2012
Poakohng, Tetehk, oh Kakehlailih
Epreil 2012

Iren Mahsen en Padahk en Pas, Epreil 2012

Poakohng, Tetehk, oh Kakehlailih

Kapakapki oh onopiki audepen iren mahsen wet, oh ni duwen me konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson, Peneinei, Sawas

Duwehte Sounkomouro, sounpadahk en pas kan kin epwel ni wad emen mwuri emen (tehk 3 Nephi 11:15). Kitail ese me kitail pweida nan atail epwel ni duwen sounpadahk kan en pas ni ansou me riatail lih akan kin nda: (1) ahi sounpadahk en pas kin seweseie keirda ni pali ngehn; (2) I ese me ahi sounpadahk en pas kin nsenohki mehlel ngehi oh ahi peneinei; oh (3) ma I ahniki kahpwal, I ese me ahi sounpadahk en paso pahn mwekid oh sohte pahn awih ien peki sawas reh.1

Ia duwen atail kak ni duwen atail wia sounpadahk en pas kei poakohng, tetehk, oh kakehlailih riatail lih emen? Me sansal pah iei kaweid duwau me dierek nan iralaud 7 en Daughters in My Kingdom: The History and Work of Relief Society pwehn sewese sounpadahk kan en pas apwalih riarail lih akan:

  • Kapakapki ih oh ah peneinei rahn koaros.

  • Rapahki kamarain sang powe pwe ken ese ih oh ah peneinei.

  • Kin kalapw pwarek ih pwe ken ese ia ire oh pwe ken kaloalamwahuih oh kakehlailih.

  • Kin kalapw tehk ih sang ni ahmw pahn kin pwarek, delepwohnih, ntinglahng, e-mailih, kadarehng text, oh mwekid en kadek tikitik kan.

  • Rahnmwahuih ni mihting kan en Mwomwohdiso.

  • Sewese ih ni ansou me e ahniki kahpwal karuwaru, soumwahu, de anahn karuwaru teikan.

  • Padahkihieng ih rongamwahuo sang nan pwuhk sarawi kan oh Iren Mahsen Kan en Padahk en Pas.

  • Kamarainih ih sang ni omw wia karasaras mwahu.

  • Repwohtlahng kaun en Pwihn en Sawas en Lih me pid arail papah oh ahn liho roson en pali ngehn oh paliwar.

Sang Pwuhk Sarawi Kan

Luk 10:38–39; 3 Nephi 11:23–26; 27:21

Sang Atail Poadoapoad

“Padahk en pas wiahlahr ahl ong lih en Souleng en Imwin Rahn nan sampah pwon en poakohng, apwalih, oh papah—ren ‘mwekid nin duwen pepehm kan me Koht ketikihieng nan kapehd[itail] kan,’ ni duwen me Joseph Smith padahngki.”2

Lih emen me liohdihla ndahki ah sounpadahk en pas kan me: “Irail kin rong. Irail kaloalamwahuih ie. Irail iang ie mwahiei. Oh irail pwoaleiehdi. … [Irail] seweseiehsang nan pahtou oh nsensuwed en tepin sounpwong kaloaloid pwuko.”3

Sawasiki doadoahk me pid pali war pil wia ehu mwohmw en epwel. Ni tiepene lap en Oaktohpe 1856, President Brigham Young pakairki me paionihr kan me seiloangki riahka tengala nan sinoh loal mwail 270–370 (kilomehder 435–595) dohsang rehrail. E poangoangki Souleng en Imwin Rahn Akan nan Salt Lake City en doareirailla irail oh en “apwaliete soahng kan me kitail kin nda me pid pali war.”4

Lucy Meserve Smith ntingiedi me lih akan kihsang arail wurohs en loale kan oh sidakin kan wasaohte nan tabernacle oh koasokehda nan kuruma kan pwehn kadaralahng paionihr kan me lemwlemwurlahr nan sinoh kan. Irail eri kihpene kepwehn meir oh likou ong irail akan me pahn leledo weuwa dipwisou malaulau. Ni ansou me pwihn en riahka kan lella, ihmw ehu nan kahnihmwo “audaudki dipwisou kan ong irail.”5

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, April 2012. Pohnpeian. 10364 885

Iren Sawas Akan

  1. Tehk Julie B. Beck, “What I Hope My Granddaughters (and Grandsons) Will Understand about Relief Society,” Liahona, Nohpempe 2011, 113.

  2. Daughters in My Kingdom: The History and Work of Relief Society (2011), 112.

  3. Daughters in My Kingdom, 119–20.

  4. Brigham Young, “Remarks,” Deseret News, Oaktohpe 15, 1856, 252.

  5. Tehk Daughters in My Kingdom, 36–37.

Dahme I Kak Wia?

  1. Ia duwen ei kak ese dahme riei lih akan anahne?

  2. Ia duwen riei lih akan ahr pahn ese me I nsenohki mehlel irail?