Vakabauta ena Veisiga ni Mataka

Vinaka vakalevu, Elder kei Sister Gilbert, ena nomudrau ivakasala totoka kei na ivakadinadina. Au nanuma vinaka tiko na veika au sotava mai Peru kei na nomu veivakavulici ka keitou kalougata kara kalougata talega kina ena nomu veivakavulici ena gauna oya.

Au via tinia na noqu vosa ena dua na vosa: nuinui.

Au vakabauta ni rawarawa vei keda na itabaqase me da raica na liga ni Turaga ena noda bula mai vei ira na gone. Baleta ni keirau sa bula mai ena dua na gauna balavu ka vuqa na veika keirau sa lako curuma mai, e rawa me keirau rai lesuva na ligana loloma na Tamada Vakalomalagi, dusimaki keirau ka maroroi keirau voli ena neirau bula taucoko.

Niu rai lesu, au raica ni gauna au nanuma kina niu tu duadua, au liaca ni sega ni vakakina. Au rawa ni raica qo ni gauna edau sogo kina vei au eso na katuba kau dau vakananuma e cava beka, lako vata na noqu kudru, na gauna au nanuma kina ni sega ni saumi na noqu masu, e dau yaco, me tadola tale e dua na katuba, ena dua tale na ituvaki vou, se dua tale na vanua vinaka cake sara. Ia, au sega ni dau raica rawa ena gauna oya. Ia, Au rawa ni raica rawa oqo, niu railesu.

Ena vuqa talega na veigauna sa oti, au nanuma niu sa cakava tiko na vakatulewa vuku se kei Monica, niu vakabauta tu niu vuku vei keirau niu sa tara cake tiko e dua na bula vinaka me baleta na veisiga ni mataka. Au rawa ni raica e dua na liga ka sega ni laurai e matanavotu ena daku ni veika e yaco tiko me dusimaki au, taqomaki au mai na so na digidigi calacala. Au rawa ni raica ni dau tiko ga o Koya kei au.

Oya na vuna au rawa ni vakadinadinataka kina ni tiko na Tamada Vakalomalagi koya e kilai keda ka kauwaitaki keda. Au vakadinadinataka ni tiko na noda iVakabula koya e lomani keda ka tu vakarau me vukei keda ena ituvaki cava ga ni noda bula.

Eso na gauna, eso vei kemuni ena nanuma ni sega ni dua e kila na veika o ni lako curuma tiko ena nomuni bula, ka rairai oni dina beka, ni keimami sega dina ni kila. Ia e kila na iVakabula. Vakavulica o Elder Bednar vei keda:

“E sega ni dua na rarawa vakayago, sega na lolosi ni yalo, sega na rarawa ni yalo, sega na ivalavala ca se malumalumu e daru sotava o iko kei au ena ilakolako ni bula oqo me a sega ni bau sotava mada e liu na iVakabula. O iko kei au, ena dua na gauna ni bula malumalumu eda rawa ni kacivaka yani, ‘E sega ni dua e kila se vakacava tu. Sega ni dua e kila.’ E sega ni dua na tamata e kila. Ia na Luve ni Kalou esa kila vakavinaka deivaki tu, ni sa vakila ka a colata o Koya na noda icolacola vakayadua bera ni da lako curuma. Ia baleta na ilutua kei na tawamudu ni Nona isoro, sa tiko Vua na kilaka vinaka sara ka sa rawa ni dodoka vei keda na Ligana loloma dau veivueti ena vuqa na ituvaki duidui ni noda bula. ”

Ena Alama 7 vulica na sala kei na vuna sa mai vakarautaka kina na iVakabula na veivuke vakaoqo.

“Ia ena lako yani ko koya, ena vakila na mosi kei na veivakararawataki kei na veivakatovolei kecega; ia sa yaco na veika oqo me vakayacori kina na vosa sa tukuni ni na colata ko Koya na nodra mosi kei na nodra tauvimate na nona tamata.”

Na iVakabula e sega ni lako curuma walega na rarawa me baleta na noda ivalavalaca, e lako curuma talega na rarawa ni veivaduiduitaki, ni mosi, na rarawa, kei na veimataqali lomaocaoca ni vakasama eda lako curuma.

Qai tinia o Alama:

“Ia ena mate ko koya, me tasereka kina na ivau ni mate sa vauci ira tu na nona tamata; ia sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.”

Au sa ciqoma e dua na ivakadinadina ni veivuke vakalomalagi oqo. Au vakila na veika oqo niu se itabagone, noqu lei vakamau, nodra tuberi na gone, kei na noqu bula ni veiliutaki. Au kila ni bula tiko na noqu Dauveivueti, ena vuku ni nona loloma soliwale kei na veivakalougatataki ni Veisorovaki, eda rawa ni niutaka ka kune marau ena bula oqo kei ira noda lewe ni vuvale ena bula tarava.

Au vakadinadinataka oqori, ena noqu loloma, ena yaca i Jisu Karisito, emeni.”