Jesus Kristo: Mesiungel a Rengud

Rodam me a rodos er ngak, chelecha el klebokel tutau er a Basqua e a renguk a ngara deureng el melbedebek er sel kot el meang, kot el ngarbab, e diak a telkelel teletael el mla duubech er a chelsel a rokui reksi er a rechad—el ngii a tenget el tngakireng er a Rubak, el Jesus Kristo. A merael chisel tekingel a profet Isaiah a dochelii a klisichel e diak el bechelechelingaol e mo cheuarem a Osobel el kirir a rokui el ngelekel a Dios:

“Ng meral ngii a mla otour a lengeled, a chemol a kngtil a rengud: eng di kid omes er ngii el kmo ng secher, e delbeakel er a Dios, e ngara ringel.

“Ngii a mlo er a ringel el kirel a telmelled, e miltemall a bedengel kirel a kngtid; me a otuub el mlo er ngii a budech el mei er kid; me a chelebed el mlo er ngii omekungil er kid.”

Ngokiu a kengei er Ngii el mo ngmai a kngterir a rokui el chad, e mengai el mo medeel er a kerus, e milkiis er a kodall er a ongedei er a klebesei,e a Jesus a ulechotii sel kot el chedaol el belkul a Basqua el ngii a di bla loba rechad er a Israel er a ngara mong el taem. Chelsel sel ongerulii a ulaoch, Ngii a uldersii a Bedengel me a kesiokel el resechel el ngii a mo ungil e ulebongel el tenget,lochotii aikel sebeched el dmangech er a chelsel sel do mengemedaol er a Passover er a Rubak. Tiaikid el teletael, e a Kristo a mlo er a ringel er a tech me a reng el ngii el ringel a diak a ngii di el chad el sebechel smodii. A Osobel a Ngii a dilu el kmo:

Ng uaisei, el Ngak, el Dios, a mlo chuarm er a ringel el kirir a rokui

El ngii el ringel el mle er ngak, el dirrek el Dios, el kot el ngarbab er a rokui, el rirellak el mo omritel er a ringel, e mlo merserasech a bedengek, e mlo chuarm a bedengek ma renguk—me bol sebechek el diak nguu sel mechuached el kok, e bolak el sebechek—

“Eng di, a klebkall le bo er a Chedam, e ak ngiluu e kildmeklii el mo er a rokui el ngelekel a chad.”

A Kristo uleba blekokeuii el reng e kildmeklii sel soal a Chedamlokiu a ulebongel e chubechub el tngakireng er Ngii. Ngii a mlo mesisiich er a telmellel a kodall er a tech me a reng,el ulchotii er a beluulechad el lokiu a Rebet,e meskid a techall er a diak a ulebengelel losobeled.

A Jesus a di mle chimol Chad el sebechel kudmeklii tial lulebongel e cherrungel tngakireng el kired el rokui. Ngii a mlengilt e mloterekokl er sel Klou Longdibel er a Babeluades, ruchei er a lobeob a beluulechad. Dechelel, se er a lemechel er a redil er a tech, Ngii a mlo nguu kodall er a tech, eng ding mlara Dios, el ngii a di chimol ngelkel a Chedam el Sechal, Ngii a ngiluu a klisiich el mo nguu a klengar er Ngii e lemuut el nguu. E dirrek, a Kristo kiliei er a cherrungel klengar el dimlak a kengtil e kmal mle klikiid, el uchul, eng diak a belkul bol mukerkeriil. Ngara bebil el taem e a Profet Joseph Smith a ulisechakl:

“Osobel a diak el sebechel el mei er a beluulechad el diak lokiu urelel a Jesus Kristo.

“A Dios … a kildemklii a tngakireng lulusengk er a chimol Ngelekel Sechal, el mo modurokl er a ngarmedad el taem … el mo mekengii a chesimer me a chad bol sebechel mo soiseb er a rengedel a Rubak.”

Ng uaisei el Osobel a ngilbetii a telmellel a kodall lokiu a tngakireng er Ngii,eng di Ngii a dimlak el cheridii a ngercheled a dersta el chad el mo ouchel a rengud er a klengit el kid a remuul. Ng bai, Ngii a mla odersii a beltik el reng el siotai el mei er kid el ngara klausubes lobengkel a Diak a Ulebengelel Demad. Ngokiu a Jesus Kristo me a tngakireng er Ngii, eng sebeched el melchesuar a klou el ngeldechel a uldesued me a rengud, e mo beches a uldesued, el kirel a Dios me a klengar. Sel demeral louchel a rengud er a kengtid e meltii a rengud me a soad el bedul a Dios me a Llechul, e ng sebeched el nguu a klausubes er Ngii e melchesuar odbechel a Chedaol Reng er Ngii el kmal mo mesisiich er a klengar kid. Osisiu, e kede choridid er a delechel a ringel el Osobel a mlarngii.

A sengk er a ouchel reng a olchotel a blekokeuii er a Dios el kirir a Rengelekel, a dirrek lolchotel a diak a mekesiur el Klisichel ngosukid el mo mesisiich er a mekngit el omeruul el deruul. Ng dirrek lolchotel a kllouelreng me a kemanget-lomengiil er a Diak a Ulebengelel Demad el kirel a chelitechetud me a telmelled. A President Russell M. Nelson, el betik er a rengud el profet er kid, a millekoi er tial “sengk el kmo, ng kisel a deureng me a budech er a uldasou.”

Resechelik, a kuuchais er kemiu el kmo sel demeral louchel a rengud er a kengtid,eng sebeched el mecherei a tngakireng er a Kristo el mo mui a klisichel er a klengar kid. Kede mengubet er a lechetel a klengit, e metik er a deureng er tial klengar, e mo sebeched el mo suobel el mo cherechar, el ngii a mlekedmokl er a uchelel a beluulechad el mo er a rokui el tir oumerang er a Jesus Kristo e mei er Ngii.

Osisiu lobengkel tial meang el sengk er a mo suobel, e a Osobel a dirrek el meskid a selbechakl me a ongelaod sel bodechau a ringel, ongetikaik, me a chelitechetul tial klengar, luldimukl er a teletael el kid a mla soiseb er a chelsel el tial rakt a er a chelechang. Ak subedemiu el kmo a Kristo a kmal ungil medengei a ringel el kid a mo chemau er a chelsel er tial klengar. Ngii a medengei a rokui el kngtil a rengud, lengeled, me a ringel er a tech me a dirrek el ringel er a uldasou me a reng el kid a chelbangel. Aikel dmolech el tebedechel a bedengel a Osobel a mui er a chubechub, e Ngii a blechoel el mereched el olngeseu er kid. Tiang a mo sebechel le Ngii mlo chemau tial el teletael el mla duubech e di mle Ngii el nguu a tech er a ringel er a chelitechetud.

Ngokiu a delemdengk me a ngariou reng, e Ngii a mlo riou er a rokui el tekoi e kilengei el mo motelechakl, modik, e motuub er a rechad, e mlo e ra ringel el kirel a kengtid me a telmelled. Ngii a mlo er a ringel el kirir a rokui, e Ngii a ngilai a rokui el mekngit er a beluulechad, e Ngii a mlo kot el ngaruchei lomekerreu er kid.

Me sel dolekeed el mo er Ngii, e denguu a rengud lotilii er Ngii, eng mo sebeched el nguu a chelngelel, el ngii a beot, me a ringel, el ngii a kebekakl, me kede mo metik er sel blel yaksok er ngii el ongelaod me a ulengull. Osisiu, kede mo ngmai a klisiich el kid ousbech el mo mesisiich er a ringel, chelitechut, me a klengitelreng er tial klengar, el ngii a kmal meringel a dotekangel alskeum eng diak dultuil er a ngelsouil me a klisichel. A chedaol llechukl osischeklid el mo “choiit a chelngeled er a Rubak, me bo lengesukid.” “A Dios bol [beskid] me a [chelngeled] bol kebekal, lokiu a deureng er a ngelekel Sechal.”

Mocha er a ulebongel er tial mlomerek el rak, e ak mlo medengelii a secherrir a reteru lobekel, el Mario me a Regina Emerick, el kmal mle mesisiich a klaumera er tir ra Rubak e di diul mlad el di eua el klebesei a delongelir el tial COVID-19.

A tara ngelekir el sechal, el ngii a bisop er a Brazil er chelechang, a ulechais aikakid er ngak: “Ng kmal mle meringel el kulemes er a demak me a delak el mo smecher er a uai tia el teletael, eng di ng mle bleketakl a chimal a Rubak er a klengar ngak, le ak ngiluu a klisiich me a budech lengelakl er a di klemedengei er ngak. Ngokiu a klaumera er ngak er a Jesus Kristo me a Tngakireng er Ngii, e ak ngilai chedaol ngesou me a klisiich me a ongelaod er a rechedal a telungalek er ngak me tirkel rokui lulngeseu er kemam er tiaikid el meringel taem. Ng uaisei el sel mengasireng el teletael el rebek el chad a ulsingch el kirel a dimlak el dubech, eng di Ngak a sioning er a klou lomelodech el dilubech er a klengar ngak me a klengar er a rechedal a telungalek er ngak. A kmal mlo melchesuar a diak a smodii el budech el kmal silbechii er a chelsel a renguk, el milskak a urungulek me a selbechakl er a beltikereng er a Osobel el kirek me a moktek er a deureng er a Dios el kirir a Rengelekel. Ak silubii el kmo chelsel aikel kot el meringel el taem er kid, e sel chimal Osobel a di blechoel luldars el kired sel dosiik er Ngii loba rengud el rokir, rokui er kid, me a uldesued, me a klisiched.”

Rodam me a rodos er ngak, chelechal temel a Basqua, e a kuchais er a sioning er ngak el kmo a Jesus a milkiis er a kodall e Ngii a ngar. A kuchais er kemiu el kmo ngokiu Ngii me a tngakireng er Ngii, e a Osobel a kildmeklii a rael el bo deselbechakl er a kodall, di dul kodall er a tech me a reng. Dechelel aikal lungil el klengeltengat, Ngii a dirrekl el meskid a mengeload e menglou a rengud er a temel a ringel el taem. A kuchais er kemiu el kmo sel dotilii a klaumera er kid er a Jesus Kristo me a Tngakireng er Ngii, e doutekangel el ngara klaumera el mo er a ulebongel, e kede mo ngara deureng er a ikel yaksok er a Demad er a Babeluades, el ngii a meruul a rokui el ngara a Klisichel el ngosukid el muut el mo er a Rengedel er a tara klebesei. Tiang a Urerel e Ikelesia er Ngii! A kuchais er kemiu el kmo a Jesus a Kristo, a Osobelel a beluulechad, el mle telbiil Messiah, el okiis er a kodall me a klengar. A kuchais aika el klemerang lobengkemiu el ngara Chedaol Ngklel, el di Chimong er a Chedam, el Rubak er kid, el Jesus Kristo, amen.