Kev Qhia txog txoj Moo Zoo ntawm Ib lub Siab rau Ib lub Siab

Vajtswv yuav ua kom cov neeg uas npaj siab mloog lawm los nyob rau ntawm Nws cov tub qhe uas npaj siab qhia txoj moo zoo lawm txoj kev. Koj twb tau muaj li no hauv koj lub neej los lawm. Qhov uas yuav muaj li no pes tsawg zaus yuav yog nyob ntawm koj txoj kev npaj ntawm koj lub siab thiab txoj kev xav.

Kuv muaj ib tug phooj ywg uas thov Vajtswv txhua hnub kom ntsib ib tug neeg uas npaj los txais txoj moo zoo. Nws yeej nqa rawv ib Phau Ntawv Maumoos nrog nws. Ib hmos ua ntej nws yuav mus kev deb, nws txawm txiav txim siab hais tias nws yuav tsis nqa phau ntawv tab sis nws yuav nqa ib daim me nyuam ntawv uas nws muab tau rau lwm tus neeg xwb. Tab sis thaum nws tab tom npaj yuav mus, ces txawm muaj ib qho kev tshoov siab ntawm tus ntsuj plig los rau nws hais tias: “Nqa ib Phau Ntawv Maumoos nrog koj.” Nws txawm muab ib phau rau hauv nws lub hnab.

Thaum ib tug poj niam uas nws paub los zaum ntawm nws ib sab, nws txawm xav hais tias, “Puas yog tus no?” Thaum nws rov qab los tsev tib tug poj niam ntawd rov qab nrog nws zaum ua ke los thiab. Nws tau xav tias, “Kuv yuav ua li cas pib tham txog txoj moo zoo?”

Tab sis, tus poj niam txawm hais rau nws hais tias, “Koj them ib feem kaum rau koj lub koom txoos, puas yog? Nws teb hais tias nws yeej them tiag. Tus poj niam tau hais tias nws yuav tsum them ib feem kaum rau nws lub koom txoos tab sis nws twb tsis them. Ces tus poj niam tau nug tias, “Koj qhia tau li cas txog Phau Ntawv Maumoos rau kuv?”

Kuv tus phooj ywg thiaj li piav hais tias phau ntawv yog ib phau vaj lug kub, ib zaj ua tim khawv ntxiv txog Yexus Khetos, uas tus Yaj Suab Yauxej Xamiv tau muab txhais. Zoo li tus poj niam xav paub ntxiv, ces nws thiaj li muab phau ntawv hauv nws lub hnab los thiab hais tias, “Kuv cia li xav hais tias yuav tsum nqa phau ntawv no nrog kuv. Kuv xav hais tias yog yuav muab rau koj.”

Tus poj niam cia li pib nyeem. Thaum nkawd sib ncaim, ces tus poj niam tau hais tias, “Koj thiab kuv yuav sib tham ntxiv txog qhov no nawb.”

Kuv tus phooj ywg twb paub tsis txog—tab sis Vajtswv twb paub lawm—hais tias tus poj niam no tau nrhiav lub koom txoos. Vajtswv yeej paub hais tias tus poj niam no tau pom kuv tus phooj ywg thiab xav tau tias ua cas kuv tus phooj ywg lub koom txoos ua rau nws zoo siab ua luaj. Vajtswv yeej paub hais tias tus poj niam no yuav nug txog Phau Ntawv Maumoos thiab hais tias nws xav kom cov tub txib mus qhia nws. Tus poj niam no twb npaj siab lawm. Kuv tus phooj ywg los kuj npaj lawm thiab. Koj thiab kuv yeej npaj tau thiab.

Tej kev npaj uas peb xav tau twb nyob hauv peb tej kev xav thiab lub siab lawm. Tus poj niam tau hnov thiab nco ntsoov txog cov lus uas hais txog Phau Ntawv Maumoos, tus Tswv lub Koom Txoos uas txum tim rov qab los, thiab zaj lus txib kom them ib feem kaum rau Vajtswv. Thiab nws tab tom hnov tau qhov uas ua tim khawv txog qhov tseeb hauv nws lub siab.

Tus Tswv tau hais tias Nws yuav qhia qhov tseeb rau peb tej kev xav thiab peb tej siab los ntawm tus Vaj Ntsuj Plig Dawb Huv (saib D&C 8:2). Cov neeg feem coob uas koj yuav ntsib twb tau pib npaj lawm. Lawv yeej tau hnov los sis nyeem txog Vajtswv thiab Nws cov lus lawm. Yog hais tias lawv lub siab mos siab muag, ces txawm tias yau yau xwb, los lawv yeej tau hnov kev ua tim khawv txog qhov tseeb lawm.

Tus poj niam twb npaj lawm. Kuv tus phooj ywg los yeej npaj lawm, tus Neeg Ntseeg hauv Hnub Nyoog Kawg uas tau kawm txog Phau Ntawv Maumoos. Kuv tus phooj ywg hnov tau qhov tim khawv uas muaj tseeb, thiab nws paub tias yog kev tshoov siab ntawm tus Ntsuj Plig hais kom nws nqa ib phau ntawv nrog nws. Nws tau npaj hauv nws txoj kev xav thiab nws lub siab lawm.

Vajtswv tab tom npaj cov neeg los txais koj zaj lus tim khawv txog txoj kev tseeb uas txum tim rov qab los lawm. Nws xav kom koj muaj kev ntseeg thiab tsis txhob ntshai cia li qhia txog yam uas zoo heev rau koj thiab rau cov neeg uas koj hlub.

Npaj los mus qhia los ntawm kev xav txog tej kev tseeb ntawm txoj moo zoo txhua hnub. Thaum koj ua raws li cov lus txib thiab hwm koj tej kev khi lus, ces koj yuav hnov tau tus Ntsuj Plig zaj lus tim khawv thiab yuav hnov tau tus Cawm Seej txoj kev hlub koj thiab cov neeg uas koj hlub.

Yog koj npaj lawm, ces koj yuav ntsib cov neeg uas tau npaj los mloog koj zaj lus tim khawv txog qhov tseeb—uas hais ntawm ib lub siab rau ib lub siab, ntawm koj lub rau lawv lub.