Pe kuimba’e sacerdocio-gua

Opavave jareko peteĩ tekove jaguerohorýva, pe ñane mitãrusu jave. Che cheroñoi ha akakuaa Princeton, Nueva Jersey, Estados Unidos-pe. Umi equipo deporte rehegua herakuã guasuvéva hi’aguĩva ore roikohágui oguerekova’ekue tenda oñembatyha tavaguasu Nueva York-pe. Upépe, ymámi, oĩva’ekue mbohapy equipo profesional: umi Dodgers Brooklyn-gua, umi Gigantes Nueva York-gua ha umi Yankees Nueva York-gua. Filadelfia hi’aguĩve ore rógagui, ha upépe oñembyaty umi equipo Atletics ha Phillies. Heta oĩva’ekue tekove che ikatúva arohoryete umi equipo apytépe.

Joe DiMaggio, ohugava’ekue umi Yankees Nueva York-pe, oñekonverti tekove che arohoryvéva béisbol-pe. Che hermano ha che anguirũnguéra ohugarõguare pe escuela che róga ypypegua yvyreípe, che añeha’ãmi abatea aimo’ãvo Joe DiMaggio obatea háicha. Ko’ã mba’e ha’e yma televisiõ ndaipórirõ gueteri (pe prehistoria-pe), upévare arekónte foto kuatiñe’ẽmegua aha’anga hağua mba’échapa ha’e obatea.

Che mitãrusúpe, che ru che gueraha estadio Yankees-pe. Upéramo guare añónte ahechava’ekue Joe DiMagio-pe ohuga. Pe che akãme ha’ete aimévaicha upépe; ahechakuaa chupe obateáramo hína ha ahecha pe béisbol pelota morotĩ ovevérõ umi grada gotyo pe medio campo-pe.

Araka’eve ndahuga porãiva pe béisbol pe tekove che arohoryetévaicha che mitãrõguare; ha katu ajapi porã jave pe pelota, aha’anga pe i’swing atãite ikatuháicha.

Jaiporavóramo tekove jarohorýtava, ñañepyrũ ñaha’anga chupe, jaikuaápe térã jaikuaa’ỹme, pe mba’e jahecharamovéva chuguikuéra.

Mba’eporãra, che ru ha che sy omoĩva’ekue che rapépe imba’eguasúva tekove aguerohory hağua che mitãme. Che ru che guerahava’ekue estadio Yankee-pe peteĩ árante ahecha hağua che hugador de béisbol-pe, ha katu opa domingo ohechauka chéve kuimba’e sacerdocio-gua oikova’ekue chugui peteĩ tekove ojeguerohoryvéva. Upe tekove ojeguerohorýva omoĩporã che rekove. Che ru ha’eva’ekue presidente peteĩ rama michĩva oñembyatýva ore rógape. Ha añetépe, roguejýramo primer písope domingo pyharevekue, oĩma hína hikuái capilla-pe. Araka’eve ndahetavéiva ore rama-pe 30 tekovégui.

Oĩva’ekue peteĩ mitãkuimba’e ogueraháva isýpe ore rógape pe roñembyatyhápe, ha katu ha’e ndoikéiva. Ndaha’eiva’ekue miembro. Che ru omoguahẽva’ekue chupe oñemoaguĩvo ha’e omoĩháme hi auto ha o’invita chupe ore rógape. Pe mitãkuimba’e ikaraíkuri ha oiko chugui peteĩmi líder Sacerdocio Aaronico-gua che arekóva; chugui oiko tekove sacerdocio-gua che oguerohoryvéva. Che mandu’agueteri pe ta’anga yvyrágui jejapopyre ha’e ome’ẽva’ekue chéve premio ramo ajapopa rire peteĩ proyecto ambo’i hağua jepe’a peteĩ viuda-pe ğuarã. Añeha’ãva ajapo ha’e ojapo haguéicha opa ára amoporã jave peteĩ Tupã rembiaguái hembiaporãvape.

Aiporavova’ekue ambue tekove aguarohorýva ore rama’imi Tupaoguápe. Ha’ékuri peteĩ infante marina Estados Unidos-pegua oúva jepi roñembyaty hápe iñuniforme verde infante marina reheve. Uperõ ha’eva’ekue ñorairõ ára, ha upéicha rupi ha’eva’ekue tekove che aguerohorýva. Pe infantería marina-gua ombou chupe Universida Princeton-pe oñemoaranduve hağua. Ndaha’éi ahecharamónteva pe iñuniforme militar, aheja jepi katu chupe ohuga estadio Palmer-pe ha’éramo capitán pe equipo futbol americano-gua Universida Princeton-pe. Ahecha chupe ohuga equipo básquebol universidaguápe ha ahecha avei chupe ohugarõ ha’erõ receptor estrella pe ijequipo béibol-guápe.

Ha pe aimo’ã’ỹvéva, ouva’ekue che rógape entre semána aja ohechuka hağua chéve mba’éichapa ajapiva’erã peteĩ básquetbol pelota che po akatúa ha che po asúpe. He’i chéve aikotevẽtaha upe katupyry ahugátagui tepeĩ árape básquetbol umi equipo porãme. Ndahechakuaái upérõ guare, ha katu heta ary aja ha’ékuri, chéve guarã, peteĩ techaukarã pe kuimba’e sacerdocio-gua añetévagui.

Opavave peẽkuéra ha’éta peteĩ techaukaha kuimba’e sacerdocio-gua, péipota ha ndapeipotáiramo jepe. Peẽ peñekonvertiva’ekue peteĩ tataindy hendývape mboajéramoguare pe sacerdocio. Ñandejára pene moĩ tataindyrendápe pehesape hağua opa tapicha oĩvape pende jerére, ha umi oĩva voi pende sacerdocio quórum-pe. Peẽ ikatu ha’e peteĩ techaukaha guasu, peteĩ techaukaha imba’eguasu’ỹva, térã peteĩ techaukaha ivaíva. Ikatu peje ndaha’eiha mba’eve peẽme ğuarã, ha Ñandejarápe guarã katu imba’eguasu. Ha’e he’iva’ekue péicha:

“Peẽ ningo ha’e ko yvóra resape; ha peteĩ táva oĩva yvyty ru’ãme ndaikatúi ndojehecháivo.

“Noñemohendýi ningo peteĩ tataindy oñemoĩ hağua peteĩ mba’yru guýpe, ha katu pe tataindyrenda ári, ohesape hağua opa óga ryepýpe oĩvape.

“Péicha aveíke tahesakã pende resape yvyporakuéra renondépe, ohecha hağua hikuái pene rembiaporãngue ha omomba’eguasu hağua pende Ru yvágaguápe”.

Che ajehovasava’ekue techaukarãme sacerdocio rekoha imba’egusúvape umi quórum che areko haguépe po’a aservívo. Peẽ ikatu pejapo umi ha’ekuéra ojapova’ekue cherehe ha’évo peteĩ techaukarã ambuekuéra ikatúva osegui.

Che ahecháva mbohay mba’e tapia oguerekóva umi sacerdocio-gua ha’éva tekove che aguerohorýva. Peteĩva ha’e mba’éichapa oñembo’e, mokoîha ha’e akóinte ome’ẽ servicio ha mbahapyha ha’e hekojoja atãse hikuái.

Opavave ñañembo’e, ha katu pe sacerdocio guerekoha peẽ ha’eséva py’ỹi oñembo’e ha añetetépe. Pyharekue, peẽ peñesũ ha pe me’êta aguije Tupãme umi jehovasa pehupityva’ekuére upe ára. Peme’ẽta aguije chupe pende ru ha pende sýre, pene mbo’ehárare ha umi tuicha techaukarã perekóvare pesegui hağua. Pemombe’úta pene ñembo’épe mavaitépa ha mba’éichapa ohovasa pende rekove upe árape. Péva ipukumiéta ha tekotevẽta peñepy’amongeta. Penepy’amondýita ha penemoambuéta.

Peñembo’évo pehupyty hağua perdón, pehechakuaa’ỹre peñepyrũta peme’ẽ perdón pende rapichápe. Peme’ẽvo aguije Tupãme Imba’eporã rehe, peñepy’amongetáta ambue tapicha réra oikotevẽvare imborayhuporã. Ha’e jey, kóva penepy’amondýita ára ha ára ha ára ha, ára ohasávo penemoambuéta.

Peteĩ henda penemoambuetaha pe ñembo’eramo pendepy’aite guive ha’e añetehápe peñandúta peẽ ha’eha Tupã ra’y, apromete peẽme. Peikuaa vove peẽ ha’eha Tupã ra’y, peikuaáta avei Ha’e oha’arõha heta mba’e pende hegui. Peẽ ha’e rupi Ita’yrakuéra, Ha’e oha’arõta pe segui Imbo’epykuéra ha Ta’ýra ohayhuetéva mbo’epykuéra. Ha’e oha’arõ pende pojera ha pende py’aporã pende rapicha ndive. Ha’e ombyasýta peñembotuicha ha pende jehénte pejepy’apýramo. Ha’e pende rovasáta pemoĩse hağua pende rapicha oipotáva umi peẽ peipotáva ári.

Oĩ pende apytépe ha’émava techaukaha ome’ẽva pytyvõ sacerdocio-pe oha’arõ’ỹra mba’eve. Templo-pe opa yvy ári, umi sacerdocio orekóva oğuahẽ ko’ẽ mboyve ha oĩ heta ome’ẽva servicio pyhare peve jepe. Ndaipóri techakuaapy ni momorã ko yvy’ape ári upe sacrificio de tiempo completo ha upe ñemba’apópe ğuarã. Che aha jepi mitãrusukuéra ndive aservi hağua umi oĩva mundo de los espíritus-pe, ndakatúiva ojerure templo-gua jehovasa ijeheguikuéra.

Ahechávo pe vy’a kane’õ rangue umi tapicha rováre omba’apóva upépe pyahareve ha ka’aru, aikuaa oĩha tuicha mba’eporã ko tekove aja péichagua sacerdocio servicio-pe oha’ãrõ’ỹvape mba’eve, ha katu péva ha’énte peteĩ techauka pe vy’a ohasátava hikuái umi oserviva’ekuépe ndive pe mundo de los espíritu-pe.

Che ahechava’ekue upe vy’a umi tapicha rováre omombe’úvo jehovasa oúva ha’égui Tupã rréinogua. Aikuaa peteĩ presidente de rama aimete ára ha ára oguerúva tapicha misionero-kuéra ombo’e hağua. Mése upe mboyvemi, ha’e ndaha’éikuri miembro Tupaogua; ha ko’áğa oĩ misionero-kuéra ombo’éva ha peteĩ rama okakuaáva número-pe ha oñemombaretéva hína ha’e rupi. Ha upévagui tuichavéva katu, ha’e ningo peteĩ tesape ambue tapichápe ğuarã oipe’átava ijurukuéra ha upéicha ombopya’éta ñembyty Ñandejá ojapóva Túva Yvagagua ra’ykuéragui.

Ñañembo’e ha jaservívo ambue tapichápe, jeikuaa perekóva peẽ ha’eha Tupã ra’y ha umi mborayhu perekóva Hese okakuaavéta. Peikuaa porãvéta Ha’e ombyasyha pende rekojoja’ỹramo; peguerekovéta mbarete pe kumpli hağua pene promesa Tupãme ha pende rapichápe. Pehechaporãveta ndapepokoiva’erãha penemba’eỹvare; pende rekojojavéta pene mba’apohára ndive; peğuahê voisevéta ha pejapopavéta opa tembiapo Ñandejára ome’ẽva peẽme ha jepeva’ekue pejapotaha.

Ñañeporandu rãngue oútapa ñane maestro orientador-kuéra, umi mitã familia-kuéra oñe’asiganáva peẽme pevisita hağua penera’arãrõ asý hína. Che ra’ykuéra oguerekova’ekue upe jehovasa. Okakuaávo aja, oguerekova’ekue hikuái tekove sacerdocio-gua ojerohorypaitéva oipytyvõva’ekue chupekuéra omoĩ hağua umi hape oservi hağua Ñandejárape. Upe techaukarã jehovasapyre ohasa hína ko’áğa tercera generasiõme.

Che mensaje avei ha’e aguijeme’ẽrã.

Che aguije peẽme pene ñembo’ére. Ame’ẽ peẽme aguije peñesũ haguére pehechakuaávo ndapeguerekoiha opa ñembohovái. Peẽ peñembo’e pe Túva Yvagaguápe peme’ẽ hağua aguije perekóvare ha pejerure hağua umi Ijehovasa ko tekovépe ha pene familia-kuérape ğuarã. Che aguije peẽme pende servicio rehe ha umi ára napeikotevẽrõ guare ojehecha pende servicio.

Ñande ñamoporãva’ekue Ñandejá he’íramo guare jahekáramo mba’e ñande jupe ğuarã ko yvy’ape ári pe ñande servicio rehe, ndajahuputymo’ãiha jehosava tuichavéva. Penemandu’áne ko´ã ñe’ẽ rehe:

“Pema’ẽke ani peme’ẽ tupãmba’e yvyporakuéra renondépe pehechauka hağua chupekuéra; upéicha pejapóramo, ñande Ru oĩva yvágape nomyengoviái chéne peẽme mba’evépe.

“Peme’ẽ jave, péicha, tupãmba’e, ani pembopu trompeta pene renonderã, ojapoháicha umi hovamokoĩva pe sinagóga ha umi tapépe, yvyporakuéra omomorã hağua chupekuéra; añetehápe ha’e peẽme chupekuéra niko oñemyengoviapáma oñemyengoviave’erã.

“Ha katu nde ome’ẽ vove tupãmba’e, aníke oikuaa nde’asu pe ne’akatúa ojapóva.

“ha’e hağua netupãmba’e kirirĩháme; ha nde Ru, ohecháva kirirĩháme, omyengoviáta ndéve heta tekove renondépe”.

Ha’eva’ekue techaukarã chéve ğuarã umi tekove guasu orekóvape sacerdocio-pe hasy ohechakuaa hağua oguerekoha umi mba’eporã tekove ojehayhutéva orekóva. Ha péicha, ha’etévaicha hasy chupekuéra ojehecha hağua umi mba’e che arohoryetéva. Amombe’úkuri che ru ha’ehague presidente ijerovia mbaretéva peteĩ rama’imi Nueva Jersey-gua topaópe. Uperire, ha’e omba’apo miembro mesa directiva tupaogua Escuela Dominical-pe. Upevére, ko’árape ajesareko añe’ẽ hağua ñembotuicha’ỹme pe iservicio sacerdocio-gua rehe, ha’e noñembotuichágui.

Upéicha avei pe infante marina-gua ha’eva’ekue tekove che arohoryetéva che mitãroguare. Ha’e araka’eve ndohechakuaáiva pe iservicio sacerdocio-gua térã umi mba’eporã ohupytyva’ekue; ome’ẽminte kuri servicio. Aikuaa ijerovia mbarete hague ambue tapicha rupive. Ha katu ndaikuaái ha’épa ohechaneraka’e ijehe umi mba’eporã che amomba’éva hese.

Upéicha, che ñemoñe’ẽ peẽ pehovasaséva ambue tapichápe pende sacerdocio reheve, ha’e hekove rehegua, mavave ndoikuaáiva, térã Tupã añónte.

Peñembo’éke Tupãme; peme’ẽke chupe aguije opa mba’e porã perekóvare. Pejeruréke Chupe mávapepa Ha’e omoĩ pende rapépe peme’ẽ hağua chupe servicio. Pejerure’asyke Ha’e tapenepytyvõ hağua upe servicio-pe. Peñembo’e pe poroperdona ha peñeperdona hağua; upéi katu perservíke, pe hayhúke, ha pe perdonáke chupekuéra.

Ha pe imba’eguasuvéva, penemandu’áke opa servicio peme’ẽvagui, ndaipóri tuichavéva ñaipytyvõ pe ñande tapichápe oguereko hağua tekopotĩ hupytývo pe vida eterna. Tupã ombo’eva’ekue tuicha mba’eha mba’éichapa jaipuru ñande sacerdocio. Ha’e niko techakaha iporãmbáva upévagui. Kóva ha’e techaukarã jahecháva, michĩmi, umi Hembiguái yvy’árigua iporãvéva rehe.

“Ha Tupã Ñandejára oñe’ẽ Moisépe, he’ívo: Yvagakuéra hetaiterei, yvypóra ndaikatúi oipapa; ha katu chéve ğuarã ojeipapa, chemba’égui.

“Ha opataháicha peteĩ yvy’ape ijyvykuéra ndive, upéicha osẽta ambuéva; ha che rembiapo nda’ijjapýrai, ni umi che ñe’ẽ avei.

“Ha, péina ápe, kóva ha’e che rembiapo ha che gloria: Ajapo yvyporakuéra tomanove’ỹ ha hekove ta’ijapyra’ỹ”.

Ñaipytyvõva’erã upe tembiapópe. Opavave ñande ikatu jajapo moambue. Ñañembosako’iva’ekue ñande ára ha tenda ñaimehápe ko tembiapo marangatu ára pahaguápe. Opavave ñandekuéra ojehovasava’ekue techaukarã reheve umi ojapova’ekue upe tembiapógui mba’e imba’eguasuvéva hi’ára aja ko yvy’ape ári.

Ajerure ikatu hağua ñañopytyvõpa ñaime hağua upe oportunida ru’ãme.

Tupã pe Túva oikove ha ombohováita pene ñembo’e pejerurévo pytyvõ peikotevẽva peservi porã hağua chupe. Jesucristo ha’e Ñandejára oikovejeýva. Kóva ha’e Itupao. Pe sacerdocio peguerekóva ha’e pu’aka pemba’apo hağua Hérape ha Hembiapópe peservi hağua Tupã ra’ykuérape. Peme’ẽvo opa pene korasõ ko tembiapópe, Ha’e pene magnifikáta. Apromete péva Jesucristo rérape. Amén.