Tus Yaj Saub uas Muaj Sia Nyob Coj Peb Txoj Hau Kev

Thaum kuv muaj 16 xyoo, kuv muaj cib fim mus koom lub tuam rooj sab laj es yog thawj zaug kuv tau zaum hauv chav tsev rau rooj sab laj. Kuv tsev neeg nyob hauv lub xeev Oregon tim sab hnub poob hauv teb chaw Amelikas, thiab peb tau tsav tsheb mus tim Utah yuav koom lub rooj sab laj thiab xa kuv tus nus hlob mus nyob hauv qho chaw qhia cov tub txib.

Kuv tau mus koom lub rooj sab laj muaj lub siab xav tau tus Vaj Ntsuj Plig Dawb Huv txoj kev cob qhia. Yog li ntawd, kuv thiaj tau kev tshwm sim los ntawm tus Vaj Ntsuj Plig uas nyaj kuv yuav tsis tau txais yog tias kuv tsis tau ua tib zoo npaj tos.

Nyob hauv ib tuas, sawv daws tau sawv ntsug thiab hu zaj nkauj hu ua “Coj Peb Kev, Au tus Yehauvas uas Zoo Kawg Nkaus.” Thaum peb hu nkauj ntawd, kuv tau kev tshoov siab kom kuv tsa qhov muag saib ib ncig lub Tsev Rau Rooj Sab Laj. Kuv tau ua li ntawd thiab xav tsis thoob vim muaj ntau txhiab leej neeg uas sib koom siab tsa suab hlo qhuas Vajtswv.

Thaum ntawd ces kuv xav tias kuv zoo li Nifais thaum nws ua yog toog pom tsob ntoo uas cawm tib neeg txoj sia, vim tus Ntsuj Plig qhia kuv tias, “Saib seb” (saib 1 Nifais 11–14). Kuv tau ntsia Thawj Tswj Hwm Thomas S. Monson thiab tau kev tshoov siab hais tias lub Koom Txoos yeej koom ib siab ntawd vim peb muaj ib tug yaj saub uas muaj sia nyob uas coj peb txoj hau kev. Dhau los ntawm tus Vaj Ntsuj Plig Dawb Huv txoj kev ua tim khawv ntawd, kuv thiaj paub tias Thawj Tswj Hwm Monson yog tus yaj saub tseeb rau peb lub caij nyoog, thiab kuv paub tias Yexus Khetos coj lub Koom Txoos no dhau los ntawm nws.