King Follett nga Diskurso

Niadtong Abril 7, 1844, si Joseph Smith mibarog aron mamulong sa unsay nahimong iyang kataposang komperensiya. Human mohangyo sa mga Santos alang sa ilang “lawom nga pagtagad,” mipasabot siya nga mamulong siya kabahin sa mga patay, agig tubag sa usa ka hangyo gikan sa pamilya ug mga higala ni King Follett, usa ka miyembro sa Simbahan kinsa bag-ohay lang namatay sa usa ka aksidente. Walay kompleto o eksakto nga rekord sa gisulti ni Joseph, apan pipila ka mga indibidwal ang misulat sa ilang nadunggan, nga naghimo niini nga usa sa labing maayong pagkarekord nga mga wali ni Joseph.

Diha sa wali, mitudlo si Joseph mahitungod sa kinaiya sa pagkadios ug sa mahangtorong pag-uswag. Gikontra niya ang dugay nang teyolohikanhong tradisyon nga nagtan-aw sa Dios nga hingpit nga lahi kay sa katawhan. Mipasabot siya nga “kon ang mga tawo dili makasabot sa kinaiya sa Dios dili sila makasabot sa ilang kaugalingon.” Mitudlo siya nga ang Dios “kaniadto sama kanato” ug nga “ang tanang espiritu nga gipadala sa Dios dinhi sa kalibotan” adunay “kahigayonan nga molambo,” nga may kapasidad kini nga mahimong sama sa Dios sa kahangtoran. Mitudlo usab si Joseph nga usa ka mahinungdanong parte sa matag tawo kauban sa Dios sa kahangtoran, mitandi niining balaang parte ngadto sa usa ka singsing, nga walay sinugdanan o kataposan.

Ang King Follett nga wali mao ang labing direkta nga pagpasabot sa publiko niini nga mga doktrina, apan dili kadto ang unang higayon nga gipaila kini. Ang Basahon ni Mormon ug ang basahon ni Moises parehong naglangkob og mga tudling nga sukwahi sa teyolohikanhong posisyon nga kasagarang gituohan sa panahon ni Joseph Smith nga ang Dios “walay lawas, mga parte, o mga pagbati.” Ang mga pagpadayag nga nadawat ni Joseph Smith sukad pa sa 1832 nagtudlo nga ang mga espiritu anaa na “sa sinugdanan uban sa Dios” ug nga pinaagi sa gahom sa Pag-ula ni Jesukristo, ang mga indibidwal makahimo sa “pagdawat sa ilang kabilin ug mahimong kapareha niya,” nga mahimong mga dios. Gipasabot na ni Joseph Smith kini nga mga pagpadayag sa lainlaing mga sitwasyon, nagtabang sa uban nga makasabot sa mga implikasyon sa iyang mga pagtulun-an.

Bisan sa mga tawo nga nakahibalo sa nag-unang mga pagtulun-an ni Joseph Smith kalabot sa premortal nga kinabuhi, diosnong kinaiya, ug kahimayaan, ang King Follett nga diskurso maklaro nga maoy makahuluganong punto diin kadtong importante nga mga konsepto kusganon nga nahiusa. Usa ka miyembro sa Simbahan nga nakadungog sa wali mihulagway niini nga dakong ebidensya nga si Joseph Smith nakabaton sa “Espiritu sa Inspirasyon.” Dul-an 50 ka tuig human sa pakigpulong, si Wilford Woodruff, samtang namulong sa pagpahinungod sa Templo sa Salt Lake, mideklarar nga ang pagpaminaw sa diskurso mao ang labing kusganong espiritwal nga kasinatian sa iyang kinabuhi. Apan ang wali usab adunay mga kritiko. Duha ka bulan human sa wali, ang masupilon nga mga Santos sa Ulahing mga Adlaw mimantala og pamantalaan nga gitawag og Nauvoo Expositor, diin gisaway nila ang mga pagtulun-an sa Propeta isip mapanamas-tamason ug migamit niini isip rason sa ilang pagpamulong batok ni Joseph Smith. Ang nagsunod nga mga kritiko sa Simbahan miatake usab sa mga pagtulun-an sa wali.

Sukad sa 1844, ang Simbahan nagpadayon sa pagtudlo sa daghang kinauyokan nga mga doktrina nga gipresentar ni Joseph sa King Follett nga diskurso. Samtang ang sermon wala gi-canonize, kini nakaimpluwensiya sa paghulma sa panan-aw sa mga Santos sa Ulahing mga Adlaw sa premortal nga kinabuhi sa katawhan, mortal nga kasinatian, ug balaan nga mahangtorong potensiyal.

May Kalabotan nga mga Hisgotanan: Mother in Heaven [Inahan sa Langit]