Aia Taeka Unimwaane ao Titita Gilbert

Unimwaane Clark G. Gilbert: Kam rabwa, Unimwaane ao Titita Godoy. N te wiiki aio I tuanga kainabau bwa ae a na weteira te Godoy bwa ti na taetae tabeua te miniti. Ao e taku, “Ngaia, ao mwaitira aomata aika a na mena ikanne?” Ao I taku, “O, tao tengaa tabun aomata n te Taebanaeko, ao bubua tabun tengaa ni katobibia te aonaaba. Tai raraoma.”

Ai korakorara ae kam a tia n reiakinaki n te tairiki aei. Unimwaane ao Titita Godoy, kam rabwa ibukin reiakinaia kairake ni ikawai n ae rangi n tamaroa. Christine ao Ngai ti kakaitau ibukin taai aika mwaiti are ti reitaki ao n reiakinaki irouia kairake n ikawai ni kabutaa te Ekaretia. Ongoraara nakoia te utu ae te Godoy n te tairki aei e rangi n tamaroa. Ngkana ti ikawai, ti tangiria n riki n ai aroia te utu ae te Godoy. E teretere bwa a namakina kainanoia ao raraomaia kairake n ikawai ao e korakora tangirakimi irouia.

Te bwai ae kamiimii nakoiu bwa aia rongorongo e bon boboto i aon Kristo ao n nene i aon taetae ni burabeti. Ngkai I ongoraa irouia n te tairiki aei, kanga e reke namakinan okiokin te rongorongo n taetae ni burabeti ake a tia ni kanakoaki n taian bootaki n taromauri ae tabangaki n te aonaaba iroun Beretitenti Nelson, Beretitenti Oaks, ao abotoro ake tabeman. Ti a toki moa teutana ao ni iangoa te boto ni iango ake a tibwai te Godoy n te tairiki aei:

1. Te bwaibwai iroun Kristo ao ara Berita aika Tabu

2. Te Marooro

3. Karekean te Kaotioti ae Onoti Ibukim

4. Bannan Mwakuri n Ibuobuoki

   • Te Tembora

   • Mition

5. Te Kareke Tangira ao te Mare

6. Kakawakin Iriran te Intitute

Aki ti aron tibwaan aron mwanangaia te utu ae te Godoy, ma a karaoia n te aro ae e onoti nakoia ao ae nanonaki raoi. Au kantaninga bwa kam nora anne bwa kaotan aia tangira ao aia raraoma ibukimii. A tia naba n tibwa aia rongorongo ni kawai aika a kamatoai reirei n taetae ni burabeti ao ni kauringiira bwa ti na karaoi baikai rinanon te Tia Kamaiu Iesu Kristo.

Titita Christine Gilbert: Teuana mai ibuakon banna ae mamate nanou iai n te tairiki aei bon tamneia te Godoy ngke a taanga ni kairake. E taraa n ae a nakoraoi bwaai iroun Monica, ma e taraa n nakonanon Carlos!

Nora kaokorona ma tamnein te utu ae te Godoy ae bwanin.

I bae ni iangoia ngkana kairake aika Carlos ao Monica a bon noria natiia akanne n taai rimwi, ai natiia, ao tibuiia i nanon ririki ake ngkoa. Tao a ataia ae a na bane aia reirei ae rietaata, te mwakuri, moanan ao karikirakeaia aia utu, te beku n te Ekaretia, maeka n te aonaaba ni kabutaa, ao ni weteaia ngkai ae kinaaki ni kairiiri n te Ekaretia? Ti tangira Unimwaane ao Titita Godoy. Ti noriia bwa raoraora ao banna ni baika a kona ni karaoaki ngkana ko kawakin am berita aika tabu, maiuakina te euangkerio, ao ni kairiiran te Uea i nanon mwanangami. I tei bwa te tia kakoaua bwa ngkana ti kairiira te Uea, E na kaira nanora ao ni kakorakoraa ara kekeiaki ae tamaroa.

Unimwaane Gilbert: Taraan aron mwanangaia te utu ae te Godoy ao aia banna ni kairiira te Uea e kauringai te taneia ae onoti irou ae ti rinanona Ngai ma Unimwaane Godoy onoua te ririki n nako.

I bon beku ngkoa bwa te beretitenti n te BYU–Pathway n te Aonaaba ni Kabutaa, ao Unimwaane Godoy bon te Beretitenti ngkoa n te Aono n te South America Northwest Area, ae mena i Lima, Peru.

Peru bon te aono ae nakoraoi iai te Ekaretia ma te titeiki ae riaon 40 ao uoua tembora ngkai. Iai te ngaa ataein BYU–Pathway i Peru. N te tairiki anne, n aron naba te tairiki aei, ti butiia Unimwaane Godoy bwa E na taetae nakoia kairake ni ikawai iaon mwanangaia ni waakin te reirei.

E a tia Unimwaane Godoy ni katauraoa ana marooro, ma ngke ti tekateka i moa n taraiia ataei ni kabane, e taonna te rawawata ibukin baike ti tuangiia bwa a na karaoia. E rotaki nanona ngke e iangoaiia kairake n ikawai aikai n reiakina te taetae ni Imatang, n anai kooti n reirei ake i aona, ao ngkai iai aia mwakuri ae bwanin ao ni manga kamatebwai n te taetae ae tiaki oin aia taetae. Ma nanona ae rangi n rootaki, e katuka ana marooro Unimwaane Godoy are e a tia ni katauraoia, e teirake, ao n taekinna ma te korakora: “Te bwai ae ti tuangi ngkami bwa kam na karaoia e bon matoatoa—riki ngkana ko kataia ni karaoi ti ngkoe. Te kawai teuana ae ko kona ni karaoa aei bon kairiiran te Uea i nanon am kamatebwai. Karika te Uea bwa toam, ao a na roko bwaai aika tamaroa nakoim inanon taina.”

E ataia i mwiina Unimwaane Godoy bwa tera are e aki rangi ni mataata iai i nanon ririki ake ngkoa ngke ngaia te kairake n ikawai i Brazil ma ana kawaerake ae mwarairai ae bubura rangana: ti te kawai ibukim n riki nakon are ko na riki nako iai ao ni kunea te kimwareirei i nanon mwanangam bon kairiran te Uea i nanon am tai n reiakinaki. N te tairiki aei, ti a tia n nora te kakoaua iaon te reirei anne. Carlos ao Monica Godoy bon banna ni katooto aika maiu ni baika ti kona ni karaoi ngkana ti katuka ara onimaki iroun te Uea ao ni Karikia bwa toaia.

Ti tangiriia te taanga aei ao I kamatoaa aia marooro nakoimi. Ti tibwa ara kakoaua Ngai ao Christine bwa ngkana ko kairiira te Uea i nanon am kekeiaki, E na karika te kakai i nanon maium. Ti taekin aikai n aran Iesu Kristo, amen.