Iroir Sang Wasa Ileile

Ni ahi pwulopwulo I ahniki ansou mwahu tohto en kapwaiada pepdais kan ong me melahr nan Tehnpas Sarawi en San Diego California. Ansou koaros I kin ahniki irair mwahu, ahpw ehu ansou I tamataman sansal sang ansou teikan.

I sounpar 16, oh riei serepein tikitiko ahpwtehn lel sounpar 12 oh iei ehd en eh pahn kohlahng wia pepdais kan ong me melahr akan. Pwehki met eh wia ehd en ah kohdo, se koasoanehdi en alu pidakihpene likin tehnpas sarawio mwurin aht nekiero.

Likin tehnpas sarawio mie wasahn iroir riau apali tehnpaso, eri kiht aluhla wasao. Pwehki Tehnpas Sarawi en San Diego mih limwahn ahl lap pwoat me inenen kin kedirepw, ansou me ke pahn kohlang iroir, ke pahn kilikilengdieng ahl lapo.

Rahno ni ahi keskesihnen pohn wasa ile en tehnpas sarawio I ahnikihda madamadau kapw ehu me pid mour. I kilikilengdieng sampah me audaudiki sidohsa marahra kan, wasahn netinet kan me diren aramas, oh sain kan pohn ahl me aramas ntingmwahlihseli wasa koaros powe.

Ih ansouo me madamadau ehu kohdohng nan moangeie: “Ke sohte men wia kisehn mwo; kaidehn ih wehwehn mouro met.” I kin ansou koaros padahngki me kahrepen mour iei en pwurala mour rehn Samatail Nanleng oh en duwehla Ih. I ese me I sohte anahne dipwisou kan en sampah pwehn kapwaiada kahrepe wo.

I pirekekla oh kilengdalahng tehnpas sarawi kaselelo, oh I kaping kalahnganiki wehwehpen rongamwahuo oh madamadau me e kihieng ie. I ese me nan eilepen pingiping oh keper en sampah, I diarada wasa me ileile ien kesihnen powe.

Rahno ni tehnpas sarawio I inoukihieng Semei Nanleng me I pahn ansou koaros kesihnen ni Sapwellime pali oh kaidehn pali en sampah. Sohte lipilipil me sampah pahn katehkin kitail, kitail kak powehdi sang ni kolokol inou sarawi kan me kitail wiadahr oh sang ni keskesihnen nan wasa sarawi kan (tehk D&C 87:8).