Onimaki i nanon Taai aika a na Roko

Kam bati n rabwa, Unimwaane ao Titita Gilbert, ibukin ami reirei aika a tamaroa. I uringa te bwai are e riki i Peru n reitaki naba ma am reirei ao bwa ti rangi ni kakabwaiaaki ao a rangi ni kakabwaiaaki naba aomata man am reirei n taai akekei.

I tangiria ni motika au maroro n te taeka ae kangai: te kaantaninga.

I kakoaua bwa e bebeete riki iroura ngaira ikawai bwa ti na kinaa bain te Uea i nanon maiura nakoia kairake. Ibukina bwa ti a tia ni maiu n ririki riki aika a mwaiti ao n bati bwaai aika ti rinanona ngkoa, ti kona n tanrikaaki ao n noora bain Tamara are i Karawa ae tatangira ni kairiira ao ni kamanoira i nanon maiura.

Ngkai I tanrikaaki ngkai, I kinaa bwa n taai aika a mwaiti are I taku bwa bon tii ngai, I bon aki. I kona n nooria ngkai bwa ngke a kainaki tabeua mataroa ao I titiraki inanou man ngurengure iai, ngke I taku bwa e aki kaekaaki au tataro, ma ni koauana, te mataroa teuana, n te tai teuana, ke n te tabo teuana e uki nakon te kawai ae tamaroa riki. I aki nooria n boong akekei. Ma ngkana I tanrikaki ngkai, I a kona n nooria.

E mwaiti te tai are I taku iai bwa a tamaroa babaire ake I karaoi ibon irou ke ngai ma Mônica, man taku bwa boni man wanawanau are I a katea iai arou ibukin taai aika a na roko. I kona ngkai n noora te bai ae aki nooraki n te mata i akuun te bwai ae riki ae kairai ao n kamanoai man kaairua. I kona n nooria bwa E memena ikekei n taainako ibukiu.

Anne bukina ae I kona n kakoaua bwa iai Tamara are i Karawa ae kinaira ao n tabe i bukira. I kona n kakoaua bwa iai ara Tia Kamaiu ae e tangiriira ao e tauraoi ni buokiira ni baika a riki ni maiura.

N tabetai, a iango tabeman mai i buakomi bwa akea ae ataa te bwai are ko rinanona ni maium, ao tao ko bon eti, ao ngaira tiaki. Ma e ataia te Tia Kamaiu. E reireiniira Unimwaane Bednar:

“Akea te maraki n rabwata, maraki n nano, korakain te tamnei, akea te korakai ke te mamaara are ko rinanona inanon maiura n te maiu ae mamate are e aki rinanona moa te Tia Kamaiu. Ngai ao ngkoe, n te tai ni mamaara, ti kona ni bwaebwaeti, ‘Akea ae oota iai. Akea ae e ataia.’ Akea te aomata, ae tao, e ataia. Ma natin te Atua e ataia ni koaua ao e mataata, bwa E namakinna ao ni uota rawawatara i mwaain are e riki nakoira. Ao ibukina bwa E kabooa man uota te korakai anne, E kororaoi maiai ana nanoanga ao ni kona n arora baina n nanoanga nakoira n taai aika a kakaokoro inanon [maiura].”

N Aramwa 7 ti reiakinna bwa e kangaa ao bukin tera ngkai e kona te Tia Kamaiu ni katauraoa te aeka ni buoka aei.

“Ao e na waaki, n rinanon te kainnano ni maraki ma te karawawataki ao te kaririaki n aekaia nako; ao aio bwa e na kakoroaki te taeka are e taku bwa e na uota iaona marakiia ao aorakiia ana aomata.”

Ngaia are e korakai te Tia Kamaiu tiaki ti ibukin ara bure ma E boni korakai naba man mwakuri n aonikai, te maraki, te rawawata, ao korakain te iango n aekana nako are ti kona n rinanona inanon maiura.

Ao i mwiina ao e kaina ana marooro Aramwa:

“Ao e na uota i aona te mate, bwa e aonga ni kabwara ana kabaebae te mate are e kabaeiia ana aomata; ao e na uota i aona mamaaraia, bwa e na on nanoia n te nanoanga ni kaineti ma te maiu n rabwata, bwa e na ataia ni kaineti ma te maiu n rabwata bwa e na kanga ni buokiia ana aomata ni kaineti ma mamaaraia.”

Iai au kakoaua irou n te buoka ae mai karawa aei. I a tia ni karekea i nanon au tai ni kairake, ieiniu, kairakia natiu, ao n au kairiiri. I ataia bwa e maiu te Tia Kabooa Maiu ao i nanon ana akoi ao Ana kakabwaia n Ana mwakuri ni kamaiu, ti kona n karekea te kaantaninga ao te kimwareirei n te maiu aei ao te utu ae akea tokina n te maiu ae na roko.

Aio au koaua ma nanou ni kabane n aran Iesu Kristo, amen.