2012
Cov Ntxhais hauv Kuv lub Nceeg Vaj
March 2012

Cov Mus Xyuas tom Tsev tsab Xov, Peb Hlis Ntuj 2012

Cov Ntxhais hauv Kuv lub Nceeg Vaj

Cia li kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg, Tsev Neeg, Kev Pab

Peb yog peb Leej Txiv Saum Ntuj Ceeb Tsheej cov ntxhais. Nws paub peb, hlub peb, thiab tau npaj ib txoj hau kev rau peb lawm. Ib qho ntawm txoj hau kev ntawd yog kom peb yuav los nyob hauv ntiaj teb no kom peb yuav kawm xaiv qhov zoo es tsis xaiv qhov phem. Thaum peb txiav txim ua raws li Vajtswv cov lus txib, peb hwm Nws thiab lees paub tias peb yog Vajtswv cov ntxhais. Lub Koom Haum Niam Tsev pab peb nco qab tias peb yeej los saum ntuj los.

Lub Koom Haum Niam Tsev thiab zaj keeb kwm rau lub koom haum no ntxiv zog thiab txhawb pab peb. Julie B. Beck, lub Koom Haum Niam Tsev tus tuam thawj tswj hwm hais tias: “Vim nej yog Vajtswv cov ntxhais, nej npaj rau kev tsa nto nyob mus ib txhis thiab nej txhua tus muaj poj niam tus cwj pwm thiab ntiag tug hauj lwm. Nej tsev neeg, cov koog zej zog, lub Koom Txoos no thiab txoj kev cawm seej yuav vam meej nyob ntawm seb nej rau siab ntseeg npaum li cas. … [Peb Leej Txiv Saum Ntuj Ceeb Tsheej] xav kom lub Koom Haum Niam Tsev yuav pab txhawb nqa Nws cov neeg thiab npaj lawv los txais yuav cov koob hmoov ntawm lub tuam tsev. Nws txhim tsa lub [Koom Haum Niam Tsev] kom pab Nws cov ntxhais ua Nws txoj hauj lwm thiab kom lawv pab txhim tsa Nws lub nceeg vaj thiab ntxiv zog rau tej yim neeg hauv Xi-oos.”1

Peb Leej Txiv Saum Ntuj Ceeb Tsheej tau muab hauj lwm rau peb ua los pab txhim tsa Nws lub Nceeg Vaj. Nws kuj tau muab tej yam txiaj ntsim ntawm sab ntsuj plig rau peb xwv kom peb yuav muaj cuab kav ua txoj hauj lwm ntawd. Dhau ntawm lub Koom Haum Niam Tsev, peb muaj cib fim los siv peb tej txiaj ntsim no los ntxiv dag ntxiv zog rau peb tsev neeg, pab cov neeg uas xav tau kev pab, thiab kawm seb peb yuav tsum ua Yexus Khetos cov neeg pab coj li cas.

Thawj Tswj Hwm Dieter F. Uchtdorf, tus Pab Cuam Thib Ob hauv Thawj Pawg Thawj Tswj Hwm, hais txog txoj kev ua ib tug pab coj hais tias: “Thaum ua siab ntev txog kev ua ib tug neeg pab coj, peb qhia hais tias peb muaj kev ntseeg npaum li cas thiab peb xum muaj lub siab xav ua raws li Vatjswv lub siab nyiam tsis ua raws li peb lub siab nyiam.”2

Cia peb nco qab ntsoov tias peb yog Vajtswv cov ntshais thiab sim ua neej nyob ua Nws ib co neeg pab coj. Thaum peb ua li no, peb yuav pab txhim tsa Vajtswv lub nceeg vaj hauv ntiaj teb no thiab rais los mus ua neeg uas tsim nyog rov qab mus nrog Nws nyob.

Los ntawm cov Vaj Lug Kub

Xakhaliyas 2:10; Lus Qhuab Qhia thiab Kev Khi Lus 25:1, 10, 16; 138:38–39, 56; “Tsev Neeg: Ib zaj Lus Tshaj Tawm rau lub Ntiaj Teb” (Liahona thiab Ensign, Kaum Ib Hlis Ntuj 2010, 129)

Los ntawm Peb zaj Keeb Kwm

Thaum lub Plaub Hlis Ntuj hnub tim 28, 1842, tus Yaj Saub Yauxej Xamiv hais rau cov muam hauv lub Koom Haum Niam Tsev hais tias: “Nim no nej nyob hauv ib qho chaw uas cia nej muaj cuab kav ua raws li nej lub siab nyiam uas yog tej uas Vajtswv twb cog hauv nej lub siab lawm. … Yog tias nej ua neej raws li nej tej cai, yuav txwv tsis tau cov tim tswv los ua nej tus khub.”3

Thaum pom lub hwj chim ntawm lub Koom Haum Niam Tsev uas yog kev pab lwm tus neeg thiab pab tib neeg haj yam muaj kev ntseeg, Zina D. H. Young, lub Koom Haum Niam Tsev tus tuam thawj tswj hwm, cog lus rau cov viv ncaus hauv xyoo 1893 tias, “Yog nej yuav nrhiav puag sab hauv nej lub siab, thiab yog tus Tswv tus Ntsuj Plig pab ces, nej yuav pom lub hlaws uas muaj nuj nqis, uas yog zaj lus tim khawv txog txoj hauj lwm no.”4

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, March 2012. Hmong. 10363 295

Lus Cim

  1. Julie B. Beck, “‘Daughters in My Kingdom’: The History and Work of Relief Society,” Liahona, Kaum Ib Hlis Ntuj 2010, 112, 114.

  2. Dieter F. Uchtdorf, “The Way of the Disciple,” Liahona, Tsib Hlis Ntuj 2009, 76.

  3. Joseph Smith, hauv History of the Church, 4:605.

  4. Zina D. H. Young, “How I Gained My Testimony of the Truth,” Young Woman’s Journal, Plaub Hlis Ntuj 1893, 319.

Kuv Yuav Pab Li Cas?

  1. Kuv yuav ua li cas pab kuv cov viv ncaus ua tau raws li lawv lub peev xwm vim lawv yog Vajtswv cov ntxhais?

  2. Kuv yuav ua li cas muab cov lus ntuas thiab lus ceeb toom rau cov poj niam hauv phau Lus Qhuab Qhia thiab Kev Khi Lus 25 rau hauv kuv lub neej?