Niuterene Taua o le Talalelei

O’u uso e ma tuafafine pele, ou te faafetai mo le avanoa e lauga atu ai ia te outou o taitai ma faiaoga faalelotu i lenei faasalalauga i le lalolagi atoa. Faafetai atu mo le faaavanoaina o lou taimi, ma faafetai atu mo mea uma o loo outou faia e fesoasoani ai e tulei i luma le galuega a le Alii. Faamolemole ia e silafia o lou faamanuiaina “e muamua ona fua i lou tuuto atu e fesoasoani i fanau a le Atua ia avea o ni soo faamaoni o Iesu Keriso.” E le filima’otia lou faamanuiaina i le tele o au tamaiti aoga e avea ma soo faamaoni o le Faaola; e le faalagolago i le ala latou te filifili ai e tali atu i au aoaoga, valaaulia, po o tāga faamaoni o le agalelei. O lou tiutetauave, o le aoao atu lea ma le manino ma le mamana ina ia mafai ona latou faia se filifiliga atamai e faamanuiaina ai i latou. E tofu le tagata ma lana faitalia. E tusa ai ma lena, o le a ou fai atu ia te outou e faapei ona saunoa le Perofeta o Iosefa Samita i uluai faifeautalai i le Ekalesia i lenei tisipenisione, “Afai tou te faia lo outou tiute, o le a faapei ona lelei ia te outou, e faapei ua talia e tagata uma le talalelei.”

I le 1916, sa saunoa ai Elder Tavita O. MaKei, “E leai se tiutetauave e sili atu e mafai ona i ai i soo se alii [po o se tamaitai], nai lo le avea ma se faiaoga i fanau a le Atua.” E faapena foi ona moni lena mea i ona po nei. O se faiaoga e i ai le faatuatua, ma aoao atu i le faatuatua, e taua tele i Le Ekalesia a Iesu Keriso o le Au Paia o Aso e Gata Ai, aemaise mo le tupulaga faia’e.

I se taimi itiiti, o le a ou faitauina ai se upusii mai ia Peresitene Jeffrey R. Holland, ma o le a e vaaia ai le fesootaiga. Ae ua ou valaaulia ni nai volenitia e fesoasoani. Ma o le a tatou fai atu i le au Reese ma le au Ashton e o susu mai i luma nei, ma o le a tofu i latou ma se Twinkie. Ma e pei ona outou iloa, o le Twinkie o se keke vanila e i ai se kulimi i totonu. Ou te manao ia tatala a latou Twinkie ma amata ona ‘taumafaina. E tofu i latou ma se pepa solo. Ma o le a ou taumafai e fai lenei fesootaiga iinei.

Na faamamafa mai e Peresitene Jeffrey R. Holland le taua o le taulai atu i le aoao atu o elemene taua o le talalelei i le 1998. I lana saunoaga na ia aoao atu ai: “E ao ona tatou toe faafouina ma toe faapaleina aoaoga sili a le Ekalesia—i le aiga, mai le pulelaa, … ma le mea moni i totonu o le potuaoga. …

“… A oo mai puapuaga i o outou olaga … o filosofia o tagata e lalagaina faatasi ma ni nai mau ma solo e le aoga lea. “Pe o tatou fafagaina moni ea a tatou [tamaiti a’oga] i se ala o le a lagolagoina ai i latou pe a oo mai faigata o le olaga? Pe o tatou tuuina atu ia i latou se ituaiga o Twinkie faamataupu silisili—ae matuai leai se ‘anoa faaleagaga?”

O lea la ua e taumafaina lena mea, i se vaega, Peresitene Reese, e fia ni kalama o ‘alava faaniuterene e te manatu sa i ai i lau Twinkie? O le mea moni lava, e leai se mea.

Sister Reese, e fia milikalama o le calcium e te manatu o loo i ai i lena Twinkie? O le mea moni lava, e leai se mea.

Ma Sister Ashton, e fia ni amikrokalami o vaitamini A e te manatu o loo i ai iina? O le mea moni lava, e leai se mea.

Ma Brother Ashton, e fia milikalame o vaitamini C o i ai? Ioe, e i ai le mamanu. Sa leai se vaitamini C na i ai.

A o ou laitiiti, ou te fiafia lava i Twinkies. A na faapea na faataga a’u e o’u matua, semanu e leai se isi mea ou te ‘aia ae na o Twinkies i le taeao, aoauli, ma le afiafi. Ia, ana latou faatagaina au e fai lena mea, e te iloa le mea o le a e vaavaai i ai? O le mea moni, o le a avea a’u ma se tagata tauaso e ma’i ponaivi ma pipili. E le o se vaaiga manaia.

Faafetai i a tatou volenitia. O le mea moni ou te le’i sau iinei e talanoaina le aafiaga o le le lava o niuterene i lo outou soifua maloloina faaletino. Atonu e tofo lelei ia Twinkies, ae e leai se niuterene e maua ai. Ae na ou sau iinei e talanoaina le niuterene faaleagaga o loo outou ofoina atu ia outou tamaiti a’oga.

A i ai tamaiti naunau i o tatou luma, e manaomia ona tatou fafagaina i latou i le afioga lelei a le Atua ae le o Twinkies faaleagaga ia e leai ni meaai faaleagaga. O i latou e fafaga i Twinkies faaleagaga e ono le avea o ni soo i le olaga atoa o Iesu Keriso—o tagata e tuputupu a’e i le Alii ma maua “se atoaga o le Agaga Paia.” Nai lo lena, o le fafagaina i Twinkies faaleagaga, latou te ono, tuputupu a’e ai i le lotomaaa faaleagaga, leai se faatuatua, ma fememea’i.

Ina ia tetee atu i le pa’e’e’e faaleagaga, e manaomia e o tatou tamaiti aoga e le itiiti ifo ma le fa mea’a’ano faavaliata e tumu i niuterene. O le mea muamua o se molimau i le Tama Faalelagi ma Lona fuafuaga, Iesu Keriso ma Lana Togiola, ma le Toefuataiga o le atoaga o le talalelei a Iesu Keriso i nei aso e gata ai. Ina ia faia lenei mea, e tatau ona tatou aoao atu le upumoni ua toefuatai mai ma molimau atu i nei mea moni.

Sei ou tuuina atu se faataitaiga. I ni nai tausaga ua mavae, sa faaalu e se fomai Saina e igoa ia Grace le 18 masina e asiasi ai i aoga faafomai i le Aai o Sate Leki. Sa sau o ia e aoao i itu faafomai o le fatu ua toe suia. Sa faauo e lo’u aiga o ia, ma sa matou faaaofia ai o ia i le tele o gaoioiga. I se Aso o le Kerisimasi lea na pa’ū i se Aso Sa, sa matou valaaulia ai o ia i le Lotu mo le sauniga faamanatuga. Sa matou faamoemoe o le aoao o ia i savali e uiga ia Iesu Keriso ma faamamafa atu ai mafuaaga o faamanatuga o le Kerisimasi. Sa ou galue o se peresitene o le siteki, ma sa ou nofo i luga o le tulaga i le taimi o le sauniga. Sa nonofo lo’u toalua ma lo’u afafine faatasi ma Grace i le potopotoga.

I le mavae ai o le faamanatuga, o le failauga muamua na faamatalaina se tala lauiloa e le moni o se makoi lona fa. Sa matagofie lona faamatalaina ma na afua ai ona ootia tagata. O le failauga na sosoo ai, sa faavae ona manatu i se tala i laau ua faaliutagata e tolu. Na manao le tasi laau ia avea ma pusa matagofie ae nai lo lena, na avea o se pusa e fafaga ai manu, o se moegavaovao lea na faataoto ai se pepe i Peteleema. O le lona lua na manao e avea o se vaa folaulau e faamemelo i ai. Nai lo lena, na avea o se vaa e lei maoae na faaaoga e ni faifaiva masani i le Sami o Kalilaia. I le taimi o se afa fulifaō, sa i ai se tagata na ta’ua e isi o le “Matai” na fetalai, “Filemu,” ona to’afilemu ai lea o le afa. O le laau lona tolu na manao ia faamamanuina i se mea e mafai ona faamemelo mamao mai i ai. Ae nai lo lena, na avea ma laau na faasatauro ai se tagata i luga o le maupuepue e igoa o Kalevaria. Na toe fai foi, se isi tala e le moni o le Kerisimasi, ae ootia.

Sa ou le fiafia i le anotala o le sauniga ma sa ou lagona ai, e le mafai ona ou faaiuina faapena mo Grace. E ui lava ua uma le taimi, sa ou fālō atu i le epikopo, ma sa ou fesili, “E te tago e faauma faalelei le sauniga lenei, pe e te manao ou te faia?” Sa ia fai mea o le a ia faia. Sa alu o ia i le pulelaa ma faaaoga le lima minute e faamalamalama ai le Pepe i Peteleema ma le mea o le a Ia faataunuuina. Sa tuuina atu e le epikopo se molimau mamana e uiga ia Iesu Keriso, o le Faaola o tagata uma. Sa ia faalau atu le viiga faaiu ma le tatalo ona nofo ai lea i lalo.

A o usuina le pese faaiu, sa punou ane Grace i lo’u toalua ma fai atu, “Ruth, ina ua saunoa lena epikopo, sa i ai se mea na suia i le sauniga!” Ma e moni lava. Sa lelei lava faauigaga a le au failauga, ae sa latou laulauina Twinkies faalemataupu silisili, e gaogao ‘i’i ma ni niuterene faaleagaga, o faailoaga vaivai o le faatuatua ma molimau na leai le mana o le afioga a le Atua ma faapea foi ma le Agaga.

O le molimau ma le loto a le epikopo na faavae i upumoni o loo aoao mai i tusitusiga paia ma aoaoga a perofeta a le Alii; o le mea lena na valaaulia ai le Agaga i le sauniga. Sa ou faaiuina e faigata i le Agaga ona molimau atu i le moni o se tala e le moni. Po o le a lava se isi mea ua tatou faia i a tatou aoaoga, e tatau ona tatou toe aumai i taimi uma a tatou aoaoga ia Iesu Keriso ma Lana Togiola, le Tama Faalelagi ma Lana fuafuaga, ma le Toefuataiga o Lana talalelei. O le mea moni, e lelei le faaaogā o tala, e oo lava i tala faafoliga, e tata’i mai ai le gauai mai o tamaiti aoga. Sa ou faaaogaina Twinkies e faaosofia ai lou gauai mai. Ae o le taimi lava tatou maua ai le latou gaua’iga, ona manaomia loa lea ona tatou tuuina atu meaai ia e suia ai olaga. Ou te matea sa tatau ona ou tulitataoina ia Twinkies ma tuuina atu fasi karoti, broccoli, hummus—ae ou te lei faia.

Na tautino mai e le Aposetolo o Paulo, “Aua e faaolaina i latou uma o e valaau atu i le suafa o le Alii.” Ona fai ai lea e Pauo se soloa’iga o fesili e fesoasoani tatou te malamalama ai i le taua o se faiaoga ua faatagaina e aoao atu lenei niuterene e tatau ai. Na ia fesili, “‘Pe faapefea ona latou valaau atu ia te ia latou te lei faatuatua i ai? pe faapefea foi ona latou faatuatua i le ua latou le faalogo atu i ai? ma pe faapefea foi ona latou faalogo atu pe a leai sē tala’i atu? Pe faapefea foi ona latou tala’i atu, pe afai ua le aauina atu i latou?” Ona ofo atu lea e Paulo o lenei faaiuga: “O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.” Ina ia mafai e a outou tamaiti aoga ona atia’e le faatuatua ia Iesu Keriso ma Lana matafaioi tupito i le fuafuaga a le Tama, o le aoao atu o i latou e uiga i le Tama Faalelagi ma Iesu Keriso e sili ona taua. O le autu o lenei fonotaga ua faamatala uma ai: “Ia outou saili lenei Iesu o le ua tusi i ai le au perofeta ma aposetolo.”

Na tusia e le faifeau Sikotilani, o le toefaafou faalelotu, o Tomasi Chalmers, e uiga i ona aafiaga a o aoaoina lenei mataupu faavae. Na soifua Charlmers mai le 1780 i le 1847. I le agai atu i le faaiuga o lona soifua, sa iloa ai e Chalmers na ia faatautaia se suesuega e lei fuafuaina i le taimi o lana tala’iga. Mo le tele o tausaga, sa ia tala’i faasagatau atu ai i ituaiga uma o le ola lē mama ma faaletonu o le tagata. Sa ia taulai atu i le amioga vaaia a tagata o ana aulotu, ma aoao lelei atu Poloaiga e Sefulu. O le taunuuga na le manuia. Na ia iloa ane o ana upu “sa lei i ai se aafiaga o amio a tagata o aulotu, e pei o le mamafa o se fulumanu e pa’ū. Sa ia iloaina tusa lava pe a na ia faatalitonuina se tasi e aua le gaoi, e tumau lava le le suia o le agaga; e leai lava se eseesega o le tagata i totonu, e ui ua le toe faia e le tagata le amio leaga. Pe a toe faaupu, e mafai ona e suia le amio e aunoa ma le fesuia’ia o le loto o se tamaitiiti aoga.

Ona amata ai lea e Charlmers ona tala’i le toefaalelei ma le Atua ma le faamagaloga o agasala e ala i le toto o Keriso. A na le aoao atua faapea e ia ana aulotu e le toesuia o latou olaga. O le lesona sili na ia aoaoina o le “o le tala’i atu o Keriso ua na o le pau lea o le ala aoga e tala’i atu ai le ola mama.” Na ia iloa lona sese muamua—na galue o ia e suia le amio, ae le o loto. O lea la sa galue o ia e suia loto, ma o amioga masani ma le tautinoga na suia.

O le iloa ai o Iesu o le Keriso, o Ia o lo’u Faaola ma le Togiola, na suia ai lo’u olaga ma lo’u loto. O lenei malamalama ua suia ai la’u amio i se ala e leai a se isi na te mafaia. Ou te iloa o a’u o sē ua faamanuiaina i Lana taulaga togiola e lē i’u. O lena malamalama o le mea moni lea e suia olaga.

O le niuterene faaleagaga mau’oa lona lua mo tamaiti aoga o se sootaga patino lea ma oe. Ona o le sootaga patino ma oe e mafai ai ona faafoefoe tamaiti aoga ua ta’a’ina i le Faaola. O le a avea pea lava o Ia ma faapogai moni o niuterene faaleagaga. Ae o le sootaga i le va o le faiaoga ma le tagata a’oa’o e fesoasoani e naunau ai tagata a’oa’o i afioga a le Faaola. E oo lava i le mavae ai o tausaga o lou aoao faafaiaoga o tamaiti aoga, e mafai lava ona faifai pea la oulua sootaga e faaofi atu ai tosinaga lelei i o latou olaga. O la outou tosinaga tumau o le a i ai ona, o lo outou alolofa loloto ma le popole mo lo latou soifua manuia, na faasino atu ai i latou i le Alii ma Lana aoaoga faavae, nai lo outou lava.

Ua ou oo i ai i lenei mea. O se tasi o o’u faiaoga Peraimeri, o Becky, sa i ai lena ituaiga o tosinaga ia te au. A o ou tamaitiiti, nai lo le ta’ua soo a’u measese, a iloa e Becky ua ou faia se mea lelei, na te oomi lo’u alafau, popo lo’u ulu ma fai mai, “Dale, o oe lava o se tama lelei.” Ou te le’i manatu o se mea e aveane ai lea mea; ae sa ou naunau i na taimi pe a tupu. Mulimuli ane, i lo’u talavou, ua le o toe i ai i le Peraimeri, sa toe foi lo matou aiga i lena uarota ina ua mavae le tele o tausaga sa matou nonofo ai i Finelani ma Suetena. Sa sau Becky ia te au ma fai mai ina ua uma ona ou tufaina le faamanatuga, oomi lo’u alafau, popo lo’u ulu, ma fai mai, “Dale, o oe lava o se tama lelei.” Ina ua ou toe taliu mai la’u misiona, ina ua mavae ona ou lipotia o’u aafiaga faafaifeautalai i se sauniga faamanatuga, na sau ai Becky ia te au, oomi lo’u alafau, popo lo’u ulu, ma fai mai, “Dale, o oe lava o se tama lelei.” I tausaga e fiasefulu ua mavae, sa ou faia ni filifiliga sili atu nai lo le mea semanu ou te faia—o se vaega ona o Becky sa fesoasoani e faataula’i au i le Faaola, ma sa ou le manao e faaita o ia.

I se tasi Aso Sa i le mavae ai ona tofia a’u i le Toasefululua, sa ou toefoi i le uarota na ou ola a’e ai. O loo nofo ai pea lava Becky i lena uarota. Sa ou nofo i le faatausiusiuga o le pulelaa, lauga puupuu i le sauniga faamanatuga, ma ou nofo ai i lalo. Ina ua uma le tatalo faaiu, o le taimi lea ua 80 ma ona tupu tausaga o Becky, na tolotolo mai tua e faate’i a’u. Sa sau Becky i o’u tua mai le nofoaga o le aufaipese, oomi lo’u alafau, popo lo’u ulu ma fai mai, “Dale, o oe lava o se tama lelei.”

E tofu manaomia e tamaiti aoga taitasi se tasi pe sili atu foi o ni Beckys i o latou olaga—faiaoga e i ai sootaga i le olaga atoa ma i latou, se tasi e faasinoa i latou i le Faaola, se tasi e faaaafiaina o latou mafaufauga ma amioga, se tasi latou te le mananao e faaita. A faamanu’alia tamaiti aoga i puapuaga ia o le a leai se masalosalo e oo i ai, e mafai ona e saunia se nofoaga saogalemu mo i latou e liliu atu i ai mo le alofa ma le faamautinoaga. O le mea moni, e ono i ai nisi e teena a outou taumafaiga e iloa i latou, ae e le taofia ai oe mai lou alofa i ai. E mafai ona i ai sau tosinaga sili atu i tamaitai aoga e teena, nai lo se mea e te mafaufauina.

O se niuterene faavaliata mau’oa lona tolu e moomia e tamaiti aoga taitasi, o le tomai lea e talanoaina fesili ma ni o latou atugaluga e ono i ai e uiga i le Ekalesia. E valu tausaga talu ai, sa fautuaina ai e Elder M. Russell Ballard taitai ma faiaoga faalelotu:

“Ua mou atu na aso lea pe a fai mai ai e se tamaitiiti aoga se fesili faamaoni ae tali atu se faiaoga, “Aua le popole i ai!” … Ua uma na aso pe a tuu mai e se tamaitiiti aoga se popolega faamaoni ma tuuina atu e se faiaoga lana molimau o se tali e faamoemoe e aloese ai mai le mataupu. Ua uma na aso sa puipuia ai tagata aoga mai tagata sa osofaia le Ekalesia.

“Ae e te lei auina atu [au tamaiti aoga] i le lalolagi, ia saunia [i latou] e ala i le tuuina atu o aoaoga faamaoni, agalelei, ma sao o aoaoga faavae o le talalelei, o tusitusiga paia, lo tatou talafaasolopito, ma autu na e le malamalama i ai i nisi o taimi.”

Faiaoga, e mafai ona outou fesoasoani i tamaiti aoga i le aoaoina o i latou i le uiga o le tuufaatasia o le suesue ma le faatuatua a o latou aoao. E mafai ona outou aoao i latou e ala i le faataitaia o lenei tomai ma metotia i le vasega.

Ua uma ona toefuatai mai le talalelei a Iesu Keriso i o tatou taimi e ala i faaaliga. O le mea lea ua tatou iloa ai le ala e toefoi atu ai i lo tatou aiga faalelagi, ae atonu o i ai pea ni a tatou fesili ma atugaluga tatou te moomoo ma le loto ua tatou maua i ai ni tali. O le a mata’itu e au tamaiti aoga le ala e te tali atu ai i fesili faigata; o le faasēloa po o le lē amanaiaina o fesili faamaoni o le a tulai mai ai le mau fesili. E tatau ona e saunia e taiala isi ia latou sailiiliga mo tali ma fesoasoani ia i latou e fausia le faatuatua i le Alii ma Ana punavai paia o le upumoni. Na aoao mai Elder Dieter F. Uchtdorf, “O le faia o fesili e le o se faailoga lea o le vaivai; ae o se taimua o le tuputupu ae.” O lea la, ua tuufaatasia ai e le Ekalesia se punaoa matagofie faatuatuaina mo tagata taitoatasi o loo sailia tali ia latou lava fesili, ma mo isi o loo taumafai malosi e fesoasoani i ai. O la tatou sini o le fesoasoani e faamalolosia le faatuatua ia Iesu Keriso, tusa lava pe o tatou tuuina atu ni nai fautuaga i le ala e taulima ai ni autu lavelave a o nisi foi taimi e faigata.

E mafai ona maua lenei punaoa i le uepisaite o le ChurchofJesusChrist.org ma le Gospel Library app. Ae afai e te le o masani i nei punaoa, se’i ou faasino atua le mea e maua ai i totonu o le Gospel Library app. Tatala lau polokalama o le Gospel Library. Mai le itulau autu, faasolosolo i le potutusi po o le library. Ta le ulutala “Autu ma Fesili. O iina o le a e vaai ai i se vaega ua faaigoaina “Saili Tali i Fesili,” o se isi vaega ua faaigoa “Fesoasoani i Isi e i ai Fesili,” ma se lisi faaalafapeta o le mau autu o mea e ono fiafia i ai.

O le vaega o le “Saili Tali i Fesili” o loo aoao mai ai mataupu faavae e mafai ona taialaina ai a tatou suesuega a o tatou saili ma le naunautai tali i a tatou fesili—pe uiga i le faatuatua, aoaoga faavae, po o le talafaasolopito o le Ekalesia. O le faatomuaga i lenei vaega o loo faamatala mai ai faapea o fesili o se vaega taua o le tuputupu ae faaleagaga, ma o le sailia o tali e mafai ona avea o se tulimata’iga i le olaga atoa. O mataupu faavae o loo maua i le vaega lenei e fautuaina ai i tatou ia faatotonugalemu o tatou olaga ia Iesu Keriso ona o Ia e tatau ona tatou fausia ai le faavae o lo tatou faatuatua. Ua faamanatu mai ai ia i tatou e faapea, o le fuafuaga o le faaolataga a le Atua tatou te maua ai manatu mo a tatou fesili. E fesoasoani na manatu po o vaaiga tatou te iloa ai le eseesega o upumoni autu o le talalelei mai mea e le tāua tele. Ina ia tupu le faatuatua, e tatau ona tatou filifili ia maua le faatuatua. Ona tatau lea ona tatou galulue i le faatuatua ma pipiimau i mea ua tatou iloa. A tatou faia, ua tatou faalolotoina lo tatou malamalama ma le faatuatua ia Iesu Keriso.

O mataupu faavae faaopoopo o loo talanoaina i le vaega lea ua fautuaina ai i tatou ia onosai ia i tatou lava, i isi, ma le taimi a le Alii. E ao ina tatou manatua o faaaliga o se faagasologa e tele ina amata i fesili, e masani ona oo mai i lea fuaiupu ma lea fuaiupu, ma e mafai foi i nisi taimi o se tauiviga. A o tatou sailia tali, e ao ona tatou sailia le taitaiga mai le Agaga Paia ma galulue ia malamalama i le tuanai e ala i le tuu faamatalalaga o mea.

O le vaega o le “Fesoasoani i Isi i Fesili” o loo fautuaina mai ai mataupu faavae e mafai ona taialaina ai i tatou a o tatou fegalegaleai ma isi e i ai fesili. Po o le a lava, e tatau ona tatou tautala ma le faaaloalo, faalogo ma le lotomalamalama, ma faapupula atu le alofa faaKeriso. O le mea lea, faalogo ma tali atu ma le alofa. Saili ia malamalama, faailoa aafiaga o isi, ma aloese mai le faalēāno po o le faamasinosino. A o tatou faia, e mafai ona tatou faailoa atu o tatou tapulaa. Faamolemole ia manatua e ui ua tatou maua le atoaga o le talalelei, tatou te le o maua tali i fesili uma. O nisi tali e tatau ona faatalitali mo nisi faaaliga. O nisi fesili ma o nisi foi o fesilisili, e le o lava lo tatou iloa e uiga i le finagalo o le Alii ma le atoaga o le aoaoga faavae a le Ekalesia e faamalie ai atoatoa tamaiti aoga. I nei tulaga, atonu o le a le fesoasoani se taumafaiga e faatalitonu le au tuufesilisili i ni mafuaaga faaopoopo talafeagai.

O se mailei e toatele faiaoga e ono pauu atu i ai, o le tuuina atu lea o mafuaaga po o faamalamalamaga e lei tuuina mai e le Alii. A oo ina tupu lena mea, o le mafuaaga po o le tali e tuuina atu e ono i’u ai ina faapeapea atu, ma i’u ai ina itiiti le faatuatua o le tamaitiiti aoga. E sili atu ai le faapea atu, tatou te le iloa nai lo le fatu atu o se mafuaaga po o se faamalamalamaga. O le mea moni, o le faatuatua, o se filifiliga, o nisi foi taimi, na pau le tali o le faalagolago i le faatuatua i le Alii o Iesu Keriso ma le faatuatua i le Toefuataiga o le talalelei ma ia onosai ma faatalitali mo tali mai le Alii pe a filifili o Ia e faaali mai. Tatou te faalagolago i le Alii ma taumafai ia saogalemu ma faatuatuaina faapogai mo isi e liliu atu i ai mo se fesoasoani.

E mafai ona tatou fautuaina tamaiti aoga e atia’e a latou lava molimau faaleagaga i le alofa o lo latou Tama Faaleagaga ma o Iesu Keriso na togiolaina i latou. Ia manatua tusa lava pe le taliaina e tamaiti aoga le atoaga o le talalelei, e mafai lava ona latou talitonu ma faatuatua i afioga a Iesu Keriso. A latou tauivi ma se itu o le Ekalesia, e mafai lava ona i ai a latou molimau maumaututu e alofa le Tama Faalelagi ia i latou ma e finagalo i le mea sili mo i latou ma o Iesu Keriso o lo latou Faaola.

O le a outou matauina o le tele o fautuaga mo se fesoasoani i isi ma a latou fesili, e sili ona aoga pe a faia ta’itasitasi. Ou te talitonu o le auala aupito sili lea. Atonu e le o se poto i se faiaoga ona faataga le vasega atoa e tuuto atu i le taliina o se fesili taua a se tagata e toatasi. O fesili a tamaiti aoga e le tatau ona tata’iese ai mataupu aoaoina ua uma ona fuafua e mamanu e fausia ai le faatuatua. Ia manatua pea lava pea o lou faamoemoega o le fausiaina lea o le faatuatua i le vasega atoa, ae ia le faasalaveia e ni leo o se toaitiiti. Faapei o aoaoga uma lava, o le taulimaina o fesili e manaomia ai le taitaiga a le Agaga.

O le anotusi o le vaega lenei, ua faamanatu mai ai foi ia i tatou ia faafaileleina lo tatou lava faatuatua a o tatou fesoasoani atu i isi. Na fautuaina i tatou e Sister Tamara W. Runia ia “lē tuliloaina ē e pele ia te oe o ē ua lagona le leiloloa. Nai lo ena, ia faapei o Liae i le faaaliga o le Laau o le Ola, “ia e tu i le mea na e te i ai ma valaau i latou. E te alu atu i le laau, tu ai i le laau, tausami pea i le fua o le laau ma, se ataata i ou foliga, e faaauau ai ona e augani atu ia i latou e te alofa i ai ma faaali atu e ala i le faataitaiga o le aai i le fua o le laau o se mea fiafia!”

O mataupu faavae o loo i ai i vaega o “Autu ma Fesili,” aemaise mea na e aoao mai i le “Sailia o Tali i Fesili” ma le “Fesoasoani i isi e i ai Fesili” ua fesoasoani ia te au e saili ai tali i a’u lava fesili i se ala na faamalosia ai lo’u faatuatua i le Alii ma faaloloto ai lo’u malamalama ia te ia ma Lana galuega. Na fesoasoani foi mataupu faavae ou te fesoasoani ai i isi i le faatautaiga o o latou atugaluga ma fesili. O le a faaopoopo se anotusi i le lumanai e fesoasoani ai i fesili ma autu patino, o le mea lea toe alu soo i tua i nei punaoa ma aua lava nei mafaufau, “Ua uma ona ou faitauina lena mea.” Ou te mautinoa o le a outou mauaina foi nei vaega ma nei autu e tutusa lava le aoga. Ou te tatalo o lou faaaogaina o nei anomea o le a fesoasoani ai ia te oe ma isi e faaloloto ai le faatuatua i le Faaola.

O le niuterene faavaliata lona fa faaleagaga ma o le mea mulimuli foi ou te fia manao lava ia maua e tamaiti aoga uma, o le, po o le a lava le mea taua e fatuina ai ma faatumauina se loto e taliagofie le agaga. O le loto e taliagofie, o lona uiga o le vave ona lagonaina le Agaga. O se loto e maaa, o le faafeagai lea o se loto taliagofie, e mata’utia faaleagaga. E faamatala soo mai e tusitusiga paia le faafanoga e faatalitali mo i latou e loto maaa. Na aoaoina e Nifae faapea “o puao o le pogisa [na vaaia i le faaaliga i le laau o le ola] o faaosoosoga ia a le tiapolo, ia e faatauaso ai mata, ma faamaaa ai loto o le fanauga a tagata, ma taitai ese atu ai i latou i ala lautetele, latou te fano ma se ai.”

O se fatu faaletino e maaa pe malo, e faigata ona faatumuina i le toto. A o faatumulia le fatu, a o sauni e faatele, o se fatu malo e faigata ona faalautele e faataga ai le toto i totonu. Ma o lenei mea e o’o atu ai i se tulaga matuiā e le aoga ai le fatu lea e afua i se faaletonu ona ua fufusi. E faapena foi o se fatu ua malō e faigata ona faatumu i le toto, o se loto maaa faaleagaga e faigata ona faatumu i le Agaga.

I le 2 Nifae 33, o loo faapatino mai ai e Nifae o tagata ua maaa o latou loto, o le a latou le faatagaina le Agaga Paia e tauave atua afioga a le Atua i o latou loto. Fai mai a ia, “Ona pe a tautala se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata.” Na faaauau le tala a Nifae, “Ae faauta, e toatele e ua faamaaa o latou loto e faasaga i le Agaga Paia, ua leai ai sona nofoaga i totonu o i latou; o le mea lea, ua latou lafoai ese ai le tele o mea ua tusia, ma manatu i ai o ni meanoa.”

Na ta’ua e Elder David A. Bednar: “Faamolemole matau le ala e molioo mai ai e le Agaga le savali i le ae le tau faapea o totonu o le loto. … O le iuga, … o le autu o se savali ma le molimau a le Agaga Paia e faatoa tuia ai lava le loto o le e mauaina pe afai na te faatagaina i latou e ulufale atu.”

Afai e leai se loto taliagofie o o tatou tamaiti aoga, e ono avea i latou e faapei o i latou o le a fai mai: “Ua ia i matou, matou te le toe manaomia nisi mea! … aua ua lava ia! Ia i latou, “ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o; ma e manuia lava i latou o e e faalogologo i aʼu mataupu, ma uaʼi mai o latou taliga i laʼu fautuaga, ona o le a latou aoaoina le poto; ona o ia o lē na te taliaina o le a Ou tuu atu atili i ai; ae o i latou o e e fai mai, Ua lava mea ua matou maua, o le a aveesea mai ia te i latou e oo lava i mea ua latou maua.”

O le i ai o loto e maaa, e ono polokaina ai e o tatou tamaiti aoga le auala e mafai ai ona latou maua atili le afioga a le Atua po o tali i a latou tatalo. O i latou, faapei foi o i tatou, e manaomia ona naunau atu i le Agaga ina ia mafai ai ona aoaoina i latou i mea uma e tatau ai mo i latou. Na aoao mai foi Alema, “Ma o i latou o e e faamaaa o latou loto, e tuu mai ia i latou le vaega itiiti o le afioga, seia oo ina latou lē iloaina se mea e uiga i mealilo [a le Atua]; ma ona ave ai lea o i latou faatagataotaua e le tiapolo, ma taitai atu e lona loto i lalo i le faafanoga.” O loto taliagofie e faalauiloa ai le taunuuga na folafola mai e le Faaola. “O ia o le e tausia ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.” Peitai, o loto e maaa, e mafai ai mo “e amioleaga “ona [o mai] ma [ave] ese le malamalama ma le upumoni.”

Na aoteleina e le Tupu o Peniamina ia vaega o lenei faapipii faaleagaga faafaatusa ua faatamaoaigaina i niuterene, lea e fatuina ma faatumauina ai se loto malū. Na ia tautino mai, “Ou te manao ia outou manatua, ma manatua pea lava, le silisili ese o le Atua, ma lo outou lava noa, ma lona agalelei ma lona tali-tiga ia te outou … ma faamaualaloina outou lava e oo ifo i loloto o le lotomaualalo, ma valaau atu i le suafa o le Alii i aso taitasi, ma tutu mausali i le faatuatua i mea o le a oo mai.” O vaega nei: ia tatou manatua pea lava pea ua na o Iesu Keriso lava e oo mai ai le togiola, a aunoa ma Ia e leai se faamoemoe o lo tatou tulaga. O lena mea e uunaia ai i tatou e faalotomaualaloina i tatou lava i le loloto o le lotomaualalo ma uunaia ai i tatou e tatalo i aso taitasi, ona tatou tutu mausali ai lea i lo tatou faatuatua ia Iesu Keriso ma Lana Togiola. O le taunuuga lava ia e faapea o le a tatou “olioli pea, ma faatumuina i le alofa o le Atua, ma taofi pea le faamagaloina o a [tatou] agasala; … ma tutupu aʼe i le malamalama o le mamalu o ia na foafoaina [tatou].”

Tou te fesoasoani i tamaiti aoga ia manatua ma faatumauina pea lava pea i le manatuaina o le silisili ese o le Atua a o outou galulue ma le filiga e faatauanau i latou ia talitonu ia Keriso “ma faalelei ma le Atua [ia iloa e faaolaina i [latou] i le alofa tunoa, pe a uma mea uma e mafai ona [latou] faia. O lea la o oe ma a’u e “tautalatala ai ia Keriso, tatou olioli ia Keriso, … ina ia mafai ona iloa e a tatou [tamaiti aoga] po o le a le puna e mafai ona latou tepa taulai i ai mo se faamagaloga o a latou agasala.” E fesoasoani lena malamalama ia i latou e tumau faamaualalo ai, uunaia i latou e valaau atu i le suafa o le Atua i aso taitasi ma tutu mausali i le faatuatua. E fesoasoani ia i latou e faatumauina ai loto agamalu e mafai ona faatumulia i le Agaga Paia.

O ia niuterene mau’oa uma e fa na ou talanoa atu ai, e fesopoa’i ma e fefaamalosia’i moni lava. O le asō o se aso lelei lea e faia ai se suesuega a le tagata lava ia e uiga i lo tatou aoao atu. Faamolemole fesili ifo ia te oe lava:

• Pe o faatotonugalemu lo’u aoao atu ia Iesu Keriso?

• Pe o o’u aoao atu ma se molimau ma le alofa?

• Pe o o’u sailia e atia’e ni sootaga i le olaga atoa ma a’u tamaiti aoga?

• Pe o o’u fesoasoani i tamaiti aoga e tali a latou lava fesili ae le tuua i latou ma nisi mau fesili?

• Pe o o’u faaali atu ea se faataitaiga o se loto taliagofie, faaali atu le lotofaafetai i le Atua ma tu mausali i le faatuatua?

• O a mea o aoaoina e a’u tamaiti aoga mai a’u faataitaiga faapea foi ma a’u aoaoga?

Uso e ma tuafafine, faafetai atu mo mea tou te faia e fesoasoani ai i fanau a le Tama Faalelagi ia avea ma soo faamaoni o Iesu Keriso, e fesoasoani ia i latou e faatumauina loto agamalu, e fesoasoani ia i latou e faataga le Agaga i o latou loto, ma faasino manino atu i latou ia Iesu Keriso, le Togiola o le lalolagi. E pei ona tatou faalogo i ai i le pese, e faigofie lava ona tatou feoai solo, ma e faigofie lava ona tuua le Atua tatou te alolofa i ai. E manaomia ona faamanatu mai ia i tatou Lona agalelei ina ia fusia ai e le agalelei, e pei o se noanoaga o noatiaina o tatou loto feoai i le Atua. Ma o le mafuaaga lena na fai mai ai Robert Robinson, ina ua ia tusia lena mea, “O lo’u loto lenei. Ave ma faamauina. Faamau ai mo maota i lugā.” Sa ia manao e faamanatu atu le mafuaaga na ia lagona ai le usuina o lena pese o le alofa togiola ae o nisi taimi na te le lagonaina le fia usuina. Ma e faapena foi la tatou galuega, o le fesoasoani lea i a tatou tamaiti aoga i lena ala.

Ia faamanuia outou e le Atua mo mea o tou faia. Ia faamanuia outou e le Atua mo lo outou agalelei, ia faamanuia outou e le Atua mo lo outou faatuatua, lo outou faamaoni, ma a outou molimau. Faafetai mo le auauna atu i le Matai. Faafetai atu mo le avea ai ma Ana uo, aua o Ia o la tatou uo agalelei, atamai, ma faalelagi. Ou te iloa e moni lena. I le suafa o Iesu Keriso, amene.