Vim Li Cas Peb thiaj Xav Tau cov Yaj Saub?

Vim hais tias Leej Txiv Saum Ntuj Ceeb Tsheej hlub Nws cov me nyuam, Nws tsis tau tso lawv tseg thaum lawv ua lub neej uas txawj tuag no nws tseem qhia thiab coj lawv txoj hau kev. Peb Leej Txiv Saum Ntuj Ceeb tsheej tej kev qhia yeej tsis zoo xws luag li, tsis yog tej yam uas yus xam tau, los yog tej uas yus nrhiav tau hauv ib phau ntawv uas yuav lam yuav hauv ib phau ntawv muag ntawv xwb. Lawv yog ib tug Neeg uas nyob saum ntuj ceeb tsheej uas hlub Nws cov me nyuam, Nws muaj hwj chim txhua nrho thiab tau qhia tej kev txawj ntse no. Nyob hauv Nws tej lus qhia yeej muaj tej yam uas neeg tsis paub txog hauv txhua tiam neeg—uas yog lub hauv paus hauv ntsis rau txoj kev zoo siab hauv lub neej no thiab hauv lub neej tom ntej.

Leej Txiv Saum Ntuj Ceeb Tsheej qhia txoj kev txawj ntse no rau Nws cov me nyuam hauv ntiaj teb no dhau los ntawm Nws cov tub qhe uas yog cov yaj saub (saib Amaus 3:7). Txij thaum Adas nyob hauv ntiaj teb no los, Vajtswv hais lus rau Nws cov me nyuam dhau los ntawm cov neeg uas Nws xaiv cia es lawv raug txib los qhia seb Nws xav li cas thiab kom qhuab ntuas lwm leej lwm tus. Cov yaj saub raug kev tshoov siab los ua cov xib hwb thiab yog neeg uas ua tim khawv tshwj xeeb txog Yexus Khetos (saib Q&K 107:23). Tsis yog hais tias cov yaj saub hais lus rau cov neeg hauv lawv lub caij lub nyoog xwb, tiam sis lawv kuj hais lus rau tib neeg hauv txhua lub caij nyoog. Tib neeg hauv ntau tiam neeg yeej hnov lawv lub suab hu los ua tim khawv seb Vajtswv xav kom Nws cov me nyuam yuav ua li cas.

Niaj hnub no yeej tsis txawv tej tiam neeg thaum ub. Tus Tswv yeej hlub cov neeg hauv peb lub caij lub nyoog ib yam nkaus li Nws hlub cov neeg ntawm tej tiam neeg thaum ub. Ib txoj xov zoo kawg nkaus ntawm txoj Kev Muab Yexus Khetos lub Koom Txoos Txum Tim Rov Qab Los twb yog txoj xov uas qhia tias Vajtswv tseem hais lus rau Nws cov me nyuam! Nws tsis tau khiav nkaum saum ntuj ceeb tsheej tiam sis niaj hnub no los Nws hais lus ib yam li Nws tau hais lus yav thaum ub.

Ntau yam uas tus Tswv qhia Nws cov yaj saub twb yog pab kom peb txhua tus thiab tej xam khoo yuav tsis muaj kev tu siab li. Thaum Vajtswv hais lus, Nws ua li ntawd kom thiaj qhia, txhawb nqa, kho, thiab ceeb toom tau Nws cov me nyuam. Thaum tib neeg thiab tej xam khoo tsis quav ntsej lawv Leej Txiv Saum Ntuj Ceeb Tsheej tej lus qhuab qhia, lawv thiaj muaj feem raug tau kev cov nyom, kev tsim txom thiab kev nyuaj siab.

Vajtswv hlub tag nrho Nws cov me nyuam. Yog vim li ntawd Nws rau siab ntso taij thov peb los ntawm Nws cov yaj saub. Ib yam nkaus li peb xav kom cov neeg uas peb hlub yuav tau tej yam zoo, Leej Txiv Saum Ntuj Ceeb Tsheej xav kom peb tau tej yam zoo thiab. Yog vim li ntawd Nws cov lus qhuab qhia thiaj tseem ceeb thiab tej thaum muaj kam ceev. Yog vim li ntawd niaj hnub no Nws tsis tau tso peb tseg tiam sis nws tseem qhia peb los ntawm Nws cov yaj saub seb Nws xav li cas. Peb txoj hmoov thiab lub ntiaj teb no txoj hmoov nyob ntawm seb peb puas yuav mloog lus thiab ua raws li Vajtswv txoj lus uas Nws qhia rau Nws cov me nyuam.

Vajtswv tej lus qhia rau tib neeg sawv daws uas muaj nuj nqi nyob rau hauv phau vaj lug kub Npaiv Npaum, Phau Ntawv Maumoos, phau Lus Qhuab Qhia thiab Kev Khi Lus, thiab phau Hlaws uas Muaj Nqi. Ntxiv rau cov no, tus Tswv hais lus rau peb dhau los ntawm Nws cov tub qhev, yam li Nws yuav ua dua hauv lub tuam rooj sab laj tom ntej no.

Rau nej cov uas xav paub seb puas muaj li—thiab tej zaum yuav nug hais tias, “Niaj hnub no Vajtswv puas hais lus rau peb?”—kuv thiaj hais tag siab tag ntsws kom nej yuav “los thiab saib” (Yauhas 1:46). Nyeem Vajtswv tej lus uas nyob hauv cov vaj lug kub. Ua tib zoo cuab pob ntseg mloog tej lus hauv lub tuam rooj sab laj uas twb yog Vajtswv lub suab hu dhau los ntawm Nws cov yaj saub hauv lub caij nyoog kawg no. Los, mloog, thiab qhib nej lub siab lub ntsws! Vim yog nej nrhiav “nrog lub siab dawb paug, nrog txoj kev thov tiag tiag, muaj txoj kev ntseeg Khetos, [Vajtswv] yuav ua kom nej paub qhov tseeb ntawm tej ntawd, los ntawm lub hwj chim ntawm tus Vaj Ntsuj Plig Dawb Huv” (Maulaunais 10:4). Los ntawm thiab dhau ntawm lub hwj chim no, kuv thiaj paub tias Yexus Khetos muaj sia nyob thiab coj Nws lub Koom Txoos dhau los ntawm ib tug yaj saub uas muaj sia nyob, uas yog Thawj Tswj Hwm Thomas S. Monson.

Cov kwv tij cov muam es, niaj hnub no Vajtswv tseem hais lus rau peb. Thiab Nws xav kom tag nrho Nws cov me nyuam yuav mloog thiab ua raws li Nws hais. Thaum peb ua li no, tus Tswv yuav foom koob hmoov thiab txhawb nqa peb, hauv lub neej no thiab hauv lub neej tom ntej tib si.