Ngerang meng Rolel a Telbiil
A klekakerous er a tial rolel a telbiil a ngodech diak a ulebengelel el klou a belkul.
Chelsel a urerel e a, President Russell M. Nelson a mla mesuub e olisechakl a telbilel a Dios lobengterir a Rengelekel. Ngii a okesiu er a chad el ngara rolel a telbiil. Sel kot el klemechel er a bol Merredel er a Ikelesia, e a President Nelson a dilu el kmo:
“Sel blak el reng er kemiu loltirakl er a Osobel lokiu a telbiil Lobengkel e oltirakl aikal telbiil a mo mekengii a chesimer el kirel chedaol klengeltengat me a techall el kirir a rokui el sechal, redil, me a rengalek er a ngii di el ker.
“A chedaol ruoll er a chelsel a templo me a telbiil el mruul er a chelsel a ngii a mo smisichii a klengar kau, chebechiielem me a telungalek er kau, me a techellem el mo odngakl odechelakl er a cherarou. A omengull er kau er a chelsel a templo me a omesiungem el kirir a rebeldekem a mo klengeltengat leko er kau e mo smisiich chedaol ocholt me a budech e smisichii a blak el reng er kau el melemolem el ngara rolel a telbiil.”
Ngera rolel a telbiil? Tiang a chimol rael el ngii a omekrael el mo er a Rengedel a Celestial a Dios. Kede omuchel er a rael lokiu a techolbechelid e sola “melemolem el merael bedul luchei el mesisiich el ngara Kristo, el mesisiich a urunguled, me a beltikereng er kid el mo er a Dios me a rokui el chad [leru el ngarbab el llach] … el mo er a ulebongel.” Chelsel tial rolel a telbiil (el ngii, a melemolem, lengelakl er tial klengar), e kede ngmai aikel rokui el chedaol ruoll me a telbiil el kirel osobeled me a kiei el mo er a ulebongel.
Sel kmal telbilel a blakereng er kid a mo oltirakl a soal a Dios “e mo olngesenges a rokui el llach el ngii a modmu er kid.” A otireklel osisechakl me a llechul ebangkelio er a Jesus Kristo er a bek el sils a kot el deureng a kot lungil tekoi er a klengar. A tara klungiolel, a chad a sebechel mochib er a betok el mondai me a ouchel reng ruriul. Msall e kuusbech er a klekool lokesiul tiang. A denguu er a tennis, e ngarngii a domekedong er ngii el kmo dimlak el durengud el telemall. Tia modubech sel sekum e kede olbedii a bduu el subechii er a net a lechub e ngeru el mserve er a bduu. A diak el durengud el telemall a uaia leterkeklel a chad ng diak el telitur ngii er a klekool.
Ng blechoel mondai a lechub a ringel el dechelebangel a di mle kid, lokiu a telitur lomelilt, a lechub eng sebeched el kmo “ng dimlak el durengud e remuul.” Sel blak a rengud el ngara rolel a telbiil, eng sebeched el mochib er a betok “el diak el durengud el telemall.” Kede mo mechei a kakerous el bedengel a mekngit el kse. Ng diak derebet er a kengtil a blulak me a diak el bleketakl lomeruul. Kede chengelakl mekngit el teletael er a deleboes me a laokreng. Kede mochib osenged er a rechad me a tekoi, el merael chisel, el ngii a sebechel tomelii a bedenged me a rengud. Kede mengeroid er kid er a omelilt el mo tomellid a lechub eng tomelterir a rebebil e bai mo oba lulserechakl reng me a omesiou.
A Elder J. Golden Kimball a millekoi el kmo, “Ng locha diak [blechoel] ngara melemalt e chibutek el rael, eng di ak [melasm] el blechoel mo oleong er ngii.” A klemera er ngii, e ak medengei el kmo a Brother Kimball a locha mo kongei el kmo, a dolemolem, el diak di bo doleong er a rolel a telbiil a ngii a ngarbab lurunguled el mo choridid er a sebechel mochib el ringel e dirrek el ngoriakl er a ikel diak el mochib el olibesongel er a klengar.
A rebebil a locha kmo, “Ng sebechek el melilt a ungil ak nguu a techolbechelid me a lak; ng diak kusbech a telbiil luchul e ak mo chetengakl e ungil besuk el chad.” Ng klemerang, el betok el chad, el diak el ngara rolel a telbiil, a meruul a betok lungil lomeruul el diuaia tirkel ngara rolel a telbiil. Ng sebechiu el kmo te meridm a klengeltengat le tir el “blechoel ngara rolel” a telbiil. Me ngera klekakerous er a rolel a telbiil?
A mera er ngii, ng kmal klou a belkul a klekakerous er ngii. Nguldimukl er ngii a blekerdeled lolngesenges, me a blekerdelel a Dios el mei er kid, me a chedaol ngesou el dengai, me a klengeltengat loldak er kid a rechad er a telbiil, e sel kmal ngaruchei, sel dikesed er a diak a ulebengelel klengar.
Blakereng Lolngesenges
A kot a sel teletelel a blekongesenges er kid el mo er a Dios. Meng diak di lungil a moktek er kid, kede dirrek el tibir el mo kiei loltirakl a bek el tekoi el tuobed er a ngerel a Dios. Tiaikid, e kede oltirakl er a okesiu er a Jesus Kristo, el ngii, a mlo metecholb, “lolchotel el mo er a rengelekel a chad, el kmo ngariou a rengul er medal a Chedam, e sioning el mo er a Chedam el kmo ngii a mo olngesenges er ngii e oltirakl a llechul.”
Aika el telbiil, a rullid el mo kerekikl el mengeroid er kid er a mekngit a lechub a leko kede meduch. Kede omdasu el kirel a Dios er a ikel dolilt el meruul er a klengar kid. Kede mo oungakl er a ngklel a Kristo. A moktek er kid a ngara Kristo—el mesisiich er a klaumerang er a Jesus e omekdubech a blekerdelel a Kristo er kid.
A telbiil, me a blekongesenges er kid er a osisechakl er a ebangkelio a mo delalem er a rengud. Ak medengelterir a reteru lobekel, er sel taem er a bol bechiil, e a redil a dimlak el sal mesisiich er a Ikelesia e a sechal a dirkak bol chedal a Ikelesia. AK mo omekedeong er tir el Mary me a John, el diak el meral ngklir. A rengelekir er a lorael meklungang, e a Mary a ulemelchesiu el kirel lomekeroul er tir, el uaia ikel lolekoi chedaol llechukl, “el kmo te mukeroul loltirakl er a Rubak.” A John a mle ungil lolngeseu. A Mary a millilt el di mo kiei er a blai me leblechoel lolisechakl er a ebangkelio el mo er a rengelekel. Ng mle soal a telungalek er ngii a bol mesisiich er a tekoi er a Ikelesia. A Mary me a John a kmal mlo ungil lokesiu er a roungalek, e a rengelekir (mesisiich a bedengir el sechal) a mlukeroull er a klaumerang me a blakereng el kirel osisechakl me a llach er a ebangkelio.
A rechad er a blil a John, el tir a grandparents er tirkal buik, a mle cheam er a ungil klengar tirkal ngelekel a rengelekir el sechal, eng di bebil er a ultekengir el kirel a Ikelesia, eng sorir el kmal di ngmai a chetengakl er a duch er a ungil chedam e chedil el mo er a John me a Mary. A John, el dimlak el chedal a Ikelesia, a dimlak di lluk e lak lolekoi a ngera el kirel. Ng millekoi el kmo te mla sioning a rdechel osisechakl er a ebangkelio—aikel lurruul a rengelekir el sechal er a Ikelesia me a ikel lurruul er a blai.
A John a mlodurch er a Chedaol Reng, me a beltikereng me a ungil lokesiu er a bechil, me a klemeriar reng er a rengelekel sechal. Uriul, eng miltecholb, el mlo klou el deureng er a rechedal a ward me a resechelil.
Ng uaisei el klengar a dirkak a ringel el mo er tir me a rengelekir el sechal, eng di a Mary me a John a mui el medengei el kmo a telbiil er a ebangkelio a delalem er a klengeltengat el kirir. Te mla mes a tekingel a Rubak el mo er a Jeremiah el motaut er a klengar er a rengelekir me tir el dirrek: “A llechuk a mo ngara chelsel a bedengir, e mo llechukl er a rengrir; e ak mo Dios er tir, e tir a mo chedak.”
Rrengodel el mo er a Dios
A ongeru lungil telengtengil a rolel a telbiil a sel deleuill er kid me a Dios. A telbiil el Dios a msterir a Rengelekel a lmuut el klou a relii er a di omekrael er kid e merekong. Ng rongedid el mo er Ngii, e le, a derrengodel er Ngii, eng sebeched el ngoriakl er a rokui el tekoi.
Ng mle tal kchiuii a tekoi el mlara chad er a niius el milsaod el kmo a teletael el doruul a techolbechelid el kirir a re mla mad a dodulb a siasing er a ralm. Me tirkel rokui el tuobed a ngklir er a siasing a tir a mla nguu a techolbechelid. Tial teletael a loach ungil, eng di ng uaia lak lesa klou el ultutelel a chad me a klou el ultutelel a telbiil er a chad lobengkel a Dios.
“A [Jesus] a dilung … : Msiseb er a melemalt el rael; leng melemalt, e chibutek a rael el mo er a klengar, e mekesai a mo metik er ngii.” Tial tekoi a belkul a kmo, tial rael a kmal chibutek meng di chimol chad a sebechel soiseb. A dersta tir a tibir el mo oltirakl er a Dios, e a Dios a kuk rulii a telbiil lobengterir, lokiu a ngakl, me bol sebeched lomes el bedul a diak a ulebengelel klengar. Sel lobengkel chedaol ruoll me a telbiil, “ea klisichel a kledios a mocholt” er a klengar kid.
Chedaol Ngesou
Tia ngoikid el mo omtab er sel longedei el klengeltengat er a rolel a telbiil. A Dios a meskid a diak a smodii el sengk el ngosuterir a remeruul a telbiil el mo oltirakl a telbiil: el sengk er a Chedaol Reng. Tial sengk a kldemed, omecheliu er kid, e omekrael er kid lokiu Chedaol Reng. Ng dirrek el dodengelii el kmo ng Mengelaod, el Chedaol Reng “el mui er a urunguled me a cherrungel el beltikereng.” Ngii a medengei a rokui el tekoi e ouchais el kirel a Chedam me a Ngalek, el kid a sioning er kirir.
Tial rolel a telbiil e kede dirrek el metik a meklou a belkul e klengeltengat er a klausubes me a omengikiid er a kngtid. Tia ngesou el di mei lokiu a chedaol chubechub, el beskid a Chedaol Reng. “Chelechang, e tiakid a llach,” ng millekoi a Rubak, “Mouchel a rengmiu, kemiu el ngara merkelel a beluulechad, e me rengak e bom metecholb lobang ngklek, me bo longikiid er kemiu a Chedaol Reng, me bom klikiid er medak er sel uriul sils.”
Bom Kldibel el teloi er a Rechad er a Telbiil
Ongeuang, e tirkel losiik er a rolel a telbiil a metik er a chimol klengeltengat er a kakerous el chedaol kldibel er a rechad. A ulaoch el kirel omengideb er a berberiid el blai er a Israel el muuut el mo er a ikel kebelurir a debetik er a chelsel chedaol llechukl. A otutel aika lulaoch me a telbiil a mla omuchel lokiu omengideb er a rechad er a telbiil er a chelsel a Ikelesia, el rengedel a Dios el ngara beluulechad. A President Nelson a smodii, “Sel dolekoi el kirel a cheldellel, e kid a melekoi er a beot el klemerang: bek el ngelekel a Chedam er a Babeluades … a kmal kirir el mo rongesii a osisecheklel a mloluut el ebangkelio er a Jesus Kristo.”
A Rubak a dmu er a rechedal a Ikelesia er a Jesus Kristo er a Uriul-klebesei el Santo el “mo okesiu er a llomes me bo lolangch el mo er a rokui el beluu; … me a omengideb er a Zion, me a ikel rechelel, bo sebecheklir, er a ses el eolt, me a mekngit el mo mochubel er a beluulechad el rokir.”
Ng dirrek el ngarngii omengideb er a bek el sandei er a rechad er a telbiil er a sils er a omeluluuch el mo er a Rubak, me bo de klikiid er a mekngit er a beluulechad. Ng omengideb el bo dolai er a sakrament el blauang me a ralm lomeletked er a Tngakireng er a Jesus Kristo e taem er a olsengerenger me a nglunguuch, e chadecheduch el kirel osebelel a ta me a tang. Sera kngeasek eng di mle ngak el tang a chedal a Ikelesia er a high skuul el kblarngii. Ak mle semeriar er a deleuill er ngak me a rebetok lungil sechelei er a skuul, eng di ak mlo metik el kmal lultuil er tial kldibel er a Chedaol sils er a bek el sandei el mo omekbeches er a renguk, me a bedengek. Kede meral mla melchesuar a klechacheroid er tiaikid el kldibel er chelechal ngarngii tial mekngit el secher, e ousemeriar er sel taem el deluut el mo dmak el uaia ngaramong.
A rechad er a telbiil a dirrek el mo kldibel er a templo, el blil a Rubak, el mo melai chedaol ruoll, klengeltengat, me a chedaol ocholt el kirir. A Profet Joseph Smith a ulisechakl: “Ngera moktek er a omengideb … er a rechedal a Dios er a ngii di el ker er a beluuelchad? … A kmal mle moktek a mekedecherur a blil a Rubak el uchul e Ngii a mo ocholt el mo er a Rechedal a chedoal ruoll er a Blil me a klebkellel a Rengedel, e osisechekelterir a rechad a rolel e t emo suobel; le ngarngii a chedoal ruoll me a osisechakl el sekum eng mosisechakl e motirakl, eng kirel mekedmokl er a chelsel a blai el kirel tiaikid el moktek.”
Mo Ngmai a Yaksok er a Telbiil
A ulebongel, ng di tal rolel a telbiil a sebeched el mo ngmai a klengeltengat er a Abraham, Isak, me ea Jacob, el ngarbab el klengletengat er a mo suobel e ngar el mo cherechar el di tal Dios a sebechel meskid.
A belkul chedaol llechukl el kirir a rechad er a telbiil a kmo te meral uchelel a Abraham lokedongall el “blai er a Israel.” Eng di a rechad er a telbiil a dirrek luldimukl tirkel kongei er a ebangkelio er a Jesus Kristo. A Paulus a silodi:
“Tirkel tir a mla metecholb er a Kristo a mla mo ulecherangel er a Kristo. …
“E a omulcherangel er a Kristo, e kom ulchelel a Abraham, e sebechiu el mo ngmai a yaksok.”
Tirkel blak a rengir er a telbilir a “mo mekiis er a okiis er a kodall er a remelemalt.” Te mo cherrungel “lokiu a Jesus Kristo el ngii a sebecheklel a beches el telbiil. … Tirkaikid tirkel mo nguu a bedengir er a celestial, el klebkellel a uaia sils, el klebkellel a Dios, el kot el ngarbab er a rokuil.” “A leuaisei, e a rokui el tekoi a bol ngai, a le ngar me a lekodall, a lechub eng chelechal taem, a lechub eng merael mei el taem, a rokui a bo lolab le tir a Kristo, e a Kristo a Dios.”
Bo derengesii okedongel a profet el mo melemolem el ngara rolel a telbiil. A Nephi a milsa tial temed e milluches el kmo, “Ngak, el Nephi, a milsang a klisichel a Ngelekel a Sib er a Dios, el mle metengel er a resanto er a ikelesia er a Ngelekel a Sib, me a rolab a telbiil el chedal a Rubak, el tir a mle berriid er a beluulechad; te mle bliull er a llemalt me a klisichel a Dios el ngarbab el klebkall.”
Ak uaia Nephi, “el ngara deureng er a telbilel a Rubak.” Chelecha el Sandei er a Baskua, e a kuuchais el kirel a Jesus Kristo, el okiis er a kodall er Ngii a urunguled e meskid a selbechakl el kirel aikel rokui el yaksok el ngara rolel a telbiil. El ngara a ngklel a Jesus Kristo, amen.