Aapa Atu ma le Aafiaga o Seminare ma Inisitituti

Ou te fiafia e faasoa atu ia te outou i le asō se faafouga i taumafaiga a Seminare ma Inisitituti e faateleina lo tatou aapa atu ma le aafiaga ma mea o loo tutupu i le autalavou ma talavou matutua i le salafa o le lalolagi. Atonu na vaai pe faalogo nisi o outou i vaega eseese o lenei aoaoga i ni nofoaga eseese. Ae ou te talitonu e i ai se taua i le vaaia o le auala e fetaui faatasi ai vaega uma ma mafaufau i le mea e sosoo ai.

Mo outou e lē faigaluega i le S&I, ou te faamoemoe e manaia ma aoga foi lenei faamatalaga ia te outou.

O i tatou uma o e galulue i Aoga a le Ekalesia e mafaufau i taimi uma i le ala tatou te fausia le faatuatua i le Faaola ma lagolago ai o tatou tamaiti aoga ia latou taumafaiga e ola i le talalelei. Pe tusa ma le lima po o le ono tausaga talu ai, ina ua tatou matauina ua fai ifo le lesitala o le inisitituti mo ni nai tausaga, ma o se afuaga tele lea o lo tatou popolega. O le iloaina foi, e toatele talavou matutua o loo feagai ma luitau faigata tele i lo latou faatuatua, sa tatou mananao ai e fesoasoani aua ua tatou iloa o le inisitituti e mafai ona avea o se ala sili mo i latou e maua ai le lagolago latou te manaomia. Sa tatou mananao ia iloa pe o a nisi mea e mafai ona tatou faia, e le gata ina ia faamalosiauina i latou e auai ae ia iloa ai foi pe mafai faapefea ona tele atu so tatou aafiaga i o latou olaga. Sa tatou manatu e taua le sue o se auala e matuai faalogo atu ai ia i latou, ia malamalama i o latou luitau ma sue pe o le a se mea e mafai ona fai e le inisitituti e fesoasoani ai. O lea sa tatou fatuina ai se ‘au i totonu o Seminare ma Inisitituti lea na tatou ta’ua muamua o le Komiti Faama’ite a le Inisitituti.

O le komiti na mua’i galulue ma le Sailiga Faamaopoopo e punoua’i ai i suesuega e uiga i talavou matutua i le Ekalesia. Ona latou galulue ai lea ma le BYU AdLab e vaai ai pe o a suiga e mafai ona tatou faia i le inisitituti e fesoasoani ai i manaoga o talavou matutua.

Sa matua aoga nei aafiaga ae sa tuua ai foi i tatou e mananao ia faia nisi mea e faailoa ai avanoa e saga faateleina ai le pa’i atu o le inisitituti ma lona aafiaga. O lea na tatou galulue faatasi ai ma le Bonneville Communications e faia se isi auiliiliga iloga.

Sa latou taula’ia vaega ma suesuega i le silia ma le 5,000 talavou matutua, e aofia ai le toatele o isi sa lei auai i le taimi lea i le inisitituti mo le Ekalesia. Sa faia le suesuega i konetineta e lima ma sa maua mai ai ni faamatalaga e maoae le taua.

I le fatu o mea sa ta’u mai e talavou matutua e faapea, sa latou mananao ma moomia ni mea se fa:

Sa latou mananao i le inisitituti ia sili atu ona aoga e faafetaia’ia ai o latou manaoga ma tali ai a latou fesili.

Sa latou mananao ia maua se lagona o i latou o ni ō—o ni ō o se vaega o tagata e fesoasoani ia i latou ia ola i le talalelei, ma ia avea o ni ō o se mafuaaga, ia lagonaina o i latou o se itutino o se mea taua.

Sa latou fesili mai foi ia tatou faia ia sili atu ona faigofie ona latou maua le inisitituti ina ia mafai ai ona latou auai e ui i le pisi i o latou tiutetauave ma le manaomia o o latou taimi ma la latou gauai.

O le tali aupito sili ona talitutusa o le, sa latou mananao e lagonaina le alofa o le Tama Faalelagi ma le latalata atili i le Faaola. Ua tatou faaigoaina le mea lea o le “liua ia Iesu Keriso.” Sa fesoasoani Elder Gilbert ia tatou iloa o lenei mea e matuai ese lava mai isi.

O le faamoemoega o le inisitituti o le faalolotoina lea o le liua ia Iesu Keriso ma Lana talalelei toefuataiina. O isi tali o se auala i lena liua. E tatau ona fesootai i le sini o le liua, po ua leai moni lava se aoga tumau lea e manaomia e talavou matutua. E mafai ona tatou fatuina se mea taua e le tau atu i le liua, po o le avea ma ni ō o se kalapu po o se ‘au taaalo. Ae e le o le mea lena o loo tatou mananao ai. E manaomia ona tatou fesoasoani ia latou iloa pe faapefea ona tali e le talalelei fesili o o latou agaga, ma fesoasoani ia i latou i luitau o aso faisoo. Ma e manaomia ona tatou fatuina le avea ma ni ō o le feagaiga. O mea uma tatou te fai e tatau ona taitai atu ai i le liua.

O lea sa tatou tulitulitatao ai talavou matutua e fesili i ai, “Pe o a foliga o le inisitituti pe afai o le a sili atu ona aoga, fatufatu ai le avea ma ni ō, ma sili ona faigofie i ni ala o le a fesoasoani e faaloloto ai le liua?”

O le taunuuga o le fatuina lea o ni taumafaiga se tele na faatinoina i polokalama filifilia i le fa tausaga talu ai. O nisi nei o faataitaiga.

Ia sili ona aoga le inisitituti, na tatou fatuina ai ni mafutaga faaleaoaoga. O mafutaga faaleaoaoga, o semina e lua- i le lima-vaiaso sa faavaeina patino i manaoga na faailoa mai e talavou matutua. O le faaopoopo atu la i vasega mamanu i semesa, e mafai ona latou o mai ma i se vaitau e puupuu atu e talanoaina tonu mea o i o latou mafaufau. O loo faavaeina pea nei mafutaga faaleaoaoga i tusitusiga paia ma aoaoga a perofeta o ona po nei ma isi taitai o le Ekalesia.

Ua tatou faaopoopo foi i ai ni vasega fou. Mo se faataitaiga, sa tatou amataina se vasega e faavae i tusi a Elder Anderson The Divine Gift of Forgiveness, lea e ofoofogia le matuai taliaina lelei.

Tatou te faafetai foi ia Elder Uchtdorf, o le sa folasia mai le Aoao Atu i le Ala a le Faaola i o tatou faiaoga uma. O le faavae lena mo a matou aoaoga, e aofia ai le auala e faia ai a tatou vasega ia sili atu ona talafeagai.

I se taumafaiga e faateleina le lagona o le avea o ni ō, ua tatou faamamafaina ai le manatu a Peresitene Nelson faapea soo se taimi e te faia ai se mea e fesoasoani ai i soo se tasi e sau ia Iesu Keriso ma osia ma tausia feagaiga, ua e faapotopotoina Isaraelu. Faafetai mo le galulue malosi e tuuina atu valaaulia ma faamalosiauina tagata aoao uma.

Mo se faataitaiga, i le na o le tausaga lava ia na te’a nei i Amerika Tutotonu, na valaaulia patino ai e o tatou faiaoga le silia ma le 25,000 talavou ma talavou matutua e auai i vasega. Sa tatou talosagaina foi o tatou tamaiti aoga e valaaulia a latou uo. O le taunuuga, sa silia ma le 30,000 uo a isi faatuatuaga sa auai ai, lea na silia ma le 9,000 papatisoga na maua ai. Mo suiga uma ua tatou faia, ou te manatu o le mafuaaga sili lava ua faatupulaia ai le lesitala i le seminare ma le inisitituti ona o le toatele o outou ua mauaina le vaaiga mamao na aoaoina e Peresitene Nelson e faapotopoto ai se augatupulaga o le autalavou ma talavou matutua. Faafetai mo le mauaina o le loto o se tagata aoina ma le aumaia o le toatele o isi tagata talavou ia Iesu Keriso. O le tele o lo tatou ogatasi ma le faaaliga faaperofeta, o le tele foi lena o lo tatou mana i lenei galuega.

Na tatou faia isi mea, e pei o le faafouina o potuaoga, ma faamamafa le ausia o manaoga o tamaiti aoga nai lo le na ona aoaoina o anomea. Ua tatou tuuina atu foi i tamaiti aoga e saga aumai o latou manatu pe o a vaega o a tatou mataupu aoaoina latou te mananao e tele pe itiiti le taimi e faaalu ai.

E tusa ai ma le faigofie ona maua, o le suiga tele o le inisitituti i luga o upega tafailagi. O lesitala faaletausaga ua faateleina ia le 25,000, mai le 9,000 sa i ai i le lua tausaga ua mavae. O lea faatelega e afua ona o le galulue faatasi ma le BYU–Pathway i le Lalolagi Atoa ma o le a avea o se mafuaaga autu mo lo tatou tuputupu a’e faifai pea i le lumanai.

Ua tele atu foi le fetuunai ua tuuina atu i taimi o vasega ma nofoaga e faafaigofie atili ai mo tamaiti aoga ona auai.

Ua matou aumaia gaoioiga ma isi punaoa i fale o le inisitituti, lea ua aumaia ai le tele o le malosi ma le fiafia ma tagata talavou faaopoopo e auai i le inisitituti. O loo matou galulue faatasi foi ma iunite o le Ekalesia e tuuina atu le inisitituti i nofoaga fou ua faamaonia e faapotopoto ai.

Ina ia fautuaina le tele o nisi tamaiti aoaoga e auai ai, sa fatuina e Peresitene Nelson se valaaulia i se vitio. Sa o tatou maua mai ai foi faamatalaga mai tamaiti aoga e uiga i o latou aafiaga i le inisitituti. Ua matou faaigoaina lena vitio o le “Ou Te Fiafia i le Inisitituti.” O se vaega lenei o loo tuufaatasia uma ai.

[vitio]

Kofi: Ou te manatu ua fesoasoani moni le inisitituti ou te iloa ai lo’u Faaola, ma a’oa’o e uiga ia te Ia, ma itu o lo’u olaga e galue ai ia avea faapei o Ia.

Lily: Ou te fiafia i le inisitituti ona ou te alofa ia Iesu Keriso, ma ou te talanoa ai e uiga ia te Ia. E i ai le mana i le talanoa ia Iesu Keriso. Ua i ai lena mana i lo’u olaga.

Peresitene Russell M. Nelson: O’u uso e ma tuafafine pele, ou te alofa ia te outou. Te mafaufau ma tatalo soo mo outou. Ua ese vaitausaga ua tou ola ai. Ua e i ai i le taimi e faia ai faaiuga taua, faaiuga e aafia ai lou olaga nei ma le ola faavavau. O le faia o nei faaiuga e ono lofituina pe taufaafefe, ae manaia foi aua ua tatou ola i se vaitaimi taua.

E mafai ona ou valaaulia oe e faia se mea e fesoasoani ai ia te oe: auai i le inisitituti. Ua ou vaai nei i la’u fanau, a latou fanau, ma le toatele o fanau a latou fanau o o i le inisitituti. O le auai i le inisitituti ua suia ai le olaga mo i latou. Ua fesoasoani ia i latou, ma outou foi, e loloto ai lou liua ia Iesu Keriso. O le inisitituti e te lagona atili ai le alofa tele o le Tama Faalelagi mo oe.

O le inisitituti e te maua ai faiaoga musuia, uo faamaoni, ma se lagona o oe o se tasi o i latou. O le a e iloa ai o le ola i le talalelei e tau i le fiafia e le gata. E fesoasoani le inisitituti e te ola ai i le talalelei ma atili olioli ai nei.

A e fia iloa lou tagata moni, auai i le inisitituti. A e fia iloa le faamoemoega o le olaga, auai i le inisitituti. A e fia tumau i le ala o feagaiga, auai i le inisitituti. A e fia faamuamua le Atua i lou olaga, auai i le inisitituti. A e fia faatupu filemu, auai i le inisitituti.

Ou te folafola atu nei faamanuiaga ma lo’u alofa mo outou, i le suafa paia o Iesu Keriso, amene.

[End video]

O loo i ai nei vitio i luga o le uepisaite a le Ekalesia. Sa faaaogaina i luga o ala o faasalalauga, i potuaoga, ma taitai perisitua, ma e toatele outou ua faaaogaina i faigalotu a le YSA. Faafetai mo le faaaogaina o nei anomea e tuuina atu ai valaaulia ma folafolaga a le perofeta.

Ou te fiafia i vitio a tamaiti aoga. E le’i tusiaina, ma o le toatele o i latou na talanoa e uiga i le aafiaga o loo i ai i a latou vasega i le fesoasoani ia i latou ia iloa le Faaola ma mulimuli ia te Ia. Faafetai la mo le mea o loo e faia; Ou te fiafia e faalogo i a latou molimau. Ma e moni, matou te matua faafetai lava ia Peresitene Nelson mo lana savali, lea ua matuai ootia ai lava le toatele o talavou matutua.

A o ma i ai i San Diego ma Elder Stevenson, sa sau se tamaitai talavou ia te au ina ua mae’a le faigalotu ma fai mai sa ia manatu ua uma ia ma le inisitituti ina ua uma ona faauu. Ae ina ua uma ona faalogo atu i le perofeta o faasoa mai na folafolaga, na vave loa lava ona ia toe lesitala mo se vasega, ma na avea o se faamanuiaga tele mo ia.

O le taunuuga o nei taumafaiga uma ma isi, ua ola le inisitituti.

Ina ua mavae le lima tausaga o le fai ifo, ua matou faaopoopoina le 57,000 o tamaiti aoga faaopoopo i le lua tausaga ua mavae. O se faatelega i le 20 pasene—ma ua tatou iloa foi e tele se fuainumera o tamaiti aoga o loo auai, ae e le’i lesitalaina aloaia. O le fuainumera aupito tele lea i le valu tausaga, ma ua matou matua’i fiafia lava i le vaaia o tausaga sosoo e lua o le faatupula’ia.

O le faatupula’ia o le lesitala ua na o se vaega o le tala. Soo se mea lava ou te alu i ai, ou te faalogo ai lava i tala i olaga o tagata ua suia. A o amata e le autalavou se suesuega mamafa o tusitusiga paia, e faamanuiaina i latou ma maua musumusuga ma le faamoemoe. Ma o le mea lena o loo tupu i a tatou vasega i aso taitasi.

E faaopoopo atu i nei lesitala faaletausaga, ua tatou iloa ai pe tusa o le 95 pasene o talavou matutua nofofua toaaga e o i le inisitituti i nisi taimi o ni talavou matutua, ae o le toatele lava i le va o le 18 ma le 24 tausaga le matutua. Ae e le o faamalieina ai i tatou i lenei mea; o loo tatou taumafaia mea uma tatou te mafaia e aapa atu ai i talavou matutua uma e malolosi ma e ua faavaivai. O lea la o le faamoemoe ia maualuga atu le pasene nai lo le 100 pasene o e malolosi aua e mafai e le inisitituti ona aapa atu i YSA uma o loo auai i le Ekalesia, ma le toatele o i latou e le o auai mai e fesoasoani ai ia latou toe foi mai ia malolosi pe toaaga.

O le tausaga lenei, ua tatou i ai i le ala e faaopoopo le isi 20,000 tamaiti aoga o le inisitituti. O lona uiga o le a tatou faaopoopoina le silia ma le 77,000 tamaiti aoga inisitituti i le tolu tausaga ua mavae, ma le silia ma le 100,000 i le seminare ma le inisitituti tuufaatasi. E mafai ona ou toe fai atu lena mea? E silia ma le 100,000 tamaiti aoga faaopoopo i le tolu tausaga—ona o a outou taumafaiga!

O lona uiga e 100,000 isi tagata o e ua maua le avanoa e vaai ai i le taua o le talalelei i o latou olaga, lagonaina se lagona o le auai, ma faalolotoina lo latou liua ia Iesu Keriso ma Lana talalelei toefuataiina. Faafetai lava!

O le a la le isi mea e sosoo ai mo le inisitituti?

E tatau ona tatou taulai atu i taimi uma ma ogatasi ma o tatou faamoemoega o Seminare ma Inisitituti. O loo matou faama’ite mo le faamoemoega o le faama’itega. Ua matou faama’ite e faalautele lo matou aapa atu ma faateleina lo matou aafiaga.

Ina ia fesoasoani e faia lena mea, o loo matou tuuina atu se taitaiga faaopoopo ma se faagasologa mo faama’itega i le lumanai. E amata lenei faagasologa i le faalogologo e fesoasoani ai i talavou matutua ia lagona le alofagia ma le faalogoina. Saili ia malamalama i o latou manaoga. Valaaulia i latou ia avea o se vaega o le faagasologa.

O le isi, ia fefautuaai faatasi ma suesue i vaifofo talafeagai a o mafaufau i aiaiga ma punaoa o loo maua.

Ona saili lea o se faamaoniga e faatino ai na vaifofo ma fuaina taunuuga, iloilo taunuuga mo le mataalia, ma toe faalogo i le aofia.

I lenei faagasologa faifai pea ma le faifai pea, ia galulue vavalalata ma la outou faatonu o le itulagi po o le eria. O le a latou tuuina atu le taitaiga ma le faatonuga anoa.

E pei ona saunoa talu ai nei Elder Neil L. Andersen:

“O i tatou uma o tagata faama’ite. E na o le tausisia lava o lena agaga o le faama’ite i o tatou mafaufau ma le iloa o lenei Ekalesia o se Ekalesia faama’ite. O i tatou o Le Ekalesia a Iesu Keriso, o na la mataupu faavae e tutusa le matutua ma le faavavau. Ae o tatou ua faama’ite ona tatou te fetuutuunai lava i taimi uma, o loo tatou tuputupu a’e i taimi uma, o loo tatou faia pea lava pea sina mea i se ala e lelei teisi. Ae ou te faamoemoe o le taimi foi lea, o i tatou o ni soo lelei. … O tagata uma lava o ni tagata faama’ite.”

Ou te fiafia i le agaga o mea na aoao mai e Elder Andersen. O nisi mea o le a le suia lava, e pei o mataupu faavae e faavavau o le talalelei. E mafai ona tatou fetuunaia polokalama o le Ekalesia ia fetaui ma manaoga o lana au paia.

O le faavae o le mea o le a tatou faia pea o le aoao atu lea o le talalelei a Iesu Keriso e pei ona maua i le afioga a le Atua faatasi ai ma le agaga o le Agaga Paia.

I a matou taumafaiga e faia lenei mea i se auala e taulai atu ai tagata aoao, matou te uunaia outou e auai i lenei faagasologa o le faalogo ma tali atu i tamaiti aoga.

Ma faamolemole ia manatua: o mea uma tatou te faia i le faama’ite o le inisitituti e tatau ona ogatusa ma le faamoemoega ma fesoasoani ai i talavou matutua ia faaloloto lo latou liua ia Iesu Keriso.

Ia, e faapefea la le seminare? E pei ona ou ta’ua, ua i ai foi le aafiaga o le tuputupu ae o le seminare. E le tele sona aafiaga pei o le inisitituti, ae ua faatupula’ia i le 5 pasene i le lua tausaga ua tuanai atu le seminare. O se alualu i luma taua lenei aua e ui lava i le faaitiitia o le gafatia o le seminare i le 50,000 tamaiti aoga talu mai le 2018, ae o loo tatou tuputupu ae pea. O le tausaga ua tea, na tatou ausia ai le 54.4 pasene o le aofai o tagata e ono lesitala i le seminare. O le pasene aupito maualuga lea ua tatou lipotia mai, ma ua siitia mai le 49 pasene i le lima tausaga ua mavae. O le tausaga lenei, ua matou tuliloaina ai le toe faateleina o lena pasene i le 56 pasene ma faaopoopo i ai le isi 3,000 tamaiti aoga.

Ua matou fiafia lava i lenei mea. Sa masani ona i ai se faatonu o le vaega i le Maota o Ofisa o le Ekalesia, o lē, pe a faamanuiaina lana vaega i se mea, e na ona ia ee atu lava, “Aisa kulimi mo tagata uma! Ou te fia fai atu lena mea i le lalolagi atoa, a ea?” O nei galuega ofoofogia uma ua e faia e faateleina ai le lesitalaina ma le aafiaga o loo e maua, na o—tagata uma lava, o atu e aumai se aisa kulimi, faamolemole. Ma faamanatu! O se mea matagofie tele lenei o loo tupu. Faafetai, faafetai. Ae peitai, i le agaga, o le fiafia ae le faamalieina, tatou te faaauau ai pea ona fesili ifo ia i tatou lava, “O le a se isi mea e mafai ona tatou faia e faamanuia ai tagata talavou i le seminare?”

I ni nai tausaga ua mavae, sa ou faasoa atu ai o le mea sili tatou te mafaia e fatu ai ni mea fou i le seminare o le faaauau pea lea ona faatino o le atamai i aoaoga faavae. O le tele e mafai ai ona tatou faaaoga le atamai i aoaoga faavae i le ala na faamoemoeina ai, o le tele foi lea o le a faamanuiaina ai le autalavou a le Ekalesia. O le atamai i aoaoga faavae o le a valaaulia aafiaga loloto o le liuga, taua a’ia’i, ma lagona o le avea ma ni ō mo tatou tamaiti aoga seminare.

Talu mai lena taimi, ua matou faaaofia ai se isi taumafaiga taua. E amata atu i le 2025, o le a tatou faailoa atu ai lesona o sauniuniga o le olaga i le lalolagi atoa e tali atu ai i manaoga o i ai nei ua faailoa mai e o tatou talavou ma taitai.

O nei lesona musuia o loo talanoaina ai autu e pei o le tapenaga o faifeautalai ma le malumalu, a’oga, soifua maloloina faaletino ma faalelagona, aoaoga a perofeta o ona po nei, ma isi. O lesona o le a faaopoopo i lo tatou aoao atu faifai pea e vaavaalua ma le aoao atu o tusitusiga paia ma taumafaiga o le atamai i aoaoga faavae.

I le saunoa atu i le autalavou, na ta’ua ai e lo tatou komesina, o Elder Clark G. Gilbert, “O nei lesona sauniuni mo le olaga ua mamanuina e fesoasoani ia te oe e faamalosia ai lau sootaga ma le Atua ma maua ai Lana fesoasoani!”

Na faaauau pea ona ia saunoa mai, “Na folafola mai e Peresitene Nelson e faapea o le auai i le seminare, ‘o le a maua ai e le [autalavou] tali i nisi o a [latou] fesili e sili ona faigata. O le a [latou] maua ni uo e mafai ona [latou] faatuatuaina. O le a avea [i latou] ma soo moni o le Alii o Iesu Keriso.’”

Afai la o loo e mafaufau e uiga i le faama’iteina o mea fou o le seminare, mo le taimi nei, sei o tatou taulai atu i le aoaoina atu ma le mamana o tusitusiga paia i le faasologa, faaaogaina atoatoa o le Atamai i Aoaoga Faavae, ma faatinoina ma le mataalia o lesona o sauniuniga o le olaga. O le auala lena ou te talitonu o le a sili ona tatou faafetaiaia ai manaoga o le autalavou a le Ekalesia i le taimi nei.

Faafetai atu mo mea uma o loo outou faia e lagolago ai le autalavou ma talavou matutua i soo se mea. O a outou taumafaiga o le faalauteleina lea o le aapa atu ma le faalolotoina o le aafiaga o Seminare ma Inisitituti i ni auala taua.

Ua le sili atu lo’u fiafia i le mafaufau i le 100,000 o tamaiti aoga faaopoopo i a matou vasega i nai tausaga ua mavae—ma le faateleina o le taua, auai, ma le mauaina o le avanoa lea ua taitai atu ai i lo latou liua ia Iesu Keriso.

Ia tatou faaauau pea lenei uunaiga matagofie i tausaga a sau i le faamanuiaina o le toatele ma le toatele o fanau a lo tatou Tama Faalelagi.

Ou te molimau atu ua faatelea’i e le Alii Lana galuega. O se faamanuiaga lava le avea ai ma vaega o lena mea. Ma ou te molimau atu o Iesu o le Keriso, o le Faaola o le lalolagi; e i ai se fuafuaga atoatoa a le Tama Faalelagi mo Ana fanau; o Iesu Keriso o le tagata totonugalemu lea i lena fuafuaga atoatoa e laveai ma faaeaina fanau a le Tama Faalelagi. O Lona malo lenei i le lalolagi, ma o se avanoa le avea ai ma se vaega i soo se itu. O le faaaogaina o o tatou olaga e molimau atu ai ia Iesu Keriso o se avanoa. Ou te matua faafetai lava i le avea ai ma se vaega o lena mea ma molimau atu ia Iesu Keriso ma Lana Ekalesia moni i le lalolagi, e uiga i perofeta soifua, o le Tusi a Mamona, i faamanuiaga uma ua tuuina mai ia i tatou ona o le talalelei toefuataiina a Iesu Keriso i le lalolagi. I le suafa o Iesu Keriso, amene.