Cov Mus Saib Xyuas tom Tsev tsab Xov, Cuaj Hlis Ntuj 2012
Kev Xav Tau uas Tshwj Xeeb thiab Kev Pab Lwm Tus
Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.
Kev Ntseeg, Tsev Neeg, Kev Pab
“Lwm tus neeg yeej xav tau kev pab,” Thawj Tswj Hwm Thomas S. Monson hais, “thiab peb txhua tus yeej ua tau ib yam dab tsi pab rau lwm tus neeg. … Yog peb tsis rau siab pab lwm tus neeg, ces peb lub neej yuav tsis muaj lub ntsiab.”1
Peb cov uas mus saib xyuas tom tsev ua siab ntev kom paub zoo thiab hlub txhua tus viv ncaus uas peb mus saib xyuas. Kev pab rau cov uas peb mus saib xyuas yuav zoo heev thaum peb ua siab dawb pab lawv nrog kev hlub (saib Yauhas 13:34–35).
Peb yuav ua li cas thiaj li paub txog tej kev xav tau ntawm sab ntsuj plig thiab ntawm lub cev ntawm peb cov viv ncaus kom peb thiaj pab tau lawv thaum lawv xav tau kev pab? Peb cov uas mus saib xyuas tom tsev, peb muaj cai txais tau kev tshoov siab thaum peb thov Vajtswv txog cov neeg uas peb mus saib xyuas.
Kev tiv tauj cov viv ncaus uas peb mus saib xyuas yog ib qho tseem ceeb kawg li thiab. Mus xyuas, hu xoov tooj, sau ib tsab ntawv pab kom nws muaj kev zoo siab, sau e-mail, mus nrog nws zaum ua ke, hais lus qhuas nws, nrog nws sib tham thom lub koom txoos, pab nws thaum nws muaj mob los sis xav tau kev pab, thiab tag nrho lwm yam kev pab yuav pab peb saib xyuas thiab ntxiv dag zog ib leeg rau ib leeg.2
Twb hais lawm kom cov mus saib xyuas tom tsev yuav tsum qhia saib cov viv ncaus nyob li cas, saib lawv puas xav tau kev pab tshwj xeeb dab tsi, thiab saib tau pab lawv li cas lawm. Tej kev qhia txog tej no thiab qhia txog peb tej kev pab rau peb cov viv ncaus ua tau qhia hais tias peb yog cov thwj tim.3
Los ntawm cov Vaj Lug Kub
Yauhas 10:14–16; 3 Nifais 17:7, 9; Maulaunais 6:3–4
Los ntawm Peb zaj Keeb Kwm
Kev sib pab ib leeg rau ib leeg yeej ib txwm yog qhov tseem ceeb heev ntawm txoj kev mus saib xyuas tom tsev. Thaum peb pheej sib pab li no mus ces peb muaj kev ua siab zoo thiab ua phooj ywg zoo lawm ces tsis yog yuav tsum mus xyuas ib tug neeg txhua hli lawm xwb. Twb yog peb txoj kev xav pab uas yog qhov tseem ceeb.
Mary Ellen Smoot, Koom Haum Niam Tsev tus tuam thawj tswj hwm thib 13, tau hais tias, “Kuv xav hais kom peb cov viv ncaus tsis txhob txhawj txhawj txog qhov uas yuav tsum hu xov tooj los sis yuav tsum mus xyuas txhua peb lub hlis los sis ib hlis ib zaug.” Nws tau hais kom peb yuav tsum “rau siab tu cov neeg uas tsis muaj zog.”4
Thawj Tswj Hwm Spencer W. Kimball (1895–1985) tau qhia hais tias, “Tseem ceeb heev uas peb ib leeg yuav tsum pab ib leeg hauv lub nceeg vaj.” Tab sis txhua txoj kev pab yuav tsis tas yog tej yam loj heev kom sawv daws pom yus ua. Nws tau hais tais, “Feem ntau, peb tej kev pab lwm tus neeg yog tej yooj yim li uas pab kom muaj kev zoo siab los sis pab ua tej hauj lwm uas yus niaj hnub ua xwb, tab sis yuav muaj tej yam zoo heev los ntawm kev ua tej yam me me no!”5
© 2012 by Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, September 2012. Hmong. 10369 295
Kuv Yuav Pab Li Cas?
-
Kuv puas nrhiav kev tshoov siab kom thiaj li paub hais tias yuav pab tau txhua tus viv ncaus uas kuv yuav tsum saib xyuas li cas ntawm sab ntsuj plig thiab ntawm lub cev?
-
Cov viv ncaus uas kuv yuav tsum saib xyuas yuav ua cas paub tau tias kuv yeej txhawj txog lawv thiab lawv tsev neeg no?