Veika Bibi Sara ena Kosipeli

Kemuni na taciqu kei na ganequ, au vakavinavinakataka vakalevu na madigi meu mai vosa vei ira na qasenivuli vulilotu ena kakaburaki ni vuravura raraba oqo. Vinaka vakalevu na nomuni solia mai na nomuni gauna, vinaka vakalevu na veika kece oni sa cakava tiko ena kena tosoi i liu na cakacaka ni Turaga. Yalovinaka mo ni kila na nomu rawa-ka “sa kena ivakaraitaki levu na nomu yalodina ni vukei ira na luve ni Kalou mera yaco me tisaipeli yalodina i Jisu Karisito.” Na nomu rawaka e sega ni kena ivakaraitaki na levu ni nomu gonevuli era yaco me tisaipeli yalodina ni iVakabula, e sega ni vakatau ena ivakarau era digitaka me ra rogoca kina na nomu ivakavuvuli, veisureti, se nomu ivalavala dina ni yalovinaka. Na nomu itavi me matata ka mana nomu veivakavulici me rawa kina ni ra digidigi ni ra sa kila, era na vakalougatataki kina. Na tamata yadua e galala me digidigi. O koya, au na kaya kina vei kemuni me vaka a kaya na Parofita o Josefa Simici vei ira na imatai ni daukaulotu ni Lotu ena itabagauna oqo, “Kevaka o ni cakava na nomuni itavi, ena vinaka vei kemuni, me vaka ga ni ra sa ciqoma na tamata taucoko na kosipeli.”

Ena 1916, tukuna o Elder David O. McKay, “E sega na itavi cecere cake e rawa ni vakataqari vua e dua na tagane [se yalewa] me vaka na qasenivuli vei ira na luve ni Kalou.” Sa vakakina nikua. E dua na qasenivuli e tu vua na vakabauta, ka vakavuvulitaka na vakabauta, sa ka bibi sara ena Lotu i Jisu Karisito ni Yalododonu Edaidai, vakabibi vei ira na tabatamata era tubu cake tiko mai oqo.

Ena dua ga na gauna lekaleka, au na wilika mada e dua na vosacavuti nei Peresitedi Jeffrey R. Holland, ona qai raica na isema. Ia au sureti ira e vica na cakacaka bole mera veivuke. Ena yaco mai na Reeses kei na Ashtons, era na rawata yadua e dua na Twinkie. Me vaka oni kila, e dua na Twinkie e dua na keke vanila ka vakasinaiti kina na kirimu. Au vinakata mera dolava na nodrau Twinkie ka tekivu kania. Era dau mokoti ira yadua. Au na tovolea meu cakava na isema oqo eke.

A vakabibitaka o Peresitedi Jeffrey R. Holland na bibi ni noda vakanamata ena vakatavulici ni veika bibi ni kosipeli ena 1998. Ena nona vosa a vakavulica kina: “Sa dodonu meda vakabibitaka tale ka vakacerecerea tale na veivakavulici ena Lotu—e vale, mai na itutunivunau, … vakakina mai valenivuli. …

“… “Ni yaco na dredre ki na noda bula… na vuku vakatamata ka veiwaki vata kei na vica na tiki ni ivolanikalou kei na serekali e sega ni rauta. Eda sa susugi ira dina tiko beka na noda [gonevuli] ena sala era na tokoni kina ni yaco mai na lomaocaoca ni bula oqo? Se da solia tiko vei ira e dua na mataqali kakana kamica vakalotu—ka lala tu ena veika bulabula vakayalo?”

Ia oqo nio sa kania oqori, vakatikina, Peresitedi Reese, e vica na karamu ni kakana o nanuma ni tiko ena nomu Twinkie? Io, e sega.

Sisita Reese, e vica na milikaramu ni calcium o nanuma ni tiko ena Twinkie oya? Io, e sega.

Kei Sisita Ashton, e vica na micrograms ni vitamin A o nanuma ni tiko e kea? Io, e sega.

Kei Baraca Ashton, e vica na milligrams ni vitamin C era tiko kina? Io, e tiko e dua na ivakarau. E sega ni dua na vitamin C e tiko kina.

Niu se gone, au dau taleitaka na keke. Kevaka erau a vakatara vei au na noqu itubutubu, keu a sega ni dau kania e dua tale na ka ia na keke ga ena katalau, vakasigalevu kei na vakayakavi. Ia, ke rau vakatara meu cakava oqori, o kila beka na ka ona raica tiko? Na dina, Au na mataboko ka sega ni namaki, ka mataboko. E sa sega ni dua na ka rairai vinaka.

Vinaka vakalevu kemudou na bole mai qo. Au sega ni lako mai ke meu mai tukuna na revurevu ni kana vakaca e yagoda. E kana vinaka beka na keke, ia e sega ni dua na ka bulabula e tu kina. Ia au lako mai meda mai veitalanoataka na kakana vakayalo ko ni solia tiko vei ira na nomuni gonevuli.

Ni ra dabe e matada na gonevuli nanamaki tu mai, e gadrevi meda vakani ira ena vosa vinaka ni Kalou, sega ni keke vakayalo ka sega kina na mamau vakayalo. O ira era vakani ena keke vakayalo era na sega ni rawa ni yaco me tisaipeli tiko i Jisu Karisito ena nodra bula taucoko—na tamata e tubu cake vua na Turaga ka sa ciqoma na “taucoko ni Yalo Tabu.” Ni ra a vakani ena keke vakayalo, ena rawa, ni ra yaco me ra tubucake ka dau vakadrecike vakayalo, tawavakabauta, ka veilecayaki.

Me levei na kana vakaca vakayalo, era gadreva na noda gonevuli, ke lailai e va mada ga na pini ivakabi bulabula vakayalo. Na imatai e dua na ivakadinadina kei Tamada Vakalomalagi kei na Nona ituvatuva, Jisu Karisito kei na Nona Veisorovaki, kei na Vakalesui mai ni taucoko ni kosipeli i Jisu Karisito ena gakataotioti ni gauna oqo. Me yaco oqo, meda vakavulica na dina vakalesui mai ka vakadinadinataka na dina oqo.

Meu tukuna mada e dua na kena ivakaraitaki. Ena vica na yabaki sa oti a veisiko voli kina ena 18 na vula e dua na vuniwai ni Jaina na yacana o Grace e Salt Lake City. A mai vulica kina na veiqaravi vakavuniwai ni veisautaki uto. Keitou a vakaitokanitaki koya vakamatavuvale, ka okati koya ena vuqa na itaviqaravi. Ena dua na Siganisucu e yaco ena Sigatabu, keitou sureti koya i Lotu ena soqoni ni sakaramede. Keitou nuitaka ni ivakavuvuli i Jisu Karisito ena itukutuku ka vakabibitaka na vu ni kena marautaki na Siganisucu. Au veiqaravi voli kina vakaperesitedi ni iteki ka dabe tiko mai cake ena soqoni. Erau dabe vata kei Grace ena ivavakoso na watiqu kei na luvei keirau yalewa.

Ni oti na sakaramede a talanoataka o koya na imatai ni vosa e dua na italanoa kilai levu ia e buli, me baleta na ikava ni tamata vuku. E totoka na kena tukuni ka vakaciriloloma. O koya e vosa tarava e yavutaka nona vosa ena dua na italanoa ni tolu na vunikau vakamareqeti. E dua e vinakata me dua na katokau totoka ia a qai yaco me kisi ni kedra kakana na manumanu, dua na valenimanumanu ka a davo kina e dua na gonelailai mai Peceliema. Na ikarua a vinakata me yaco me dua na waqa ni veisokoyaki qoroi. Ia, a mani yaco me dua na boto vinaka sara era dau vakayagataka na dau qoli ena matasawa o Kaleli. Dua na gauna ni donua e dua na cava ka kaukauwa, a kaya mai kina e dua na tamata era vakatoka na kena vo me “iVakavuvuli” “Malumu,” a malumu mai na cava. Na ikatolu ni vunikau a vinakata me buli me dua na ka e rawa ni qoroi ni laurai mai vakayawa. Ia, e qai kau mera vakoti koya kina ena delana vakatokai o Kalivari. E dua tale na italanoa buli vakaciriloloma ni Siganisucu.

Au sega soti ni marautaka na lewe ni soqoni oya au nanuma niu na sega ni rawa ni laiva me vaka tu oya ena vukui Grace. Dina ni lailai na gauna, au toro voleka yani vei bisopi, au taroga, “Ona cakava edua na ka me vinaka kina na soqoni qo, se o gadreva meu cakava?” A kaya o koya ni na cakava. A lako o koya kina itutunivunau ka taura e lima na miniti ka vakamacalataka se o cei na Gonelailai mai Peceliema kei na veika ena mai cakava. A wasea na bisopi e dua na ivakadinadina qaqa kei Jisu Karisito, na iVakabula ni tamata kecega. A kacivaka na sere isogo ni soqoni kei na masu ka dabe sobu.

Ni laga tiko na sere ni suka, a kala yani vei watiqu o Grace ka kaya, “Ruth, ni vosa na bisopi oya, e veisau e dua na ka ena soqoni qo!” E vaka dina kina. E vakaibalebale na nodra vosa ia ena nona vosa e solia na Keke vakaivolatabu, lala ena veika vakayalo, ivakaraitaki ni malumalumu ni dra ni vakabauta kei na ivakadinadina ka sega kina na mana ni vosa ni Kalou qai tarava yani na Yalo.

Na ivakadinadina mai vuniyalona na bisopi e yavutaki ena dina mai na ivolanikalou kei na nodra ivakavuvuli na parofita ni Turaga, oqori na ka e sureta na Yalo kina soqoni. Au tinia ni dredre vua na Yalo me vakadinadinataka na dina ni dua na italanoa buli. Se cava ga eda sa cakava ena noda veivakavulici, e dodonu meda dau kauta lesu na noda ivakavuvuli vei Jisu Karisito kei na Nona Veisorovaki, Na Tamada Vakalomalagi kei na Nona ituvatuva, kei na Vakalesui mai ni Nona kosipeli. E dina sara, e vinaka meda vakayagataka na italanoa, o ira sara mada ga na gonevuli era sega ni dau vakasamataka, mera kauwaitaka na gonevuli. Au kaya, au vakayagataka na Twinkies me rawa nio vakarorogo kina. Ia nida raica nira sa vakarorogo, sa dodonu meda solia na ivaqanibula e veisautaka na bula. Au vakabauta ni a dodonu meu a talemuria na Twinkies ka vakarautaka na kau kareti, broccoli, hummus—ia au a sega.

E kaya na iApositolo o Paula, “Ni na bula oira vakayadua ga era sa masuta na yaca i Jiova.” A qai taroga o Paula e vica na taro ka na vukea me da kila na bibi ni dua na qasenivuli vakadonui me vakavulica na pini yaga sara oqo. A taroga o koya, “Mera na kacivi koya rawa vakacava o koya era sega ni vakabauta? ka ra na vakabauta rawa vakacava o koya era se sega ni rogoca, ka ra na rogoca rawa vakacava ke sega me tukuna? “Ia era na tukuna vakacava kevaka era sa sega ni talai? … A qai tinia vaqo o Paula: “O koya sa rawa kina na vakabauta ena vakarorogo, ia na vakarorogo ki na vosa ni Kalou.” Me rawa nira taracake na nomu gonevuli na vakabauti Jisu Karisito kei na Nona itavi ka itakele ena ituvatuva nei Tamada, sa bibi sara kina mera vakavulici me baleti Tamada Vakalomalagi kei Jisu Karisito Sa tukuna vakamatata sara na ulutaga ni koniferedi oqo: “Vakasaqarai Jisu oqo o koya era sa volavola kina na parofita kei na iapositolo.”

A vola na dauvakayaco veisau ka dauvunau vakalotu ni Sikoteladi o Thomas Chalmers na veika a sotava ni vulica na ivakavuvuli oqo. A bula o Chalmers mai na 1780 ki na 1847. Ena mua ni nona bula, a qai kila o Chalmers ni sa vakayacora e dua na vakadidike sega ni nakiti ena gauna ni nona vunau. Ena loma ni veiyabaki, sa dau vunau saqata o koya na iwalewale kece ni bula tawasavasava kei na itovoca ni bula. A kauwaitaka vakalevu o koya na nodra itovo e taudaku na nona ivavakoso, ka dau vakavuvulitaka na iVunau e Tini. Sega soti ni marautaki na vuana. A kunea ni nona vosa e “vaka walega na bibi ni dua na vuti ni manumanu ena ivakarau ni nodra bula savasava na nona ivavakoso. A qai kila ni kevaka mada ga e vakauqeta e dua me kakua ni butako, e sega ni veisau kina na yalona na tamata oqori, e sega ni dua na duidui e yalona na tamata oqori, e dina ga ni sa biuta na tamata oqori na itovo ca oya. Dua tale na kena itukutukuni, e rawa ni o veisautaka na nona itovo ka sega ni vukica na yalona e dua na gonevuli.

Sa qai tekivu vunautaka o Chalmers na vakaduavatataki kei na Kalou kei na vosoti ni ivalavala ca ena vuku ni dra i Karisito Era sega vakadua ni veisautaka na nodra bula na lewe ni nona parisi me yacova ni sa qai vakavulici ira ena ivakarau oqo. Na lesoni levu a vulica sai koya “na sala mana duadua me vunautaki kina na bula savasava sai koya me vunautaki na Karisito.” Sa qai raica rawa na nona cala taumada—ni cakacaka me veisautaka na itovo, sega ni yalo. Ena gauna oqo e cakava me veisautaka na yalo, ka veisau na itovo ena kena ivakarau e veilecayaki.

Noqu kila nio Jisu na Karisito, nio Koya na noqu iVakabula ka Dauveivueti, sa veisautaka na noqu bula kei na yaloqu. Na kila oqo sa veisautaka na noqu itovonibula me vaka e se bera ni bau vakayacora e dua tale na ka. Au kila niu sa vakaivotavota ena Nonna isoro ni veivakaduavatataki tawayalani. Na kila oqori sai koya dina e vakayaco veisau kina bula.

Na ikarua ni veika bulabula vakayalo baleti ira na gonevuli sai koya na isema ni veiwekani vata kei iko. Oqo e baleta ni isema ni veiwekani vata kei iko e rawa ni vakavuna nodra gole vua na iVakabula na gonevuli. O Koya na ivurevure dina ni kakana bulabula vakayalo. Na isema ni veiwekani vinaka vei qasenivuli kei gonevuli ena vukea na nodra dolavi ini Nona vosa. Ni oti mada ga e vuqa na yabaki ni nomu ilesilesi vakaqasenivuli vei ira na gonevuli, ena rawa ni tomani tiko na kena revurevu vinaka ena nodra bula. Na revurevu ni nomu veivakayarayarataki e baleta, ena nomu loloma titobu kei na nomu kauwaitaka na nodra tiko vinaka, o dusimaki ira kina vua na Turaga kei na Nona ivunau, ka sega vei iko.

Au sa sotava oti qori. E dua na noqu qasenivuli ena Lalai o Becky, e vaqori na imawe ni nona veivakayarayarataki vei au. Niu se gone, mai na nona dau raica na noqu cala, e dau tovolea o Becky me raica niu cakava e dua na ka vinaka, ena kinita na baluqu, masia na uluqu ka kaya, “Sa dua na gonetagane vinaka dina o iko Dale.” Au sega ni raica ni veivakalailaitaki, ia au namaka ena veigauna e dau yaco kina. E muri niu sa itabagone, sa sega tale niu Lalai, a lesu tale mai kina tabanalevu oya na noqu matavuvale, ni oti e vica na yabaki neitou vakaitikotiko voli mai Finiladi e Sweden. A lako mai vei au o Becky ni oti noqu solia wavoki na sakaramede, kinita na baluqu, masia na uluqu, ka kaya, “Sa dua na gonetagane vinaka dina o iko Dale.” Niu lesu mai ena noqu kaulotu, ni oti noqu soli itukutuku baleta noqu kaulotu ena soqoni ni sakaramede, a lako mai vei au o Becky, kinita na baluqu, masia na uluqu, ka kaya, “Sa dua na gonetagane vinaka dina o iko Dale.” Ena veiyabaki sa sivi, au digia vinaka cake mai na kena au rawa ni cakava—e dua na vuna baleta ni dau dusi au vua na iVakabula o Becky, au sega ni vinakata meu vakararawataki koya.

Ni oti noqu kacivi kina Le Tinikarua, au lesu kina tabanalevu au a tubu cake kina ena dua na Sigatabu. Se tiko ga ena tabanalevu oya o Becky. Au dabe ena mua ni tavata e cake, vosa vakalekaleka ena soqoni ni sakaramede, ka dabe sobu. Ni oti na masu ni suka, a lako vuni mai o Becky, sa yabaki 80 vakacaca tiko kina. A lako wavoki mai ena idabedabe ni matasere e dakuqu, kinita na baluqu, masia na uluqu, ka kaya, “Sa dua na gonetagane vinaka o iko Dale.”

Na gonevuli yadua e gadreva e dua se sivia na Becky ena nona bula—na qasenivuli ka sema tu kina nodra veiwekani ena bula taucoko, e dua ka a dusimaki ira vua na iVakabula, e dua era na sega ni vinakata me ra vakararawataka. Nira vakamavoataki na gonevuli ena veika dredre ka sega ni vakabekataki ni na yaco mai, e rawa nio vakarautaka e dua na ivakaruru taqomaki vinaka me ra lomani ka vakadeitaki kina. E kadina, so beka era na vorata na nomu sasaga mo kilai ira vinaka, ena sega ni tarova nomu lomani ira oqori. E rawa ni cecere cake nomu veivakayarayarataki vei ira na gonevuli dau veivorati mai na ka o nanuma.

E dua na ikatolu ni pini ni kakana bulabula e gadreva na gonevuli yadua na nona rawa ni sauma na taro kei na kauwai e tu vua me baleta na Lotu. Ena walu na yabaki sa oti, a vakasalataki ira na qasenivuli ni vulilotu o Elder M. Russell Ballard:

“Sa oti na gauna ni taroga e dua na gonevuli e dua na taro dina ka sauma na qasenivuli ena, ‘Kua ni leqataka!’ Sa oti na gauna ni laveta cake mai e dua na gonevuli e dua na kauwai dina ka wasea o qasenivuli na nona ivakadinadina me sauma kina ka kena inaki me ubia na leqa oya. Sa oti na gauna era a taqomaki kina na gonevuli mai vei ira era dau vakadiloya na Lotu. …

“Ni bera nio talai ira yani na [nomu gonevuli] i vuravura, culai ira ena itatarovi ena nomu solia vei ira na ivakadewa yalodina, vakasamataki vinaka, ka dodonu vinaka ni ivunau ni kosipeli, ivolanikalou, kei na keda itukutuku makawa, ka ni so na gauna e sega ni dau tauri vinaka na ulutaga eso oqori.”

Kemuni na qasenivuli, e rawa nio vukei ira na gonevuli ena nomu vakavulici ira ena kena ibalebale me cokoti vata na vuli kei na vakabauta nira vuli tiko. E rawa nio vakavulici ira ena nomu matanataka na maqosa kei na iwalewale oqo ena kalasi.

Sa vakalesui mai ena noda gauna oqo ena ivakatakila na kosipeli i Jisu Karisito. Eda sa kila na sala me da lesu tale kina ki na noda itikotiko vakalomalagi, ia e rawa ni se tu ga na taro kei na kauwai eda gadreva dina sara meda kila na kena isau. Era na sarava toka na nomu gonevuli na nomu sauma na taro dredre, ni levei se vagalui na taro dina ena vakavuna e levu tale na taro. Ena gadrevi mo vakarau tu mo tuberi ira na tani ena nodra vaqara isaunitaro ka vukei ira mera tara na vakabauta na Turaga kei na nona ivurevure vakalou ni dina. E vakavulica o Elder Dieter F. Uchtdorf, “Na taro e sega ni ivakatakilakila ni malumalumu, sa itekitekivu ni tubu.” Ena ka oqori sa biuta vata kina na Lotu e dua na ivurevure vakasakiti, nuitaki ena vukudra era vakasaqara tu na isau ni nodra taro kei ira era segata me ra vukei ira kina. Na noda sasaga sai koya meda veivuke ena vaqaqacotaki ni vakabauti Jisu Karisito, ena gauna sara mada ga eda vakarautaka kina eso na vakatutu ni ivakarau meda goleva kina eso na ulutaga rabailevu ka dredre ena so na gauna.

Na ivurevure oqo e rawa ni kunei ruarua ena mataveilawa ni ChurchofJesusChrist.org kei na app ni Gospel Library. Kevaka se bera ni matata vei kemuni na ivurevure oqo, meu vakaraitaka mada na vanua e tiko kina ena app ni Gospel Library. Dolava nomu app ni Gospel Library. Mai na imatai ni tabana gole kina library. Tabaka na ulutaga “Topics and Questions.” E keri ona raica e dua na iwasewase ka vakatokai na “Seeking Answers to Questions,” e dua tale na iwasewase ka vakatokai na “Helping Others with Questions,” kei na dua na ituvatuva vakamatanivola ni veiulutaga taleitaki.

Na iwase ni “Seeking Answers to Questions” e vakavulica na veivakavuvuli e rawa ni tubera na noda vuli nida vaqara vagumatua na isau ni noda taro—se baleta na noda vakabauta, ivunau, se itukutuku makawa ni Lotu. Na ivakamacala taumada ni iwase oqo e vakamacalataka ni taro e tiki bibi sara ni tubu vakayalo ka rawa ni yaco me sasaga ni bula taucoko na vaqara isaunitaro. Na ivakavuvuli e kune ena iwase oqo e vakayaloqaqataki keda me yavutaki noda bula vei Jisu Karisito baleta ni sai Koya ga e dodonu me tara cake kina na noda yavu ni vakabauta. Sa vakananumi vei keda ni yavu ni veivakabulai ni Kalou me vakanamata kina na noda taro. Na ivakarau ni rai oqori ena vukei keda meda kila na dina vakosipeli mai na veika e sega soti na betena. Me tubu na vakabauta, ena gadrevi me da digitaka meda vakabauta. Sa dodonu kina me da cakacaka ena vakabauta ka taura matua na veika eda kila. Nida kitaka vakakina, eda sa vakatitobutaka na noda kila ka kei na noda vakabauti Jisu Karisito.

Na ikuri ni ivakavuvuli e veivosakitaki ena iwase oqo e vakauqeti keda meda dau wawa o keda vakataki keda, ira na tani, kei na Nona gauna na Turaga. E dodonu meda nanuma ni ivakatakila e dua na iwalewale e vakavuqa ni dau tekivu ena vakatataro, so na gauna dau lako mai vakalalai, ka so tale na gauna e rawa ni dredre na kena sasagataki. Ni da vaqara na isaunitaro, sa dodonu me da segata na veituberi ni Yalo Tabu ka cakacaka meda kila na veika sa oti ena noda biuta ena kena itutu dina na veika eso.

Na iwase ni “Helping Others with Questions” e vakatura na ivakavuvuli e rawa ni tuberi keda ena noda veimaliwai kei ira na tani e tu nodra vakatataro. Se cava ga, sa dodonu meda vosa ena vakarokoroko, vakarorogo ena duavata, ka vakaraitaka na loloma Vakarisito. Vakarorogo ka saumitaro ena loloma. Segata mo kila, rokova na veika era kila na tani, ka levea na veivakuwai se na lelewa. Ni vakakina, sa rawa nida vakadiandinataka na noda iyalayala. Yalovinaka nanuma tiko ni dina ga ni sa tu vei keda na taucoko ni kosipeli, e sega ni tu vei keda na isau ni taro kece sara. Eso na isaunitaro me na waraka na ikuri ni ivakatakila ena qai muri mai. Ena so na taro kei na so na dauvakatataro, e sega ni taucoko na ka eda kila me baleta na loma ni Turaga kei na taucoko ni ivunau ni Lotu me ra vakacegui kina vakavinaka na gonevuli. Ena veigauna vaqo, ena sega beka ni veivuke me da vakacegui ira na dautaro ena ikuri ni vakasama se ivakamacala.

E dua na dai e rawa ni dau tacori kina e vuqa na qasenivuli me ra solia na ivakamacala se iulubale a sega ni solia na Turaga. Ni yaco oqori, e rawa ni yaco me dui tautau na iulubale se isaunitaro ka vakalailaitaka na nona vakabauta na gonevuli. E vinaka cake meda kaya nida sega ni kila mai na noda bulia e dua na isaunitaro se ivakamacala. Na vakabauta, e dua na digidigi, ka so na gauna na isaunitaro duadua ga sai koya me da vakararavi kina vakabauta na Turaga ko Jisu Karisito kei na vakabauta na Vakalesui mai ni kosipeli ka waraka na isaunitaro mai vua na Turaga ena gauna e digitaka o Koya me vakatakila mai kina. Eda vakanuinui vua na Turaga keda tovolea meda ivurevure vinaka ka nuitaki mera goleva mai na tamata mera vukei.

E rawa nida vakayaloqaqataki ira na gonevuli me ra tara cake na nodra dui ivakadinadina vakayalo baleta na nona loloma na Tamada Vakalomalagi ka ni a cabora na isoro ena vukudra ko Jisu Karisito. Nanuma ni kevaka mada ga era sega ni se ciqoma na taucoko ni kosipeli na gonevuli, e rawa nira vakabauta ka yalodina tikoga kina vosa i Jisu Karisito. Nira sotava na dredre ena so na ivakavuvuli ni Lotu, se rawa nira taukena tikoga e dua na ivakadinadina tudei ni lomani ira na Tamada Vakalomalagi ka vinakata na ka vinaka duadua ena vukudra, ni nodra iVakabula o Jisu Karisito.

Oni na kila ni vuqa na vakatutu ni nodra vukei na tani ena nodra vakatataro ena vakayacori vakavinaka duadua nida dabe yadudua. Au vakabauta ni kena sala vinaka duadua oqo. Ena sega beka ni vinaka me vakatara e dua na qasenivuli mera solia na nodra gauna na lewe ni kalasi taucoko mera sauma na nona taro bibi e dua na tamata. E sega ni dodonu me vagolea na ituvatuva ni lesoni sa caka tu me tara cake na vakabauta na nodra taro na gonevuli. Dau nanuma tiko na nomu inaki mo tara cake na vakabauta ena kalasi raraba, ka sega ni vagolei tani mai vei ira na vica era dau tukuna na lomadra. Me vaka na veivakavulici kece sara, na saumi taro e gadrevi kina na veidusimaki ni Yalo.

Na lesoni ena iwase oqo e vakananuma talega vei keda me da vakabulabulataka na noda dui vakabauta ni da veivuke sara tiko mada ga vei ira na tani. E vakasalataki keda o Sister Tamara W. Runia me da kakua ni “cemuri ira na noda daulomani era nanuma ni ra sa lakosese voli.” Ia, me vakataki Liai ena raivotu ni Vunikau ni Bula, “tu ga ena vanua o tu kina ka kacivi ira. Mo lako ki na vunikau [ni bula], tiko ga ena vunikau, kania tikoga na vuanikau ka, ena matadredredre, yalovi ira tikoga o ira o lomana ka mo vakaraitaka ni sa ka marautaki na kania na vuanikau!”

Na ivakavuvuli era tu ena iwase ni “Topics and Questions,” vakauasivi na kena era vakavuvulitaki ena “Seeking Answers to Questions” kei na “Helping Others with Questions”, sa vukei au ena noqu vaqara na isau ni noqu taro ena dua na ivakarau sa vaqaqacotaka na noqu vakabauta na Turaga ka vakatitobutaka na noqu kilai Koya kei na Nona cakacaka. Na ivakavuvuli talega sa vukei au meu vukei ira tale eso ena kena cakulei na nodra kauwai kei na vakatataro. Na ikuri ni lewe ni veiulutaga oqori ena qai biu ena dua na gauna e muri me veivuke ena taro eso kei na ulutaga, yalovinaka mo ni dau lesuva wasoma na ivurevure oqo ka kakua sara ni nanuma, “au sa wilika oti qori.” Au nuidei nio na raica ni veivuke vakakina na iwasewase oqo kei na veiulutaga oqo. Au masuta ena nomuni vakayagataka na iyaragi eso oqo ena vukei kemuni kei ira tale eso me titobu cake na nomuni vakabauta na iVakabula.

Na ikava ka iotioti ni pini ni tiki bulabula ni kakana vakayalo au gadreva me tu vei ira kece na gonevuli sai koya se cava ga na tiki bibi bulabula ni kakana vakayalo oqori me bulia ka maroroya dei toka na yalo malumalumu. Na yalo malumalumu au vakaibalebaletak kina e dua ka dau kidava na Yalotabu. Na yalo kaukauwa, ka veibasai kei na yalo malumalumu, e rerevaki vakayalo. Sa dau vakamacalataki vakavuqa ena ivolanikalou na ca e waraki ira tu e kaukauwa na yalodra. E vulica o Nifai “na kabu ni butobuto sai koya na veitemaki ni tevoro, ka sa vakamatabokotaka na matadra ka vakaukauwataka na lomadra na luve ni tamata, ka sa tuberi ira tani kina veisala rabailevu, mera rusa ka yali yani.”

E dua na uto qaqa se kaukauwa e dau dredre ni sinai ena dra. Ni sa vakasinaiti na yalo, me vaka ni sa vakarau tu me konitaraki, sa dredre kina vua e dua na yalo kaukauwa me vakalevutaki na gauna me vakacurumi kina na dra. Oqo e rawa ni vuna na mataqali mate ni uto ka dau bibi sara me vaka na mate ni uto ka vu mai na leqa ni kena pamu na uto. Ena sala vata ga e dredre kina me vakasinaiti ena dra e dua na uto qaqa se kaukauwa, na yalo kaukauwa ena dredre me vakasinaiti ena Yalo.

Ena 2 Nifai 33, e vakamatatataka kina o Nifai ni o ira na tamata era dau vakaukauwataka na yalodra era na sega ni vakatara vua na Yalo Tabu me vakauta na vosa ni Kalou ki yalodra. E kaya o koya, “Ni sa vosa e dua na tamata ena kaukauwa ni Yalo Tabu, na kaukauwa ni Yalo Tabu ena qai vakadewataka ki na lomadra na luve ni tamata.” E tomana o Nifai, “Ia raica, e lewe vuqa era sa vakaukauwataka na lomadra vua na Yalo Tabu, ka sa sega kina na nona tikina e yalodra; o koya, era sa biuta tani kina e vuqa na ka sa volai ka ra okata me ka wale.”

A tukuna o Elder David A. Bednar, “Yalovinaka raica na sala e kauta kina na mana ni Yalo na itukutuku kina e sega ni loma ni yalo. Kena isoqoni, … na lewe ni dua na itukutuku kei na ivakadinadina ni Yalo Tabu ena qai curuma walega na yalo kevaka e vakatara o koya e ciqoma me rau curu yani.”

Kevaka e sega vei ira na gonevuli e dua na yalo malumalumu, e rawa ni rau yaco me vakataki ira era na kaya: “Keimami sa ciqoma, ka sega ni dua tale na ka keimami na gadreva! … ni sa rauti keimami qo! Ia raica, sa kaya vakaoqo na Turaga na Kalou: Au na solia vei ira na luve ni tamata na vosa ena vosa, na ivunau ena ivunau, vakalailai eke ka vakalailai e kea; ia sa kalougata ko ira era sa vakarorogo ki na noqu ivunau, ka vakatudaliga ki na noqu ivakasala, ni ra na vulica na yalomatua; ia kivei koya sa ciqoma au na solia vakalevu cake vua; ia kivei ira sa kaya, Sa rauti keimami ga, ena kau tani mai vei ira na ka sa tu vei ira.

Ena yalo kaukauwa, sa rawa nira sogota na gonevuli na sala e rawa nira ciqoma kina eso tale na vosa ni Kalou se na isau ni nodra masu. O ira, me vakataki keda, era gadreva mera dolavi ira vua na Yalo me rawa nira vakavulici kina ena ka kecega mera kitaka. Me vaka e vakavuvulitaka o Alama, “Ia ko ira sa vakaukauwataka na lomadra, sa soli vei ira e dua na iwase lailai ga ni vosa; me yacova nira sa sega ni kila e dua na ka me baleta na nona veika vuni; ia sa yaco mera tauri vakavesu mai vua na tevoro, ka sa kauti ira sobu ena nona lewa kina rusa.” Na yalo malumalumu e tokona na ka e yalataka na iVakabula. “Ko koya sa muria na vunau [ni Kalou] sa rarama kina ka vakavukui sara ka kila na ka kecega.” Na yalo kaukauwa, ia, e vakatara na “vunica [me lako mai] ka [kauta] tani na rarama kei na dina.”

A vakalekalekataka na Tui Penijamini na tiki ni veika bulabula oqo, ka vakatautauvatataki kina na ivakatakilakila vakayalo ka vakavuna na yalo malumu. A kaya o koya, “Au gadreva moni nanuma, ka maroroya tu ena nomuni vakanananu, na cecere ni Kalou, kei na nomuni sega ni yaga, kei na nona vinaka ka dau vosoti kemuni vakadede … ka vakayalomalumalumutaki kemuni ena kena titobu, ka masuta na yaca ni Turaga e veisiga, ka tudei tu ena vakabauta na veika ena qai yaco mai.” Oqo na kena ivakarau: nida dau nanuma tikoga ni veisereki e yaco ga mai ena vuku i Jisu Karisito, ni kevaka e sega o Koya sa sega na noda ituvaki e sega ni nuitaki. Oqori e vakauqeti keda meda vakayalomalumalumutaki keda ena yalomalumalumu titobu ka vakauqeti keda meda masu ena veisiga, ka da qai tudei ena noda vakabauti Jisu Karisito kei na Nona Veisorovaki. Na kena isau tudei sai koya ni da na “reki tikoga, ka vakasinaiti ena loloma ni Kalou, ka da na rawata tikoga na vakabokoci ni noda ivalavala ca, ka … tubu ena noda kila na lagilagi i koya ka a buli keda.”

O na vukei ira na gonevuli me ra nanuma ka maroroya tu ena nodra vakanananu na cecere ni Kalou nio cakacaka vagumatua mo vakauqeti ira me ra vakabauti Karisito “ka vakaduavatataki kei na Kalou mera kila ni ena loloma soliwale ga [era] sa vakabulai kina, ni sa oti na veika kece [era] rawa ni cakava. Oqo na vuna “eda sa veivosakitaki Karisito, eda reki ena vukui Karisito, eda vunautaki Karisito, … me rawa nira kila kina na noda [gonevuli] na ivurevure mera rai kina me bokoci kina na nodra ivalavala ca.” Na kila oqori e vukei ira me ra yalomalumalumu tikoga, ka uqeti ira me ra masuta na yaca ni Kalou ka tudei tu ena vakabauta. Ena vukei ira mera yalo malumu tikoga ka rawa nira vakasinaiti mai vua na Yalo Tabu.

Na pini e va ni veika bulabula vakayalo au sa tukuna era veitokoni era veivaqaqacotaki. Nikua e dua na siga vinaka me da dikeva lesu kina na noda veivakavulici. Yalovinaka tarogi iko:

• Sa yavutaki tiko beka vei Jisu Karisito na noqu veivakavulici.

• Au sa veivakavulici tiko beka ena ivakadinadina kei na loloma?

• Au sa segata tiko beka meu tara cake na isema ni veiwekani ena bula taucoko kei ira na noqu gonevuli?

• Au sa vukei ira tiko beka na gonevuli me ra sauma ga na nodra taro ka sega ni laiva tu vei ira e levu tale na taro?

• Au vakaraitaka tiko beka e dua na ivakaraitaki ni yalomalumalumu, ka vakavinavinaka tiko vua na Kalou ka tudei tu ena vakabauta?

• Na cava beka era sa vulica tiko na noqu gonevuli mai na noqu ivakaraitaki vakakina na noqu ivakavuvuli?

Kemuni na taciqu kei na ganequ, vinaka vakalevu na veika oni cakava moni vukei ira kina na luvena na Tamada Vakalomalagi mera tisaipeli yalodina i Jisu Karisito, me vukei ira mera dau na yalomalumalumu, me vukei ira mera vakatara na Yalotabu ki yalodra, ka dusimaki ira vakamatata vei Jisu Karisito, na Dauveivueti kei vuravura. Me vaka eda rogoca ena sere, eda dau lako sese kece, eda na rawa ni biuta na Kalou eda lomana. E dodonu meda vakananumi ena Nona vinaka me rawa kina vei keda na vinaka, me vaka e dua na ivakatakilakila, me vauca na yaloda sa lako voli vua na Kalou. Oqori na vuna a vola kina o Robert Robinson, ena nona vola o ya, “Oqo na yaloqu. Taura ka dregata. Ni dregata meu curu kina nomuni itikotiko mai lomalagi.” E vinakata me vakananumi ena vuna e vakila kina me lagata na sere ni loloma veivueti oya ni sega ni dau vakila ena so na gauna me lagata. Sa vakakina na noda itavi, me da vukei ira na noda gonevuli ena sala o ya.

Me vakalougatataki iko na Kalou ena veika o cakava. Me vakalougatataki iko na Kalou ena nomu vinaka, me vakalougatataki iko na Kalou ena nomu vakabauta, nomu yalodina, nomu ivakadinadina. Vinaka na nomu veiqaravi vua na Qasenivuli Levu. Vinaka vakalevu na nomu itokani, baleta nio Koya na noda itokani yalovinaka, vuku, ka vakalomalagi. Au kila vakaidina ni dina oqori. Ena yacai Jisu Karisito, emeni.