Lesoni mai na Bula ni dua na iTabagone Qase Cake

Elder Carlos A. Godoy: Vinaka vakalevu na nomu tiko nikua ena vanua kilai vinaka ka totoka oqo. Sa dua na ka talei dina na tiko kei kemuni nikua. Vinaka vakalevu nomuni tomani keirau mai, mai na veiyasai vuravura. Keirau taleitaka me tiko vata kei ira na itabagone qase cake. E tiko na nomuni itavi yaga ena Lotu, ka oni bula tiko ena dua na gauna bibi ni nomuni bula. Na nomuni digidigi nikua ena vakayaco-ka vakalevu sara ki na nomuni veisiga ni mataka. O koya gona, ena bogi oqo keirau nuitaka me vakuria edua na ka ena veivuke sara ki na levu na itukutuku cecere ka sa ciqomi oti ena veilotu tale eso.

Au marau niratou tomani keirau tiko o Baraca Chad kei watina, o Kristi, kei Elder Clark Gilbert kei watina, o Christine. Vinaka vakalevu nomudou tomani keirau mai nikua.

Au marau ni tiko vata kei au o Mônica ena lotu oqo. Keirau na veivukevuke ena veivakavulici, kau nuitaka ni oni na taleitaka.

Me tiki ni neirau itukutuku, keirau na wasea edua na vidio lekaleka ka cakava na Lotu me baleta na neirau gauna ni gone. O Mônica kei au keirau a yabaki vata kei kemuni.

Ena vidio oqo, keirau nuitaka me vakavulica vei kemuni eso na ivakavuvuli ka rawa ni vakayagataki sara ga oqo ena nomuni bula. E lima na miniti na vidio ka oni na sarava kina na veigauna duidui eso ena neirau bula. Yalovinaka vakarorogo vinaka sara ka tovolea mo kila na vei ivakavuvuli o nanuma ni yaga vei iko. Eda na qai lesu mai e muri me veitalanoataka eso vei ira. DONU?

[vidio]

Au a sega ni vaqara tiko na kosipeli se lotu. Au a sa yabaki 16 tiko kina, ka a lako mai edua na itokani nei tuakaqu ki vale me sureti iratou na ganei keirau gone ki na dua na itaviqaravi ni lotu baleta ni nanuma o koya nio taciqu kei au keirau sega ni taleitaka na lotu. Ni keitou yaco ki valenilotu, era a qitotaka tiko edua na itaviqaravi rawarawa, ka ra a marau ka dredre tiko. Kau nanuma. “Na cava na vuna era sa rui marau kina vakalevu?”

Ni oti e rua na siga, au a ciqoma tiko na veivosaki e valenilotu baleta ni a sega dina ni taleitaka na noqu matavuvale me caka oya e vale. Au a marautaka na kosipeli. Au a kila ni dina, ka yalorawarawa meu papitaiso ke rau sega mada ga ni via papitaiso na noqu itubutubu. E a dredre sara meu veimaliwai kei ira.

E a sega na noqu itokani, ka dau dabe tiko e muri e valenilotu—sarasara tiko, vakarorogo, ka lesu i vale. E rawa nio cakava tiko oqo me dua na gauna, ia ke sega na nomu itokani, ka o kila mada ga ni dina, e dredre, vakauasivi ke ra tiko e tuba na nomu itokani ka ra kacivi iko lesu tiko.

Au a gole ki lotu ena dua na Sigatabu, vakadua dua tale, ka ra a vakalewe ivola kerekere tiko. Kau taroga, “Na cava oqo?”

“Oqori e dua na koniferedi ni tabagone,” a kaya. “E dodonu mo lako.”

Au a kaya, “DONU, au via tovolea.” Ka keimami a tiko e kea, ka ra qito, lagasere, ka danisi tiko na itabagone, ka vakasauri e a rogo mai edua na domo ena sipika, “Meda cabora mada na imatai ni masu.”

Ea mudu na kosakosa, ka vakasauri era a vakarokoroko. Ka vei au a vaka, “Na cava? Na cava e yaco tiko eke?” E rawa vakacava ki na ilawalawa itabagone oqo mera kosakosa tiko ia ena sekodi ka tarava mera tiko vakarokoroko mera masu? Ka, io, era sa duatani. Au vinakata meu vakataki ira. Vei au, na Turaga a vakauta tale tiko mai vei au edua na itukutuku: “Carlos, kua ni soro koso. Oqo na nomu tikina.”

Ena siga tarava, au a taubale voli ka dua na goneyalewa e a uvuca tiko flute. Noqu raica koya, au tukuna, “Wau!” Sa tekivu me tavadugudugu na utoqu. Au vinakata meu vosa vua. Ka ivalavala matau o koya ka matadredre. Ka tekivu me vosa vei au me vaka ga keirau veikilai. Ka mani yaco me noqu itokani, duadua ga. Ena vukuna, au a sotavi ira tale kina eso na itokani.

Ni oti na koniferedi ni itabagone oqo, au a digitaka meu lako tiko ga ki lotu. Ea toki na noqu matavuvale ki na yasa ni siti kadua. Au a gole ki na valenilotu volekata na noqu itikotiko, ka kilakila mada se o cei a tiko ekea—o Mônica! Oya na nona tabanalevu. Kei na gauna e oti kina na soqoni, a lako mai vei au edua na sisita ka kaya, “O sa lewe tiko beka ni Lotu?”

Au sa dau rogoca vakawasoma na taro oya. Au a kaya, “Io, au nanuma ni vakakina; e vaka dina kina.”

“O, e dodonu mo tiko ena semineri.”

Kau nanuma, kila, mai na vanua au lako mai kina, na semineri na vanua ni vuli talatala, mo dua na bete.

Kau mani kaya, “Sega, sega, au via vakawati ka vakaluveni.”

Ka kaya o koya, “Sega, na semineri e baleti ira na itabagone, kila, me vulici kina na kosipeli. E sega ni levu na itabagone ena nodatou tabanalevu. E tolu tiko ga, o: Adriano River, Carlos Mancini, kei Mônica Brando.

Kau nanuma, “Uo. Io, au sega ni kila se cava, ia au vinakata meu tiko e kea.”

Kei na veimataka kece au a vakani tiko ena vosa vinaka ni Kalou. Ka oya a vakavuna meu kila kina se o cei o au, na kaukauwa meu valu tiko ga kina ka toso tiko ga na cakacaka ni noqu saumaki.

Kau a qai lesi meu itokani nei peresitedi ni Cauravou vaka dauveituberi ni matavuvale. E dina ga niu a sega ni kila e levu na ka me baleta na kosipeli, ia ea dau solia tu ga vei au na itavi meu veivakavulici. A nuitaki au o koya, au nanuma, mai na noqu nuitaki au vaka i au ena gauna oya.

Ia ea dua tale ga na ka a talei kina— o koya e tamai Mônica. Edua tale na ka, na agilosi yalewa o Mônica kau a tukuna ni a tiko e kea me vukei au—a qai yaco emuri me watiqu. Ni oti na neirau kaulotu, keirau a vakamau ena valetabu, ka oqo e sa tinadratou e va na gone, ka tubudratou e vitu na makubuna. Ka se agilosi tiko ga ena noqu bula.

Ke o veiraiyaki, au sega ni vakatitiqataka nio na rawa ni raici ira eso era gadreva na nodra veivuke na agilosi. Na Turaga e gadrevi iko. Kei na gauna o tirovi iko kina ena iloilo, kua ni guilecava: e lomamu e tiko kina edua na yalo totoka vaka dua na luvena tagane se luvena yalewa na Tamada Vakalomalagi vata kei na kena itovonibula kei na igu e lomamu.

[cava na vidio]

Elder Godoy: Au duavata kei iko. DONU. Meda vakarogoca mada na ka era kaya eso vei ira. Na galili na kena imatai.

Sisita Mônica Godoy: Oqo, au vakabauta, ni dua na gauna uasivi meda cegu ka veitalanoataka na ka a yaco. O Carlos, ni se gone, a dau vakila na galili kei na yalolailai.

E rairai eso vei kemuni a vakila talega na galili ka guilecavi, me vaka a yaco eke. E sega ni rawarawa meda vakila nida sega ni bibi se sega soti na keda yaga. Vei ira era sotava na ituvaki vata oqo, yalovinaka kua ni vakalaiva na veika oqo me rawai iko. Ko sega ni tiko duadua. E rairai beka nira sega ni veitaratara tiko kei iko na tani se ciqomi iko me vaka o vinakata. E ituvaki rarawataki dina. Ia nanuma, o sega ni tiko duadua baleta ni iVakabula sa dau tiko vata ga kei iko. O Koya e kilai iko, e kila o Koya na cava e yaco tiko ena nomu bula, o Koya e lomani iko, ka rawa nio tarai Koya ena gauna ga o gadreva kina. Yalovinaka, kua ni guce ena sasaga mo ciqomi kina. Ena talai ira mai na agilosi o Koya mera vukei iko.

Elder Godoy: Oqo, edua na itukutuku vei keda kece eda volekati ira era vakila nira tu duadua se guilecavi. E dodonu meda sai ira na agilosi oya. Yalovinaka veiraiyaki ka rai yani ki taudaku ni nomu ilawalawa ni veitokani. Era tiko e kea, era se tu makawa e kea, ka rairai o se bera beka ni raici ira. O rairai osooso beka ena nomu bula, vata kei ira na itokani vinaka kei na ilawalawa, ka o sega ni raici ira rawa kina na gadreva mera lomani ka ciqomi. Ia era vaqara tiko na veitokani, ka nuitaka mera ciqomi. Era na rawa ni dabe tiko mai muri e valenilotu, se ena vei tutu ni rumu ni vuli. Ena vakavuqa, mera sega ni dara tiko na sote vulavula kei na tai se dua na ivinivo ni Sigatabu totoka. Ia era saga tiko ena nodra igu mera okati vata kei keda. Yalovinaka solia vei ira e dua na madigi. Era gadreva na nomu matadredre, nomu lululu, kei na nomu veitokani. Oqo edua na cavuvosa mai vei Peresitedi Spencer W. Kimball me baleta na ka oqo:

“Sa kilai keda na Kalou, ka sa wanonovi keda tu. Ia sa dau vukei keda ena noda leqa mai vua e dua tale na tamata.”

DONU. Veigadivi Vakavolivoliti ena Loloma.

Sister Godoy: Sa vinaka, oqo e dua na gauna vinaka me talanoataki na gauna ni nodau veidomoni.

Elder Godoy: Au kila nio na digitaka na ulutaga qori.

Sister Godoy: Io! E a gauna talei dina, ka tiko eke edua na lesoni me wasei. Eso vei kemuni ena vakila na dodomo ka kunea vakarawarawa o koya oni domona ena nomuni bula. Ena vaka na dodomo ena imatai ni veirai.

Elder Godoy: Au kila ni oya na ka a yaco vei au. Raici au mai.

Sisita Godoy: Ia vei au e a duatani.

Elder Godoy: Au kila.

E sega ni dodonu meda namaka meda na kunea na noda itokani tawamudu ena sala e tautauvata kei ira tale eso. Vei ira eso, ena matata ka kaukauwa. Vei ira tale eso, ena taura na gauna, sasaga, kei na vosota. Ena yaco me matata mai nio soli iko taucoko ki na veimaliwai. Kua ni soro vakarawarawa ke sega nio ciqoma edua na veivakadeitaki taumada. Na veika sotavi e vakatavulica ni so na vakawati qaqaco e a tekivu ena sala lailai, vakalalai, dua na veigadivi ki na dua tale.

Elder Godoy: E dina o Mônica. Vei keirau mada ga, ea vakaoya. A tarai vakatitobu na utoqu ena gauna au a raici koya kina. Vei au a vaka, “Niu raica edua na duru bukawaqa.” O koya, ena yasana kadua, a sega taumada ni vakila edua na ka. A taura e vica na vula ni cakacaka vakaukauwa vei au me yacova ni kila o koya niu rawa ni dua na digidigi vinaka. Taumada keirau a yaco me veitokani vinaka, ka oti e vuqa na veigadivi, a qai kila o koya ni sa dodomo tiko vua na cauravou “totoka” oya. Sa okoya tiko.

Na veika oqo a vakavulica vei keirau edua tale na ivakavuvuli: na sala keirau ciqoma kina na ivakatakila. Na sala ni kena kunei na dua oya e tautauvata kei na iwalewale ni ciqomi ni ivakatakila.

Au taleitaka na ivakavuvuli nei Elder Bednar me baleta na ivakatakila. E vakayagataka o koya e rua na ivakaraitaki ni veika eda sa sotava oti beka me baleta na rarama me vakavulici keda kina.

E tukuna o koya na veika e sotavi “nida curuma edua na rumu buto ka waqaca na kena cina. … Vakasauri sara ena vakasinaiti na rumu ena rarama ka vakavuna me seyavu na butobuto. … Na vakacaudrevi ni cina ena dua na rumu buto e vaka na kena ciqomi vakatotolo ena duavata ga na gauna edua na itukutuku mai vua na Kalou.” Ea vakaoya na veika au a vakila me baleti Mônica.

Na kena ikarua e yaco ena “noda vakaraica toka na malawa cake ni mataka. … Na kedrau duidui kei na waqaci ni cina ena dua na rumu buto, oya ni rarama mai na cabe ni siga e sega ni vakasauri mai. [Ia], e toso cake vakamalua na kaukauwa ni rarama, ka … emuri, sa qai basika mai na matanisiga.

“Na toso cake tiko vakamalua ni rarama mai na matanisiga, e vaka na ciqomi ni dua na itukutuku mai vua na Kalou ‘na vosa ena vosa, na vunau ena ivunau’ (2 Nifai 28:30).”Oya na ka a yaco vei Mônica ni vaqara tiko na tamata e donu vua. A taura toka vakalailai na gauna.

E tinia o Elder Bednar: “Ena vuqa na gauna, e dau yaco mai vakalalai na ivakatakila ka dau soli mai me vaka na noda gagadre, noda bula kilikili, kei na noda vakavakarau.”

Sisita Godoy: Ena rawa ni tautauvata kei na noda ciqoma na veivakadeitaki vakayalo me baleta na noda itokani tawamudu. Ena vuqa na gauna, ena dau yaco mai vakalalai nida sota kei ira na tamata ka vakayagataka na gauna vata kei ira.

Elder Godoy: Meu vosa mada ena tikina oqori. Me vaka oni raica ena vidio, na tiko ena semineri ea digidigi bibi vei au. E dina ga ni a inaki taumada meu tiko kina a baleta edua na goneyalewa totoka ka sega ni lesoni ni kosipeli, e a vakayaco-ka vakalevu ki na noqu saumaki kei na noqu ilakolako vakayalo.

Baleta na kana e veisiga mai na ivakavuvuli ni kosipeli, au a vaqaqacotaka kina na noqu ivakadinadina ka vorata na veitemaki ena loma ni noqu siga taucoko. A vukei au meu kila niu sa luve ni Kalou ka tiko edua na Nona ituvatuva vei au ena bula oqo.

Sisita Godoy: Na ivakavuvuli vata oqo e rawa ni vakayagataki ena inisitute. E a dua talega na tiki ni neirau veigadivi. Au nuitaka nio ni na vakayagataka na ivurevure cecere oqo. E kea, ona sega walega ni kunea kina na dina ni kosipelli ia na itokani vinaka talega. Raica na veika e tukuna o Peresitedi Nelson me baleta na inisitute:

Vidio: “Kemuni na taciqu kei na ganequ, au lomani kemuni. Au dau nanumi kemuni ka dau masulaki kemuni vakawasoma. Oni bula tiko ena dua na itaba gauna ka sega ni tautauvata kei na dua tale. Oni tiko ena yabaki ni bula oni cakava kina eso na vakatulewa bibi—na vakatulewa ena tara na vo ni nomuni bula vakayago kei na bula tawamudu. Ena veivakadrukai beka se veivakarerei na caka ni vakatulewa oqo ena so na gauna. Ia e ka marautaki talega baleta ni da bula tiko ena dua na gauna bibi.

“Au via sureti iko mo cakava edua na ka ena vukei iko ka vica wale sara na ka ena rawa ni cakava vakakina? Gole ena Inisitute! Au saravi iratou tiko oqo na luvequ, makubuqu, kei na vuqa na makubuqu vakarua era tiko ena inisitute. Na goleva na inisitute e yaco kina na veisau ni bula vei iratou.

“E sa vukei iratou na inisitute, ka na vukei iko, me vakatitobutaka na nomu saumaki vei Jisu Karisito. Na nomuni tiko ena inisitute ena vukei kemuni moni vakila vakalevu cake na loloma cecere nei Tamada Vakalomalagi vei kemuni. Na inisitute ena vakarautaka vei kemuni na qasenivuli veivakauqeti, itokani yalodina, kei na yalo ni veivakataukenitaki. Ena vukei iko mo raica na vuna e veimuataki kina kina marau tawayalani na bulataki ni kosipeli. Na goleva na inisitute ena vukei iko mo bulataka na kosipeli ka vakila na reki e levu cake—ena gauna sara ga oqo.

• Kevaka o via kila na dina me baleta se o cei o iko, lako ki na institute.

• Kevaka o via kila na inaki ni bula, lako ki na institute.

• Kevaka o vinakata mo tiko ga ena salatu ni veiyalayalati, lako ki na institute.

• Kevaka o vinakata mo vulica na sala mo laiva kina na Kalou me qaqa tikoga ena nomu bula, lako ki na institute.

• Kevaka o vinakata mo dautataro, lako ki na institute.

“Au yalataka vei kemuni na veivakalougatataki oqo ka tukuna noqu lomani kemuni ena yaca tabu i Jisu Karisito, emeni.”

Elder Godoy: Nida se tiko ga oqo ena iwase ni qaqaco vakayalo, meu vosa mada ena veika au sotava me baleta na dauveituberi ni matavuvale.

Me vaka oni sarava ena vidio, au a lesi me veiqaravi dina ga nia sega ni veirauti na veika meu solia. Au a vakila na kequ yaga niu veiqaravi. A vakarautaki au meu vukei ira na tani, ka yaco kina me vaqaqacotaki na noqu ivakadinadina. E dua vei ira na sala vinaka me vaqaqacotaki kina na nona ivakadinadina edua sai koya me wasei. Au nuitaka ni oni vakaogai kemuni tiko ena madigi eso ni veiqaravi. E rawa ni veiqaravi, tuvakawa, veiqaravi e valetabu, se dua tale na ilesilesi ni Lotu ka mo guilecavi iko kina ka vukei ira na tani. Ena vakalougatataki iko, vaqaqacotaki iko, ka taqomaki iko.

Au taleitaka na tikina mai na Vunau kei na Veiyalayalati ka vakabibitaka na ivakavuvuli oqo:

“Au sa kaya vakaidina, mera gumatua ena cakacaka vinaka ko ira na tamata kecega, io me ra vakayacora e levu na ka mai na nodra kila ga vakataki ira na ka e dodonu, ka vakayacora na veika dodonu eso.”

O, kei na dua tale na ka, me vaka au kaya ena vidio, au a taleitaka vakalevu na noqu itokani ni dauveituberi ni vuvale kau mani vakamautaka kina na luvena yalewa. A yaco me noqu momo. E tamai Mônica. Au a bulabula ena noqu ilesilesi ni dauveituberi ni vuvale. Veivula au tiko ena nona vale ena vuku ni veisiko.

Sisita Godoy: Edua na veivakalougatataki ka nodra na itabatamata oqo ka sega vei keirau sai koya na tiko voleka ni valetabu. Na kena ga ka tiko e Brazil ena neirau gauna ni gone oya e Sao Paulo, ka yawa sara mai vei keirau. Ena gauna oya, era na gole ki valetabu na itabagone qase cake nira biubiu mera lai kaulotu se mera lai vakamau. E ka marautaki, ni sa vakabibitaka o Peresitedi Nelson na bibi ni ciqomi ni nomu edaumeni ka sega ni semati ki na kaulotu se vakamau. E sa baleta vakalevu cake na vakavakarau ka sega ni dua tale na ka. Au nuitaka nio ni na vakasamataka na tikina oqo.

Na gole vakawasoma ki na vale ni Turaga e kauta talega mai na veivakalougatataki. E valetabu, eda ciqoma kina na lesoni me vukei keda meda rawai vuravura kina. Au taleitaka na ka a kaya o Peresitedi Nelson ena koniferedi se qai oti oqo:

Vidio: “Ena sega ni dua na ka ena vukei iko vakalevu mo tautauri matua ki na itoko kaukamea me vaka na sokalou vakawasoma ena valetabu ena gauna kece o rawata kina. Ena sega ni dua na ka ena taqomaki iko vakalevu cake nio lako curuma na butobuto kei vuravura. Ena sega ni dua na ka ena vaqaqacotaka na nomu ivakadinadina baleta na Turaga o Jisu Karisito kei na Nona Veisorovaki se vukei iko mo kila vakalevucake na ituvatuva maqosa ni Kalou. Ena sega ni dua na ka ena vakamalumutaka vakalevu cake na yalomu ena gauna ni mosi. Ena sega ni dua na ka ena dolavi lomalagi vakalevucake. E sega sara!”

Elder Godoy: Vinaka, Peresident Nelson, na nomu vakavuvuli. Keimami lomani kemuni vakalevu. Sa vinaka, ulutaga tarava: veiqaravi vakaulotu

Sisita Godoy: IO, gauna ni veitalanoa me baleta na kaulotu. Ni oti e ono na vula ena nona gole o Carlos ena kaulotu, au a gole ena noqu.

Elder Godoy: A vaka e nakiti.

Sisita Godoy: Ea sega ni ka vakacala ka. Keirau a vinakata ruarua me qarava na Turaga, ka keirau vinakata me keirau tiko vata mai muri. Ka keirau raica kina na neirau kaulotu me sala vinaka ni vakamarautaka na iVakabula ka vakarautaki keirau ena gauna vata oya ki na neirau bula vakawati. Keirau a kila ni na kauta talega mai na veivakalougatataki ka na gadrevi vakalevu e muri mai vei rau edua na veiwatini gone.

Elder Godoy: E sega ni vakatitiqataki ni neirau lai kaulotu a vakalougatataki kina na neirau bula. Baleta na neirau a kaulotu, ea qaqaco kina na neirau ivakadinadina me baleta na iVakabula, tubu na neirau kila na kosipeli, kei na kila ni veitaratara kei na veiliutaki ka vulici mai kea a vukei keirau ena neirau cakacaka. Ia ka vakauasivi, keirau a logaloga vinaka me vakayacora rawa na ilesilesi ka namaka vei keirau na Turaga.

Sisita Godoy: Meu tarogi kemuni mada. Sisita Godoy:Vacava o ira era sega ni rawa ni lako se sega ni vakacavara na nodra kaulotu ena vuna eso? E rawa beka ni se tiko na inuinui me baleta edua na veisiga vinaka ni mataka?

Elder Godoy: Io e rawa! Edua na Tamada Vakalomalagi dauloloma ena dau tiko vata kei ira. E sega ni dodonu meda vakalewai ira ka duidui na veika era a sotava ena kaulotu se era a sega sara ga ni kaulotu. Ka dina ga, ni veiqaravi vaka daukaulotu e rawa ni dua na gauna ni vuli bibi ena noda bula ka itavi vakamatabete vei ira na cauravou, ia e sega ni tiki ni cakacaka vakalotu ni kosipeli, ka na sega kina ni dua e totogitaki ena nodra tubu ena bula oqo se vakayalia na veivakalougatataki ena tawamudu ena vuku ni ka oqo.

Sisita Godoy: Au marau niu a rawa ni veiqaravi, kau vakatututaka vei keda kece. Ia me vaka eda kila, era ciqomi ka gadrevi vakalevu na goneyalewa, ia na kaulotu e vakatau vua na goneyalewa yadua.

Elder Godoy: Au marautaka talega na veika au a sotava ena noqu kaulotu. Au vakabauta ni noqu lesu mai ni oti na yabaki rua oya au a vakarau vakavinaka tu me baleta na bula. Kei na ulu e koti vinaka.

Sisita Godoy: Ni tou veitalanoataka tiko na lesu mai na kaulotu, vacava me veivosakitaki mada oqo na vakawati?

Elder Godoy: Donu. Tou tara mada yani na ulutaga.

Sisita Godoy: Edaru sa tu oqo, rua na lesu mai na kaulotu rau veivinakati kaukauwa, levu na ituvatuva, ia e sega na ilavo.

Elder Godoy: Io! Au se nanuma tiko.

Sisita Godoy: Niu railesu qo, au kila na totoka ni tauyavutaki ni nodaru bula vakawati ka rawata vata na nodaru lalawa vakavuli, vakacakacaka, kei na ituvatuva vakayago. Edaru a cakava vata, kei na veika sotavi oya kei na bolebole eso ea kauti kedaru mai vakavoleka.

Elder Godoy: Au vakasamataka kau vakadonuia. Na veiyabaki ni nodaru tara cake na nodaru bula ka rawata na nodaru lalawa era ivakananumi vakamareqeti. E sega ni kena ibalebale ni cala me tauyavutaki na bula vakawati ena dela ni rawa-ka vakailavo. Keirau via wasea ga edua na itukutuku vei kemuni oni waraka tiko moni toso ki liu ena nomuni veimaliwai me yacova ni sa rawati kece na ka oni gadreva. Oni gadreva na veika me liu, oi kemudrau, kei na Turaga me nomudrau ito—kei na veika kece tale drau rawa ni rawata vata, me na qaqaco kina na nomudrau vakawati. Au vakasaqara tale tiko ga eso e loma qo.

Sisita Godoy:Veisautaki na iyaloyalo ka sega ni iulutaga—edua tale na itukutuku me baleta na bula vakawati: ni oi kemuni na itabagone qase cake oni raici keimami, na veiwatini kei na vuvale ka sa yavutaki dei tu, oni rawa ni nanuma ni a sa vaka tu ga oqo, ni vinaka tu na veika kece, ka rawarawa vei keimami na bula. Ena dina beka vei ira eso, ia e levu ena sega.

Elder Godoy: Ea sega ni vakakina vei keirau.

Sisita Godoy: Na bula vakawati e ka ni vuli ka nuitaki ni na vinaka cake nida toso tiko i liu. Na dodomo a se tiko mai na itekitekivu, ia na veimaliwai ena veisiga yadua e tarai cake vaka ikabakaba. E gadrevi meda veirogorogoci, dredre ka tagi ena so na gauna; era na kauta mai na gone na marau kei na mosi ni ulu, ka na sikovi keda vagauna na tauvimate, ka na lailai na ilavo ena so na gauna, ia kila na cava? Ia kila na cava? Oqo na sala a dodonu me vakakina na bula.

Elder Godoy: Ia edua na ka e dei. Ke da okata na kosipeli i Jisu Karisito ki na veiwekani oqo, ena rawarawa ka marautaki cake vakalevu na bula vakawati.

Sister Godoy: Karua, ni taro. Vakacava o ira ka na sega na nodra madigi ni vakawati ena bula oqo? E tiko beka edua na ka mo tukuna vei ira?

Elder Godoy: Io, e tiko. Au taleitaka na vakasala nei Peresitedi Hinckley vei ira na marama kau vakabauta e rawa ni vakatabakidua vei keda kece. Me da raica mada na ka e tukuna:

Vidio: “E ka ni rarawa, ni so vei kemuni ena sega ni vakawati ena bula oqo. E dau yaco dina na ka oqo ena so na gauna. Ke yaco oya, kua ni vakayagataka na nomu bula mo rarawataka. Na vuravura e gadreva tiko na nomu taledi. E gadreva tiko na nomu cau. Na Lotu e gadreva na nomu vakabauta. E gadreva na ligamu kaukauwa, dauveivukei. Na bula ena sega vakadua ni druka ka vakavo ke da vakatoka me vakakina. E vuqa era gadreva tu na ligamu dauveivukei, nomu dredre ni loloma, kei na nomu dau veikauwaitaki loloma. Au raica e levu na marama gugumatua, totoka, talei ka sa lakosiviti ira na bula ni wakawati. E sega ni matata vei au, ia au kila ni ena ituvatuva i Koya sa Kaukauwa sara, na ituvatuva tawamudu ka da vakatoka me ituvatuva ni marau ni Kalou, ena tiko kina na madigi kei na icocovi vei ira era vakasaqarai ira.”

Elder Godoy:Edua na ivolanikalou ka tukuni kina na yalayala vata oqo e kunei ena Mosaia 2:41.

“Ka dua tale, au gadreva mo ni vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo; ka kevaka era sa yalodina tiko me yacova na ivakataotioti era na curu ki lomalagi, me ra tiko marau kina vata kei na Kalou me tawamudu. Io, mo ni nanuma, mo ni nanuma, ni ra sa dina na veika oqo; ni sa kaya na Turaga na Kalou.”

Me kena isoqoni, na itukutuku sai koya, ni cavuti na vosa i Elder Bednar, e gadrevi ga mo goneyalewa se gonetagane vinaka, maroroya na ivakaro, ia na Turaga ena qai cakava na kena vo. E muri, na veivakalougatataki kece ena soli vei ira na yalodina.

Môni, e tiko beka edua tale na ka o via tukuna?

Sisita Wixom: Io. Sisita Godoy:Au via tinia ena noqu ivakadinadina.

Au kila nida luvena tagane kei na yalewa na Tamada Vakalomalagi dauloloma. Au kila ni o Jisu na Karisito, ka bula tiko o Koya. Au kila ni bula oqo e gauna ni vakavakarau meda sota kei na Kalou. Au kila ni liutaki keda ka vakarautaka tiko o Koya na sala. Eda sega ni tiko duadua. Au kila ni valetabu e vale ni Turaga e vuravura. E tiko edua na vanua eda rawa ni ciqoma kina na kila-ka kei na veivakauqeti ena noda bula. Au kila ni tiko na noda parofita nikua, ka vakavulica keda ka dusimaki keda.

Ena yacai Jisu Karisito, emeni.

Elder Godoy: Vinaka sara vakalevu. Au taleitaka na veivakavulici kei iko. Kau lomani iko.

Vakacava o rau na veiwatini na Gilbert? Dua na nomudrau vosa se vakavuvuli vei ira na itabaqase?