“Miting sa Pagsugod sa Simbahan ni Kristo,” Mga Hisgotanan sa Kasaysayan sa Simbahan
“Miting sa Pagsugod sa Simbahan ni Kristo”
Miting sa Pagsugod sa Simbahan ni Kristo
Niadtong Martes, Abril 6, 1830, si Joseph Smith, Oliver Cowdery, ug uban pa naghugpong aron sa pag-organisar sa Simbahan ni Kristo. Gipaabot na nila kining miting sukad sa ting-init sa 1829, dihang ang mga pagpadayag nagsugo kang Joseph ug Oliver sa pagtukod og usa ka simbahan kon ang Basahon ni Mormon mahuman na sa pagmantala ug ang mga tumutuo mahimo nang magkapundok. Sa wala pa tawaga pagtingob “kadtong mga nabunyagan na” ug ang uban “nga nagtuo,” sila si Joseph ug Oliver nakadawat og sugo gikan sa Ginoo sa pag-organisar sa Simbahan niadtong Abril 6 sumala sa mga balaod sa yuta. Walay nahibilin nga opisyal nga rekord sa miting, apan adunay pipila ka mga kapanguhaan nga nagpakita og pipila sa unsay nahitabo. Ang miting gisugdan sa pag-ampo, ug ang kahugpongan mipaluyo ni Joseph ug Oliver isip mga elder ug mga magtutudlo sa Simbahan. Si Joseph ug Oliver miorden dayon sa usag usa isip mga elder sa Simbahan, ang mga partisipante sa miting miambit sa sakramento sa Panihapon sa Ginoo, si Joseph ug Oliver mipandong sa ilang mga kamot sa ulo niadtong mga nabunyagan aron mahatag ang gasa sa Espiritu Santo ug gikompirmar sila nga mga miyembro sa Simbahan. Nadawat usab ni Joseph ang pagpadayag nga makita karon sa Doktrina ug mga Pakigsaad 21 niini nga miting o sa dili madugay pagkahuman.
Usa ka log home sa lugar sa umahan ni Peter Whitmer Sr. sa Fayette, New York.
Tali sa Abril 6 ug Hunyo 9, sa dihang gipahigayon ang unang komperensiya sa Simbahan, si Joseph ug Oliver miorganisar sa mga branch didto sa Fayette, Manchester, ug sa Colesville, New York. Nagkasumpaki ang mga direktang asoy sa mga nanambong bahin sa lokasyon sa miting sa pagsugod, ang uban nagtaho sa Fayette ug ang uban sa Manchester. Pananglitan, usa ka kasaysayan sa Simbahan nga gihimo ni Joseph Smith niadtong 1839 naghisgot sa Fayette. Usa ka artikulo nga iyang gisulat niadtong 1842 bahin sa kasaysayan sa Simbahan naghisgot bahin sa Manchester. Samtang adunay pipila ka pangutana mahitungod sa piho nga lokasyon sa kasadpang New York diin nahitabo ang miting, klaro nga si Joseph ug Oliver mituman sa sugo sa Ginoo sa pag-organisar sa Simbahan niadtong Abril 6, 1830.
May Kalabotan nga mga Hisgotanan: Palmyra and Manchester