Deureng ra Diak el Bechechelingaol Omesiou

Uriul er tia el dirk mlo merek el klou el ongdibel, ng betok el chad a mle er ngak el oba osisiu el ker: “Aike el kingall ng ungil besum sel om dengchokl? A nger er ngak a di mle osisiu ra bek el team: “Aike el kingall a kmal ungil besul sel mdengchokl a sekum e kau a diak bo mongedecheduch.” Ng klemerang, ng uaisei? A kingellek a diak el sa el kmal ungil besuk sel kdengchokl er ngii er chelecha el ongdibel, e ng di ak mereng a saul el kirel a klengeltengat me a chetengakl el be kungedecheduch er kemiu er chelecha el kesus.

Bebil er a taem sel dosiou, e kede mo dengchokl er a kakerous el kingall. Bebil a kmal ungil besud er ngii e a bebil a diak, e ngdi kede mla yaksok er a Demad er Babeluades el kmo kede mo mesiou er Ngii me a rebebil el oba a beltikelreng e meruul er sel ngii a Soal a Rengul er a rokui.

Sesei el rak ra memong, a rengeasek er a Ikelesia a silubii el kmo “sel momuchel el ngara omesiou er a Dios [mesa Doctrine and Covenants 4:2], 1 ke mo teloi er a kot el ungil el omerael. Ke olengeseu er a Dios el orreched er a Urerel, me a ungil, deurreng, e mengasireng el omeruul.” Ng omerael el ngii a ngarngii el mora rokui—er a ngidi el rak—e dirrek el omerael el ngoikid el mo oiak sel ngii a betik er a rengud el profet a mla mengedecheduch er kid el kmo “ng rael ra telbiil.”

E ngdi ng mekerior, el uaisei, el de kiei er a chelsel a bechechelingaol el beluulechad el ngii a rechad a melemolem el oker, “Ngera ngar er ngii el kirek?” er a le bai loker el kmo, “Ng techang a sebechek el ngosuir er chelecha el sils?” me a lechub “Ng mekera a bo kungil el mesiou ra Dios er a okedong el kuungerachel er ngii? ma dirrek “Ngak ak msa Rubak a rokui el sebechek?”

A ta er a kmal ungil okesiu er a chelsel a klengar er ngak el kirel a diak el bechechelingaol el omesiou a Sister Victoria Antonietti. A Victoria a ta er a mle sensei er a Primary er a chelsel a branch el kbla er ngii er se er a taem er ak kurael me klou er a Argentina. Bek el Ongeru el ureor er a sueleb, e aki kldibel er a Primary, e ngii a uleba chocolate cake el mo kelam. Rokui el kmal sorir tia el cake—e ngdi, ng dimlak el ngak. Ng mle chetik a chocolate cake! E uaisei el ngii a melasem el merous er tia el cake lobengkek, ak blechoel el kotouar.

A ta er a sils el ngii a mla merous er ngii el chocolate cake lobengterir a rokui el ngalek, ak mocha oker er ngii, “Ngera meng diak omnguu a kuk tara bedengel—el ua orange malechub e ng vanilla?”

A uriul ra locherchur, e ng ulker er ngak, “Ngera meng diak mchermii a telkib? Tia el cake a meruul er a kmal tokubets el klekedall, e ak yaksok er kau el kmo alsekum ke chormii, eng mo soam!”

A kulemes el meliuekl, e mle mechas a renguk, le rokui a kora kmal sorir tia el cake. Ak kilengei el mocha chormii. Ng sebechem el melangch el kmo ngera dilubech? Ng kmal mlo soak! Sei a mle kot el taem el ngak a kmal mlo soak a chocolate cake.

Ng dimlak el merekmo uriul er a bebil er a rak el ngak a mlo medengei el kmo ngera sel mle tokubets el klekedall el ngii a mlara chelsel a chocolate cake er a Sister Antonietti. Ngak me a rengelekek a oldingel er a delak er a bek el sandei. Chelsel a ta er a ika el odingel, e ngak me a delak a mle ungil a rengmam el menga ra selkosek el chocolate cake, e ngak a mocha ouchisa er ngii el kmo ak milkera e mlo ketengek el soak tial cake. E ngii a mocha ouchais er ngak a derengel tia el cheldecheduch.

“Mesang, e Cris, a delak a dilu, “Victoria me a telungalek er ngii a dimlak a kmal ngera er tir, e a bek el sandei e ng kirel melilt er a delongelel a cheral a bus el ngii a ngoikii ngii me a reteua el rengelekel el mora Primary me a lechub e ng mo omechar a klekedall el mo meruul er tial chocolate cake el mora klas er ngii er a Primary. Ngii a blechoel el ngiltii a omeruul el chocolate cake er a ocheral a bus, e ngii ma rengelekel a merael er a bekord el betok er a eru el mael [3 km], er a ta el omerael, diak el ior er a eanged.”

Sel sils e ngak a mlo ungil ngara omereng el saul el kirel a chocolate cake er ngii. Mong meng klou a ultutelel, ak silubii el kmo se sel tokubets el klekedall er a omeruul el cake er a Victoria a se l beltkil a rengul el kirel tirke el ngii a mesiou er tir me a dirrek el diak el bechechelingaol el ongarm el kired.

Sel kulbedebek el kirel a cake er a Victoria e ng ngosukak el mo medengelii a diak el bechechelingaol el ongarm er a chelsel a diak a ulebengelel el suobel el ngii a musisechakl el mlara Rubak el mo er tirke el ultirakl er Ngii e Ngii a milrael el bedul a omsengelel a templo. Ke medengelii tia el cheldecheduch. A Elder James E. Talmage a ulsisechakl el kmo ng mla er ngii a teruich me a kldei el kiuar, “el chelsel e a rechad a ulelsiseb a telengtengir el mora [kakerous] el moktek el ngii a lluches el omesodel ngii el baks.” A Jesus a ulemes a lelir a rulmaked, el ngii a ulsiseb er ngii a betok el bek bedengir a kakerous el chad. Bebil a ulemechei a omiange er tir el obengkel a “meral moktek” e a rebebil a kuk di ulemechei a “diak el uaidisel a silber me a kolt,” el ousbech a kmo te moues, medangch, e mouchetengakl el kirel aika el lomadek.

“A mle teloi er a rebetok a mle chebuul el mla melakl el dil, el ngii … a milechei er a ta er a ika el meringelchad el kiuar a eru el brons el udoud el lomekedong el kmo ng mites; a uldekial a bedekel a diak el bo el tedobech er a tach el sens el udoud er a Ngebard. A Rubak a ulemekedong er a roltirakl er ngii el kirel Ngii, ulmekrael a osengir el mo er ngika el chebuul e kosikii el melakl el redil me a sel tekoi el rirellii, e kmo: ‘Uaisei el kulekoi er kemiu, El kmo ngika el chebuul el melakl el redil a mla otuu a betok, lemuut el betok er a ike el mla soiseb er a chelsel a kiuar: E le di mle ta el loruul a oltuu aike el ngii a betok el ngar er ngii er tir; e ng di ngii a lilecha aike el rokui el ngar er ngii er ngii, el osisiu el rokir el delengcheklel [Markus 12:43–44].”

Ngke el melakl el dil a ual sa el dimlak el oba a ngera el meringel el chad el deruchall er a buai er se el temel. E ng di ng ulebang a muut el klou a ultutelel: se el ngar er a rengul a mle klikiid, e ngii a uldars a rokui el ngii a ullab el mla er ngii er ngii. Uaisei el ike el luleldars a mle kesai er a rebebil, mle mechellakl er a rebebil, e ngodech er a rebebil. A osengir a rebebil, aike el ngii a luldars a diak a belkul, e ng di osengel a Osobel, a “chetengakl er a uldasu me a mera el ngar er ngii er a reng,” ngii a uldars a rokui er ngii.

Rodos, kid kede oldars a rokui el dolab el mora Rubak el diak a mo medechel? Kid kede melenget a temed me a duch er kid me a merael el mei el telcheroll a sebechir el mo mesuub el mo oubeltikelreng er a Rubak e mo oltirakl a Llechul? Kid kede mesiou er tirke el tir a meliuekl er kid me tirke el tir a demukedong el mesiou er tir el oba ulekerreu me a blakelreng—melenget a taem me a klisiich el ngii a sebechel el usbechall er a bebil er a teletael? Kid kede oltirakl el meruul aike el eru el kot el ngarbab el llechul a Dios—mo oubeltikelreng ra Dios e dirrek loubeltikelreng er a Rengelekel? Ng oumesingd el beltikelreng a mocholt el okiu a omesiou.

A President Dallin H. Oaks a ulsisechakl: “A Osobeled a Uldersii el okiu a diak el bechechelingaol el omesiou. Ng ulsisechakl er a tang ma tang er kid a kired el oltirakl er Ngii el meliakl er kid er a bechechelingaol el soal a rengud me bo el sebeched el mo mesiou er a rebebil.”

Ng millemolem:

“A ta er a osisiu el okesiul sel de metom er a rolel a omesiou el mo er a rebebil … a sel cherreuel a chedam me a chedil el mora rengelekir. A rechedil a chuarm er a ringel e obes aike el ngii a orechudel el tekoi er a rengrir me a ongelaod el mo omechell e omekeroul el kirel a ta el ngalek. A rechedam a melbodeb er a klengar er tir me a orechudel el tekoi el mo mesiou er a telungalek. …

“… Kede dirrek el dmeu a rengud el kirir tirke el tir a olengeseu er a rechitechut el chad er a telungalek me a dirrek el mechuodel el chedam me a chedil. Ng diak er a ta er a ika el omesiou a olengit, ngerang rullii el me er ngak? Ngii el rokui a ultiul er a omeliakl el temed el kirel aike el soal a rengud el kirel a diak el bechechelingaol el omesiou. …

“[E a] aika el rokui a olechotel a diak a ulebengelel el osisechakl el kmo kid a ungil a rengud e lmuut el kmal mesubed a rengud sel doruul e dosiou el kirel aike el ngii a doruul, diak el kirel a ngera kede mo ngmai.

“A Osobeled a olsisechakl er kid el mo oltirakl er Ngii el melenget el mo uchul e kede mo meliakl er kid er a diak el bechechelingaol el omesiou el mo er a rebebil.”

A President Thomas S. Monson a dirrek el ulsisechakl el kmo “uaisei sel de bo dechelbangel el obengkel a Ulemeob er kid, e ng diak bo mukerr el kmo, ‘Ng tela el deruchall a mngilai?’ ng bai, ‘Ng tela el rechad a ble molengeseu er tir?’ Ng bai klemerang, kau a diak el sebechem el oubeltikelreng el mora Rubak el di merekmo bo mosiou er Ngii el mesiou er a Rechedal.”

El le uaisei, rodos, ng diak el ior alsekum kede dengchokl a ungil besud er ngii el kingall me a lechub e kede metarchebesud el rokir a miting el ngara sabiter el kingall el ngara kmal uriul. Ng dirrek el diak a belkul alsekum kid, el ngar ngii a meral uchul, e kede tuobed el mera berandang el me mengelaod er a lemangel el tolechoi. A klou a ultutelel a kmo kede mlei el oba sel kmal soal a reng el mo mesiou, el kmo kede dongcheterir tirke el tir a dosiou er tir e oudkeu er tir el oba deurreng, e dirrek el bo dodengelterir tirke el tir a dedak el dengchokl el obengterir—oldars chimad el okiu a klsechelei el diak el ior a kmo kede mukedong el mo mesiou er tir. E ngii a kmal mo bleketakl el ngar ngii a ultutelel mede meruul aike el rokui el kid a meruul el obengkel a tokubets el klekedellel a omesiou el obengkel a beltikelreng me a omelenget.

Ak mla mo medengei el kmo ng diak el belkul a kmo ng kired el mo meruul a chocolate cake el mo ungil besud malechub e dungil sensei ra Primary, leng diak el tekoi ra omeruul cake. Ng sel beltikereng lobengkel omeruul.

Ak olecholt er a klaumerang er ngak el kmo a beltikelreng a meruul chedaol el okiu a omelenget—se el omelenget er a sensei e lmuut el okiu sel kot el ngar er bab e diak a ulebengelel el omelenget er a Ngelekel a Dios. Ak sioning el kmo Ngii a ngar! Ak betik a renguk er Ngii e meral soal a renguk el mo meliakl a bechechelingaol el soal a renguk el mo uchul ak mo sebechek el oubeltikelreng e olisechakl el di uai Ngii. El oba ngklel a Jesus Kristo, amen.