Mo Ta el Kldibel er a Rokui el Tekoi el ngara Kristo
A klisichel a ebangkelio er a Osobel el melodech e omekngeltengat er kid a omaoch el okiu a ultebechelel me a omerellel a tekoi el urekodel er a osisecheklel, telengtengil, me a okesiul.
A ekil a klou a ultutelel dongu el kid el rokui a medengelii. A ekil a meruul er a dersta el rekodoll, dellomel, seng, malechub a kmo ngera el klalou el delidai e dmak el chelechaet. Ng mechas a rengud, le ikel ko er a uaia lak a belkul klalou a sebechel mo uldak el chelechaet e kmal mesisiich. A leuaisei, e sel modekdak e lemechaet a ko er a di hutsu el klalou eng sebechel kmal mo mesisiich el dongu.
Ng uaisei el ekil a mesisiich el klalou leng uldekial a dersta el rekodoll a uchul, me a ebangkelio er a Jesus Kristo meng uaisei el meskid a ngarbab el klemerang me a mui el klengeltengat alsekum e kede oltirakl er a tekingel a Paulus el kmo “ta el kldibel er a rokui el tekoi el ngara Kristo, er a eanged, me a chutem; loltirakl er ngii.” A klou a belkul, a kmo tia el mo kldibel el ngara klemerang a kmal ngii a moktek el bedul a Rubak el Jesus Kristo el Ngii a “rael, e klemrang, e klengar.”
Nglunguchek me a Chedaol Reng bo lomekellomes er a dersta er kid sel dolbedebek el kirel a kmo ng mekera tial osisechakl er a mo ta el kldibel er a rokui el tekoi el ngara Kristo a doltirakl er ngii er a omesubed me a otirekled er a mla moluut el ebangkelio er Ngii er a klengar kid er a bek el sils.
Taem er a Betok el Ocholt
Kid a kiei er a meang el taem er a betok el ocholt er a chelsel a mla moluut el Ikelesia er a Jesus Kristo. Sel meketeketang el dulngiil er ngii ulaoch el mluchais er chelechal sils a oba chimol moktek: mo melisiich a klaumera er kid er a Chedam er a Babeluades me a moktek er Ngii me a Ngelekel, Jesus Kristo, me a Tngkaireng er Ngii. A ongdibel er a Sandei a dimlak el dil beot el mo kedeb a temel. Ng bai, meskid a techelled el menglou a techall me a ngerachel el okiu a derta er kid me a lechub eng telungalek er kid el mo ousbech a temed el melisiich er a klungiolel a Chedaol Sils er a rekeblid me a ikelesia.
Tial mlomerek el Ongeua el buil, e a cheldellel a chelechad er a priesthood a dimlak di lemengodech el merekong. Ng bai, moktek me a klisichel a mlengai el muut el mo er bab e chedaol el teletael er a odingel el mo er a rodam me a rodos er kid.
Meng diuaia chelechaet el ekil el kmal mesisiich e diak el metetemall el dongu, e a ikal rokui el omeruul a telengtengil a blak el reng el mo sumechokl a moktek er kid, me ikel ngarngii er kid, me a ureor er a chelsel a mla moluut el Ikelesia er a Osobel lobengkel a chimol moktek er ngii el mo: olngeseu er a Dios er a Urerel el mo uchul a diak a ulebengelel klengar me a osebelir a Rengelekel. A kulengit me lak bol rrau a rengmiu el kirel tia el mla muchais el tekoi. Ng diak el kired el mechei a komakai el teletelel tiang me rellid el mo rrau a rengud el kirel aikel chedaol moktek er a ikal lomelodech el mla muchais.
Sel kmal soad a kmo a klaumerang er kid er sel moktek er a Chedam me a urerel a Osobel a mo chachisois e sel diak a ulebengelel telbilel a Dios a mo mekedmokl. A ngercheled a olngeseu er a beltel a chad el mo er a Rubak e mo mui er a beltikereng e lmuut el mo ungil mesiou er a rodam me a rodos er kid.
Oldekdak e Omibii
Bebil er a taem e kid el chedal a Ikelesia a oldekdak, e omibii, e oltirakl er a ebangkelio el remuul a betok el tekoi el kired el mesuub me a betok el tekoi el kired el meruul. Eng di tial teletael a sebechel torbengii a klemedengei me a moktek er kid. Ng kired el mo kerekikl le kuk di domes aikel komakai el teletelel a llach eng sebechel choridid er a Rubak.
A moktek me a omengikiid, deureng me a deuil a reng, me a obult e melemolem el mesisiich me a selbechakl el mei lokiu sel “dodersii a [rengud] el mo er a Dios” e “[bodobang] Osengel er a [medad]” a diak le borngii sel sekum e kede kuk di meruul a urerel a chedaol tekoi el kired el meruul. Ng bai, sel klisichel a ebangkelio er a Osobel a sebechel ngodechid e omekngeltengat er kid el mo oltirakl aikal kakerous el osisechakl, suobel, me a omeruul. Ng di sel bo detal kldibel er a rokui el tekoi el ngara Kristo, el mesisiich a moktek er kid lultuil er Ngii, e seikid e a klemerang er a ebangkelio a meltid el mo er sel teletael el Dios a soal a de borngii e outekangel el mo er a ulebongel.
Mesuub e Omekuak a Klemerang er a Ebangkelio
A ebangkelio er a Jesus Kristo a klebokel el besichel a klemerang el “kmal ungil kldmokl” e cheluchaus. Me sel dosuub e domekuak a mla moluut el klemerang er a ebangkelio, e kede mo mukngeltengat el mo ngmai a mekreos e chachisois el chedaol teletael e mo mesa klisichel a Rubak er a klengar kid e mo rongesii a Ngerel. E a suobel er a mo tal kldibel er a rokui el tekoi— el Lobengkel—a mo ngosukid el ngmodech a omerelled e kid a mo kaukledem, e dmak, e cherrungel. Msall e kuchais a osisechakl me a okesiu er a chelsel a Ikelesia el kirel a kusaod er ngii el tekoi.
Kot Lokesiu 1. Sel ongeua el tebechelel a klaumerang a kmal ungil lolchotel a mo ta el kldibel er a rokui el tekoi el ngara Kristo: “Kede oumerang el kmo a kot el suobel me a chedaol ruoll er a Ebangkelio a: kot, klaumerang er a Rubak el Jesus Kristo; ongerung, Ouchel reng; ongedei, Techolbechelid el mo modulb el kirel a ngebetel a klengit; ongeuang, Omor er a chim el kirel a ngeiul a sengk er a Chedaol Reng.”
A meral klemerang a ultuil er a Rubak el Jesus Kristo— el kmo Ngii a chedaol e Di Chimong el Ngelekel a Chedam el Sechal e Ngii a rirekir a Urerel lolsobel. “Le Ngii a nger el mo er a rokui el llach, e ngii a ngoiteterir tirkel rokui loumera er Ngii; e tirkel loumera er ngii a mo urrekodel a rokui el klungiaol; a leuaisei e ngii a mesebechakl er a rengelekel a chad.” A mo ultuil er a klaumera er a Kristo a belkul a kmo kede oumerang e otilid er Ngii el kmo ng Osobeled, e otilid er a Ngklel, me a yaksok er Ngii.
A kot el olchotel a klaumerang el mo er a Osobel a sel douchel a rengud er a kngtid e decheridid er a mekngit. Sel dotilii a klaumera er kid er a Rubak, eng di kid lobult, el bedul ngii, e mo ultuil er Ngii. A leuaisei, e a ouuchel reng a belkul a kmo kede oumerang e ultuil er a Osobel lolngeseu er kid er a ikel diak el sebeched el di kid el remuul. A dersta er kid a kmal kired el mo “mui [lultuil] er ngii le ngii a ngarbab lolsobel” leng di kired “ultuil er a chubechub, me a krazia er a Chedaol Mesiah” e kid a sebeched el mo beches el chad er medal a Kristo e mo sebeched er a uriul taem el lemuut el mo soiseb er a rengedel a Dios.
A Chedaol ruoll er a techolbechelid el mo modulb el kirel a ngebetel a klengit a ultuil er a klaumerang er kid er Ngii, e ultuil er Ngii, e oltirakl er Ngii. A Nephi a ulechais el kmo,“Ak medengei el kmo alsekum e komoltirakl er a Ngalek, loba rokir el rengmiu, el diak mkora mengeblad er medal a Dios, e meral ngarngii er a rengmiu, e ouchel a rengmiu er a kngtemiu, e sioning el mo er a Chedam el kmo ko meral ngarngii er a rengmiu a mo nguu a ngklel a Kristo, lokiu a techolbechelid—oi, el mo oltirakl er a Rubak e Osebeliu el mo modulb er a ralm, lultuil er a tekingel, oi, e seikid e kemiu a mo nguu a Chedaol Reng; oi, e sola ng mochu techolbechelid er a ngau lokiu Chedaol Reng.”
A chedaol ruoll er a omor er a chim el kirel a sengk er a Chedaol Reng a ultuil er a klaumera er kid er Ngii, el mo ultuil er Ngii, e oltirakl er Ngii, e melemolem el mesisiich lultuil er Ngii lobengkel a ngesou er a Chedaol Reng er Ngii. A Nephi a uluchais el kmo, “Chelechang … e a kmal ungil medengei el kmo alsekum a chad a diak loutekangel el mo er a ulebongel, loltirakl a okesiul a Ngelekel a ngar el Dios, eng diak el sebechel mo suobel.”
Tial ongeua el tebechelel a klaumerang a diak louchais a llach ma chedaol ruoll er a chelsel a mla moluut el ebangkelio. Ng bai, tial klemerang a uldekial a rokui el tekoi el ngara Kristo: oumera er Ngii, ultuil er Ngii, e oltirakl er Ngii, e outekangel el melemolem Lobengkel—loltirakl er Ngii.
Ongeru Lokesiu. Ng soak el mo mesaod el kmo ng mekera rokui el prokuram me a teletael er a chelsel a Ikelesia a “luldak el rokui el mo chimong el ngara Kristo. Ng betok a okesiu el sebeched lousbech; ak di ngmilt a bebil lousbech.
Sera 1978, ea President Spencer W. Kimball a dilu er a rechedal a Ikelesia el mo smisichii a zion er a beluulechad el rokir. Ng milellach er a Resanto me lolemolem el ngara ikel rekebelurir e lolisiich er a rechedal a ikelesia el mo mengideb er a telungalek er a Dios e lolisechakl er tir a teletelel a Rubak. Ng millemolem louchais el kmo a lmuut el bebil er a templo a mo mokedechor me a klengeltengat le bo er a Resanto er a ikel basio le kiei er ngii er a beluulechad.
A lorola el betekngang a iidisel a stakes, e mla mo klou a belkul el rekeblirir a rechedal a ikelesia a “mo [basio] el rechedal a telungalek a ngara [beltikereng], el ngii a [sebechir] el smisiich a klengar tir e metik er a beltikereng, me a ngesou, me a omereng el saul, me a olisiich.” Osisiu, e sera 1980, e a miting sel Sandei a mlo edei el sikang a temel el mo “lmuut el melisiich er a ngerchelel a dersta el chad me a telungalek el mo mesuub, oltirakl, e olisechakl er a ebangkelio.” Tial ngerachel el kirel a telungalek me a blai a liluut el kmal mo mesisiich er a chelsel sel “Telungalek: Chais el mo er a Beluulechad” el lebilchisii a President Gordon B. Hinckley er sera 1995.
Sera April 1998, e a President Hinckley a ulechais okedecherul a lmuut el betok el mekekerei el templo, me luchul e a chedaol ruoll er a chelsel a blil a Rubak bolkeed er a Ruriul-klebesei el Santo el mo er a dersta el chad me a telungalek er a beluulechad el rokir. E a ikang a smisichii a techall el kirel a ulekerulel a reng e dirrek el smisichii a klou el belkul a siungel a klechad lokiu sel Perpetual Education Fund er sera 2001.
Sera lengara omerredel, e a President Thomas S. Monson a ulemelekl el melekoi er a Resanto el “mo er a siik” e milketeklii a klou el belkul a ulekerreu el mo er a remechebuul me a rengesool el ngii a tara chedaol ngerchelel a Ikelesia. Seikid e a Self-Reliance Services a ulemuchel er a 2012, el kirel a melemolem el kedmeklel a bedenged.
Aika el mereko el tela el rak, e a klou a belkul osisechakl el kirel omengull er a Chedaol sils er a blai me a ikelesia a mla lmuut el mo mesisiich, el uchul a kedmekled el kirel a ngedechel a ongdibel sel Sandei el mla muchais er tial ongdibel.
Kmeed el elolem el buil er a memong, e a chelchad er a Melchizedek Priesthood a liluut el mo mesisiich e mo oureor lobengkel aikel telengtengil a ikelesia el mo meruul a lmuut el ngarbab e chedaol urerel odingel.
A kumerang el kmo a teletelel me a temel aika el meketeketang el tekoi a sebechel ngosukid el mesa chimol cherrungel el ureor e diak el betok el kakerous el kakeakl el tekoi. “A Dios a mla ochotii a teletael er a chedaol ulekerulir a dersta el chad me a telungalek lokiu a chedaol ruoll, osisechakl, prokuram, me a omeruul el ngii a melutk el kirel a blai e a Ikelesia olngeseu. A prokuram er a Ikelesia a ngarngii lomekngeltengat er a dersta el chad me a telungalek ng diak kuk di el teletael el mereko el medechel.”
Nglunguchek mel sebeched el mtebengar a urerel a Rubak el kmo ng tara kot el klou a belkul ureor er a beluulechad el rokir el ngii a mla merael mo melutk el kirel a blai e a Ikelesia di olngeseu. Ak medengei e ouchais el kmo a Rubak olecholt “e lmuut el mo ocholt ruriul a betok el meklou a belkul tekoi el kirel a Rengedel a Dios.”
Yaksok me a Klaumerang
A kulemuchel er a klemechek el mesaod er sel klisichel a dersta rekodoll sel lemochull el mechaet el mo ekil. Ngosisiu el teletael, e ak yaksok el kmo a osenged me a moktek er kid a mo chachisois, e a klisiich a mo olchotel a omesubed me a otirekled er a mla moluut el ebangkelio er a Jesus Kristo sel dolasm el mo tang er a rokui el tekoi el ngara Kristo—el dirrek el okiu Ngii.
A rokui el techall me a klengeltengat el melutk er a diak a ulebengelel klengar el mokdubech, a sebechel mekedmokl lokiu a moktek, e melemolem el mo er a ulebongel lokiu a Rubak el Jesus Kristo. El uaia tekingel a Alma el kmo: “Ng diak a ngodech el rael me a teletael el sebechel a chad el mo suobel, ng kmal di okiu a Kristo. Le ngii, a klengar e llomes er a beluulechad.”
A kuba deureng e ochotii a sioning er ngak el kirel a chedaol me a klemerang el ngar el Diak a Ulebengelel Chedam me a Ngelekel Sechal, er a Jesus Kristo. Ngokiu a Osobeleld, e kede metik er a deureng. E okiu Ngii e kede metik er a “selbechakl er tial beluulechad, me sel diak a ulebengelel beluulechad el merael mei.” Aika kuchais el ngara chedaol ngklel a Rubak el Jesus Kristo, amen.