Iren Mahsen en Presidensi Keieu, Epreil 2012
“E Kaiasadahr”
Kadehde en Soukohp Men
“Ngilen koronihda en Wehi Souleng Kan,” President Thomas S. Monson kasaledahr, iei me Sises en Nasared iasadahr sang mehla. Mehlelpen iasadao kiheng emenemen oh koaruhsiehn “popohl, me inenen laudsang uwen atail dehdehki” (tehk Pilipai 4:7).1
Nan ire kan me sansal pah, President Monson ehukihda sapwellime kadehde oh kapingki Iasadahn Sounkomouro oh pakairki me pwehki Iehroso eh ketin powehdi mehla, Sapwellimen Sahm serihkan koaros me kohdo pohn sampah pahn pwurehng mour.
Mour mwurin Mour en Pohn Sampah
“I kamehlele me sohte emen rehtail kak medewehda uwen kesempwal unsek en dahme Krais ketin wia ong kitail nan Kedsemeni, ahpw I kaping kalahnganiki rahn koaros en ahi mour Sapwellime tohnmetei pwehki ngehi.
“Ni keimwseklahn ansouo, E kakete ketin pweiek. Ahpw E sohte ketin pweiek. E ketila pahn mehkoaros pwe En kak komourala mehkoaros. Ni Eh ketin wia met, E ketikiheng kitail mour likin mour en pohn sampah wet. E ketin doareikitailla sang Pwupwulahn Adam.
“Lel idin loalen ngenie, I kaping kalahngankihieng Ih. E ketin padahkihieng kitail duwen atail pahn mour. E ketin padahkihieng kitail duwen atail pahn mehla. E ketin katengehdi komourpatail.”2
Keskesehsang Rotorot en Mehla
“Nan ekei irair kan, me rasehng lokolok laud oh soumwahu, mehla kin wia kalahngan ieu. Ahpw pali laud en ansou, kitail kin medewehki me mehla iei imwintihti en atail peren.
“Rotorot en mehla kak sarpeseng ansou koaros pahn marain en mehlel me pwaradahr. Kauno mahsanih, ‘Ngehi me mour sapahl, oh Sounkomour’. ‘Mehmen me pwoson ie, mehnda ma e pahn mehla, ahpw e pahn mour oh mehmen me momour oh pwoson ie sohte pahn mehla kohkohlahte.’
“Kaloalamwahu wet—ei, lella kamehlel sarawi—en mour palilahsang sousouo kakete kihda meleilei me inoupe mie sang Sounkomouro ni ansou me E ketin kaloalamwahuihki Sapwellime tohnpadahk kan: ‘I kihong kumwail popohl, pein ei popohl me I kihong kumwail, I sohte kihong kumwail nin duwen me sampah wet kin wia. Kumwail dehr nsensuwed, oh pahtou, oh masak.’”3
E Seuwer Ket Met
“Atail Sounkomouro pwurehngehr mour. Mwekid keieu lingan, kaloalamwahu, oh kapehm mwahu sang mwekid kan koaros me wiawihier nan poadoapoad en sampah—Christ eh ketin powehdier mehla. Medek oh lokolok en Kedsemeni oh Kalpweri irihrsangehr. Komourpen aramas katengtengdier. Pwupwulahn Adam kolkoldi sapahl.
“Sousou tehndao ni tepin menseng en Pahsohpao iei pasapengpen ahn Sohp peideko, ‘Ma aramas emen pahn mehla, e kak pwurehng mourda?’ Ong koaruhsiehn me kak rong ngileie, I ndaieng kumwail, Ma aramas emen pahn mehla, e pahn pwurehng mourda. Kitail ese, pwe kitail ahniki marain en mehlel me pwaradahr. …
“Riei ohl ohl lih kempoake kan, nan atail ansou en pahtou keieu loal, kitail kak alehdi meleilei loal sang mahsen en tohnlengo ni tepin menseng en Pahsohpao: ‘E seuwer ket met: pwe e kaiasadahr.’”4
Koaruhsiehn Pahn Pwurehng Mourda
“Kitail kin kouruhr, kitail kin sengiseng, kitail kin doadoahk, kitail kin mwadong, kitail kin ahniki limpoak, kitail kin mour. Oh kitail eri kin mehla. …
“Oh ni atail mehlahr ihte pahn duwetail met ma sohte Ohl men oh Sapwellime pwukoah, ih iei Sises mehn Nazaret. …
“Ni mohngiongi unsek oh ngoang en ngenie, I kihda ngileie pwehn kadehde ni duwen sounkadehde tohrohr men oh kasalehda me Koht ketin ieias. Sises iei Sapwellime, Iehros en Sahmo ni uduk. Ih atail Soundor; Ih iei Weliapatail rehn Sahmo. Iei Ih me mehla pohn lohpwuo pwehn tomwiki dipatail kan. E ketin wiahla tepin wahn Iasadao. Pwehki E ketin pwoula, kitail koaros pahn pwurehng mourda.”5
Pein Ahi Kadehde
“I kihda pein ahi kadehde me mehla lohdihier, mour me powehdier sousouo. Mahsen pwukat me kasarawihalahr sang Ih me ketin kapwaiada en wiahla mehkot me koaros ese. Taman mahsen pwukat. Kesempwaliki mahsen pwukat. Wauniki mahsen pwukat. E iasadahr.”6
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, April 2012. Pohnpeian. 10364 885
Padapadahk sang Iren Mahsen Wet
Mwurin amwail ehukipene iren mahsen kan sang mahsen en President Monson, tehk kadehde me e kihda duwen wehwe mehlel en Pahsohpa. Komw kak idek rehn towe kan en nan peneineio peidek kan me sansal pah: “Ia wehwe ong komwi me soukohp ieias men kadehdehkihier duwen mehlel pwukat rahnwet? Ia duwen omw kak doadoahngki nan ahmw mour?” Tehk ma komw kak kapatahieng omw kadehde.