NODRAU VOSA O ELDER KEI SISTER GILBERT

Elder Clark G. Gilbert: Vinaka vakalevu, Elder kei Sister Godoy. Ena tekivu ni macawa oqo au kaya vei watiqu ni rau sa lesi keirau na Godoy me keirau vosa vakalailai nikua. Ka kaya mai o koya, “Ena vica beka na tamata ena tiko ekea?” Kau kaya yani, “Ena vica toka na udolu na tamata ena Valetabalaca, ka drau vakaudolu e veiyasai vuravura. Kua ni loma leqa.”

Sa vakacava na kaukauwa mana ni nomuni vakaroti ena bogi nikua. Elder kei Sister Godoy, vinaka vakalevu na nomudrau veivakavulica totoka vei ira na itabagone qasecake. Keirau vakavinavinakataka na madigi e vuqa sa neirau me keirau vuli ka veisemati kei ira na itabagone qasecake e vuravura raraba. Na vakarorogo vei rau na Godoy na bogi oqo sa ka talei dina. Ni keirau tubucake mai keirau via vakatakai rau na Godoy. E matata sara tu ga ni rau vakila na veika o ni gadreva ka leqataka tu na itabagone qasecake ka rau lomani kemuni sara vakalevu.

E vakasakiti dina vei au ni vosa o drau wasea e vakatabakidua vei Karisito ka yavutaki ena veiparofisai. Niu vakarorogo vei rau ena bodi edai, au vakila na domo ni parofita a wasea waletikoga oqo ena vei lotu ni itabagone qasecake e vuravura o Peresitedi Nelson, Peresitedi Oaks, kei eso tale na iliuliu vakapositolo. Me da tu vakadua ka raicalesu mada eso na iulutaga rau sa wasea vei keda ena bogi nikua:

1. Vakaitaukeitaki vei Karisito kei na noda Veiyalayalati

2. Veigadivi

3. Ciqomi ni iVakatakila Yadua

4. iVakarau ni Veiqaravi

   • Na Valetabu

   • Tabana ni Kaulotu

5. Veidomoni kei na Vakamau

6. Na Bibi ni Vakaitavi ena Inisitute

E sega walega ni rau wasea o rau na Godoy na nodrau ilakolako, ia e rau wasea ena dua na sala ni kauwai ka mareqeti. Au niutaka ni o na raica oya me ivakaraitaki ni nodrau loloma kei na kauwai vakabibi vei kemuni. E rau wasea talega na nodrau vosa ena dua na sala e vakatokaruataki na ivakasala ni parofita me vakananuma vei keda kece ni da qarava na veika oqo ena vukuna na noda iVakabula o Jisu Karisito.

Sister Christine Gilbert: E dua na itaba taleitaki vei au mai na bogi nikua sa ikoya na kemudrau itaba nomudrau se veiwatini gone. O Mônica e rairai nuidei, qai o Carlos e rairai vaka e rere tiko vakalailai!

Oqo ni veidutaitaki kei na itaba ni vuvale levu na Godoy.

Au vakasamataka kevaka o rau na veiwatini gone o Carlos kei Mônica a tatadra taka tu mai na luvedrau na qai sucu mai, o ira na watidra na luvedrau, kei ira na makubudrau, ena vica vata na yabaki sa oti oya. E rau tatadrataka tu beka na vuli torocake e graduate school, cakacaka vinaka, tekivutaki kei na bucini ni vuvale, veiqaravi ena Lotu, vakaitikotiko ena yasana kadua kei vuravura, kei na gauna oqo na nodrau veikacivi me iliuliu kilai levu ena Lotu? Keirau taleitaki rau o Elder kei Sisita Godoy. Erau sa vaka ga neirau itokani ka ivakaraitaki ni veika o rawa ni rawata ni o maroroya na nomu veiyalayalati, bulataka na kosipeli, ka vakaliuca na Turaga ena nomu ilakolako. Au tu meu ivakadinadina ni da vakaliuca na Turaga, ena dusimaki keda ena noda gagadre ka vakalevutaka na noda sasaga vinaka.

Elder Gilbert: Niu railesuva na nodrau ilakolako na Godoy kei na iwalewale ni nodrau vakaliuca na Turaga e vakananuma vei au e dua na ka au a lakocuruma kei Elder Godoy ena ono na yabaki sa oti.

Ena gauna oya au a veiqaravi tiko vaka peresitedi ni BYU-Pathway e Vuravura, ka Peresitedi tiko ni Wasewase ena Vualiku e ra kei South America o Elder Godoy, ka tiko na kena valenivolavola e cake e Lima, Peru

E dua na vanua vakasakiti ena Lotu o Peru, tiko kina e 40 na iteki ka rua na nodra valetabu. E udolu vakacaca na gonevuli ni BYU-Pathway e tiko e Peru. Na bogi oya, me vaka ga e dua ga na bogi, keitou a kerei Elder Godoy me vosa vei ira na itabagone qasecake me baleta na nodra ilakolako vakavuli.

Vakarautaka o Elder Godoy e dua na vosa, ia na gauna keitou sa lei dabe kina e cake ka raici ira mai na gonevuli, e tuburi koya e dua na nuiqawaqawa ena itavi ni vosa e kerei vei koya. Sa tekivu me luluvu ni vakasamataka ira na itabagone qasecake era vulica tiko na vosa Valagi me ra rawa ni taura e dua na kalasi ni vuli torocake, kei o ira era cakacaka tiko ka qai vuli tiko ena duidui vosa. Sa luvuci sara o Koya, qai biuta vakanatutu na vosa a vakarautaka mai o Elder Godoy, tucake qai vunautaka ena yalodei: “Na veika e kerei mo ni cakava e dredre—vakabibi ke o qarava duadua tiko. Na sala duadua ga o rawa ni cakava kina oqo mo vakaliuca na Turaga ena nomu vuli. Cakava me nomu itokani na Turaga ka na qai lako kece mai na veika vinaka vei iko ena kena gauna.”

E kila o Elder Godoy ena gauna oya na veika e sega ni se kila matata sara ena veiyabaki ni se cauravou voli mai Brazil: na sala duadua ga mo ni yacova na tamata o dodonu mo vakataka ka mo kune marau ena ilakolako sa ikoya mo vakaliuca na Turaga. Keirau sa vakadinadinataka ena bogi nikua na dina ni vakavuvuli oya. O Carlos kei Mônica Godoy e rau ivakaraitaki ni veika e rawa ni yaco kina rua na itabagone qasecake erau vakataqara na nodrau inuinui vua na Turaga ka vakayagataki Koya me nodrau itokani.

Keirau lomani rau na veiwatini oqo, ka vakavinavinakataka na nodrau itukutuku vei kemuni ena bogi nikua. Keirau wasea kei Christine na neirau ivakadinadina ni o ni vakaliuca na Turaga ena nomuni sasaga, o Koya ena cakamana ena nomuni bula. Keirau cavuta na veika oqo ena yaca i Jisu Karisito, emeni.