Kalaudehla Pwoson oh Pein Ahmw Mour Mwahu

Aiseia 2:2–3; D&C 109:22–23; 110:8–10

“Inou sarawi kan me kitail kin wiahda iangahki pelie tiahk sarawi kan me kitail kin alehda nan tehnpas sarawi wia kisehn me anahn pwehn patohla rehn Koht. Inou sarawi pwukat kin pwekada kitail daulih idin pein atail manaman oh madamadau. Kitail kin wiahda inou sarawi kan pwehn kasalehda atail loaloapwoat ong kauwada wehio. Kitail kin wiahla aramas inou ansou me kitail kin mih pahn inou sarawi rehn Koht. Koaros kapai inou kan iei atail sang ni atail loaloapwoatohng inou pwukat. …

“”Dahme lih akan en Mwomwohdiso kak wia pwehn alehdi kapai kan en tehnpas sarawi?

“Sang Sapwellime soukohp akan, Kauno ketin luke irail akan me saikinte alehdi kapai kan en tehnpas sarawi en wia sohte lipilipil me re anahne wia pwehn warohng alehdi. E kin luke irail akan me alehdier kapai pwukat en pwurala uwen arail kin kak pwehn pwurehng alehdi ansou mwahu en pwurehng paieki irairo, en kalaudehla arail kilikilang oh wehwehki Sapwellime pilahn poatoapoat.

“Kitail en warohng kolokol kisin likoun mweimwei en pidolong nan tehnpas sarawi. Kitail kohla ni tehnpas sarawi pwehn katengehdi atail peneinei kan ong mour soutuk. Kitail pwurala ni tehnpas sarawi ni uwen me irair kan me kitail mih loale kak mweidada. Kitail kihieng kadaudokatail me mehlahr akan ansou mwahu en alehda tiahk sarawi kan en lapalapala. Kitail en paieki kehlail en pali ngehn oh kaudiahl me kitail kin alehdi ni atail kin kalapw towe tehnpas sarawi. Kitail en loaloapwoat oh wiahda oh kolokol inou kan en tehnpas sarawi pwehn alehdi kapai unsek kan en Tomwo.”¹

President Gordon B. Hinckley (1910–2008) padahngki me Pwihn en Sawas en Lih kokouda sang ni lih akan arail inangih en kaudok nan tehnpas sarawi kan:

“Erein ansoun koadoahkpen Tehnpas Sarawi en Kirtland lih akan kin alehdi ilek en sukpene neirail dahl kaselel kan pwehn dolehng plaster me doadoahk ong ni dihd kan en tehnpas sarawio, me kin daperedi lingen ketipin oh maram oh kapwure maraino pwehn kalingana mwohmw en tehnpaso.

“Nan ansou pwuko, ansou me tikitik mwohni ahpw diren pwoson, tohn doadoahk ko kihda arail kehlail oh arail pai kan ong kokoudahn tehnpas en Kauno. Lih akan kihda mwonge, me keieu mwahu me re kak kaunopada. Edward W. Tullidge repwohtiki me ni ansou me lih akan wie dedehk kahdeng kan en pere mwoahl en tehnpas sarawio, Joseph Smith ni eh patohwan irail, mahsanih, ‘Eri, riei lih akan, kumwail ansou koaros mie pwehn sawas. Lih akan kin ansou koaros keieu oh tieng nan doadoahk mwahu koaros. Mery me keieu ni iasadao; oh met lih akan me pil keieu pwehn koadoahke loalehn tehnpas sarawio.’ …

“Pil pwurehng nan Nauvoo, ansou me tehnpas sarawio wie kokouda, ekei lih akan patpene pwehn wiahda seht ahn ohl akan me wie doadoahk. Sang nan irair pwukat me irail meh riehk pokonpene ni Epeng, 17 Mahs 1842, nan pere powe nan ahn Soukohpo sidohwao.”² Iei tepidahn Pwihn en Sawas en Lih.

1. Soangen sawas dah me I kak kihda pwehn sewese riei lih akan kaunop ong oh towehda tehnpas sarawio?

2. Ia duwen ahi kak wia karasaras en sohsohn tepin lih pirien kan me kihda meiroang pwehn alehdi kapai kan en tehnpas sarawio?

3. Ia duwen ahi kak alehdi kapai kan en tehnpas sarawio?