Dah Me Mwahu nan Ngelingel en Kidi

Nan summer en 2009, nein kompoakapahi men nah kidi ngalisdi meseie. Kasuwedpe, ngelingelo kawehla kilin eweie, oh i anahne kohla nimwen wini pwehn deideipene.

Mwurin ohlao, I udahn mwoarosala. I mweidehng kasongosongo en audehla ahi madamadau kan, oh i pehm me ahi mour pwon sohlahr mwahu. I kin namenengki kilin eweie oh sohte douluhl men kohla nanpwungen aramas. Nan ahi madamadau ahi koasoandi kan ong piano, volleyball, sarawi, pampap, oh sukuhl solahr pahn pweida pwehki ahi ohlao.

Ahpw ansou koaros me i kin kapakap, alehdi kapai kan en priesthood, koasoaieng ahi pahpa nohno, de kin tuhweng ahi peneinei oh kompoakapahi kan, ngeni kin kehlailda oh I kin kehn peren nan ansoun nsensuwed wet. I mwadangete pil esehda me ma aramas akan kin wie medemedewe ahi ohlao, ihme re wia re poakeiehla.

Irair wet kakehlailihie, oh I esehla en sohte nohn pwunodiki dah me aramas teikan pahn medemedewehkinie. I pil kapaida pwehki ahi ohlao seweseie en esehla me I konehng sohte nohn medemedewe pein ngehi oh uhd apwahpwalih mehteikan. Ngehniet inenen kakehlaila nan ansou wet.

I esehla me kasongosong wia kisehn sapwellimen Sahm Nanleng koasoandi ong kitail. Ma kitail pahn rapahki me mwahu oh kaidehn me suwed, kitail kak powehdi kasongosong oh wiahla aramas me mwahusang mahs, oh mweidehng irair wo en kakehlailih atail kadehde.