoa i nanon maiura. A kan ataia bwa bukin tera? A kan ota bwa ti kanga ni karekea anne.
Anne e karikiia bwa a na tabeki titiraki n aron ae “Bukin tera bwa kam kukurei?” ke “Bukin tera bwa e katoatai n iai iroumi te aroaro ae tamaroa?” Boon titiraki aikai, ni koauana, a kairiiri raoi nakon maroroakinan taekan ana euangkerio Iesu Kristo are kaokaki.
Kakarabakau
Uotakirakean te bwai ae taekan te aro—riki nakoiia raora ao ake ti tangiriia—e kona n tara ni kabwaranano ao ni kakaewenako. Tiaki ae e na bon riki anne. Mwaneweneweakin taian maiu n tamnei ke mamaroroakinan taekan mwakurin te Ekaretia ke baike a riki n te kakarabakau e kona ni bebete ao ni kakukurei ngkana iai iroura te ninikoria ao te wanawana.
Bon te kakairi ae kamimi n aio kaainabau ae Harriet. Ngke ti maeka i Tiaman, e na bae n ukera te anga teuana n uotirakei bwai ni karekerekei ma wakin te Ekaretia ni mamarorona ma raona ao ake e kinaiia. N aron te kakairi, bwa ngkana antai are e titirakinna n taekan ana wikente, e na kaeka, “Te Tabati aei e reke iroura te maiu ae kakukurei n ara ekaretia! Temanna te ataeinimwaane ae 16 ana ririki e anga ana taeka are tamaroa i mataia 200 kaain te taromauri n taekan te maiu ae itiaki.” Ke, “I karekea rongorongon te aine ae 90 ana ririki are e waei e raka i aon 500 te burangketi ao e anga nakon ana buroukuraem n ibuobuoki te Ekaretia bwa a na katokaki n te kaibuke nakoiia aomata ake a kainnano ni katobibia te aonaaba.”
N aron te tataneiai, aomata ake a ongo aei a kan ata ae bati riki. A titiraki. Ao anne e kairiiri nakon reken te tai ni maroroakina taekan te euangkerio n aron ae kakaraoaki, n onimaki, n te anga are a na aki matauninga aomata iai.
Man kuneakin te Intanete ma bwai n reitaki n te botanaomata, e a bebete riki n te bong aei maroroakinan bwai aikai n te kawai ni kakarabakau nakon are mai mwaaina. Tera ae ti kainnanoia e bebete arona bwa ti te ninikoria karaoana.
Onrake n te Akoi
Ma te tekebuaka iai, bwa e kai reke te kauntaba. E reke bwa n angiin te tai ti kauntaeka, ti kataorikaki, ao ti kabuakaka. Ngkana ti un, ti kamatauninga, ke ti kamaraki nanoia aomata, te kabanea ni bwai are a tangiria a na karekei rongorongora aika bati riki. E matoatoa atakina bwa iraman aomata ake tao a tia ni kitana te Ekaretia ke a bon tuai man kaainna ibukina bwa tabemwang a taekina te bwai teuana are kamatauningaiia.
E bati te kamatauninga n te aonaaba n te bong aei. Ibukina bwa a kona aomata ni koroboki i aon te intanete n akea temanna are ataia bwa antai are koroia, e a bebete riki n akea tokina atongan bwai ake a kamarakinano ke a kamatauninga i aon te kombiuta. E aki riai iroura, ngaira ana reirei Kristo ae nimamannei aika kakantaninga, ni karekea te anua ni maiu ae rietata riki ma n ibuobuoki? A reirei koroboki aika tabu, “A na raonaki ami taeka n te akoi, ao a na taarinaki n taari, bwa kam aonga n ata te aro ae riai bwa kam na kaekaia aomata ni kabaneia iai” (I-Korote 4:6).
I tangira te iango n ara taeka bwa a kakukurei, a kokoaua ao a akoi. Ko kona n iangoia bwa a na tera aekan ara utu, uote, botanaomata, ao te aonaaba ngkana ti kona ni kariaia te reirei ae uarereke aei?
Kaonaki n te Onimaki
N tai tabetai ti karekei iroura taekara aika raraoi aika bati ke bukinakira aika bati ngkana e roko irouia tabemwang ake a butimwaea te euangkerio. E kakawaki bwa ti na uringnga bwa e aki kantaningaira te Uea bwa ti na karaoa te rairannano.
Te rairannano e reke tiaki ri nanon ara taeka ma ri nanon mwakurin karawa iroun te Tamnei ae Raoiroi. N tai tabetai ni kabane ake e tangiria bon teuana te botantaeka n ara kakoaua ke taekan te waki ni maiu teuana ni kamaraua te nano ke kaukan te mataroa are e kona ni kairiia tabemwang n nori koaua aika kaunganano ri nanon ana wirikiriki te Tamnei.
E taku Beretitenti Brigham Young (1801–77) bwa e ataia bwa e koaua te euangkerio ngke e “nora te aomata are akea ana atatai n taetae ni katekenano, ke ana tarena ibukin te taetae i matan te botanaomata, are e ti kona n taku, ‘I ataia bwa ni mwaakan te Tamnei ae Raoiroi, e koaua Ana Boki Moomon, bwa Iotebwa Timiti bon temanna ana Burabeti te Uea.’” E taku Beretitenti Young ngke e ongo te kakoaua are mangori arei, “Wakin te Tamnei ae Raoiroi mai iroun te aomata arei e kaitiaka otau, ao te ota, te mimitong, ao te aki mamate [a mena] i moau.”2
Tariu ao mwaaneu, onimaki. E kona te Uea ni karababai taeka ake kam taekin ao ni karaoi bwa a na korakora aroia. E aki tuangngkami te Atua bwa kam na rairi nanomi ma kam na kaurei wimi. Te tabe n te rairannano tiaki tabem—anne e bwainna te aomata are ongongo ao nakon te Tamnei ae Raoiroi.
Mitinare ni kabane membwa.
Raou aika tangiraki, n te bong aei iai kawai aika bati riki nakon are ngkekei ibukira ni kaurei wira ao n tibwai ma tabemwang rongorongo aika kakimwareirei n ana euangkerio Iesu Kristo. Iai te kawai ibukira n tatabemanira—ao te mitinare ae mwarara—ni karaoan te mwakuri ae kakannato aei. Ti kona n tatabemanira ni kunea te kawai ni kabonganai bon oin ara tarena ma nanora ni outoka te mwakuri ae kakannato ni kanoa te aonaaba n te ota ao te koaua. Ni karaoakiia, ti na kunea te kimwareirei are roko nakoiia ake a kakaonimaki ao a ninikoria “n tei bwa ana taan tia kakoaua te Atua n tai nako” (Motiaea 18:9).
@2013 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/12. Kariaiakaki rairana. Rairan te First Presidency Message, February 2013. Kiribati. 10662 859
Reirei man te Rongorongo Aei
Teuana te kawai ae katekenano ko na “kaungaiia nake ko reireiia ni katei … tia ake ko na kona ni buokiia ni maiuakina te reirei are ko a tia n reireiniia iai” (Teaching, No Greater Call [1999], 159). Iangoa kaoakiia nake ko reireiia n tataromwaaka katean te tia n tibwa te euangkerio ma temanna ke aomata aika bati n te namwakaina aei. Karo a kona ni maroroakin kawai ake a kona ataei ake a uarereke riki n ibuobuoki iai. Ko kona naba ni buokiia membwa n te utu n iangoi ke n takakaron kawai n uotarake iai te euangkerio n taian mamaroro ao n iangoi mwakurin te Ekaretia aika a na roko ake a kona ni kaoa temanna raoia nako iai.