Tibwatibwa ma Raom temanna

N tebongina ngke I tabe ni kamatebwaia au reirei n taekan te aro, e reke au iango teuana ae tikiraoi ma ni kaokoro. Ngke I tabe ni wareka te reirei ibukin te bong are i mwina, I nora ubun temanna raou n te reirei ao e reke te namakin ae korakora irou bwa N na riai n tibwa au kakoaua ma ngaia.

E ngae n otaraoi te iango aei, I maku. I tabeaianga bwa e na bae n rawa irou raou, riki ibukina bwa e aki tara n aekan te ataeinaine are e na iai nanona ni kani kaaina te Ekaretia.

 I iango rikaki nakon te taetae iroun Titita Mary N. Cook n te beretitentii ni kabuta n te Botaki n Ataeinaine are e kaewenakoira bwa ti na mwakuri korakora ao n ninikoria.¹ I tangiria n riki n aekan aei, ai ngaia are I a kororeta nakon te ataeinaine aio ao ni kakoaua koauan te Ekaretia ao n au tangira ibukin Ana Boki Moomon. N te bong are i mwina I karina teuana katooton Ana Boki Moomon, n ikotana ma au reta, i nanon ana baeki.

 Ni kubanakou, e rang n tautaumwaaka raou nakon te euangkerio. Ni moanakina n te bong anne, e na tuangai taekan tera are e a tia n reiakinna ni kamatebwaian Ana Boki Moomon. Tabeua te wiki i mwina, I kabwarabwara neiei nakoiia mitinare. E kuri n are boni ngkekei naba, e karekea te kamatoaki mai iroun te Tamnei ae Raoiroi bwa tera are e reiakinna e koaua. Mitinare ao ngai ti tang ngke e kaongoira ana namakin. E aki maan raou ao e bwabetitoaki, ao a mimi ana karo n nori bitaki ake a tia n riki i nanona.

 I kukurei bwa I a kona ni katoka makuu ao n ibuobuoki n uota te euangkerio nako nanon maiuna.