Makaantos sa Tanang Butang

Pagkalahi ra nga sitwasyon itandi sa duha ka oras sa wala pa ang hitabo. Malipayon kaayo akong misugod sa usa ka pagdagan agi sa awaaw nga dalan atol sa usa sa maanindot nga mga adlaw nga akong nasinati niana nga ting-init diha sa taas nga bukid sa kasadpan sa Wyoming, USA. Ang langit sama sa kolor sa asul nga neyon cobalt, ang ihalas nga mga bulak nagkatag sa ngilit sa mga bungtod, ug ang hangin sa kabuntagon bugnaw nga presko paminawon. Usa kadto ka hingpit nga adlaw alang sa usa ka 15 ka milya (24 km) nga dagan diha sa mga bukid.

Kini mao ang labing nindot nga pagbansay sa pagdagan. Naningkamot ko sa pagpalig-on sa akong kusog ug sa paglahutay alang sa usa ka lumba sa dagan duha ka bulan na lang. Ang mga magdadagan makadugang sa kalig-on pinaagi sa paghimo og balik-balik nga mga pagdagan sa mubo nga distansiya. Kini makapalig-on sa pagkamalahutayon, nga moresulta sa lig-ong pagsugakod.

Sa wala lang nako damha nga sa dili madugay magkinahanglan ko sa tibuok kalig-on ug gahom nga aduna ako tungod kay mabutang sa peligro ang akong kinabuhi.

Naghinumdom sa mga nangagi, nakita gyod unta nako ang mga timailhan. Hinoon, ang Ginoo nagsulti kanato nga Siya “[mopakita] [kanato] sa mga butang umaabot” pinaagi sa gahom sa Espiritu Santo (Juan 16:13). Sama sa gitudlo ni Elder Gary E. Stevenson sa Korum sa Napulog Duha ka Apostoles, “Ang Espiritu Santo makatabang kaninyo pinaagi sa pagpasidaan kaninyo og una bahin sa pisikal ug espirituhanong mga kakuyaw. ” Ug sa ingon Siya [Balaang Espiritu] mipasidaan gayod.

Pipila lang ka minuto sa akong pagdagan, mitan-aw ko sa ubos ug adunay nakit-an. Kalit nga kakuyaw ang miabot sa akong kasingkasing sa dihang nakita nako ang dili masaypang porma sa tunob sa usa ka oso diha sa yuta sa akong atubangan. Usa kadto ka klaro nga pasidaan. Sa kabuang, nangatarongan ko nga ang usa ka oso miagi gayod niini nga agianan apan sa pagkakaron luwas ako. Wala na akoy angay nga kabalak-an, sakto? Ug mao mipadayon ko sa pagdagan.

Wala pa ang usa ka oras human niana, nagsaka ko sa usa ka gamay nga bungtod ug midagan paubos ngadto sa usa ka hawan nga napalibotan sa kakahoyan. Dihang duol nako moliko paubos sa bungtod, nakadungog ko og naglagubo nga banha, kusog gayod kaayo, nga nakapabarog sa mga balahibo sa akong tangkugo. Midali ko og hunong ug hinayhinay nga milingi padung sa wala. Dayon mikaging ko sa kahadlok. Ang banha, nga dali dayon nakong gihunahuna nga nagkabali-bali nga mga sanga, paspas nga nagkaduol. Dayon nakita nako ang usa ka talan-awon nga dili gayod nako hikalimtan—usa ka hamtong bangis nga oso nagpadulong diri kanako!

Ang bangis nga pag-atake nga misunod mahimong makapatay kanako. Klaro kaayo nga sobra ang kasuko sa oso, nga akong nasamok dihang miabot ko sa hawan diha sa kusog nga pagdagan. Apan niana nga higayon nga nakahunahuna ko nga ang kamatayon segurado na nasundan kini og labing sinsero nga pag-ampo sa akong tibuok kinabuhi. Ang panginlabot nga mga kaluoy gikan sa langit miabot.

Sa dili mapasabot, ang oso mihunong sa iyang mabangis nga pag-atake ug midagan padulong sa mga kakahoyan. Kana mao ang maayong balita! Ang dili maayo nga balita mao nga aduna akoy 16 ka grabe nga mga samad gikan sa mga ngipon ug sa mga kuko sa oso ug nag-inusara diha sa lasang, naputos sa dugo, ug 11 ka milya (18 km) gikan sa kinaduolan nga dalan sa parke, nga walay tabang nga makita.

Kalit nakong napalgan ang akong kaugalingon nga nag-atubang og malisod nga desisyon. Kon kamo wala pa makasulay og ingon niana nga sitwasyon, salig nga kamo makasulay. Ang kalisdanan kabahin sa plano sa Langitnong Amahan. Maayo na lang gani, ang maatake og usa ka oso dili lakip niini—dili mahitabo sa kadaghanan nato! Apan adunay pipila ka higayon, mahimong mobati kamo nga nabug-atan sa bisan unsang kalisdanan nga inyong giatubang. Kini usa ka walay paglaom nga pagbati nga ang Ginoo sa makausa klaro nga mihulagway nga “ang mga apapangig gayod sa impyerno” nga “mobuka ug moabli sa ba-ba og dako diha kanimo” (Doktrina ug mga Pakigsaad 122:7).

Niining mga krisis nga nagsanga-sanga diha sa inyong kinabuhi, aduna kamoy usa ka desisyon nga pagahimoon. Mahimo kamong moundang, mohigda, ug mamatay; o makahimo kamo sa pagpagawas sa tanan ninyong kaisog ug kusog ug maisogon nga makig-away, mosalig nga kon inyong buhaton ang inyong bahin, ang Ginoo mobuhat usab sa Iyaha. Ang Ginoo mipasabot sa katuyoan sa mga kalisdanan sa kinabuhi ngadto ni Joseph Smith samtang napriso siya sa Bilanggoan sa Liberty: “kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7).

Ug kini makabenepisyo kaninyo. Kini mobaid ug mohapsay kaninyo samtang kamo magtubo nga mas kusgan ug lig-on. Mao kini kon ngano ang Ginoo misulti ni Joseph—ug nagsulti kaninyo—sa “[pag]padayon sa imong pamaagi” diha sa pag-atubang sa mga pagsulay ug kalisdanan (Doktrina ug mga Pakigsaad 122:9). Samtang magpadayon kamo sa kinabuhi—bisan kon ang inyo na lang mga kuko ang naghawid—inyong makaplagan nga ang inyong gamay na lang nga kalig-on gidugangan og dako nga kalig-on sa Ginoo. Sama sa gisaad, Siya mao ang “gamhanan sa pagluwas” (2 Nephi 31:19).

Kana mao gyod ang nahitabo nako. Imbis nga mohunong, midesisyon ko sa pagbangon. Determinado ko nga mabuhi, nga nagpasabot nga kinahanglan akong mangita og tabang. Nagkapandol sa akong agianan paubos sa dalan nga kapin pa sa usa ka milya [1.6 ka kilometro], sa kataposan nakatagbo nako ang mga tawo nga mao ra ang anaa diha sa lasang nianang adlawa nga mga milya ang gilay-on. Kadto nga milagroso nga pagkatagbo sa kataposan misangpot sa usa ka pagluwas gamit ang backcountry helicopter, tulo ka makaluwas sa kinabuhi nga mga operasyon, ug mas klaro nga pagsabot sa panalangin sa determinadong “pagpadayon sa imong pamaagi.”

Kini nga kasinatian nakadugang sa akong gahom, determinasyon, ug hugot nga pagtuo. Kini usab nakapalig-on ug nakaandam nako sa pag-atubang sa ubang hagit sa kinabuhi. Ako segurado nga samtang kamo “[mopailob] sa tanang butang, [motuo] sa tanang butang, [molaom] sa tanang butang, [molahutay] sa tanang butang” (1 Mga Taga-Corinto 13:7), matukod ninyo ang kalig-on ug kusog nga inyong gikinahanglan sa pag-atubang sa mga hagit. Inyong makita ang kamot sa Ginoo nga naghimo kaninyo nga andam sa bisag unsa ang moabot—bisan kon kini mao gayod ang “mga apapangig sa impyerno.”