“Paghigugma sa Pagkat-on, Paghigugma sa Pagpakigbahin,” Alang sa Kalig-on sa mga Kabatan-onan, Hulyo 2024.
Paghigugma sa Pagkat-on, Paghigugma sa Pagpakigbahin
Alang kang Liam N. gikan sa Denmark, ang ebanghelyo usa ka kabahin sa makalingaw ug makatagbaw nga kinabuhi.
Mga Litrato pinaagi ni Ashlee Larsen
Ang pagserbisyo sa uban mahimong mabuhat sa daghang lain-laing paagi. Usa ka paagi nga ganahan si Liam moserbisyo mao ang pagtugtog og musika alang sa uban.
Pag-eskwela o mga kalingawang buhaton? Trabaho o Paglingaw? Seguro adunay usa ka mas maayo nga pangutana: Nganong mopili ra man og usa? Kon siya makahimo, ang 14 anyos nga si Liam N. gikan sa Denmark maningkamot sa pagpangita og maayo nga pagbalanse.
“Gusto ko motugtog og musika,” siya miingon. “Motugtog ko og gitara, mga tambol [drums], baho [bass], piyano, ug yukelele. Naghunahuna ko ang pagtugtog og musika usa ka nindot nga paagi aron mapahayag ang akong mga pagbati. Ganahan usab ako nga motugtog alang sa uban aron sila malipay.”
Kon dili siya maglingaw sa musika, mahimong makita nimo si Liam nga nagdula og soccer, basketball, o chess uban sa iyang mga higala. “Ganahan pod ko og siyensiya ug astronomiya,” siya misulti. “Nindot kaayong makita kon sa unsang paagi ang tanan nagkonektar. Ang Dios naglalang sa tanan, ug nindot kini.”
Agig dugang sa iyang mga kalingawan, si Liam mangita og oras aron sa pagkugi og maayo, maghatod man kana og mga mantalaan libot sa iyang kasilinganan o magtuon alang sa eskwela.
Si Liam nagkat-on sa pagbalanse sa mga butang nga iyang gikinahanglan ug unsay gusto niya nga buhaton. Mahimong daghan siyag gibuhat, apan adunay usa ka butang nga iyang gigahinan og oras sa matag adlaw—ang ebanghelyo ni Jesukristo.
Si Liam nagpuyo sa sentro sa peninsula sa Denmark uban sa iyang mga ginikanan ug sa iyang duha ka mga manghod, si Filippa ug Max.
Usa ka Lima-ka-Minuto nga Tumong
“Bag-o lang kong nakahukom nga mobasa ko bisan usa ka kapitulo sa Basahon ni Mormon—usa lang ka kapitulo—matag adlaw,” miingon si Liam. “Modangat kini og tingali lima ka minuto. Apan naghatag kini kanako og dugang nga kadasig, mao nga andam ako sa pagdawat niana nga hagit.”
Ang pagbasa sa mga kasulatan kada adlaw nakatabang kang Liam labaw pa sa iyang gihunahuna nga kini mahimo. “Usahay kon ako adunay dili maayo nga adlaw, ang pagbasa og makapahupay makapalipay kanako. Apan kon kini usa ka maayong adlaw, kini makapahinumdom usab kanako nga mapasalamaton nga maayo ang dagan sa mga panghitabo. Malipayon ako nga nagpadayon sa pag-uswag sa akong tumong.”
Si Liam bisi sa daghang kalingawan ug mga responsibilidad. Apan ang paggahin og panahon matag adlaw sa pagbasa sa Basahon ni Mormon nakapanalangin sa iyang kinabuhi.
“Kinsa ang Dili Gusto og Hingpit nga Kalipay?”
Si Liam mapasalamaton sa suporta samtang naningkamot siya sa paggahin og panahon alang sa ebanghelyo. “Ako ug ang akong mga igsoon mao lamang ang miyembro sa Ang Simbahan ni Jesukristo sa mga Santos sa Ulahing mga Adlaw sa among eskwelahan, mao nga daghan kaayo sa akong labing suod nga mga higala dili mga miyembro. Apan sa akong hunahuna adunay maayo kaayo nga komunidad diha sa Simbahan sa Denmark. Ang tanan nakaila sa matag usa bisan gamay lang, ug kini nindot kon kaming tanan manag-uban.”
Ang pagbaton og mga higala nga adunay nagkalahilahi nga mga sumbanan usahay lisod. “Ang Denmark maoy nasod diin daghang batan-on ang nag-inom og ilimnong makahubog sukad pa sa pagkabata,” mipasabot si Liam. “Mahimong lisod isip usa ka tin-edyer ang pagbalibad sa mga butang nga ingon niana.” Apan si Liam naningkamot nga mosulti bahin sa iyang gituohan aron mas masabtan sa uban ang iyang mga pagpili.
Ang pagserbisyo sa uban mahimong mabuhat sa daghang lain-laing paagi. Usa ka paagi nga ganahan si Liam moserbisyo mao ang pagtugtog og musika alang sa uban.
“Usahay sa eskwelahan kon duna mi mga klase bahin sa Kristiyanismo, ang mga magtutudlo o mga higala mangutana kanako bahin sa akong pagtuo. Naningkamot ko sa pagpasabot sa labing maayo nga akong mahimo,” misulti si Liam. “Ako usab nga gidapit ang usa sa akong labing suod nga higala sa akong bunyag. Gihatagan nako siya ug ang iyang mama og Basahon ni Mormon ug nakigsulti kanila mahitungod sa pipila ka butang nga akong gituohan. Anaa ra nila ang pagdesisyon kon unsay buhaton nila sa ilang nakat-onan. Gibati nako nga husto ang akong gibuhat sa pagdapit sa uban nga mobati sa samang hingpit nga kalipay nga akong gibati, tungod kay kinsay dili gusto og kalipay?”
Si Liam ug ang iyang mga igsoon mao lamang ang miyembro sa Simbahan sa ilang eskwelahan. Daghan sila og oportunidad nga mahimong maayong mga ehemplo isip disipulo ni Kristo.
Pagsugod sa Panaghigalaay
Nasayod si Liam nga ang pagpasabot sa iyang gituohan o ang paghatag sa usa ka higala og Basahon ni Mormon dili lamang ang paagi nga mahimong disipulo ni Jesukristo. Usahay ang pagdapit sa uban nga mobati sa hingpit nga kalipay sa ebanghelyo yanong magsugod pinaagi lang sa tinuod nga panaghigalaay ug gugma.
“Ganahan kaayo ko sa istorya ni Ammon diha sa Basahon ni Mormon,” miingon si Liam. “Sa akong hunahuna kini makapainteres nga siya wala moduol ngadto ni Hari Lamoni ug moingon, ‘Ikaw maminaw sa unsay akong gituohan,’ apan nga siya hilom nga nakighigala kaniya ngadto sa punto nga ang hari maoy nag-una og pangutana kang Ammon, ‘Giunsa man nimo nga ingon ka man niana kamaayo?’”
“Makahimo usab kita og mga panaghigalaay nga relasyon sa uban,” miingon si Liam. “Tingali moduol sila kanato ug mangutana kung unsa ang naghatag kanato og dugang nga kusog.”
Usa ka Tibuok Kinabuhing Panalangin
Gibati gyod ni Liam nga ang pagsunod sa ebanghelyo nakahatag kaniya og dugang kusog. Kini nakapanalangin sa iyang kinabuhi labaw pa sa chess, musika, sports, o sa bisan unsa nga maayong mga butang nga iyang gihatagan og panahon.
“Mapasalamaton ko nga naa sa akong kinabuhi ang ebanghelyo tungod kay nagtuo ko nga dili ako sama sa unsa ako kon wala kini,” miingon siya. “Gibati nako nga ang Ginoo mas nakaila kanako kay sa akong pag-ila sa akong kaugalingon. Nasayod ako nga ang Dios ug si Kristo buhi. Gipakita Nila kanato ang dalan nga gikinahanglan natong agian ug gitabangan kita nga mahimong mas maayo.”