El Diak el Beluulechad a Meskak

Uchei er sel kot el Baskua er a Jesus a bocha longesimer er a urerel a sel beches el chedaol belsoil el Ngii a kildmeklii el mo er a Reteruich me a terung, e ngulmuchel osischeklel er a omelmesumech me a ikel dilubech er a Gethsemane, me a otuteklel, el mo el muut er a omengerus. Eng di, ng locha ulemelchesiu er a rraureng me a dirrek locha dakt er tirka el chad, e a Jesus a dillii tiakid el tekoi el mo er tir (e dirrek el mei er kid{

“Lak louedikel a rengum: Ngii a millekoi, a omoumera er a Dios, e koumera er ngak. …

“Ng diak chitau me mcheloit: Ak mei er kau. …

“A budech ak beskemiu, budech er ngak ak beskemiu: ng diak el beluulechad a meskemiu, ngak a nguu el meskemiu. Bol chelellakl a rengmiu e lak louedikel, me a diak komedakt.”

A meringel taem a mei er tial klengar er a beluulechad, luldimukl er a remelemalt, eng di sel melisiich el klemechel a Kristo a kmo Ngii, el klikiid el ngelekel a sib a “mo modars [el] tenget ”e mo mekiis, e di mereko, el uaia tekingel a psalmist el kmo, el mo “sebechekled e klisiched, el [kid] a mo ultuil er ngii er a [ikel taem] er a ringel.”

Melechesuar a ringel el taem a ngar medal a Kristo e sel Ngii a merael el mo bedul a kerus me a Mesiungel a mo nguu a ebangkelio er ngii el mo er a beluulechad er a chelsel a temel a chosoi, bong el lobengkek el mo omerk er tial tekoi el mo er a rechedal Ikelesia er a Osobel er aikal uriul klesbesei. Tial klumech a osisiu ngii me a betok el mechas a rengud er ngii el cheldecheduch er a chelsel a Babier er a Mormon er a kakerous lultok me a mondai, lomuchel er a mekngit el blekerdelel a Laman me a Lemuel el mo el muut er a ulebongel mekemad er a rebetok el telael soldau. A tara kmal bleketakl uchul a klou el omesodel a mekemad a kmo a Babier er a Mormon a milluches el kirel a uriul-klebesei, e tirkal milluches er ngii (loumesinged er tir a chad er a mekemad) a ulemlaoch lomeklatk er kid el kmo a uldikel me a ultok a ngii a mo teletael er a deluill er a rechad er a uriul klebesei.

Ng uaisei, a uldesuek el kirel a ultok er a uriul-klebesei a diak el sal kmal ngii a uchelel. Eru el telael rak er a memong, e a Osobel a ulemeklatk el kmo a uriul klebesei eng morngii a “mekemad, me a chisel a mekemad,”e a uriul eng millekoi el kmo a “budech [a mo] dibus er a beluulechad.” A Prince er a Budech, lulisechakl el kmo a ultok a kloklel a diablong, a locha dirrek el mo lmangel, lobengkel a Chedaol Demal er tirkel chad el tir a “diak a beltikereng er tir,” el chedaol llechukl a kmu el uaisei, e diak el sebechir el dmak el kiei el ngara beltikereng.

Rodam me a rodos, kede mes aikel betok el chetituokel, klautok, me a mekingt el blekeradel el meliuekl er kid. Kede ngeltengat, le chelechal telcheroll a dirkak a Ongedei el Mekemad er a Beluulechad lesiseb er ngii, a lechub e bla desiseb er a klou el chelebuul er a kerruul el uai sel dilubech er a 1929 el mlo uchul a Klou el Chelebuul. Eng di kid a chemau a ua Ongedei el Mekemad er a Beluulechad el ngii a diakel klakeuad el mo merekui er a rechereued eng di bai mo mengudel er a rengelekel a Dios el mo omkereu er a rebebil e mo olengeseu el omekungil er a telemall el kid a metik er a beluulechad el telemall. Tial Klou el Chelebuul el dechau er ngii er chelechang e kekerei a relii er a klou el riid er a ududed e klou a rellii er a uldesued el kired, lobengkel a temel a klaumerang, oureng, me a bliochel el beltik el reng er rokui el meliuekl er kid. Eng di aikel donguu el kid a ousbech el mo meruul a medidiiich el sils e omekeroul er a siukang er a ungil er a chelsel a buai a klou a lebeskid el ngara ebangkelio er a Jesus Kristo. Ng diak el sebeched—me a beluulechadmeng diak el sebechel—el diak bol mesisiich el mui loltaut aika el osisechakl er a ebangkelio er a Jesus Kristo.

Meng, chelsel a beluulechad er a “mengitengtik el eolt, e diak el ngara onglaod,” uaia Jehovah el kirel uaisei, kede mekerang e metik er sel Ngii a omekedong er ngii el telbiil er a … budech?” Ke de metik er ngii sel dobult el mor Ngii el Ngii a dilu el kmo Ngii a oba chubechub el mer kid “lobengkel a diak a ulbengelel el blekokeuii” e mo meskid a budech el mei er a rengeleked. Meng diak el iior er a kdekudel lulaoch me a ngara chedaol llechukl el kmo a budech a mo dibus er a beluulechad, a re profets, uldimukl er a betik er a rengud el Russell M. Nelson, a mla olisechakl el kmo ng diak el belkul a kmo tial budech a mo mengai er a redersta el chad! Meng, chelecha el Baskua e dolasm el toketekii a budech er a chelsel a rengud, me a chubechub me sel lomekungil el Tngakireng er a Rubak el Jesus Kristo el mer kid me a telungalek er kid me a tirkel meliuekl er kid. Mal uaisei, dirrek el mengasireng, tial chelelakl el reng a mo er ngii el mer kid el “diak a ududed me a cheral.”

Aikal ngesou me a oureng a kmal usbechall le uchul tial chelsel a beluulecahd el ongdibel er a chelechang a rebetok el tir a omekrirech lobengkel a betok el ongarm—tech me a domelchesiu er a rengud, social me a lechub eng tekoi er a udoud, me a lechub eng bebil er a uldikel. Eng di betok er kida diakde mesisiich el di kid el sumechokl, le budech el dousbech er ngii a diak el “beluulechad a meskid.” Ng diak, aikel kmal meringel el mondai eng kired el mo oltirakl er sel lomekedong er ngii chedaol llechukl el kmo “ng klisiich er a babeluades,” e mo ngmai aika el klisiich a kired loltirakl aikel lomekedong chedoal llechukl el kmo “osischeklel a llemalt.” Chelecha, sel klemedengei er kirel sel omech er a delongelel a olsisechakl me a klisiich e tiai kid a chimoel suobel el kid el chad a uaia lak desubii, el Dios er a eanged me a chutem a mla dulii!

E ngera ikaikid el osisechakl? Aika, beldukl er a chelsel chedaol llechukl, e mla mo tela el mosisechakl er a meklou longdibel el uai tiang, e chelechal taem, e a Profet Joseph Smith a ulisechakl el mle nger el mo er ngiier a llangel el kmo “Dios er ngak, kau el Dios er ngak, ngera me ke mla choitak?” Chelsel sel mekelekolt, el blil a kelebus er a Liberty Jail, e ngii a mlosisechakl el kmo a osischeklel a llemalt a uldimukl er ngii a kllouelreng, kemanget el mengiil, blekokeuii, me a meral beltikereng. A lak a ikang el olisechakl, e kede kmal mo chemau a klautok e kaucheraro.

Ngar sel uldasu, mek bleketalk el mengedecheduch el kirel selcheroider a cheslel a bebil er a rechelel aikal osisechakl er a melemalt er a temed. Me sel llach, e ngak a ungil a renguk el chad, e kmal betok a ungil e klebokel er a chelsel tial beluulechad er kid. Ng uaisei e kid a ngarngii a betok el klekedall el klengeltengat er a ngii dil telcheroll er a chesel a reski, eng di chesel a siukang er a 21st-century e belchoel el ngara chelsel a Ikelesia, e kede dirk omes tirkel tir a klengar tir a ngara uldikel, lobengekel a kengei el ngii a betok a telemall el telbiil me a betok el chelam el reng. Momdasu a meringel el cheldecheduch el ngii a mengaisisiu er a tekoi er a delbois el omeruul, tebelong el ngii a blechoel el ngara chelsel a katsudo me a lechub eng ngara tibi, malechub eng ngara skeng er a omeruul er a delbois me a lechub eng bebil er a olecholt el kid a betok el donguiu er a chesel a blil a ureor. Ngara omerolel a tekoi er a omengeroid er a mekngit, a chedaol a blechoel el mereched el meruul e a chedaol a belchoel el meruul el mekngit. Mor tirkel tir a melasem el merael malechub eng mengedecheduch me a lechub e ke meruul er ngii el—“di ua sel beskau a beluulechad,” se dolekoi—diak momdasu el kmo ng omekrael el mo er a teletelel a budech; Ak yaksok er kau el ngara klel a Rubak ng diak el sebechel. “Mekngit el omeruul a kmal dimlak el deureng,” a profet er a ngara mong a mla tal dmung. Sel bol merek tial ngloik, a chad er a klekool a blechoel mudoud, e belochel el ngara udoud er a langel me a ouchel.

A lechub e kede mes a bebil er a mekngit el teletael a lechub eng omekrur. Ng kired el mo kerekikl sel doltirakl er a Rubak el Jesus Kristo meng diak doruul a ikakid el blekeradel. Ng diak kired el mo ngara klengitelreng er a ngidil teletelel a ulekringel el teletael a lechub eng diak el melemalt el omeruul a lechub eng mekngit el orim— el diak omeruul ra tech a lechub tekoi er a reng a lechub merreder er a ikelesia a lechub e ngidil ngerang. Ak lotkak el kmal mlo mechas a renguk er a President Gordon B. Hinckley er a longedecheduch el mo er a resechal er a Ikelesia el kirir tirkel tir “oba dereder lorrouk a telungalek er tir”:

“Ng klou el chelebuul e kikiongel el teletael sel momekringel er a bechim,” ng millekoi. “Ngii di el sechal er tial Ikelesia lomekringel er a bechil, e oltuub er ngii, melekoi a mekngit el kirel, e omekcharm er ngii a diak el klikiid loba priesthood. … [E ngii] a diak el klikiid el mo oba babier er a mo er a templo.” Di osisiu el diak el ungil, ngii a melekoi, a ngidil teletael er a ulekringel el mo er a ngalek—a lechub e ngidil ulekringel teletael.

Chelsel a betok el omeruul, ea klaumerang er a sechal, redil, me a dirrek el rengalek a sebecheir mo ngara klengit sel mekngit a omelkingir, dirrek el melemall, el mor tirkel tir a mla moak el lokiu a chedaol omerrul er a chesel a templo er a Rubak. Rokui el chad a ngar ngii a lemeltir el loubeltik el reng, omelchesuar a budech, e metik a selbechakl er a blai. Adang, mei e dolasem el meruul er tial omeruul er sel basio. A yaksok el mo er a chad er a budech a kmo a Chedaol Reng a mo blechoel kldemem me a klengeltengat a mo mochubel el kirem “el diak a mo tomer ngii” el mo cherechar. Diak a chad lousbech er a mekngit a ngerel me a lechub eng mekngit el tekoi el mo “mengitakl er tial chelitakl er a olsobel er a beltik el reng.”

Msall e bo kungesimer er sel kulmuchel er ngii. A klukuk eng Baskua, el taem er a melemalt el osisechakl er a ebangkelio er a Jesus Kristo me a Tngakireng er Ngii el “ngoikid lengelakl”—er a uldikel me a ultok, me a klengitelreng me a klekurusii, me a dirrek el kodall. Ng taem el dodersii a mui lultiled er a tekingel me a urelel a Sib er a Dios, el ngii a “[chilol] a kengtil a rengud, e ultekau a lengeled” e mle blak a Rengul rokir a ureor el kirel osebeled.

Meng diak el iior er a ultutakl me a ringel, mekngit lomeruul me a blekeradel me a kengterir a rokui el chad, le Ngelekel a Ngar el Dios a ulemes er tial kemanget lomerael er a klengar, e mesekid, e kmo: “A budech ak beskemiu, budech er ngak ak beskemiu: ng diak el beluulechad a meskemiu, ngak a meskemiu. Bol chelellakl a rengmiu e lak louedikel, me a diak komedakt.” Klengeltengat, deureng, me a budech lobengkemiu er chelechal Baskua. A diak a smodii luchul eng mlo sebechel a lekildmeklii a Prince er a Budech, el ngii a kmal betik a renguk er ngii, el tiang a Ikelesia er Ngii, e ngak a sioning el kirel, el Rubak el Jesus Kristo, amen.