Tōmak kōn Ilju im Jekļaj

Kom̧m̧ooltata, Elder im Sister Gilbert, kōn kakkobba im naan in kam̧ool ko amiro. Ij keememej kar en̄jake in ilo Peru im bar katak ko am̧ im elmen aer kar jeraam̧m̧an kaki im raar itok jān katak ko am̧.

Ikōņaan kōjem̧ļo̧k naan kein aō kōn juon naan: kōjatdikdik.

Ij tōmak bwe epidodo ļo̧k n̄an kōj ro rerūtto n̄an kile pein Irooj ilo mour ko ad jān kom̧ ro rōm̧m̧an ded. Kōnke jekkar mour aetokļo̧k ium̧win iiō ko im ioon elōn̄ men ko ilo kar mour ko ad m̧oktaļo̧k, jemaron̄ reilikļo̧k im lo pein iakwe eo an Jemedwōj Ilan̄ ilo an tōl im kejparok kōj ilo aolepen iio in mour ko ad.

Kiiō ij reiliklo̧k, ij kile bwe ilo elōn̄ iien ko iaar ļōmņak imake iaō, ikkar jab. Ij loe kiō bwe n̄e jet kōjām ko rej killōk im ekkā aō ļōm̧ņak etke eindein im ij tarpok kake, ilo aō kōļmenļo̧kjeņ bwe jar ko aō rejjab uwaak, ilo m̧ool, juon bar kōjām ilo bar juon tōre ak ilo bar juon jikin kar peļļo̧k n̄an juon iaļ em̧m̧anļo̧k. Bōtaab ikar jab loe ilo tōre ko. Ak imaron̄ loe kiō, ilo aō reilikļo̧k.

Elōn̄ bar iien ko jet, ikar ļōmņak n̄a eo ij kōm̧m̧ani jokāālet ko n̄an n̄a make ak ippān Mônica, tōmak ke n̄a eo imeletlet tata n̄an kepooj ilju eo aō. Ij kiiō loe juon pā eo ettino itulikin ta ko rekkar bōk jikier eo ej tōl eō im kōjparok eō jān jabdewōt ro̧ļo̧k ko. Ij lo ke E ear pād ippa aolep iien.

En̄iin ej unin bwe in maron̄ kam̧ool bwe ewōr juon Jemedwōj Ilan̄ eo ejeļā wōn kōj im Ej iakwe kōj. Imaron̄ kam̧ool bwe ewōr juon ad rikanaan eo ej iakwe koj im ej pojak n̄an jipan̄ kōj ilo jabdewōt jekjek ko ilo mour ko ad.

Jet iien, jet iaami rej ļōmņak ejeļo̧k emeļeļe ta eo kwoj ioon e ilo mour ko ami, im bōlen kwomaron̄ jim̧we; jejjab. Ak Rilo̧mo̧o̧r eo ejeļā. Elder Bednar eaar katakin kōj:

“Ejjeļo̧k metak in ānbwin, ejjeļo̧k liājļoļ in ad, ejjeļo̧k en̄taan in jetōb, ejjeļo̧k nan̄inmej ak m̧ōjņo me kwe im n̄a nan̄in ioone ilo ito-itak in ad ilo mour wabanban in me Rilo̧mo̧o̧r eaar jab en̄jake m̧okta. Kwe im n̄a ilo tōre in m̧ōjņo maron̄ lam̧ōj, ‘Ejjeļo̧k juon emeļeļe. Ejjeļo̧k juon emeļeļe.’ Ejjeļo̧k armej, em̧ool, ejeļā. Bōtaab Nejin Anij eweppān an jeļā im meļeļe, bwe Eaar en̄jake im ineek eddo ko ad m̧okta jān ad kar kōm̧m̧ane. Im kōnke Eaar kōļļāik wōņāān eo eļap tata im ineek eddo jab in, Ewōr An meļeļe ewāppen kōn kōj im Pein tiriam̧o eo pein ej erļo̧k ilo elōn̄ m̧ōttan ko ilo mour [ko ad].”

Ilo Alma 7 jej katak ekōjkan im etke Rilo̧mo̧o̧r emaron̄ letok kajoor in jipan̄ in.

“Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k; im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmij ko an armej ro an.”

Aaet, Rilo̧mo̧o̧r eaar jab en̄taan wōt kōn jerawiwi ko ad bōtaab eaar barāinwōt kōn kalijekļo̧k ko, kōmattōr ko, metak ko, liājļoļ ko, im aolep eddodo in en̄jake bwe jān maron̄ wōnm̧aanļo̧k ilo mour ko ad.

Innām Alma ej kōjem̧ļo̧k:

“Im Enaaj bōk Ioon mej, bwe E en maron̄ kōtļo̧k to ko an mej rej lukwōj armej ro An; im Enaaj bōk Ioon m̧ōjņo̧ ko aer, bwe būruōn ren maron̄ obrak kōn tūriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.”

Ewōr juon aō naan in kam̧ool kōn jipan̄ in tok jen lan̄. Em̧ōj aō ioone ilo tōre in jodikdik eo aō, m̧are eo aō, ilo aō juon jemen bam̧le, im ilo mour in tōl eo aō. Ijeļā bwe Rilo̧mo̧o̧r emour im ilo jouj eo An im kōjeraam̧m̧an in Pinmuur eo An, jemaron̄ wōr ad kōjatdikdik im m̧ōņōņō ilo mour in im mour in baam̧le eo indeeo tokālik.

Kōn menin ij kam̧ool, kōn aolepān aō iakwe, ilo etan Jisōs Kraist, amen.