2011
Pahn Kaweid en Priesthood oh Idawehn Koasoandi en Priesthood
March 2011

Iren Mahsen en Padahk en Pas, Mahs 2011

Pahn Kaweid en Priesthood oh Idawehn Koasoandi en Priesthood

Onopiki iren mahsen wet, oh ni duwen eh pahn konehng koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Relief Society seal

Pwoson • Peneinei • Sawas

Riei lih kempoake kan, ia uwen atail pai! Kaidehnte kitail wia tohn Mwomwohdiso wet, ahpw kitail pil wia tohn Pwihn en Sawas en Lih—“sapwellimen Kauno pwihn ong lih.”1 Pwihn en Sawas en Lih wia kasansalepen sapwellimen Koht limpoak ong Sapwellime lih akan.

Omw mohngiong sou kin perenda ni omw kin tamanda tepida kaperen kan en pwihn wet? Ni Mahs 17, 1842, Soukohp Joseph Smith koasoanehdi lih akan “pahn kaweid en priesthood oh idawehn koasoandi en priesthood.”2

Pwehn koasoandi “pahn kaweid en priesthood” kihieng lih akan mweimwei oh kaweid. Eliza R. Snow, keriau en president lap en Pwihn en Sawas en Lih, padahngki me Pwihn en Sawas en Lih “sohte kak en uhtohrda kelehpw tohrohrsang Priesthood, pwehki mweimwei oh kehlail koaros en pwihn wet kin kohsang pwihn wo.”3 Elder Dallin H. Oaks en Pwihn en Wahnpoaron Ehk-riemeno kawehwe, “Manaman me pahn doadoahk rehn kaun kan oh sounpadahk kan en Pwihn en Sawas en Lih … iei manaman me pahn peidohng irail sang arail koasoandi sang Mwomwohdiso en Sises Krais en Souleng en Imwin Rahn Akan oh sang ni arail emenemen alehdi kamanaman sarawi ni peh kan en kaun kan en priesthood me malipe irail.”4

Pwehn koasoandi “pahn kaweid en priesthood” kihieng lih akan pwukoa sarawi kan. Julie B. Beck, president lap en Pwihn en Sawas en Lih kawehwe: “Kitail kin mwekid ni mwohmw en priesthood—me wehwehki kitail kin rapahki, alehdi oh mwekidki kaudiahl; wiahda koasoandi kan nan pwihn; oh tehkada mwahu aramas akan ni emenemen. Atail iei kahrepen priesthood en kaunopada pein kitail ong kapai kan en mour soutuk sang ni wiahda oh kolokol inou sarawi kan. Eri, duwehte riatail ohl akan me kin kolokol priesthood, atail iei doadoahk en komour, papah, oh wiewiahla aramas sarawi kei.”5

Barbara Thompson, sounsawas keriau nan presidensi lap en Pwihn en Sawas en Lih.

Sang Nan Pwuhk Sarawi Kan

1 Korint 11:11; Doctrine and Covenants 25:3; 121:36–46

Sang Atail Poadoapoad

Ansou me doadoahk en kauwada Nauvoo Temple wihwiawi, pwihn en lih akan inangih en koasoanehdi pein irail pwehn sewese doadoahko. Eliza R. Snow ntingihda kosonned akan ong pwihn kapw wet. Ni ansou me e kasalehieng Soukohp Joseph, e sapengki: “Ndahieng lih akan me arail meiroang wet kupwur kaperenih Kauno, oh e ahniki mehkot me ahpwete mwahusang ong irail. … I pahn koasoanehdi lih akan pahn kaweid en priesthood pwehn idawehn koasoandi en priesthood.”6 Ansou kis mwuri, Soukohpo ndahieng Pwihn en Sawas en Lih me ahpwtehn koasoansoandio: “Met I pahn kapir kih wet ong kumwail ni mwaren Koht, oh Pwihn wet pahn kaping, oh wehwe oh loalokong pahn pwilido tepida sang ansou wet.”7 Kesikpe mie me lih akan pahn keirda lel ehu irair en sarawi oh en kaunop ong tiahk sarawi kan en priesthood me pahn kerenieng kohda nan tehnpas sarawio.

© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen Visiting Teaching Message, March 2011. Pohnpeian. 09763 885

Iren Sawas Akan

  1. Spencer W. Kimball, “Relief Society—Its Promise and Potential,” Ensign, Mahs 1976, 4.

  2. Joseph Smith, quoted in Sarah Granger Kimball, “Auto-biography,” Woman’s Exponent, Septempe 1, 1883, 51.

  3. Eliza R. Snow, “Female Relief Society,” Deseret News, Epreil 22, 1868, 81.

  4. Dallin H. Oaks, “The Relief Society and the Church,” Ensign, Mei 1992, 36.

  5. Julie B. Beck, “Relief Society: A Sacred Work,” Liahona, Nohpempe 2009, 111.

  6. Joseph Smith, ah lokaia ni eh sansal nan Kimball, “Auto-biography,” 51.

  7. Teachings of Presidents of the Church: Joseph Smith (2007), 451.

Dah Me I Kak Wia?

  1. Ia duwen ahi kak sewese lih akan me I kin pwarek en ahniki kapai kan en doadoahk sarawi kan en Pwihn en Sawas en Lih?

  2. Dah me I pahn wia nan sounpwong wet pwehn kalaudehla ahi koahiek en alehdi pein ahi kaudiahl?