Iren Mahsen en Presidensi Keieu, Mahs 2011
Raparapahki me Mwahuo
Ni ara raparapahki imwara me kapw, pwopwoud pwulopwul en Souleng en Imwin Rahn Akan koasoaieng aramas akan me kakete en wiahla mehn mpara oh peidengki duwen kahnihmwo oh sukuhl kan en wasao.
Emen lih me re lokaiahieng ndahki imwen sukuhl me nah serihko kin iang towe: “Wasaht inenen kaselel douluhl! Principalo wia ohl mwahu oh kaselel men; sounpadahk kan koaros inenen koahiek, kadek, oh mwahu. I inenen pereniki me nait serihkan kin iang towe imwen sukuhl kaselel wet. Kumwa pahn pereniki kousoan wasaht!”
Emen lih tohrohr ndahki wasa me nah serihko kin sukuhl: “Wasa sakanakan ehu met. Principalo kin tetehkete pein ih; sounpadahk kan soakoahiek, sohte mwahu oh sohte kadek. Ma I kak pwainda imwei ekis wasa tohrohr, I pahn wia ni ansou karuwaru!”
Me ke pahn tehk mwahu iei me lih riemeno koaros wie koasoakoasoaia principal emente, sounpadahk kan te oh imwen sukuhl ehute.
Ke tehkehr me aramas kin kak diar dah me re raparapahki? Rapahki mwahu, oh ke pahn diarada koaros me suwed oh me mwahu rehn kerenieng aramas koaros oh nan sohte lipilipil mehkot. Ihte soahng wet me aramas akan kin wiahieng Mwomwohdiso en Sises Krais en Souleng en Imwin Rahn Akan sangete ni tapio. Irail akan me kin rapahki me mwahu pahn diar aramas me kadek oh limpoak—aramas me poakohng Kauno oh inangih en papah Ih oh kapaida mour kan en iengarail aramas akan. Ahpw mehlel me irail akan me pahn pil rapahki me suwed pahn uhdahn diar soahng kan me sohte nohn mwahu.
Kasuwediho, ekei pak soahng wet kin pil wiawi nan Mwomwohdiso. Sohte imwin mai en wiahda, mai en medewehda, oh ngihtehtehn irail akan me kin rapahki kahrepe kan en kawe. Irail sohte kak en mweidala arail men kolokol lingeringer. Irail kin lipahned oh diar souitar akan en mehteikan. Irail kin kolokol arail nsensuwed erein sounpar ekei, raparapahki ansou mwahu koaros en kawe oh kihdi mehteikan. Met sohte wia mehkot me Kauno ketin kupwuriki, “pwe wasa me peirin oh mehwo kin mie, iei wasao me pingiping oh soangen suwed koaros pil kin mi ie” (Seims 3:16).
President George Q. Cannon (1827–1901) dehdehki mwahu President Brigham Young (1801–77), sang ni eh kin iangih doadoahk erein sounpar tohto, koaros ni eh wia emen tohn Pwihn en Wahnpoaron Ehk-riemeno oh ni duwen eh wia nah sounsawas nan Presidensi Keieu. Mwurin mehlahn President Young, President Cannon ntingihdi nan nah pwuken ketemen de journal: “I sohte pak ehu kawe de diar souitar nan ahn [Brigham Young] mwekid, ah kaweid de ah padahk kan ni sohte lipilipil ansou ehu nan mohngiongi de pil ni ei lokaia de mwekid. Met wia mehkot kaperen ongie met. Madamadau me i ahniki ansou koaros iei met: Ma I pahn kawe de diar souitar reh, de kadeik Riei Ohl Brigham, I pahn kohla lao lel iawasa; ma I pahn tepida, ia wasa me I pahn uhdi? I sohte kak likih pein ngehi ong soangen mwekid wo. I ese me pwupwila kin kalapw pwarada sang ni ahnehda ngehn en mwahuki kawe de rapahki souitar rehn emen tohrohr. Ekei tohrohr, me ahniki kehlail, loalokong oh koahiek laudsang pein ngehi, mwein kak wia soahng tohto oh pitisang imwi suwed kan en soangsoangen mwekid me i sohte kak lemehda ien wia.”1
Ahn President Cannon kaweid kehlail wet wia mehkot me kitail koaros towe kan en Mwomwohdiso kak en medewe ni keneinei. Mahsen en Koht kin kaweidiki tohnpadahk kan en Krais en “mwakelekel, … kansenamwahu, kapohl, oh kompoake me kin diren kalahngan oh kin kahrehda wiewia mwahu tohtohie, e sohte kin lipilipilki aramas, oh sohte kin mwalaun.” Ong irail akan me kin kamwahu, “doadoahk en kamwahu kin kamwerehdi ni popohl” (Seims 3:17, 18).
Kitail ahniki pilipil. Kitail kak rapahki me suwed rehn mehteikan. De kitail kak kamwahuih oh doadoahk pwehn kapahieng mehteikan wehwe, pwuhng pahrek, oh mahk me kitail pil inenen anahne inangih mehlel ong pein kitail. Iei atail pilipil; pwe sohte lipilipil me kitail rapahki, iei me kitail uhdahn pahn diar.
© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen First Presidency Message, March 2011. Pohnpeian. 09763 885
Padapadahk sang Nan Iren Mahsen Wet
“Komw mwein kak en medewe me komw sohte ahniki wehwehn ehu sohte lipilipil padahk me komw kaukaunopohng padahngki” iren sawas akan Teaching, No Greater Call ([1999], 19). “Ahpw mehnda met, ni omw pahn onopiki ni kapakap, nanti en mouriki, kaunopada en padahngki, oh eri ehukihieng mehteikan, pein omw kadehde pahn kakehlail oh loalla.”
Ni omw pahn rapahki me mwahu nan mour oh rehn mehteikan nan sounpwong wet, komw pahn ahpwete onop en padahngki padahk wet oh kadehde duwen eh mehlel.