Iren Mahsen en Presidensi Keieu, Oakos 2010
Kapai Kan en Tehnpas Sarawi
I tamatamante ansou me aht pahpa nohno kin wahda aht peneinei kohla ni Tehnpas Sarawi en Switzerland me ahpwtehn kokouda, keieu nan Europe, pwehn wiahla peneinei soutuk. I sounpar 16 ansouo oh ngehi me keieu pwulopwul nanpwungen kiht seri pahmen. Se patpene kelepwikihdi ni pehio pwehn katengtengdi pohn sampah sang ni manaman en priesthood, me patehng inou kaselel me se kak katengteng erein. I sohte kak manokehla ansou kaselel kiset.
Ni ei kisin pwutak I inenen pil wadekala me se kotehla lain kan en sahpw teikan pwehn katengtengdi ni duwen peneinei ehu. Ong ie e wia karasaras en duwen doadoahk en tehnpas sarawi eh kin kotehla lain kan en sampah pwehn wahdo kapai soutuk kan ong towe kan koaros en sampah. Tehnpas sarawi kan en Mwomwohdiso en Sises Krais en Souleng en Imwin Rahn Akan kokouda mehlel ong kapaipen sampah, mehndahte wehi, tiahk, de madamadau.
Tehnpas sarawi kan wia kadehde sansal me sohte kak pweiekdi me mwahu pahn pweida. President George Q. Cannon (1827–1901), Sounsawas Keieu nan Presidensi Keieu, mahsanih, “Koaros takain pwukekeimw me kohdi ong Tehnpas Sarawi, oh koaros Tehnpas Sarawi me kin nekila … kin katikala kehlail en Sehdan pohn sampah, oh kalaudehla manaman en Koht oh Duwe Koht.”1
Ni ansou me ehuehu tehnpas sarawi kin kalaudehla lipwen mwahu nan sampah, kapai keieu lap akan, ni mehlel, kin kohdohng irail akan me kin towehda tehnpas sarawi. Wasao kitail kin alehdi doudoulahn kamarain oh wehwe oh wiahda inou kesempwal sarawi kan me, ma kitail pahn idawehn, pahn sewese kitail alu nan ahl en tohnpadahk. Ni mwotomwot, tehnpas sarawi kin padahkihieng kitail duwen kahrepe sarawi en mour oh sewese kitail esehda duwen mehlelpen pein kitail ni pali ngehn oh paliwar.
Ahpw kitail sohte kin towehda tehnpas sarawi pwehki pein kitail kelehpw. Ansou koaros me kitail kin pidolong nan tehnpas sarawi pwukat, kitail kin iang wia kisehn doadoahk sarawi, en kadoandoar me kohda ong koaros sapwellimen Koht serihkan me iei lipwen Tomw en Sapwellimen Sahm Iehroso. Met kin wia doadoahk en meiroang me sarawi me kin mweidehng kitail nin duwen aramas kan en iang apwalih doadoahk kaselel en wia sounkomour pohn Nahna Saion.
Ong irail me sohte kak towehda tehnpas sarawi met pwehki kahrepe sohte lipilipil, I kangoange kumwail en wia uwen amwail kak koaros en kolokol kisin likoun mweimwei ong nan tehnpas sarawi. Kisin likoun mweimwei ong nan tehnpas sarawi wia kasansal en atail loaloapwoat oh poadedi en papah Kauno. E wia kasansal en atail limpoak ong Kauno, pwe duwen me Sises ketin padahngki, “Mehmen me kin rong oh kapwaiada ei kosonned akan, iei ih me kin poakohng ie. Semei pahn loalloale mehmen me kin poakohng ie, oh I pil pahn poakohng, oh kasalehiong pein ngehi” (Sohn 14:21).
Ansou me sampah pahn doudoula oh kapwatiki tehnpas kaselel pwukat me kasarawi ong Kauno, e wia ahi kapakap me kitail pahn wia atail pali en wahdo nanleng en ekis kerendohng sampah ni atail pahn warohng en kolokol kisin likoun mweimwei ong nan tehnpas sarawi oh en doadoahngki. Ni atail pahn wia met, mour mwahu pahn uhdahn laudila kaidehnte nan pein atail mour oh nan imwatail kan ahpw nan atail kousapw kan oh wasa koaros nan sampah.
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen First Presidency Message, August 2010. Pohnpeian. 09368 885
Padapadahk sang Nan Iren Mahsen Wet
Pali laud en aramas kin esehda mehkot mwahu oh tamataman werei ni ansou me komw pahn kasalehda omw padahk ni doadoahngki kilel kasansal kan oh kaidehn en wie koasoakoasoaite (tehk Teaching, No Greater Call [1999], 182). Erein padahko, medewe komwi en kasalehda ehu kilel en tehnpas sarawi. Mwurin omw pahn wadek ire wet, koasoaia dahme kahrehda tehnpas sarawi nohn kesempwalong President Uchtdorf. Luke seri pwulopwul kan nan peneineio en mahlenihda ehu kilel en arail peneinei ni tehnpas sarawio.
Teaching, No Greater Call mahsanih, “Kangoange irail akan me komw kin padahkih en wiahda ehu de riau koasoandi me kak sewese irail en momouriki tepin padahk me komw padahkihier” (159). Medewe komwi en wadek ahn President Uchtdorf padahko ong peneineio oh luke tohn peneineio en ntingihdi ehu pein arail koasoandi me pahn sewese irail en kolokol arail warohng en naineki oh doadoahngki ehu kisin likoun mweimwei ong nan tehnpas sarawi.