I Pahn Pwurehng Kilang Ih

Pahpa wia pwe emenemen kiht serihkan en kin pehm me se kesempwal. E poakohng kiht oh kin mengei en mahkehng kiht. E wia uwen ah kak koaros pwe emenemen kiht en kin peren, oh e wiahda pwe en sansal me e men sen kak alehdi dahme keieu mwahu. I poakohng ih laud mehlel.

Ni ansou me I pwihn keweneu, ahi pahpao mehla nan aksiden en sidohsa. Ngehi oh ai peneinei inenen pahtoula mehlel. Lapalahn pwoahr ehu miehda nan aht peneinei. Iei Pahpa me i kin kalapw pengieng, ih me I kin kohla reh ma I kin ahniki kahpwal. I konehngete rapahki sawas apw soh, I mweidehng lingeringer oh medek en mihmi. I kedekedeo ngehi koasoanehdi me ahn Koht sapwung met. I sohla wadek nei pwuhk sarawi kan oh pil sohla kin kapakap. Ihte me i kin kohkihla sarawi iei pwehki Nohno men ien kohla. I song en dohlahsang Semei Nanleng.

Ngehi eri kohla iang camp en Peinakapw Akan. Ehdin ahi iang. I pereniki ahi wiahda kempoakepah kapw kan, ahpw lel ansouo I saikinte kin wadek nei pwuhk sarawi kan. Ni keimwseklahn pwohngo, se wia mihting en kadehde. I pehmada mehkot me I saikinte pehmki ansou reirei: Ngehno. I kepinga serepein kan me kin kesihnenda oh kihda arail kadehde kan, ahpw I mwomwohdte pwehki I leme me sohte ahi. I wiahkintehieu pehmada me I anahne kesihnenda. I kihpeseng eweie, ngehi medemedewe dahme I pahn nda. Eri ngehi nda me I pereniki camp en Peinakapw Akan. Ngehi eri soliukda I uhd ndindaieng irail me I ese me Sises Krais ketin pwoukiniehla oh me Sahm Nanleng ketin poakohng ie oh me Mwomwohdiso wet mehlel.

I audaudikihla meleilei kapwuriamwei ehu. I kalahnganki dahme wiawio, pwehki met, I kak nda me I ese me I pahn pwurehng kilang ahi pahpao pwehki Tomw oh Iasada en Sounkomouro.